أَذْلِيسْ إِقدّْسنْ إِزهِّيذنْ ٧

١ إِزْڒِي ن ذَاوُوذْ ذڭْ وَاطَّاسْ ن ثْمِيجِّيوِينْ، إِزْڒِي نِّي إِغنّجْ إِ سِيذِي ذِي سِّيبّثْ ن وَاوَاڒنْ ن كُوشْ، ونِّي إِدْجَانْ زڭْ أَيْثْ ن بِينْيَامِينْ.

٢ أَ سِيذِي، أَربِّي إِنُو،

أَقَا غَاركْ أَركّْوَاڒغْ!

سنْجمْ أَيِي زِي مَارَّا إِنِّي خَافِي إِتَّاژّْڒنْ

ؤُشَا فكّْ أَيِي،

٣ مَاحنْذْ نتَّا وَارْ ذ أَيِي إِزعّفْ

أَمْ ويْرَاذْ،

أَذْ أَيِي إِمزّقْ،

ڒَْامِي وَارْ ذِينْ وِي غَا إِفكّنْ!

٤ أَ سِيذِي، أَربِّي إِنُو،

مَاڒَا نشّْ ڭِّيغْ مَانْ أَيَا،

مَاڒَا ذِينْ شَا ن ڒْْغشّْ إِڒْصقْ

ذڭْ إِفَاسّنْ إِنُو، ◘

٥ مَاڒَا نشّْ خڒْفغْ

ونِّي أَكِيذِي إِدَّارنْ ذِي ڒهْنَا س ڒْْغَارْ،

- مَاشَا س ڒْْعكْسْ ونِّي ذ أَيِي إِحصَّارنْ خْ وَالُو،

جِّيغْ ث أَذْ يُويُورْ -

٦ أجّْ خنِّي أَذْ يَاژّڒْ ڒعْذُو خْ ڒعْمَارْ إِنُو،

أَذْ أَيِي إِعْذُو،

أَذْ إِعْفسْ خْ ثُوذَارْثْ إِنُو ذِي ثمُّورْثْ،

أجّْ إِ-ث أَذْ إِسّزْذغْ أَعُودْجِي إِنُو ذِي ثْعجَّاجْثْ!

سِيلَاهْ.

٧ كَّارْ-د، أَ سِيذِي، ذڭْ وغْضَابْ نّشْ،

سُوعْڒَا إِخفْ نّشْ خْ ؤُذُوقّزْ

ن يِينِّي ذ أَيِي إِحصَّارنْ،

فَاقْ ذِي طّْوعْ إِنُو،

أَقَا ثڭِّيذْ ثُومُورذْ ڒْْحقّْ.

٨ أَڭْرَاوْ ن ڒڭْنُوسْ أَذْ أَشْ د-إِنّضْ،

خنِّي ذْوڒْ ثِيوَا نْسنْ غَارْ سنّجْ.

٩ سِيذِي أَذْ إِحَاكمْ ڒڭْنُوسْ.

أَغْ أَيِي ثَاسْغَارْثْ، أَ سِيذِي،

عْلَاحْسَابْ ثَاسڭْذَا إِنُو،

عْلَاحْسَابْ ڒكْمَارثْ إِ ذَايِي.

١٠ سْبدّْ ثُوعفّْنَا ن إِعفَّاننْ،

سمْثنْ أَمْسڭّذْ،

شكْ، ونِّي إِقدْجْبنْ ؤُڒَاونْ ذ ثِيژَّاڒْ،

أَ أَربِّي إِسڭّْذنْ! ◼ ◘

١١ ثَاسدَّارْثْ إِنُو إِ ؤُسڒْقِي غَارْ أَربِّي،

أَمْسنْجمْ ن إِمْسڭّْمنْ ن وُوڒَاونْ.

١٢ أَربِّي ذ إِجّْ ن ڒْْقَاضِي إِسڭّْذنْ،

أَربِّي نِّي إِسخّْضنْ كُوڒْ أَسّْ. ◘

١٣ مَاڒَا نتَّا وَارْ د-إِعْقِيبْ،

أَذْ إِسّقْضعْ نتَّا سِّيفْ نّسْ،

أَذْ إِمْحضْ ڒْْقوْسْ نّسْ

ؤُشَا أَذْ خَاسْ إِنيّشْ.

١٤ إِڭَّا خَاسْ ڒسْنَاحْ إِنقّنْ،

أَذْ يَارّْ فْڒِيثْشَاثْ نّسْ

ذ إِصفْضَاونْ يَارقّنْ.

١٥ خْزَارْ، أَقَا وْضَانْ-د خَاسْ

ڒوْجعْ ن ثَارُوثْ ن ڒْْمُوعْصِييّثْ،

إِكْسِي دّيْسثْ ن ثَامَارَا

ؤُشَا أَذْ يَارُو إِخَارِّيقنْ. ◘

١٦ إِقَّازْ إِجّْ ن وحْفُورْ ؤُشَا إِسُّودْجغْ إِ-ث،

مَاشَا ذ نتَّا س يِيخفْ نّسْ إِ إِوْضَانْ

ذڭْ وحْفُورْ ن ثُورْصُوضِي إِ إِڭَّا. ◘

١٧ ثَامَارَا نّسْ أَذْ د-ثذْوڒْ

خْ ؤُزدْجِيفْ نّسْ،

ڒخْشُونثْ نّسْ أَذْ د-ثهْوَا

خْ ؤُشقُّوفْ نّسْ.

١٨ أَذْ قَاذِيغْ سِيذِي عْلَاحْسَابْ ثَاسڭْذَا نّسْ،

أَذْ زهّْذغْ إِ يِيسمْ ن سِيذِي، أَمْعُودْجِي خْ كُوڒْشِي.

◘٧:٤ 7:‏4 أَيُوبْ 31‏:‏1‏-‏34؛ إِزهد. 15‏:‏2‏-‏5

◼٧:١٠ 7:‏10 ’ثِيژَّاڒْ‘ - نِيغْ ’ثِيڭژْڒِينْ‘.

◘٧:١٠ 7:‏10 1 إِم. 28‏:‏9؛ إِرْم. 11‏:‏20؛ 17‏:‏10؛ 20‏:‏12؛ أَسَا. 2‏:‏23

◘٧:١٢ 7:‏12 أَسَا. 16‏:‏

◘٧:١٥ 7:‏15 أَيُوبْ 15‏:‏35؛ إِشا. 59‏:‏4

◘٧:١٦ 7:‏16 أَيُوبْ 4‏:‏8؛ إِزهد. 9‏:‏16؛ 10‏:‏2؛ أَوڒن. 5‏:‏22؛ 26‏:‏27؛ أَمب. 10‏:‏8