أَذْلِيسْ إِقدّْسنْ أَوَاڒنْ إِوزْننْ ٢٩

٢٩

١ أَرْيَازْ، ونِّي إِسّقْسْحنْ يِيرِي نّسْ

أَوَارْنِي ڒَْامِي ث عَاقْبنْ

أَطَّاسْ ن ثْوَاڒَاوِينْ،

أَذْ يَارْژْ ذڭْ إِجّْ ن ؤُمُورْ،

خنِّي وَارْ ذِينْ إِدْجِي عَاذْ ؤُڭنْفُو.

٢ مَاڒَا ذوْڒنْ إِمْسڭَّاذنْ س صُّولْطَا،

خنِّي إِفَارّحْ ڒْْڭنْسْ،

مَاشَا مَاڒَا إِحكّمْ ؤُعفَّانْ،

إِوعّضْ ڒْْڭنْسْ. ◘

٣ بْنَاذمْ إِتّخْسنْ ثِيغِيثْ، إِسّْفَارَّاحْ بَابَاسْ،

مَاشَا ونِّي إِتّْمُونَانْ

أَكْ-ذ ثمْغَارِينْ ن فَارْقْ-شّْغڒْ،

يَاردّدْجْ أَڭْڒَا نّسْ. ◘

٤ أَجدْجِيذْ إِسّْبدَّا ثَامُّورْثْ س ڒْْحقّْ،

مَاشَا أَرْيَازْ نِّي إِسّْڭعَّاذنْ

ضَّارِيبَا أَطَّاسْ ن ثْوَاڒَاوِينْ،

إِهدّمْ إِ-ت.

٥ أَرْيَازْ نِّي إِسّْوَاطَانْ جَّارْ نّسْ،

إِتّْبزَّاعْ إِشْثْ ن ثْرَاشَّا إِ إِضَارنْ نّسْ.

٦ ذڭْ ؤُعذِّي ن إِجّْ ن ورْيَازْ أَعفَّانْ

إِنُّوفَّارْ ذَايسْ إِجّْ ن ڒْْفخْ،

مَاشَا أَمْسڭّذْ إِتّسْڒِيوْڒوْ ؤُ إِفَارّحْ.

٧ أَمْسڭّذْ إِسّنْ دّعْوثْ ن إِمَارْخَا،

أَعفَّانْ وَارْ إِفهّمْ وَالُو ذِي ثُوسّْنَا. ◘

٨ إِمسْثهْزَايّنْ سّكَّارَانْ

أَغوّغْ ذِي ثنْذِينْثْ،

مَاشَا إِمِيغِيسنْ سّْنقْڒَابنْ أَغْضَابْ.

٩ مَاڒَا أَمِيغِيسْ إِكْسِي-د ثَانْفُوتْشْ

إِ يِيجّْ ن ؤُبُوهَاڒِي،

خنِّي نتَّا ڭُّورْ أَذْ إِخيّقْ وَانِيثَا

ؤُ أَذْ إِضْحشْ، مَاشَا وَارْ ذِينْ ڒْْهُوذْنثْ.

١٠ إِرْيَازنْ ؤُمِي إِتّعْجِيبْ إِذَامّنْ

شَارّْهنْ ونِّي إِكمّْڒنْ،

مَاشَا إِنِّي إِڭُّورنْ نِيشَانْ

خزَّارنْ غَارْ ڒعْمَارْ نّسْ.

١١ أَبُوهَاڒِي إِضدْجقْ إِ مَارَّا بُوحْبڒْ نّسْ،

مَاشَا أَمِيغِيسْ إِتّْقمّعْ إِ-ث. ◘

١٢ ڒْْحَاكمْ نِّي إِتِّيشنْ ثَايْنِيثْ

إِ ڒْْهَارْذْ ن إِخَارِّيقّنْ،

زَّايسْ أَذْ إِڒِينْ

مَارَّا إِمْسخَّارنْ نّسْ ذ إِعفَّاننْ.

١٣ أَمزْڒُوضْ ذ ورْيَازْ إِتّْوَاحْسَارنْ ڒبْذَا،

مْسَاڭَارنْ،

سِيذِي إِسّْنوَّارْ ثِيطَّاوِينْ نْسنْ

س ثْنَاينْ إِذْسنْ. ◘

١٤ أَجدْجِيذْ نِّي إِتِّيشنْ س ثِيذتّْ ثَاسْغَارْثْ

إِ إِمَارْخَا ذِي شّْرعْ،

ڒْْكُورْسِي نّسْ أَذْ إِقِّيمْ إِبدّْ إِ ڒبْذَا. ◘

١٥ أَعْمُوذْ ذ ؤُوبّخْ تِّيشنْ ثِيغِيثْ،

مَاشَا أَحنْجِيرْ جِّينْ ث إِ يِيخفْ نّسْ،

يَارَّا يمَّاسْ أَذْ ثْسضْحَا. ◘

١٦ مَاڒَا ذوْڒنْ إِعفَّاننْ جهْذنْ،

خنِّي يَارنِّي ؤُخطُّو،

مَاشَا إِمْسڭَّاذنْ

أَذْ ژَترنْ وطُّو نْسنْ. ◘

١٧ أَربَّا مِّيشْ ؤُ نتَّا أَذْ شكْ إِسَّاريّحْ،

نتَّا أَذْ إِوْشْ لْبَارَاكَاثْ ثِيمِيژِيذِينْ

إِ ڒعْمَارْ نّشْ. ◘

١٨ مَاڒَا وَارْ ذِينْ ڒوْحِييْ، إِتّْفُوشُّوحْ ڒْْڭنْسْ،

سّعْذْ ن ونِّي إِحطَّانْ شَّارِيعَا.

١٩ إِجّْ ن إِسْمغْ وَارْ إِتّجِّي

أَذْ ث أَرّبَّانْ س وَاوَاڒنْ،

مَاغَارْ وَاخَّا نتَّا إِفهّمْ خَاكْ،

وَارْ خَاكْ د-إِتَّارِّي شَا.

٢٠ مَا شكْ عمَّارْصْ وَارْ ثژْرِيذْ إِجّْ ن ورْيَازْ

إِتّْقدْجِيقْ س وَاوَاڒنْ نّسْ؟

أَقَا ذِينْ ڒَْايَاسْ كْثَارْ إِ ؤُبُوهَاڒِي ؤُڒَا خَاسْ. ◘

٢١ مَاڒَا إِجّنْ إِسُّوبضْ إِسْمغْ نّسْ زِي ثمْژِي،

أَذْ إِذْوڒْ غَارْ ؤُنڭَّارْ وَارْ ث إِتّْقِيذِي.

٢٢ أَرْيَازْ إِتَّارُّوجْذُوذنْ

إِسّكَّارَا-د أَمْشُوبّشْ،

ؤُ بَابْ ن وسْعَارْ إِتّڭّْ أَطَّاسْ ن إِخطَّانْ. ◘

٢٣ نّْفَاخثْ ن بْنَاذمْ أَذْ ث إِسّْوَاضعْ،

مَاشَا أَمْوَاضعْ ن بُوحْبڒْ

أَذْ أَسْ إِتّْوَاڭّْ شَّانْ. ◘

٢٤ ونِّي إِبطَّانْ أَكْ-ذ ؤُخوَّانْ،

إِشَارّهْ إِخفْ نّسْ،

مَاغَارْ نتَّا إِتّسْڒَا إِ نّعْڒثْ،

مَاشَا وَارْ ث إِقَّارْ شَا. ◘

٢٥ ثِيڭّْوُوذِي زڭْ إِوْذَانْ ثْندّهْ غَارْ ڒْْفخْ،

مَاشَا ونِّي إِتّْشَاڒَانْ خْ سِيذِي،

أَذْ إِتّْوَاسّْڭعّذْ ذِي ڒَامَانْ.

٢٦ أَطَّاسْ أَرزُّونْ ؤُذمْ ن ڒْْحَاكمْ،

وَاخَّا ثَاسْغَارْثْ ن كُوڒْ إِجّْ ثتَّاسْ-د زِي سِيذِي. ◘

٢٧ أَرْيَازْ أَغشَّاشْ ذ نّْعِي إِ إِمْسڭَّاذنْ،

مَاشَا ونِّي إِڭُّورنْ نِيشَانْ

ذڭْ وبْرِيذْ نّسْ،

أَقَا-ث ذ نّْعِي إِ ؤُعفَّانْ.

◘٢٩:٢ 29:‏2 أَوڒن. 11‏:‏10؛ 28‏:‏12، 28

◘٢٩:٣ 29:‏3 أَوڒن. 10‏:‏1؛ 15‏:‏20؛ 28‏:‏7؛ لك. 15‏:‏13

◘٢٩:٧ 29:‏7 أَيُوبْ 29‏:‏16

◘٢٩:١١ 29:‏11 أَوڒن. 14‏:‏33

◘٢٩:١٣ 29:‏13 أَوڒن. 22‏:‏2

◘٢٩:١٤ 29:‏14 أَوڒن. 20‏:‏28؛ 25‏:‏5

◘٢٩:١٥ 29:‏15 أَوڒن. 10‏:‏1؛ 13‏:‏24؛ 17‏:‏21، 25؛ 22‏:‏15؛ 23‏:‏13

◘٢٩:١٦ 29:‏16 إِزهد. 37‏:‏36؛ 58‏:‏11؛ 91‏:‏8

◘٢٩:١٧ 29:‏17 أَوڒن. 13‏:‏24؛ 22‏:‏15؛ 23‏:‏13، 14

◘٢٩:٢٠ 29:‏20 أَوڒن. 26‏:‏12

◘٢٩:٢٢ 29:‏22 أَوڒن. 15‏:‏18؛ 26‏:‏21

◘٢٩:٢٣ 29:‏23 أَيُوبْ 22‏:‏29؛ أَوڒن. 15‏:‏33؛ 18‏:‏12؛ إِشا. 66‏:‏2؛ مت. 23‏:‏12؛ لك. 14‏:‏11؛ 18‏:‏14؛ يَاع. 4‏:‏6، 10؛ 1 بُط. 5‏:‏5

◘٢٩:٢٤ 29:‏24 لَاوِي 5‏:‏1

◘٢٩:٢٦ 29:‏26 أَوڒن. 19‏:‏6