أَذْلِيسْ إِقدّْسنْ أَوَاڒنْ إِوزْننْ ١٦

١٦

١ بْنَاذمْ غَارسْ إِخَارِّيصنْ

ذڭْ وُوڒْ نّسْ،

مَاشَا ثَامْوَارِّيثْ ن يِيڒسْ

ثتَّاسْ-د زِي سِيذِي. ◘

٢ مَارَّا إِبْرِيذنْ ن ورْيَازْ

صْفَانْ ذِي ثِيطَّاوِينْ نّسْ،

مَاشَا سِيذِي إِتّْقدْجَابْ بُوحْبڒَاثْ. ◘

٣ سَارْسْ ڒخْذَايمْ نّشْ إِ سِيذِي،

خنِّي أَذْ تّْوَاسّْمتّْننْ إِنْوَاينْ نّشْ. ◘

٤ سِيذِي إِخْڒقْ-د مَارَّا إِ لْغَارَاضْ نّسْ،

عَاذْ ؤُڒَا ذ أَعفَّانْ إِڭَّا إِ-ث إِ وَاسّْ ن ڒْْغَارْ.◘

٥ كُوڒْ أَمْعفَّارْ ذ نّْعِي إِ سِيذِي، أَفُوسْ خَاسْ،

نتَّا وَارْ إِتّتّْوَابَارِّي عمَّارْصْ. ◘

٦ س ثْمخْسِيوْثْ إِشوَّارنْ ذ ڒَْامَانْ

أَذْ إِتّْوَاسّصْڒحْ خْ ڒْْغشّْ،

ؤُ س ثِيڭّْوُوذِي ن سِيذِي

إِتّْحيَّاذْ ورْيَازْ خْ ڒْْغَارْ.

٧ مَاڒَا ؤُسِينْ-د إِبْرِيذنْ ن إِجّْ ن ورْيَازْ

خْ ڒْْخَاضَارْ ن سِيذِي،

أَذْ يَارّْ نتَّا ؤُڒَا ذ ڒْْعذْيَانْ نّسْ

أَذْ كِيذسْ ڭّنْ ڒهْنَا.

٨ إِحْرَا ذْرُوسْ أَكْ-ذ ثْسڭْذَا

خْ وَاطَّاسْ ن ڒْْغِيدْجثْ بْڒَا ڒْْحقّْ. ◘

٩ ؤُڒْ ن بْنَاذمْ إِتّْخَارّصْ أَبْرِيذْ نّسْ،

مَاشَا سِيذِي إِندّهْ إِصُورَافْ نّسْ. ◼

١٠ ڒْْحُوكْمْ بْڒَا أَذْوَاڒْ خْ إِينْشِيشنْ ن ؤُجدْجِيذْ،

أَقمُّومْ نّسْ وَارْ إِخطِّي ذڭْ وحْكَامْ.

١١ ڒْْمِيزَانْ نِيشَانْ ذ طَّاوْيَاثْ ن ڒْْمِيزَانْ نِيشَانْ

أَقَا أَثنْ ن سِيذِي،

مَارَّا إِژْرَا ن ڒوْزنْ ذِي ثشْيَارْثْ

ذ ڒْْخذْمثْ نّسْ. ◘

١٢ ذ نّْعِي إِ إِجدْجِيذنْ خْمِي غَا ڭّنْ ڒْْغَارْ،

مَاغَارْ ڒْْعَارْشْ إِتّْوَاسّمْثنْ زِي ثْسڭْذَا.

١٣ إِينْشِيشنْ إِ إِشُّورنْ س ثْسڭْذَا

تّعْجِيبنْ إِ ؤُجدْجِيذْ،

ؤُ ونِّي إِسَّاوَاڒنْ نِيشَانْ، إِتّخْسْ إِ-ث نتَّا.

١٤ أَسْعَارْ ن ؤُجدْجِيذْ أَمْ لْمَالَاكَاثْ نْ ڒْموْثْ،

مَاشَا أَرْيَازْ أَمِيغِيسْ إِزمَّارْ

أَذْ غَارسْ ت إِ-د يَارّْ. ◘

١٥ ذِي ثْفَاوْثْ ن وُوذمْ إِتِّيسِّيقنْ ن ؤُجدْجِيذْ

ثدْجَا ثُوذَارْثْ،

أَرْضَا نّسْ أَمْ ؤُسيْنُو ن ونْژَارْ

ذِي ثفْسُوثْ. ◘

١٦ أَقَا ثحْڒَا ثَارزُّوثْ ن ثِيغِيثْ

خْ وُورغْ إِتِّيسِّيقنْ،

ؤُ مشْحَاڒْ كْثَارْ أَذْ ثِيڒِي ثْوَافِيثْ ن ڒفْهَامثْ

سنّجْ خْ ثْوَافِيثْ ن نُّوقَارْثْ. ◘

١٧ أَبْرِيذْ ن يِينِّي إِڭُّورنْ نِيشَانْ

إِتّْحيَّاذْ خْ ڒْْغَارْ.

ونِّي إِحطَّانْ أَبْرِيذْ نّسْ،

إِحطَّا ڒعْمَارْ نّسْ.

١٨ ثَانفْسشْثْ ثتِّيزْوَارْ-د إِ أَرْژِّييّثْ،

ؤُ نّْفَاخثْ ثتَّاسْ-د قْبڒْ إِ ؤُوطُّو. ◘

١٩ إِحْڒَا أَقْنَاعْ ن بُوحْبڒْ

أَكْ-ذ إِنِّي إِتّْوَاحْصَارنْ،

خْ ؤُبطُّو ن ثْكشَّاضْثْ أَكْ-ذ أَيْثْ-نّْفَاخثْ.

٢٠ ونِّي إِتّْخَارَّاصنْ مْلِيحْ

ذِي شَا ن ثْمسْڒَاشْثْ، أَذْ يَافْ ڒْْخَارْ،

سّعْذْ ن ونِّي إِتّْشَاڒَانْ خْ سِيذِي.◘

٢١ ونِّي غَارْ إِدْجَا وُوڒْ ذ أَمِيغِيسْ،

أَذْ ث سمَّانْ بُو-وفْثَانْ،

ؤُ ثَاژْيُوذِي ن ڒْْهَارْذْ ن إِينْشِيشنْ

ثَارنِّي ذِي ڒفْهَامثْ.

٢٢ ڒعْقڒْ ذ ڒْْعُونْصَارْ ن ثُوذَارْثْ إِ بَابْ نّسْ،

مَاشَا تَّارْبِييّثْ إِ إِبُوهَاڒِييّنْ

ذ ثُوبُّوهڒْيَا وَاهَا.◘

٢٣ ؤُڒْ ن ؤُمِيغِيسْ إِتَّارَّا أَقمُّومْ نّسْ إِفهّمْ،

زڭْ إِينْشِيشنْ نّسْ أَذْ فهْمنْ كْثَارْ.

٢٤ أَوَاڒنْ إِشوَّارنْ

ڭِّينْ أَمْ ثَامّنْثْ ن ثغْرَاسْثْ،

أَقَا أَثنْ ذ إِمِيژِيذنْ إِ ڒعْمَارْ

ذ ؤُڭنْفُو إِ يغْسَانْ.

٢٥ أَذْ ثَاغْ إِتّْغِيڒْ أَسْ إِ شَا ن يِيجّنْ

أَقَا أَبْرِيذْ نّسْ نِيشَانْ،

مَاشَا أَنڭَّارْ نّسْ مْغِيرْ إِبْرِيذنْ

إِتَّاوْينْ غَارْ ڒْْموْثْ. ◘

٢٦ ڒَْاژْ ن ؤُشوَّاڒْ إِخدّمْ أَسْ إِ نتَّا،

مَاغَارْ أَقمُّومْ نّسْ إِندّهْ إِ-ث.

٢٧ أَرْيَازْ إِ وَارْ إِسكّْوِينْ إِغزَّا ڒْْغَارْ،

خْ إِينْشِيشنْ نّسْ

أَمْ يِيشْثْ ن ثْمسِّي إِتّْشعَّاڒنْ. ◘

٢٨ أَرْيَازْ إِشُّورنْ س ڒخْذَاعَاثْ

إِسّكَّارَا أَمنْغِي،

ؤُ أَخْبَارْجِي إِتَّاوِي-د عَاذْ أَبطُّو

أَكْ-ذ ؤُمدُّوكّڒْ إِصبْحنْ أَطَّاسْ. ◘

٢٩ أَرْيَازْ بُو-ڒخْشُونثْ إِتّْغَارَّا جَّارْ نّسْ،

إِندّهْ إِ-ث غَارْ إِجّْ ن وبْرِيذْ

إِ وَارْ إِدْجِينْ مْلِيحْ.

٣٠ نتَّا إِتّقّنْ ثِيطَّاوِينْ نّسْ

مَاحنْذْ أَذْ إِخَارّصْ

مَارَّا دَّارْبَاثْ ن ڒخْذَاعثْ،

إِتّْكمّشْ إِينْشِيشنْ نّسْ،

أَقَا ذَا إِڭَّا ڒْْغَارْ. ◘

٣١ أَشُوَّافْ إِشَابنْ ذ إِجّْ ن تَّاجْ إِزوّْقنْ،

ثْزمَّارذْ أَذْ ت ثَافذْ خْ وبْرِيذْ ن ثْسڭْذَا.

٣٢ إِحْڒَا بُو-تَّاسِيعْ ن ڒْْخَاضَارْ

خْ إِجّْ ن ورْيَازْ إِجهْذنْ

ؤُ ونِّي إِتّبَّاثنْ بُوحْبڒْ نّسْ إِحْڒَا

خْ ونِّي إِحوّْسنْ إِشْثْ ن ثنْذِينْثْ.

٣٣ ثَاقدُّوحْثْ ثمّنْضَارْ ذڭْ وحْسِينْ،

مَاشَا مْكُوڒْ أَرَّايْ إِتَّاسْ-د زِي سِيذِي.

◘١٦:١ 16:‏1 أَوڒن. 16‏:‏1؛ 19‏:‏21؛ 20‏:‏24؛ إِرْم. 10‏:‏23

◘١٦:٢ 16:‏2 أَوڒن. 21‏:‏2

◘١٦:٣ 16:‏3 إِزهد. 37‏:‏5؛ 55‏:‏23؛ مت. 6‏:‏25؛ لك. 12‏:‏22؛ 1 بُط. 5‏:‏7

◘١٦:٤ 16:‏4 أَيُوبْ 21‏:‏30

◘١٦:٥ 16:‏5 أَوڒن. 6‏:‏17؛ 8‏:‏13؛ 11‏:‏21

◘١٦:٨ 16:‏8 إِزهد. 37‏:‏16؛ أَوڒن. 15‏:‏16

◼١٦:٩ 16:‏9 ’إِصُورَافْ‘ - س ثْعِيبْرَانِيثْ ’أَصُورِيفْ‘.

◘١٦:١١ 16:‏11 لَاوِي 19‏:‏36؛ أَعَوذ. 25‏:‏13‏-‏16؛ أَوڒن. 11‏:‏1؛ 20‏:‏10، 23

◘١٦:١٤ 16:‏14 أَوڒن. 19‏:‏12؛ 20‏:‏2

◘١٦:١٥ 16:‏15 أَوڒن. 19‏:‏12

◘١٦:١٦ 16:‏16 أَيُوبْ 28‏:‏15؛ إِزهد. 19‏:‏11؛ 119‏:‏72؛ أَوڒن. 3‏:‏14، 15؛ 8‏:‏11، 19

◘١٦:١٨ 16:‏18 أَوڒن. 11‏:‏2؛ 17‏:‏19

◘١٦:٢٠ 16:‏20 إِزهد. 2‏:‏12؛ 34‏:‏9؛ 125‏:‏1؛ إِشا. 30‏:‏18؛ إِرْم. 17‏:‏7

◘١٦:٢٢ 16:‏22 أَوڒن. 13‏:‏14

◘١٦:٢٥ 16:‏25 أَوڒن. 14‏:‏12

◘١٦:٢٧ 16:‏27 أَوڒن. 12‏:‏18

◘١٦:٢٨ 16:‏28 أَوڒن. 15‏:‏18؛ 26‏:‏21؛ 29‏:‏22

◘١٦:٣٠ 16:‏30 أَوڒن. 6‏:‏13، 14