أَذْلِيسْ إِقدّْسنْ أَوَاڒنْ إِوزْننْ ١٣

١٣

أَوَاڒنْ إِوزّْننْ ن سُولِيمَانْ - ثَاسْغَارْثْ 1ب

١ إِجّْ ن مِّيسْ ذ أَمِيغِيسْ

ذ صِّيفثْ ن ؤُوبّخْ ن بَابَاسْ،

مَاشَا أَمسْثهْزِييْ

وَارْ إِتّسْڒِي غَارْ ؤُثخْثِيخْ.

٢ زِي ڒْْغِيدْجثْ ن وَاوَاڒنْ نّسْ

أَذْ يشّْ بْنَاذمْ ڒْْخَارْ،

مَاشَا ڒعْمَارْ ن إِغدَّارنْ

أَذْ يشّْ لْعُونْفْ. ◘

٣ ونِّي يسَّارنْ أَقمُّومْ نّسْ،

إِحطَّا ڒعْمَارْ نّسْ،

مَاشَا ونِّي يَارزّْمنْ

إِينْشِيشنْ نّسْ أَطَّاسْ،

إِتّْرَاجَا ث ؤُهلّكْ.

٤ ڒعْمَارْ ن ؤُمعْڭُوزْ يَارْجفْ،

وَاخَّا أَيَا وَارْ إِنفّعْ ذِي وَالُو،

مَاشَا ڒعْمَارْ ن يِينِّي إِتّْشطَّارنْ

أَذْ إِتّْوَاسّْجِيوْننْ.

٥ أَوَاڒنْ ن إِخَارِّيقنْ

إِشَارّهْ إِ-ثنْ ؤُمْسڭّذْ،

مَاشَا أَعفَّانْ إِسَّارْزَاڭْ إِخفْ نّسْ

ؤُ إِسّْفطَّاحْ إِنّغْنِي.

٦ ثَاسڭْذَا ثْحطَّا

ونِّي إِڭُّورنْ أَبْرِيذْ نّسْ نِيشَانْ،

مَاشَا ثُوعفّْنَا أَذْ ث إِسّْهلّكْ أَمذْنُوبْ. ◘

٧ أَقَا ذِينْ إِنِّي إِتَّارَّانْ إِخفْ نْسنْ

ذ بُو-وَاڭْڒَا، وَاخَّا وَارْ غَارْسنْ وَالُو،

ؤُ أَقَا ذِينْ إِنِّي إِتَّارَّانْ إِخفْ نْسنْ

ذ إِمزْڒَاضْ، وَاخَّا غَارْسنْ أَطَّاسْ. ◘

٨ دّيّثْ إِ ڒعْمَارْ ن شَا ن يِيجّنْ

ذ أَڭْڒَا نّسْ،

مَاشَا أَمزْڒُوضْ وَارْ إِتّسْڒِي شَا

ؤُڒَا ذ إِجّْ ن ؤُهُوذِّي.

٩ ثَافَاوْثْ ن إِمْسڭَّاذنْ أَذْ ثَارْغْ س ڒفْرَاحثْ،

مَاشَا ڒفْنَارْ ن إِعفَّاننْ أَذْ إِخْسِي. ◘

١٠ زِي ثْنفْسشْثْ إِتَّاسْ-د مْغِيرْ ؤُمنْغِي،

مَاشَا إِنِّي إِكسِّينْ أَشَاوَارْ، غَارْسنْ ثِيغِيثْ.

١١ أَڭْڒَا ن ذغْيَا، أَذْ يِيڒِي ذْرُوسْ،

مَاشَا ونِّي إِيَارّْونْ س ؤُفُوسْ،

أَذْ يَارْبحْ. ◘

١٢ ڒَْايَاسْ يُويْڒنْ إِسّْعِيدْجْ ؤُڒْ،

مَاشَا ثْوَارِّيثْ ن مژْرِي إِشُّورنْ،

أَقَا ت ذ ثَاشجَّارْثْ ن ثُوذَارْثْ. ◼

١٣ ونِّي إِسّحْقَارَانْ أَوَاڒْ،

أَذْ زَّايسْ إِتّْوَاقّنْ،

مَاشَا ونِّي إِتّڭّْوذنْ ثَاوْصيّثْ،

أَذْ إِتّْوَاخدْجصْ.

١٤ ثَاغُورِي ن ؤُمِيغِيسْ ذ ڒْْعُونْصَارْ ن ثُوذَارْثْ،

مَاحنْذْ أَذْ يَاڒْوڒْ بْنَاذمْ

إِ ثخْشِيفِينْ ن ڒْْموْثْ. ◘

١٥ ڒعْقڒْ إِصبْحنْ إِتَّاوِي-د أَرْضَا،

مَاشَا أَبْرِيذْ ن إِغدَّارنْ

أَقَا إِقْسحْ أَطَّاسْ.

١٦ كُوڒْ إِجّنْ ونِّي إِفتّْننْ،

إِخدّمْ س ثُوسّْنَا،

مَاشَا أَبُوهَاڒِي إِتّْبزَّاعْ ثَاغْيُوڒِي نّسْ.◘

١٧ أَمْسخَّارْ أَعفَّانْ إِوطَّا ذِي ڒْْغَارْ،

مَاشَا أَمْسخَّارْ ذ أَمْثِيقِّي

إِتَّاوِي-د أَڭنْفُو.

١٨ زّْڒضْ ذ ڒفْضِيحثْ أَقَا أَثنْ

إِ ونِّي يُوڭِينْ تَّارْبِييّثْ،

مَاشَا ونِّي إِكْسِينْ أَوبّخْ

غَارْ وُوڒْ نّسْ، أَذْ إِتّْوَاوقَّارْ. ◘

١٩ إِجّْ ن ؤُسِيثمْ إِشُّورنْ ذ أَمِيژِيذْ إِ ڒعْمَارْ،

مَاشَا إِ إِبُوهَاڒِييّنْ ذ نّْعِي

مَاحنْذْ أَذْ حيّْذنْ خْ ڒْْغَارْ.

٢٠ ونِّي إِڭُّورنْ أَكْ-ذ إِمِيغِيسنْ،

أَذْ إِذْوڒْ ذ أَمِيغِيسْ،

مَاشَا ونِّي إِتّمْصُورُّوفنْ

أَكْ-ذ إِبُوهَاڒِييّنْ، أَذْ ث إِڒْقفْ دّدْجْ.

٢١ ڒْْغَارْ أَذْ إِضْفَارْ إِمذْنَابْ،

مَاشَا أَمْسڭّذْ أَذْ ث خدْجْضنْ س ڒْْخَارْ.

٢٢ ونِّي إِصبْحنْ إِتّجَّا ثَاسْغَارْثْ إِ وَايَّاونْ نّسْ،

مَاشَا أَڭْڒَا ن أَيْثْ-بُو-دّْنُوبْ

إِتّْوَاخمّڒْ إِ ؤُمْسڭّذْ. ◘

٢٣ أَرْبرْ ن إِمزْڒَاضْ

إِتَّاوِي-د مَاشَّا س وَاطَّاسْ،

مَاشَا أَقَا ذِينْ إِنِّي إِتّْوَاهلّْكنْ

ڒَْامِي ذِينْ أَنْقَاسْ ن ڒْْحقّْ. ◘

٢٤ ونِّي إِمنّْعنْ أَعْمُوذْ نّسْ،

إِشَارْهْ مِّيسْ،

مَاشَا ونِّي ث إِتّخْسنْ،

إِتّكَّارْ أَكِيذسْ إِتّْوبّخْ إِ-ث ذِي ڒْْوقْثْ. ◘

٢٥ أَمْسڭّذْ أَذْ إِشّْ

أَڒْ غَا إِجَّاونْ ڒعْمَارْ نّسْ،

مَاشَا أَعذِّيسْ ن إِعفَّاننْ

أَذْ إِقِّيمْ إِتّحْوَاجَا ڒبْذَا.

◘١٣:٢ 13:‏2 أَوڒن. 12‏:‏14

◘١٣:٦ 13:‏6 أَوڒن. 10‏:‏29؛ 11‏:‏3، 5، 6

◘١٣:٧ 13:‏7 أَوڒن. 12‏:‏9

◘١٣:٩ 13:‏9 أَيُوبْ 18‏:‏5، 6؛ 21‏:‏17؛ أَوڒن. 4‏:‏18

◘١٣:١١ 13:‏11 أَوڒن. 10‏:‏2؛ 20‏:‏21

◼١٣:١٢ 13:‏12 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

◘١٣:١٤ 13:‏14 أَوڒن. 10‏:‏11؛ 14‏:‏27

◘١٣:١٦ 13:‏16 أَوڒن. 12‏:‏23؛ 15‏:‏2

◘١٣:١٨ 13:‏18 أَوڒن. 15‏:‏32

◘١٣:٢٢ 13:‏22 أَيُوبْ 15‏:‏29؛ 27‏:‏17

◘١٣:٢٣ 13:‏23 أَوڒن. 12‏:‏11؛ 18‏:‏9

◘١٣:٢٤ 13:‏24 أَوڒن. 23‏:‏13