أَذْلِيسْ إِقدّْسنْ أَوَاڒنْ إِوزْننْ ٢٦

٢٦

١ أَمْ وذْفڒْ ذڭْ ؤُنبْذُو

ؤُ أَمْ ونْژَارْ ذِي ثْميْرَا،

أَمُّو وَارْ د-إِتِّيسْ شَّانْ أَكْ-ذ ؤُبُوهَاڒِي.

٢ أَمْ ژَّاوشْ إِتّْفَارْفَارنْ،

أَمْ ثْفَاڒْدْجسْثْ إِطَّاونْ سَّا ذ سَّا،

أَمُّو إِ ثڭَّا إِشْثْ ن نّعْڒثْ بْڒَا سِّيبّثْ،

نتَّاثْ وَارْ ثْڒقّفْ. ◼

٣ أَركُّوضْ إِ ؤُيِيسْ، سْڒِيمثْ إِ وغْيُوڒْ،

ؤُ أَعْمُوذْ إِ وعْرُورْ ن إِبُوهَاڒِييّنْ. ◘

٤ وَارْ د-تَّارِّي خْ ؤُبُوهَاڒِي

أَنشْثْ ثُوبُّوهڒْيَا نّسْ،

مَاحنْذْ ؤُڒَا ذ شكْ

وَارْ ذَايسْ ثَاركّْوسذْ.

٥ أَرّْ-د خْ ؤُبُوهَاڒِي

عْلَاحْسَابْ ثُوبُّوهڒْيَا نّسْ،

مَاحنْذْ وَارْ إِتّْغِيڒْ نتَّا ذ أَمِيغِيسْ

ذِي ثِيطَّاوِينْ نّسْ.

٦ أَمْ ونِّي إِتّْقسّنْ إِضَارنْ ن يِيخفْ نّسْ

ؤُ أَمْ ونِّي إِسسّنْ لْعُونْفْ،

أَمُّو إِ يدْجَا ونِّي إِسّكَّانْ ثِيبْرَاثِينْ

س ؤُفُوسْ ن إِجّْ ن ؤُبُوهَاڒِي.

٧ ثِيمسَّاضِينْ ن ؤُنعْضَابْ أَرهْفنْثْ،

أَمُّو إِ يدْجَا ؤُڒَا ذ أَوَاڒْ إِوزْننْ

ذڭْ ؤُقمُّومْ ن إِبُوهَاڒِييّنْ.

٨ أَمْ ونِّي إِتّْشدَّانْ

أَژْرُو إِغْڒَانْ ذڭْ إِدْجِييْ،

أَمُّو إِ إِدْجَا ونِّي إِتّڭّنْ شَّانْ إِ ؤُبُوهَاڒِي.

٩ أَمْ إِشْثْ ن ثِيونْثْ ن ثْزڭّْوَارْثْ

د-إِڭّعّْذنْ ذڭْ ؤُفُوسْ ن ؤُسْكَارْجِي،

أَمُّو إِ إِدْجَا لْمَاثَالْ

ذڭْ ؤُقمُّومْ ن إِبُوهَاڒِييّنْ.

١٠ أَطَّاسْ إِزمَّارْ أَذْ د-إِسُّوفّغْ

مَارَّا زڭْ يِيخفْ نّسْ،

مَاشَا ڒْْمُونثْ ن ؤُبُوهَاڒِي

ذ ونِّي ث غَا إِشْرَانْ، أَذْ خْسَارنْ.

١١ أَمْ إِجّْ ن وقْزِينْ إِعقْبنْ غَارْ مِينْ إِعُوقّْ،

أَمُّو إِ إِتّْعَاوَاذْ إِجّْ ن ؤُبُوهَاڒِي

ثُوبُّوهڒْيَا نّسْ. ◘

١٢ مَا ثژْرِيضْ عمَّارْصْ إِجّْ ن ورْيَازْ

إِ إِتّڭّنْ إِخفْ نّسْ ذ أَمِيغِيسْ؟

أَقَا ذِينْ ڒَْايَاسْ أَطَّاسْ إِ يِيجّْ ن ؤُبُوهَاڒِي

ؤُڒَا خَاسْ. ◘

١٣ أَمعْڭُوزْ إِقَّارْ:

”أَقَا ذِينْ إِجّْ ن وَايْرَاذْ إِزهَّارنْ

ذڭْ وبْرِيذْ،

إِجّْ ن ويْرَاذْ يُويُورْ ذڭْ وَازَّاينْ!“ ◘

١٤ أَمْ ثوَّارْثْ ثتُّونُّوضْ إِ ثغْمَارْثْ نّسْ،

أَمُّو إِ إِتُّونُوضْ ؤُڒَا ذ أَمعْڭُوزْ

ذِي قَامَا نّسْ.

١٥ أَمعْڭُوزْ إِسّْنُوفَّارْ أَفُوسْ نّسْ ذِي طّبْصِي،

أَقَا نتَّا يَارْخُو مَاحنْذْ أَذْ ث إِسِّيوضْ

غَارْ ؤُقمُّومْ نّسْ. ◼ ◘

١٦ أَمعْڭُوزْ إِتّْوَاڒَا إِخفْ نّسْ ذ أَمِيغِيسْ،

زِي سبْعَا إِرْيَازنْ نِّي إِزمَّارنْ

أَذْ د-أَرّنْ س ڒفْهَامثْ.

١٧ أَمْ ونِّي إِتّْشبَّارنْ

ذڭْ إِمزُّوغنْ ن وقْزِينْ،

أَمُّو إِ يدْجَا ونِّي إِتَّاذْفنْ

ذڭْ ؤُمْشُوبّشْ نِّي وَارْ إِدْجِي نّسْ.

١٨ أَمْ إِجّْ ن ؤُمجْنُونْ

نِّي إِشَّاثنْ إِصفْضَاونْ

ذ فْڒِيثْشَاثْ ذ سّمْ إِنقّنْ،

١٩ أَمُّو إِ إِدْجَا ورْيَازْ نِّي إِشمْثنْ جَّارْ نّسْ،

ؤُشَا إِقَّارْ: ”أَقَا تّْقسَّارغْ وَاهَا، نِيغْ لَّا!“

٢٠ مَاڒَا وَارْ إِدْجِي ؤُكشُّوضْ، أَذْ ثخْسِي ثْمسِّي،

ؤُ مَاڒَا وَارْ ذِينْ إِدْجِي ؤُخْبَارْجِي،

يَارسَّا ؤُمْشُوبّشْ. ◘

٢١ أَمْ إِدْجَا ڒفْحمْ إِ ڒفْحمْ إِتّحْذُوذُوقنْ

ذ ؤُكشُّوضْ إِ ثْمسِّي،

أَمُّو إِ يدْجَا إِجّْ ن ورْيَازْ إِتّمْشُوبُّوشنْ،

مَاحنْذْ أَذْ د-إِسْنكَّارْ أَمنْغِي. ◘

٢٢ أَوَاڒنْ ن ؤُخْبَارْجِييْ أَمْ حَالَاوِيثْ،

ثِينِّي هكّْوَانْثْ

ذڭْ إِخَّامنْ ن ذَاخڒْ ن ؤُعذِّيسْ. ◘

٢٣ أَمْ كُوفُّو ن نُّوقَارْثْ خْ ؤُشدْجِيقْ ن ثْڒَاخْثْ،

أَمُّو إِ دْجَانْ إِينْشِيشنْ إِمِيزِيضنْ

ن يِيجّنْ س وُوڒْ ذ أَعفَّانْ.

٢٤ ونِّي ذِي إِدْجَا وشْرَاهْ،

إِسّْنُوفَّارَا إِ-ث س يِيڒسْ نّسْ

مَاشَا ذڭْ وُوڒْ نّسْ إِتّْخَارّصْ ذِي ڒْْغشّْ.

٢٥ مَاڒَا نتَّا إِتّْحشّمْ س ثْمِيجَّا نّسْ،

وَارْ ث تِّيقِّي شَا،

مَاغَارْ سبْعَا ن نّْعَاوَاثْ

أَقَا ذِينْ ذڭْ وُوڒْ نّسْ.

٢٦ ؤُڒَا مَاڒَا إِڒحّفْ وشْرَاهْ نّسْ

ذڭْ وشْمَاثْ،

ثُوعفّْنَا نّسْ أَذْ ثتّْوَاعَارَّا

ذڭْ وڭْرَاوْ ن ڒْْڭنْسْ.

٢٧ ونِّي إِغْزِينْ إِجّْ ن وحْفُورْ ن ثُورْصُوضِي،

أَذْ ذَايسْ إِوْضَا سِيمَانْثْ نّسْ

ؤُ ثَاصْضَارْثْ أَذْ د-ثذْوڒْ

غَارْ ونِّي ت إِسّقْنُونُّوينْ. ◘

٢٨ إِڒسْ إِسّْخَارِّيقنْ

إِشَارّهْ ونِّي إِتَّاردّْدْجنْ،

إِجّْ ن ؤُقمُّومْ أَڒقَّاغْ س ثحْرَايْمشْثْ

إِتَّاوِي-د ڒْْخَارْبثْ.

◼٢٦:٢ 26:‏2 ’ژَّاوشْ‘ - نِيغْ ’أَفْرُوخْ‘.

◘٢٦:٣ 26:‏3 إِزهد. 32‏:‏9، 10؛ أَوڒن. 10‏:‏13

◘٢٦:١١ 26:‏11 2 بُط. 2‏:‏22

◘٢٦:١٢ 26:‏12 أَوڒن. 29‏:‏20

◘٢٦:١٣ 26:‏13 أَوڒن. 22‏:‏13

◼٢٦:١٥ 26:‏15 ’أَحْسِينْ‘ - نِيغْ ’أَبحْرُورْ‘.

◘٢٦:١٥ 26:‏15 أَوڒن. 19‏:‏24

◘٢٦:٢٠ 26:‏20 أَوڒن. 22‏:‏10

◘٢٦:٢١ 26:‏21 أَوڒن. 15‏:‏18؛ 29‏:‏22

◘٢٦:٢٢ 26:‏22 أَوڒن. 18‏:‏8

◘٢٦:٢٧ 26:‏27 إِزهد. 7‏:‏16؛ 9‏:‏16؛ 10‏:‏2؛ 57‏:‏7؛ أَمب. 10‏:‏8