أَذْلِيسْ إِقدّْسنْ أَوَاڒنْ إِوزْننْ ٢٣

٢٣

١ مَاڒَا ثقِّيمذْ

غَارْ إِجّْ ن ڒْْحَاكمْ،

مَاحنْذْ أَذْ ثشّذْ أَكِيذسْ،

حْضَا مْلِيحْ مِينْ إِدْجَانْ زَّاثكْ.

٢ أڭّْ إِجّْ ن ڒْْمُوسْ خْ يِيڒِي نّشْ،

مَاڒَا شكْ ذ إِجّْ ن بُو-ڒمْغَارثْ ن ؤُعذِّيسْ.

٣ وَارْ تّڭّْ مژْرِي ذِي مَاشَّا نّسْ إِشْنَانْ،

مَاغَارْ أَقَا-ث ذ مَاشَّا ن ثُوخُّونَا.

٤ وَارْ سِّيحِيڒْ إِخفْ نّشْ

حِيمَا أَذْ ثْذوْڒذْ ذ بُو-وَاڭْڒَا،

سَارْخُو ذڭْ نّيّثْ نّشْ.

٥ مَاڒَا طَّاونْثْ ثِيطَّاوِينْ غَارسْ،

أَقَا وَارْ ذِينْ أَڭْڒَا عَاذْ!

مَاغَارْ أَذْ إِڭّْ أَفْرِيونْ إِ يِيخفْ نّسْ،

أَذْ إِضْوَا غَارْ ؤُجنَّا أَمْ يِيجّْ ن ؤُڭِيذرْ.

٦ وَارْ تّتّْ أَغْرُومْ

ن ونِّي ذِي ثدْجَا ثِيطّْ ثَاعفَّانْثْ،

وَارْ مژْرِي ذِي مَاشَّا نّسْ إِشْنَانْ.

٧ مَاغَارْ أَمْ مَامّشْ ث إِتّْخَارَّاصْ،

أَمُّو إِ ث إِتّڭّْ نتَّا.

إِقَّارْ: ”أشّْ، ثسْوذْ!“،

مَاشَا ؤُڒْ نّسْ وَارْ أَكِيذكْ إِدْجِي.

٨ أَزعِّيفْ إِ ثشِّيذْ، أَذْ ث-إِ-د-ثْعُوقّذْ،

أَوَاڒنْ إِصبْحنْ نّشْ ثْضيّْعذْ ثنْ.

٩ وَارْ سِيوڒْ ذڭْ ؤُمزُّوغْ ن إِجّْ ن ؤُبُوهَاڒِي،

مَاغَارْ نتَّا أَذْ إِسّحْقَارْ

أَوَاڒنْ ن وفْثَانْ نّشْ. ◘

١٠ وَارْ سْمُوطُّويْ أَيْمِيرْ ن وشْحَاڒْ ؤُيَا،

وَارْ تَّاذفْ ذڭْ إِيَّارنْ ن إِيُوجِيڒنْ، ◘

١١ مَاغَارْ أَمفْذِي نْسنْ ذ أَمقّْرَانْ،

نتَّا أَذْ د-يَاغْ ثَاسْغَارْثْ نْسنْ زَّايكْ.

١٢ أَرّْ ؤُڒْ نّشْ غَارْ ؤُوبّخْ،

إِمزُّوغنْ نّشْ غَارْ وَاوَاڒنْ ن ثُوسّْنَا.

١٣ وَارْ تّطّفْ تَّارْبِييّثْ خْ ؤُحُوذْرِي،

وَاخَّا ثشَّاثذْ ث س وعْمُوذْ،

وَارْ إِتّْمتِّي. ◘

١٤ شكْ أَذْ ث ثوْثذْ س وعْمُوذْ،

ؤُ أَذْ ثسّْنجْمذْ ڒعْمَارْ نّسْ زِي ڒَْاخَارْثْ.

١٥ مِّي إِنُو، مَاڒَا ؤُڒْ نّشْ ذ أَمِيغِيسْ،

أَذْ إِفَارْحْ ؤُڒَا ذ ؤُڒْ إِنُو أَكِيذسْ.

١٦ ثِيژَّاڒْ إِنُو أَذْ نڭْزنْثْ س ڒفْرَاحثْ،

مَاڒَا إِينْشِيشنْ نّشْ

سِّيوْڒنْ مِينْ إِدْجَانْ إِسڭّْذنْ. ◼

١٧ أجّْ ؤُڒْ نّشْ وَارْ إِتِّيسِيمْ زڭْ إِمذْنَابْ،

مَاشَا أجّْ إِ-ث أَذْ يَارّْ أَزدْجِيفْ

غَارْ ثِيڭّْوُوذِي ن سِيذِي أَسّْ إِمُونْ! ◘

١٨ مَاغَارْ خنِّي أَقَا ذِينْ ثِيوشَّا،

ؤُ ڒَْايَاسْ نّشْ وَارْ إِتَّارژِّي. ◘

١٩ سڒْ-د شكْ، أَ مِّي، إِڒِي ذ أَمِيغِيسْ،

نْذهْ ؤُڒْ نّشْ غَارْ وبْرِيذْ.

٢٠ وَارْ تّْغِيمِي غَارْ إِسْكَارْجِييّنْ،

ؤُڒَا غَارْ إِنِّي إِلهّْفنْ ذڭْ ويْسُومْ، ◘

٢١ مَاغَارْ أَسْكَارْجِييْ ذ أَملْهُوفْ

أَذْ ذوْڒنْ ذ إِمزْڒَاضْ،

ؤُ أَنُوذمْ إِسّْيِيرِيضْ ذڭْ إِحْڒُوشنْ.

٢٢ سڒْ-د شكْ غَارْ بَابَاشْ

ونِّي شكْ إِ د-إِجِّينْ،

ؤُ وَارْ سّحْقِيرِي يمَّاشْ مَاڒَا ثوْسَارْ. ◘

٢٣ سغْ-دّْ ثِيذتّْ، وَارْ ت ثزْنُوزَا شَا،

أَمُّو ؤُڒَا ذ ثِيغِيثْ ذ ؤُوبّخْ ذ ڒفْهَامثْ. ◘

٢٤ بَابَاسْ ن ؤُمْسڭّذْ أَذْ إِفَارْحْ س وَاطَّاسْ،

ونِّي د-إِجِّينْ إِجّْ مِّيسْ ذ أَمِيغِيسْ،

أَذْ أَسْ إِفَارْحْ. ◘

٢٥ أجّْ أَذْ إِفَارْحْ بَابَاشْ ؤُڒَا ذ يمَّاشْ،

أجّْ ثنِّي شكْ إِ د-يُورْونْ أَذْ ثْفَارْحْ.

٢٦ أوْشْ أَيِي ؤُڒْ نّشْ، أَ مِّي،

أجّْ ثِيطَّاوِينْ نّشْ أَذْ أَفنْثْ

أَرْضَا ذڭْ إِبْرِيذنْ إِنُو.

٢٧ مَاغَارْ ثَامْغَارْثْ فَارْقْ-شّْغڒْ

ذ إِشْثْ ن ثسْرَافْثْ يُودْجْغنْ،

ؤُ ثَامْغَارْثْ زِي بَارَّا ذ إِجّْ ن ڒْْعُونْصَارْ إِحْسَارْ. ◘

٢٨ وَاهْ، نتَّاثْ ثتّْحَامَا

أَمْ يِيجّْ ن ؤُخوَّانْ،

نتَّاثْ ثَارنِّي

ذڭْ إِغدَّارنْ جَارْ إِوْذَانْ.

٢٩ وِي إِ غَارْ إِدْجَا وشْضَانْ؟

وِي إِ غَارْ إِدْجَا زّڒْضْ؟

وِي إِ غَارْ إِدْجَا ؤُمْشُوبّشْ؟

وِي إِ غَارْ إِدْجَا ؤُشثْشِي؟

وِي إِ غَارْ إِدْجَانْ إِيزِّيمنْ بْڒَا سِّيبّثْ؟

وِي إِ غَارْ دْجَانْثْ ثِيطَّاوِينْ بَّاروْينْثْ؟

٣٠ غَارْ إِنِّي إِتّْغِيمَانْ غَارْ بِينُو أَڒْ ثَامذِّيثْ،

غَارْ يِينِّي د-يُوسِينْ

حِيمَا أَذْ قَّاسنْ بِينُو إِخدْجْضنْ. ◘

٣١ وَارْ خزَّارْ غَارْ بِينُو، خْمِي إِتّزْوِيغْ،

إِتّْڒِيقْڒِيقْ ذِي ڒْْكَاسْ ؤُ نتَّا إِهْونْ إِ ثِيسِّيثْ.

٣٢ غَارْ ؤُنڭَّارْ إِتّْغِيمَا إِزعّفْ

أَمْ يِيجّْ ن ؤُفِيغَارْ،

إِتّْرُوشَّا سّمْ أَمْ ثْڒفْسَا.

٣٣ ثِيطَّاوِينْ نّشْ أَذْ ثْوَاڒَانْثْ

ثِيمْغَارِينْ ثِيبَارَّانِييِّينْ،

ؤُ ؤُڒْ نّشْ أَذْ إِسِّيوڒْ س ؤُخَارْوضْ.

٣٤ شكْ أَذْ ثِيڒِيذْ أَمْ يِيجّنْ

إِ إِتّطّْصنْ ذِي ڒْْوسْطْ ن ڒبْحَارْ،

أَمْ إِجّنْ إِ إِتّطّْصنْ

ذِي ثْقِيشَّاثْ ن ثحْنَاشْثْ ن ؤُغَارَّابُو

٣٥ أَذْ ثِينِيذْ: ”وْثِينْ أَيِي، مَاشَا وَارْ يزْمغْ،

ذخْمنْ أَيِي، مَاشَا وَارْ ؤُشِيغْ أَكْ-ذ وَالُو.

مڒْمِي إِ د غَا فَاقغْ؟

نشّْ أَذْ أَرْزُوغْ عَاوذْ غَارْ بِينُو!“

◘٢٣:٩ 23:‏9 أَوڒن. 9‏:‏8؛ مت. 7‏:‏6

◘٢٣:١٠ 23:‏10 أَوڒن. 22‏:‏28

◘٢٣:١٣ 23:‏13 أَوڒن. 13‏:‏24؛ 19‏:‏18؛ 22‏:‏15؛ 29‏:‏15، 17

◼٢٣:١٦ 23:‏16 ’ثِيژَّاڒْ‘ - نِيغْ ’ثِيڭژْڒِينْ‘.

◘٢٣:١٧ 23:‏17 إِزهد. 37‏:‏1؛ 73‏:‏3؛ أَوڒن. 24‏:‏1

◘٢٣:١٨ 23:‏18 أَوڒن. 24‏:‏14

◘٢٣:٢٠ 23:‏20 إِشا. 5‏:‏22؛ لك. 21‏:‏34؛ رُوم. 13‏:‏13؛ أَفا. 5‏:‏18

◘٢٣:٢٢ 23:‏22 أَوڒن. 1‏:‏8

◘٢٣:٢٣ 23:‏23 أَوڒن. 4‏:‏7

◘٢٣:٢٤ 23:‏24 أَوڒن. 10‏:‏1؛ 15‏:‏20

◘٢٣:٢٧ 23:‏27 أَوڒن. 22‏:‏14

◘٢٣:٣٠ 23:‏30 إِشا. 5‏:‏11، 22