أَذْلِيسْ إِقدّْسنْ إِزهِّيذنْ ١٦

١٦

١ ثِيرَا إِنقْشنْ. ن ذَاوُوذْ.

حْضَا خَافِي، أَ أَربِّي،

مَاغَارْ نشّْ أَركّْوَاڒغْ غَاركْ.

٢ ڒعْمَارْ إِنُو ثنَّا إِ سِيذِي:

”شكْ ذ سِيذِي إِنُو،

شكْ ذ ڒْْخَارْ إِنُو، وَارْ ذِينْ مِينْ خَاكْ يُوعْڒَانْ!“ ◘

٣ خْ إِمْقدَّاسنْ إِ إِزدّْغنْ خْ ثمُّورْثْ،

نِيثْنِي ذ أَيْثْ ن جّهْذْ

زِي سِّيبّثْ ن مَارَّا أَرْضَا إِنُو إِ ذَايْسنْ إِدْجَانْ.

٤ ثَامَارَا ن يِينِّي إِضفَّارنْ أَمُّو ذغْيَا

إِجّْ ن أَربِّي نّغْنِي أَذْ تّْوَاكْثَارنْثْ.

نشّْ وَارْ تّْفَارِّيغغْ ثَاوْهِيبْثْ نْسنْ

ن ؤُسيّبْ ن إِذَامّنْ،

وَارْ تِّيذَارغْ إِسْمَاونْ نْسنْ

خْ إِينْشِيشنْ إِنُو.

٥ سِيذِي ذ ثَاسْغَارْثْ إِنُو ذ ڒْْكَاسْ إِنُو.

شكْ ثطّْفذْ ثَاقدُّوحْثْ إِنُو ذڭْ ؤُفُوسْ نّشْ. ◘

٦ إِفِيڒَانْ ن ڒعْبَارْ كَّارنْ أَيِي-د

ذڭْ إِمُوشَانْ إِصبْحنْ،

وَاهْ، ثَاسْغَارْثْ إِنُو أَقَا ثُوسَا-د خَافِي مْلِيحْ.

٧ أَذْ بَارْكغْ سِيذِي، ونِّي ذ أَيِي إِنصْحنْ.

ؤُڒَا س دْجِيڒثْ سّْڒمْذنْثْ أَيِي ثِيژَّاڒْ إِنُو. ◼

٨ تّڭّغْ سِيذِي ڒبْذَا جَارْ ثِيطَّاوِينْ إِنُو.

ؤُمِي نتَّا إِدْجَا خْ ؤُفُوسْ أَفُوسِي إِنُو،

نشّْ وَارْ تّفْشِيرغْ. ◘

٩ س ؤُيَا إِفَارّحْ ؤُڒْ إِنُو،

إِتَّارْشِيقْ ڒعْمَارْ إِنُو.

وَاهْ، ؤُڒَا ذ دَّاثْ إِنُو أَذْ إِدَّارْ س ڒَْامَانْ.

١٠ مَاغَارْ شكْ وَارْ ثْسمّْحذْ شَا

ذِي ڒعْمَارْ إِنُو ذِي ڒَْاخَارْثْ،

وَارْ ثتَّارِّيذْ أَمْثِيقِّي نّشْ أَذْ إِكِيشُّو. ◘

١١ شكْ أَذْ أَيِي ثسّشْنذْ أَبْرِيذْ ن ثُوذَارْثْ،

ثْيَاوَانْثْ زِي ڒفْرَاحثْ

أَقَا-ث زَّاثْ إِ وُوذمْ نّشْ،

نِّيعْمَاثْ أَقَا أَثنْثْ ذڭْ ؤُفُوسْ نّشْ إِ ڒبْذَا.

◘١٦:٢ 16:‏2 أَيُوبْ 22‏:‏2؛ 35‏:‏7؛ رُوم. 11‏:‏35

◘١٦:٥ 16:‏5 إِڭجذ. 3‏:‏24

◼١٦:٧ 16:‏7 ’ثِيژَّاڒْ‘ - نِيغْ ’ثِيڭژْڒِينْ‘.

◘١٦:٨ 16:‏8 ڒخ. 2‏:‏25

◘١٦:١٠ 16:‏10 إِزهد. 49‏:‏10؛ ڒخ. 2‏:‏31؛ 13‏:‏35