٢٥
أَوَاڒنْ إِوزْننْ ن سُولِيمَانْ - ثَاسْغَارْثْ 2
١ ؤُڒَا ذ إِنَا ذ أَوَاڒنْ إِوزْننْ ن سُولِيمَانْ
نِّي إِتّْعَاوَاذنْ ؤُرِينْ ثنْ إِرْيَازنْ ن حِيزْقِييَا،
أَجدْجِيذْ ن يَاهُوذَا.
٢ أَقَا ذ شَّانْ ن أَربِّي
مَاحنْذْ أَذْ إِسَّارْ إِشْثْ ن ثْمسْڒَاشْثْ،
مَاشَا شَّانْ ن إِجدْجِيذنْ
ذ أَبقّشْ ذڭْ إِشْثْ ن ثْمسْڒَاشْثْ. ◘25:2 رُوم. 11:33
٣ ڒُْوعْڒَا ن ؤُجنَّا ذ ڒَْادْجَاغْ ن ثمُّورْثْ،
ذ وُوڒْ ن إِجدْجِيذنْ وَارْ دْجِينْ إِ ؤُبقّشْ.
٤ كّسْ كُوفُّو زِي نُّوقَارْثْ،
أَذْ د-ثفّغْ إِشْثْ نْ ڒْقشْعثْ إِ ومْزِيڒْ.
٥ سْبعّذْ إِعفَّاننْ
زِي زَّاثْ ن وُوذمْ ن ؤُجدْجِيذْ،
خنِّي أَذْ إِتّْوَاسّمْثنْ
ڒْْعَارْشْ نّسْ س ثْسڭْذَا. ◘25:5 أَوڒن. 20:8، 28
٦ وَارْ ثْفيّشْ زَّاثْ إِ وُوذمْ ن ؤُجدْجِيذْ،
وَارْ تّْبذِّي مَانِي تّْبدَّانْ إِمقّْرَاننْ.
٧ مَاغَارْ إِحْڒَا أَذْ أَشْ إِنِينْ: ”ڭعّذْ-د ذَا!“،
ؤُڒَا مَا أَذْ شكْ سّهْوَانْ
زَّاثْ إِ وُوذمْ ن إِجّْ ن ؤُمْشنّعْ
نِّي ژْرِينْثْ ثِيطَّاوِينْ نّشْ. ◘25:7 لك. 14:7-11
٨ وَارْ تّْقدْجِيقْ أَذْ ثذْعِيذْ،
مَاغَارْ مِينْ ثخْسذْ أَذْ ثڭّذْ
غَارْ ؤُنڭَّارْ نّسْ،
مَاڒَا جَّارْ نّشْ أَذْ شكْ إِسّفْضحْ؟ ◘25:8 أَوڒن. 18:17
٩ شَارّعْ أَكْ-ذ جَّارْ نّشْ،
مَاشَا وَارْ سُّوفُّوغْ سِّيرّْ ن ونّغْنِي،
١٠ حِيمَا ونِّي ذ أَسْ إِتّسْڒَانْ
وَارْ شكْ إِسّْحشّمْ شَا،
مَاغَارْ ڒخْذنِّي وَارْ إِزمَّارْ
أَذْ ثتّْوَاسّْبعّذْ ڒفْضِيحثْ نّشْ عَاذْ.
١١ أَمْ تّفَّاحِينْ ن وُورغْ
خْ طّْبَاسَا ن نُّوقَارْثْ،
أَمُّو دْجَانْ وَاوَاڒنْ سِّيوْڒنْ ثنْ
س ڒقْيَاسْ نّسْ.
١٢ أَمْ إِشْثْ ن ثْخَاذنْثْ ن وُورغْ
ؤُ أَمْ إِشْثْ ن ثْسدّشْثْ ن وُورغْ إِغْڒَانْ قَاعْ،
أَمُّو إِ إِدْجَا ؤُوبّخْ أَمِيغِيسْ
غَارْ ؤُمزُّوغْ إِتّسْڒَانْ.
١٣ أَمْ وذْفڒْ أَسمَّاضْ
ذڭْ إِجّْ ن وَاسّْ ن ثْميْرَا،
أَمُّو إِ إِدْجَا ؤُمْسخَّارْ ذَايسْ ڒَْامَانْ
إِ ونِّي ث إِسّكَّانْ،
مَاغَارْ إِسّْفَاقَا ڒعْمَارْ ن بَابْ نّسْ. ◘25:13 أَوڒن. 13:17
١٤ أَمْ إِسيْنُوثنْ ذ ؤُسمِّيضْ بْڒَا أَنْژَارْ،
أَمُّو أَرْيَازْ نِّي إِتّْعفَّارْ
ذڭْ إِشْثْ ن ثرْزفْثْ وَارْ إِسكّْوِينْ.
١٥ س تَّاسِيعْ ن ڒْْخَاضَارْ إِتّْوَاسّقْنعْ ڒْْحَاكمْ،
إِجّْ ن يِيڒسْ أَمِيژِيذْ إِتَّارژَّا إِغْسَانْ. ◘25:15 أَوڒن. 15:1؛ 16:14
١٦ مَاڒَا ثُوفِيذْ ثَامّنْثْ،
أشّْ مِينْ ثحْوَاجذْ وَاهَا،
نِيغْ أَذْ ثَافّْ ثشِّيذْ كْثَارْ زِي مِينْ ثحْوَاجذْ،
ؤُ بَالَاكْ أَذْ ت-إِ-د ثْعُوقّذْ.
١٧ وَارْ سّْرُوسَا أَضَارْ نّشْ
أَطَّاسْ ذِي ثَادَّارْثْ ن جَّارْ نّشْ،
نِيغْ أَذْ شكْ إِجِّيونْ ؤُ أَذْ شكْ إِعِيفّْ.
١٨ أَمْ وفْضِيسْ ذ سِّيفْ ذ فْڒِيثْشَا إِقضْعنْ،
أَمُّو إِ إِدْجَا ورْيَازْ نِّي إِشهّْذنْ
س ژُورْ خْ جَّارْ نّسْ. ◘25:18 إِزهد. 11:2؛ 57:5؛ 59:8؛ 120:4؛ أَوڒن. 12:18
١٩ أَمْ ثِيغْمسْثْ يَارْژنْ
ؤُ أَمْ ؤُضَارْ إِنْقْرَاضنْ،
أَمُّو إِ إِدْجَا ؤُثشْڒِي
خْ ونِّي وَارْ ذِي إِدْجِي تِّيقثْ
ذڭْ وَاسّْ ن ڒحْصَارثْ.
٢٠ أَمْ ونِّي إِتّكّْسنْ أَپَارْثسُّو نّسْ
ذڭْ إِجّْ ن وَاسّْ إِسْمضْ
ؤُ أَمْ ڒْْخدْجْ إِ تّڭّنْ خْ نِيطْرُونْ،
أَمُّو إِ إِدْجَا ونِّي إِتّْغنَّاجنْ إِزْڒَانْ
زَّاثْ إِ يِيجّنْ س وُوڒْ إِشْضنْ. ◘25:20 رُوم. 12:15
٢١ مَاڒَا إِدْجُوژْ ونِّي شكْ إِشَارّْهنْ،
خنِّي أوْشْ أَسْ أَغْرُومْ،
مَاڒَا إِفُّوذْ، أوْشْ أَسْ أَذْ إِسُو، ◘25:21 ؤُف. 23:4، 5؛ رُوم. 12:20
٢٢ مَاغَارْ أَمُّو إِ ثْيَارّْوذْ
ڒفْحمْ إِتّحْذُوذُوقنْ خْ ؤُزدْجِيفْ نّسْ،
ؤُ سِيذِي أَذْ شكْ إِخدْجصْ.
٢٣ أَسمِّيضْ زِي شَّامَالْ إِتَّاوِي-د أَنْژَارْ،
إِڒسْ أَغدَّارْ إِتَّاوِي-د ؤُذْمَاونْ إِخيّْقنْ.
٢٤ إِحْڒَا أَذْ ثْزذْغذْ
ذڭْ إِشْثْ ثغْمَارْثْ ن ثْزقَّا،
ؤُڒَا خْ ثَازذِّيغْثْ
أَكْ-ذ إِشْثْ ن ثمْغَارْثْ إِتّمْشُوبُّوشنْ
ذڭْ إِشْثْ ن ثَادَّارْثْ ثْشَارْشْ. ◘25:24 أَوڒن. 21:9، 19
٢٥ أَمْ وَامَانْ إِصمَّاضنْ
إِ يِيجّْ ن ڒعْمَارْ يُوحڒْ،
أَمُّو إِ إِدْجَا ڒخْبَارْ أَصبْحَانْ
زڭْ إِشْثْ ن ثمُّورْثْ ثِيڭّْوجْ.
٢٦ أَمْ إِجّْ ن ڒْْعُونْصَارْ إِتّْوَافسْذنْ
ؤُ أَمْ إِجّْ ن وَانُوغشّنْ ث،
أَمُّو إِ إِدْجَا ؤُمْسڭّذْ إِتّْزعْزِيعنْ
زَّاثْ إِ وُوذمْ ن إِعفَّاننْ.
٢٧ مَاشَّا ن وَاطَّاسْ ن ثَامّنْثْ
وَارْ إِدْجِي شَا مْلِيحْ،
مَاشَا ثَارزُّوثْ
ذِي ثْمسْڒَايِينْ يوْعَارنْ ذ شَّانْ.
٢٨ أَمْ إِشْثْ ن ثنْذِينْثْ إِهذْمنْ بْڒَا ڒْْحِيضْ،
أَمُّو إِ إِدْجَا إِجّْ ن ورْيَازْ
وَارْ إِتّطّفْ بُوحْبڒْ نّسْ. ◘25:28 أَوڒن. 16:32
◘٢٥:٢ 25:2 رُوم. 11:33
◘٢٥:٥ 25:5 أَوڒن. 20:8، 28
◘٢٥:٧ 25:7 لك. 14:7-11
◘٢٥:٨ 25:8 أَوڒن. 18:17
◘٢٥:١٣ 25:13 أَوڒن. 13:17
◘٢٥:١٥ 25:15 أَوڒن. 15:1؛ 16:14
◘٢٥:١٨ 25:18 إِزهد. 11:2؛ 57:5؛ 59:8؛ 120:4؛ أَوڒن. 12:18
◘٢٥:٢٠ 25:20 رُوم. 12:15
◘٢٥:٢١ 25:21 ؤُف. 23:4، 5؛ رُوم. 12:20
◘٢٥:٢٤ 25:24 أَوڒن. 21:9، 19
◘٢٥:٢٨ 25:28 أَوڒن. 16:32