28
1 إِعفَّاننْ تّْرَاكّْوَاڒنْ
وَاخَّا وَارْ ذِينِّي
وِي إِ-ثنْ إِضَافَّارنْ،
مَاشَا إِمْسڭَّاذنْ ذَايْسنْ ثَارْيَاسْثْ
أَمْ ن إِجّْ ن وَايْرَاذْ. ◘28:1 لَاوِي 26:36؛ أَعَوذ. 28:28؛ إِشا. 57:21
2 زِي سِّيبّثْ ن ؤُعذِّي ن ثمُّورْثْ
أَقَا ذِينْ أَطَّاسْ ن ڒْحُوكَّامْ نّسْ،
مَاشَا س إِجّْ ن بْنَاذمْ س ڒعْقڒْ ذ ثُوسّْنَا،
أَذْ ثقِّيمْ صُّولْطَا ثْبدّْ
إِ يِيجّْ ن ڒْوقْثْ ذ أَزِيرَارْ.
3 أَرْيَازْ أَمزْڒُوضْ نِّي إِتّْزيَّارنْ خْ إِمَارْخَا،
أَمْ ونْژَارْ إِتَّاوْينْ مَارَّا،
أَڒْ وَارْ إِتّْغِيمِي عَاذْ وغْرُومْ.
4 إِنِّي إِتّجَّانْ شَّارِيعَا
سّمْغَارَانْ أَعفَّانْ،
مَاشَا إِنِّي إِحطَّانْ شَّارِيعَا
تّْمنْغَانْ أَكِيذْسنْ.
5 إِرْيَازنْ إِعفَّاننْ وَارْ فهّْمنْ ڒْحقّْ،
مَاشَا إِنِّي يَارزُّونْ سِيذِي،
فهّْمنْ إِ كُوڒْشِي.
6 إِحْڒَا ؤُمزْڒُوضْ نِّي إِڭُّورنْ إِصْفَا،
خْ ونِّي إِڭُّورنْ إِفَارْغْ ذِي ثْنَاينْ ن إِبْرِيذنْ،
وَاخَّا نتَّا غَارسْ أَڭْڒَا. ◘28:6 أَوڒن. 19:1
7 ونِّي إِحطَّانْ شَّارِيعَا،
ذ إِجّْ ن مِّيسْ إِفهّمْ،
مَاشَا ونِّي ذ أَمدُّوكّڒْ ن إِملْهَافْ،
يَارَّا بَابَاسْ أَذْ إِسضْحَا. ◘28:7 أَوڒن. 29:3
8 ونِّي إِسّمْغَارَانْ أَڭْڒَا نّسْ
س أَرِّيبَا ذ وَارْبحْ،
إِسّْمُونَا أَيَا إِ ونِّي إِتّْحِينَّانْ
خْ إِمزْڒَاضْ. ◘28:8 لَاوِي 25:35-37
9 ونِّي إِسّْحيَّاذنْ أَمزُّوغْ نّسْ
زڭْ ؤُسدْجِي ن شَّارِيعَا،
عَاذْ ثَاژَادْجِيثْ نّسْ ذ نّْعِي.
10 ونِّي إِتَّارَّانْ إِنِّي إِڭُّورنْ نِيشَانْ
أَذْ ودَّارنْ خْ إِجّْ ن وبْرِيذْ أَعفَّانْ،
نتَّا سِيمَانْثْ نّسْ
أَذْ إِوْضَا ذِي ثسْرَافْثْ نّسْ،
مَاشَا إِنِّي إِ ذِي ثدْجَا ڒكْمَارثْ
أَذْ وَارْثنْ مِينْ إِصبْحنْ. ◘28:10 أَوڒن. 26:27
11 بُو-وَاڭْڒَا إِتّڭّْ إِخفْ نّسْ ذ أَمِيغِيسْ
ذِي ثِيطَّاوِينْ نّسْ،
مَاشَا إِجّْ ن ؤُمزْڒُوضْ
نِّي ذِي ثدْجَا ڒفْهَامثْ،
يَارْڭبْ خَاسْ.
12 مَاڒَا أَذْ سْڒِيوْڒِيونْ إِمْسڭَّاذنْ
س ڒفْرَاحثْ،
أَقَا ذِينْ أَعُودْجِي أَمقّْرَانْ،
مَاشَا مَاڒَا كَّارنْ-د إِعفَّاننْ،
أَذْ إِسّْنُوفَّارْ بْنَاذمْ إِخفْ نّسْ. ◘28:12 أَوڒن. 11:10، 11
13 ونِّي إِدَّاڒنْ إِخطَّانْ نّسْ،
وَارْ إِتّفْڒِيحْ،
مَاشَا ونِّي زَّايْسنْ إِنعّْمنْ
ؤُ إِتّْحيَّاذْ خَاسنْ، أَذْ يَافْ أَرّحْمثْ. ◘28:13 إِزهد. 32:3، 5؛ 1 يُوح. 1:9، 10
14 سّعْذْ ن بْنَاذمْ
نِّي إِتّْوقَّارنْ بْڒَا أَبذِّي،
مَاشَا ونِّي إِسّقْسَاحنْ ؤُڒْ نّسْ،
أَذْ إِوْضَا ذِي ڒْغَارْ.
15 أَمْ إِجّْ ن ويْرَاذْ إِتَّارُّوجْذُوذنْ،
أَمْ إِجّْ ن دُّوبْ إِتّْڒَاژَانْ
إِتَّازّْڒنْ زِي سَّا غَارْ ذِيهَا،
أَمُّو إِ إِدْجَا إِجّْ نْ ڒْحَاكمْ أَعفَّانْ
خْ إِجّْ ن ڒْڭنْسْ أَمزْڒُوضْ.
16 ڒْحَاكمْ نِّي بْڒَا ڒفْهَامثْ،
أَقَا-ث ذ ڒْحَاكمْ خْ وَاطَّاسْ ن ورْبَاحْ
س ؤُبعّجْ،
مَاشَا ونِّي إِشَارّْهنْ أَرْبحْ،
أَذْ إِزُّوڭَّارْثْ ؤُسَّانْ نّسْ.
17 إِجّْ ن بْنَاذمْ إِتّْوَاحْصَارنْ
ؤُمِي إِسِّيزّڒْ إِذَامّنْ ن شَا ن يِيجّنْ،
أَذْ يَارْوڒْ غَارْ وحْفُورْ ن ونْضڒْ
ن يِيخفْ نّسْ.
وَارْ تّجِّي حذْ أَذْ ث إِسّْبدّْ!
18 ونِّي إِڭُّورنْ أَبْرِيذْ نّسْ ذِي ڒصْفَايثْ،
أَذْ إِنْجمْ،
مَاشَا ونِّي إِڭُّورنْ
إِفَارْغْ ذِي ثْنَاينْ ن إِبْرِيذنْ،
وَارْ إِتّْعطَّارْ أَذْ إِوْضَا.
19 ونِّي إِشَارّْزنْ ثَامُّورْثْ نّسْ،
أَذْ إِجَّاونْ س وغْرُومْ،
مَاشَا ونِّي إِضفَّارنْ أَرْيَازْ إِخْوَانْ،
أَذْ إِجَّاونْ زّڒْضْ.
20 أَرْيَازْ إِ ذِي إِدْجَا ڒَامَانْ أَطَّاسْ
أَذْ إِكْسِي أَطَّاسْ ن لْبَارَاكَاثْ،
مَاشَا ونِّي إِتّْقدْجِيقنْ حِيمَا أَذْ إِڭّْ أَڭْڒَا،
وَارْ إِتّْوِيحْسِيبْ ذ أَمزْذَاڭْ. ◘28:20 أَوڒن. 13:11؛ 20:21؛ 23:4
21 أَسْفَارْزْ ن وُوذْمَاونْ وَارْ إِشْنِي شَا،
مَاغَارْ إِ يِيجّْ ن ؤُڒقُّوزْ ن وغْرُومْ
إِزمَّارْ شَا ن ورْيَازْ أَذْ إِخْضَا. ◘28:21 أَوڒن. 18:5؛ 24:23
22 أَرْيَازْ س ثِيطّْ ثَاعفَّانْثْ
إِتّْقدْجِيقْ غَارْ وَاڭْڒَا،
مَاشَا نتَّا وَارْ إِسِّينْ
أَقَا ڒخْسسْ أَذْ غَارسْ د-يَاسْ.
23 ونِّي إِتّْعَاقَابنْ إِجّْ ن بْنَاذمْ،
أَقَا غَارْ ؤُنڭَّارْ أَذْ يَافْ أَرْضَا كْثَارْ
خْ ونِّي إِسّْشَانَانْ ثَاژْيُوضِي س يِيڒسْ نّسْ.
24 ونِّي إِتّْكشَّاضنْ بَابَاسْ نِيغْ يمَّاسْ
ؤُشَا إِقَّارْ: ”وَارْ إِدْجِي ذ دّنْبْ!“،
أَقَا-ث ذ أَشْرِيشْ ن إِجّْ ن بُو-ڒَْاخَارْثْ.
25 ونِّي ذِي إِدْجَا نّْفَاخثْ،
إِسّكَّارَا-د أَمْشُوبّشْ،
مَاشَا ونِّي إِتّْشَاڒَانْ خْ سِيذِي،
أَذْ إِذْوڒْ لَابَاسْ خَاسْ. ◘28:25 أَوڒن. 13:10؛ 15:18؛ 29:22
26 ونِّي إِتّْشَاڒَانْ خْ وُوڒْ نّسْ،
أَقَا ذ أَبُوهَاڒِي،
مَاشَا ونِّي إِڭُّورنْ
أَبْرِيذْ نّسْ ذِي ثِيغِيثْ،
أَذْ إِنْجمْ.
27 ونِّي إِتِّيشنْ إِ إِمزْڒَاضْ،
وَارْ ذَايسْ إِتِّيڒِي بُو ڒغْبنْ،
مَاشَا ونِّي إِتّقّْننْ ثِيطَّاوِينْ نّسْ،
أَذْ إِتّْوَانْعڒْ أَطَّاسْ. ◘28:27 أَعَوذ. 15:7، 8، 10؛ أَوڒن. 19:17؛ 22:9
28 مَاڒَا كَّارنْ-د إِعفَّاننْ،
خنِّي إِتّْنُوفَّارْ بْنَاذمْ،
مَاشَا مَاڒَا تّْوَاهلّْكنْ نِيثْنِي،
أَذْ مَّارنْينْ إِمْسڭَّاذنْ.◘28:28 أَوڒن. 28:12
◘28:1 28:1 لَاوِي 26:36؛ أَعَوذ. 28:28؛ إِشا. 57:21
◘28:6 28:6 أَوڒن. 19:1
◘28:7 28:7 أَوڒن. 29:3
◘28:8 28:8 لَاوِي 25:35-37
◘28:10 28:10 أَوڒن. 26:27
◘28:12 28:12 أَوڒن. 11:10، 11
◘28:13 28:13 إِزهد. 32:3، 5؛ 1 يُوح. 1:9، 10
◘28:20 28:20 أَوڒن. 13:11؛ 20:21؛ 23:4
◘28:21 28:21 أَوڒن. 18:5؛ 24:23
◘28:25 28:25 أَوڒن. 13:10؛ 15:18؛ 29:22
◘28:27 28:27 أَعَوذ. 15:7، 8، 10؛ أَوڒن. 19:17؛ 22:9
◘28:28 28:28 أَوڒن. 28:12