أَذْلِيسْ إِقدّْسنْ أَوَاڒنْ إِوزْننْ ٢٧

٢٧

١ وَارْ تّْفيّشْ زڭْ وَاسّْ ن ثِيوشَّا،

مَاغَارْ وَارْ ثسِّينذْ شَا

مِينْ د غَا يَاوِي وَاسّْ. ◘

٢ أجّْ إِجّْ ن ؤُبَارَّانِي أَذْ شكْ إِشنّعْ،

وَارْ إِدْجِي أَقمُّومْ نّشْ،

إِجّْ ن مِيدّنْ، وَارْ إِدْجِي إِينْشِيشنْ نّشْ.

٣ أَژْرُو إِذْقڒْ، إِجْذِي إِوزّنْ،

مَاشَا أَفُوڭمْ ن ؤُبُوهَاڒِي

إِذْقڒْ خَاسنْ س ثْنَاينْ إِذْسنْ.

٤ أَسْعَارْ ذ ؤُذُوقّزْ ن وغْضَابْ

أَقَا أَثنْ قسْحنْ،

مَاشَا مَانْ ونْ إِزمَّارنْ

أَذْ إِقِّيمْ إِبدّْ غَارْ ثُوسْمِي؟

٥ ثحْڒَا تَّارْبِييّثْ س بْطَايْطَايْ

خْ ثَايْرِي إِنُّوفَّارنْ.

٦ إِيزِّيمنْ ن ونِّي شكْ إِتّخْسنْ

أَقَا ذ ڒعْڒَامَاثْ ن ڒَْامَانْ،

مَاشَا إِسُوذِيمنْ ن يِينِّي شكْ إِشَارّْهنْ

أَقَا ذ أَطَّاسْ.

٧ ونِّي إِجِّيوْننْ، إِعجّنْ

خْ ثَامّنْثْ ن ثغْرَاصْثْ،

مَاشَا إِ ونِّي إِدْجُوژنْ

مَارَّا مِينْ يَارزْڭنْ ذ أَمِيژِيذْ. ◼

٨ أَمْ إِجّْ ن وجْضِيضْ إِطَّاوْ،

إِڭّْوذْ زِي ڒْْعُوشّْ نّسْ،

أَمُّو إِ إِدْجَا ورْيَازْ نِّي إِ غَا إِطلّْعنْ

بَارَّا خْ ومْشَانْ نّسْ.

٩ زّشْثْ ذ ڒبْخُورْ سّْفَارَّاحنْ ؤُڒْ،

أَمُّو عَاوذْ ثَامْسعَّافْثْ إِشْنَانْ

ن إِجّْ ن ؤُمدُّوكّڒْ زِي شّْوَارْ ن وُوڒْ.

١٠ وَارْ سمّحْ ذڭْ ؤُمدُّوكّڒْ نّشْ،

ؤُڒَا ذڭْ ؤُمدُّوكّڒْ ن بَابَاشْ،

وَارْ تِّيذفْ شَا غَارْ ثَادَّارْثْ ن ؤُمَاشْ

ذڭْ وَاسّْ ن أَرْژِييّثْ نّشْ.

إِحْڒَا إِجّْ ن وَاجَّارْ يُوذسْ

خْ إِجّْ ن ثوْمَاثْ يِيڭّْوجْ. ◘

١١ إِڒِي ذ أَمِيغِيسْ، أَ مِّي، ؤُ سْفَارْحْ ؤُڒْ إِنُو،

مَاحنْذْ زمَّارغْ أَذْ د-أَرّغْ

خْ ونِّي ذ أَيِي غَا إِسّحْقَارنْ.

١٢ ونِّي إِفتّْننْ إِتّْوَاڒَا ڒْْغَارْ

ؤُشَا إِسّْنُوفَّارَا إِخفْ نّسْ،

مَاشَا إِحَافِييّنْ أَرنِّينْ ڭُّورنْ

ؤُشَا إِتّْخصَّا أَذْ تّْوَاعَاقَابنْ. ◘

١٣ كْسِي أَرُّوضْ نّسْ،

مَاغَارْ إِدَّاكّْوَاڒْ ذ أَضْمَانْ

إِ يِيجّْ ن ؤُبَارَّانِي،

كْسِي ث ذ دِّييّثْ

إِ يِيشْثْ ن ثمْغَارْثْ زِي بَارَّا. ◘

١٤ ونِّي إِتّْبَارْكنْ أَمدُّوكّڒْ نّسْ زِيشْ

غَارْ ثُوفُّوثْ س ثْمِيجَّا إِجهْذنْ،

أَقَا مَانْ أَيَا أَذْ أَسْ إِتّْوَاحْسبْ ذ نّعْڒثْ.

١٥ أَمشْنَاوْ ثُوذِّيمْثْ وَارْ إِتّْبذِّينْ

ذڭْ وَاسّْ ن ونْژَارْ إِجهْذنْ،

أَمُّو إِ ثدْجَا ثمْغَارْثْ إِتّمْشُوبُّوشنْ. ◘

١٦ ونِّي إِتّخْسنْ أَذْ أَسْ إِبلّعْ،

أَقَا-ث أَمْ ونِّي إِتّخْسنْ

أَذْ إِقَالَا إِ ؤُسمِّيضْ،

ؤُ أَفُوسْ نّسْ أَفُوسِي

أَذْ إِطّفْ زّشْثْ إِتّحْرُودْجُوضنْ.

١٧ أَمْ ونِّي إِسّقْضَاعنْ ؤُزَّاڒْ س وُوزَّاڒْ،

أَمُّو إِ إِسّقْضَاعْ ورْيَازْ

ثِيمڭَّا ن ونِّي ث يُوذْسنْ.

١٨ ونِّي إِحطَّانْ خْ إِجّْ ن وَارْثُو،

أَذْ إِشّْ ڒْْغِيدْجثْ نّسْ،

ونِّي إِحطَّانْ بَابْ نّسْ،

أَذْ إِتّْوَاشنّعْ.

١٩ أَمْ د-إِتّْبَانْ ؤُغمْبُوبْ ذڭْ ؤُغمْبُوبْ

ذڭْ وَامَانْ،

أَمُّو د-إِتّْبَانْ وُوڒْ نْ بْنَاذمْ

خْ بْنَاذمْ عَاوذْ.

٢٠ أَمْ ڒَْاخَارْثْ ذ ؤُسْهلّكْ وَارْ تّْيِيوِيننْ،

أَمُّو ؤُڒَا ذ ثِيطَّاوِينْ ن إِوْذَانْ

وَارْ تِّيوْضنْثْ أَذْ جِّيوْننْثْ. ◘

٢١ أَطنْجِيرْ ن ؤُسفْسِي إِ نُّوقَارْثْ

ذ ؤُفَارَّانْ إِ وُورغْ،

أَمُّو إِ إِدْجَا ؤُڒَا ذ أَرْيَازْ

أَمْ مَامّشْ ث تّْمدَّاحنْ. ◘

٢٢ مَاڒَا ثدّْزذْ أَبُوهَاڒِي س وزْذُوزْ

ذِي ڒْْمهْرَازْ جَارْ ڒْْحبّْ ن إِمنْذِي،

ثُوبُّوهڒْيَا نّسْ وَارْ خَاسْ ثْحيِّيذْ.

٢٣ حْضَا مَاحنْذْ أَذْ ثسّْنذْ

مَامّشْ د-إِتّْبَانْ وُودْجِي نّشْ،

وجّهْ ؤُڒْ نّشْ غَارْ ثْحِيمْرِيوِينْ.

٢٤ مَاغَارْ ڒكْسِيبثْ وَارْ ثتّْغِيمِي إِ ڒبْذَا،

نِيغْ مَا أَذْ إِقِّيمْ تَّاجْ ن وعْزَاڒْ

زِي جِّيڒْ أَڒْ جِّيڒْ نّغْنِي؟

٢٥ مَاڒَا إِرُوحْ أَرْبِيعْ

ؤُشَا إِبَانْ-د ؤُغمُّويْ أَزِيزَا،

إِتّْوَاحْثشْ أَفْسُو خْ إِذُورَارْ،

٢٦ خنِّي أَذْ إِڒِينْ إِزْمَارنْ إِ وَارُّوضْ نّشْ،

ؤُڒَا ذ إِغَايْضنْ إِ ثْمسْغِيوْثْ ن يِيجّْ ن ييَّارْ. ◘

٢٧ ؤُشَا أَذْ غَاركْ يِيڒِي مِينْ ثحْوَاجذْ

ن ؤُغِي ن ثْغَايْطِينْ إِ مَاشَّا نّشْ،

أَذْ يِيڒِي ذ مَاشَّا إِ ثَادَّارْثْ نّشْ،

ؤُڒَا ذ ڒعْوتْشْ إِ ثمْسخَّارِينْ نّشْ ثِيمژْيَانِينْ.

◘٢٧:١ 27:‏1 يَاع. 4‏:‏13، 14

◼٢٧:٧ 27:‏7 ’ونِّي‘ - س ثْعِيبْرَانِيثْ ’ڒعْمَارْ‘.

◘٢٧:١٠ 27:‏10 أَوڒن. 17‏:‏17؛ 18‏:‏24

◘٢٧:١٢ 27:‏12 أَوڒن. 22‏:‏3

◘٢٧:١٣ 27:‏13 أَوڒن. 6‏:‏1، 2؛ 11‏:‏15؛ 17‏:‏18؛ 20‏:‏16

◘٢٧:١٥ 27:‏15 أَوڒن. 19‏:‏13

◘٢٧:٢٠ 27:‏20 أَمب. 1‏:‏8

◘٢٧:٢١ 27:‏21 أَوڒن. 17‏:‏3

◘٢٧:٢٦ 27:‏26 1 تِيم. 6‏:‏8