أَذْلِيسْ إِقدّْسنْ أَوَاڒنْ إِوزْننْ ٢٢

٢٢

١ إِسمْ أَصبْحَانْ إِحْڒَا

خْ وَاطَّاسْ ن وَاڭْڒَا،

أَحِينِّي إِحْڒَا خْ نُّوقَارْثْ ذ وُورغْ.◘

٢ بُو-وَاڭْڒَا ذ ؤُمزْڒُوضْ تّمْسَاڭَارنْ،

سِيذِي إِ-ثنْ إِڭِّينْ مَارَّا. ◘

٣ بْنَاذمْ إِفتّْننْ إِتّْوَاڒَا ڒْْغَارْ

ؤُشَا إِتّْنُوفَّارْ،

مَاشَا إِحَافِييّنْ أَرنِّينْ ڭُّورنْ

ؤُشَا أَذْ تّْوَاعَاقَابنْ. ◘

٤ ڒْْمُونثْ إِ ؤُوَاضعْ ذ ثِيڭّْوُوذِي ن سِيذِي،

ذ أَڭْڒَا ذ شَّانْ ذ ثُوذَارْثْ.

٥ إِسنَّاننْ ذ ڒفْخُوخْ أَقَا أَثنْ

خْ وبْرِيذْ ن ونِّي إِفَارْغنْ،

ونِّي إِحطَّانْ ڒعْمَارْ نّسْ،

إِتّْغِيمَا غَارْ ڒَْاڭّْوَاجْ نْسنْ.

٦ ذَارّبْ أَحُوذْرِي

عْلَاحْسَابْ ڒقْيَاسْ ن وبْرِيذْ نّسْ،

وَاخَّا نتَّا إِوْسَارْ، وَارْ خَاسْ إِتّْحيِّيذْ شَا.

٧ بُو-وَاڭْڒَا إِتّْصدْجَاضْ خْ إِمزْڒَاضْ،

بُو-ؤُمَارْوَاسْ ذ إِسْمغْ

ن ونِّي ذ أَسْ يَارطّْڒنْ.

٨ ونِّي إِزَارّْعنْ ڒْْغشّْ، أَذْ إِمْجَارْ ڒغْبنْ،

أَعْمُوذْ ن ؤُذُوقّزْ نّسْ ن ؤُفُوڭمْ أَذْ إِفْنَا. ◘

٩ ونِّي غَارْ إِدْجَا ڒْْخزْرَاثْ صبْحنْثْ،

أَذْ إِتّْوَابَاركْ،

مِينْزِي نتَّا إِتِّيشْ إِ إِمزْڒَاضْ

زڭْ وغْرُومْ نّسْ. ◘

١٠ أَژّڒْ خْ ؤُمسْثهْزِييْ، أَذْ إِفّغْ ڒْْهمّْ،

أَقَا إِبدّْ ؤُمْحَارْوَاضْ ذ ڒفْضِيحثْ.

١١ ونِّي إِتّخْسنْ ڒصْفَايثْ ن وُوڒْ،

ونِّي غَارْ إِدْجَا إِينْشِيشنْ إِشُّورنْ س أَرْضَا،

أَجدْجِيذْ أَذْ يِيڒِي ذ أَمدُّوكّڒْ نّسْ. ◘

١٢ ثِيطَّاوِينْ ن سِيذِي حطَّانْثْ خْ ثُوسّْنَا،

مَاشَا أَوَاڒنْ ن ؤُغدَّارْ أَذْ ثنْ إِبْضڒْ.

١٣ أَمعْڭُوزْ إِقَّارْ:

”أَقَا ذِينْ إِجّْ ن وَايْرَاذْ ذِي بَارَّا!

أَذْ ثَاغْ بَالَاكْ أَذْ تّْوَانْغغْ

ذِي ڒْْوسْطْ ن وَازَّاينْ!“ ◘

١٤ أَقمُّومْ ن ثمْغَارِينْ ثِيبَارَّانِييِّينْ

ذ إِشْثْ ن ثسْرَافْثْ يُودْجْغنْ،

ونِّي خْ إِفُّوڭمْ سِيذِي، أَذْ ذَايسْ إِوْضَا. ◘

١٥ ثُوبُّوهڒْيَا ثتّْغِيمَا ثْڒسّقْ

ذڭْ وُوڒْ ن ؤُحُوذْرِي،

أَعْمُوذْ ن ؤُوبّخْ أَذْ ت إِسُّوفّغْ زَّايسْ. ◘

١٦ ونِّي إِحصَّارنْ أَمَارْخُو،

أَذْ يَارْنِي ذِي ڒمْغَارثْ نّسْ،

ونِّي إِتِّيشنْ إِ بُو-وَاڭْڒَا،

أَذْ إِحْوَاجْ وَاهَا. ◘

أَوَاڒنْ إِوزْننْ ن أَيْثْ ن ثِيغِيثْ -ثَاسْغَارْثْ 1

١٧ أوْشْ أَمزُّوغْ نّشْ،

ؤُشَا سڒْ غَارْ وَاوَاڒنْ ن إِمِيغِيسنْ،

أَرّْ ؤُڒْ نّشْ غَارْ ثُوسّْنَا إِنُو.

١٨ مَاغَارْ أَقَا مْلِيحْ

مَاڒَا ثْخمّْڒذْ ثنْ ذِي ذَاخڒْ نّشْ،

مَاڒَا أَذْ ثنْ ثسّْوجْذذْ جْمِيعْ

خْ إِينْشِيشنْ نّشْ.

١٩ مَاحنْذْ أَذْ يِيڒِي ؤُثشْڒِي نّشْ خْ سِيذِي،

أَذْ أَشْ ثنْ سّشْنغْ ڒخُّو، وَاهْ إِ شكْ.

٢٠ مَا زعْمَا وَارْ ذ أَشْ ؤُرِيغْ

أَوَاڒنْ إِفَارْزنْ أَطَّاسْ،

شُّورنْ س شّْوَارْ ذ ثُوسّْنَا،

٢١ حِيمَا أَذْ أَشْ سّشْنغْ ڒمْثنْ

ن وَاوَاڒنْ ن ثِيذتّْ،

مَاحنْذْ ثْزمَّارذْ أَذْ د-ثَارّذْ س ڒَْامَانْ

خْ ونِّي شكْ د-إِسّكّنْ.

٢٢ وَارْ تّْكشَّاضْ أَمَارْخُو

مَاغَارْ نتَّا ذ أَمَارْخُو،

وَارْ ڒبّزْ ڒْْمسْكِينْ غَارْ ثوَّارْثْ، ◘

٢٣ مَاغَارْ سِيذِي أَذْ أَسنْ يَاغْ ثَاسْغَارْثْ نْسنْ،

نتَّا أَذْ إِكشّضْ ڒعْمَارْ

ن يِينِّي إِ-ثنْ إِتّْكشَّاضنْ. ◘

٢٤ وَارْ تّمْدُّوكُّوڒْ

أَكْ-ذ أَرْيَازْ إِتَّارُّوجْذُوذنْ،

وَارْ تِّيذفْ غَارْ بَابْ ن وسْعَارْ،

٢٥ مَاحنْذْ شكْ وَارْ ثتّْنِيمِيذْ شَا

أَكْ-ذ إِمسْرَاقْ نّسْ،

أَذْ ثڭّذْ ڒْْفخْ إِ ڒعْمَارْ نّشْ.

٢٦ وَارْ تَّاذفْ جَارْ إِنِّي إِتِّيشنْ أَوَاڒْ

س ثْموْشِيوْثْ ن إِفَاسّنْ،

جَارْ إِنِّي إِدْجَانْ ذ أَضْمَانْ إِ إِمَارْوُوسَا. ◘

٢٧ مَاڒَا وَارْ غَاركْ مِينْ زِي غَا ثْخدْجْصذْ،

مَايمِّي إِجبّذْ قَامَا نّشْ

زِي سَاذُو نّشْ؟ ◘

٢٨ وَارْ سْمُوطُّويْ أَيْمِيرْ ن وشْحَاڒْ ؤُيَا،

ونِّي ڭِّينْ ڒجْذُوذْ نّشْ. ◘

٢٩ مَا ثژْرِيذْ إِجّْ ن ورْيَازْ إِمحْضنْ

ذِي ڒْْحِيرْفَا نّسْ؟

أَذْ ث سّْبدّنْ زَّاثْ إِ وُوذمْ ن إِجدْجِيذنْ،

وَارْ إِدْجِي أَذْ إِبدّْ زَّاثْ إِ وُوذمْ

ن مِيدّنْ وَارْ ذِي إِدْجِي ڒَْامَانْ.

◘٢٢:١ 22:‏1 أَمب. 7‏:‏1

◘٢٢:٢ 22:‏2 أَوڒن. 29‏:‏13

◘٢٢:٣ 22:‏3 أَوڒن. 27‏:‏12

◘٢٢:٨ 22:‏8 أَيُوبْ 4‏:‏8؛ Isaiah 14‏:‏5.؛ Psalm 125‏:‏3؛ حُوش. 10‏:‏13

◘٢٢:٩ 22:‏9 2 كُور. 9‏:‏6

◘٢٢:١١ 22:‏11 إِزهد. 101‏:‏6

◘٢٢:١٣ 22:‏13 أَوڒن. 26‏:‏13

◘٢٢:١٤ 22:‏14 أَوڒن. 2‏:‏16؛ 5‏:‏3؛ 7‏:‏5؛ 23‏:‏27

◘٢٢:١٥ 22:‏15 أَوڒن. 13‏:‏24؛ 19‏:‏18؛ 23‏:‏14؛ 29‏:‏15، 17

◘٢٢:١٦ 22:‏16 أَوڒن. 14‏:‏31؛ 17‏:‏5

◘٢٢:٢٢ 22:‏22 ؤُف. 23‏:‏6؛ أَيُوبْ 31‏:‏13؛ إِزهد. 82‏:‏3، 4؛ زَاك. 7‏:‏10

◘٢٢:٢٣ 22:‏23 ؤُف. 22‏:‏22، 23؛ إِزهد. 10‏:‏18

◘٢٢:٢٦ 22:‏26 أَوڒن. 6‏:‏1؛ 11‏:‏15

◘٢٢:٢٧ 22:‏27 أَوڒن. 20‏:‏16

◘٢٢:٢٨ 22:‏28 أَعَوذ. 19‏:‏14؛ 27‏:‏17؛ أَوڒن. 23‏:‏10