٣١
١ إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.
٢ نشّْ أَركّْوَاڒغْ غَاركْ، أَ سِيذِي،
وَارْ تّجِّي أَذْ سضْحِيغْ إِ ڒبْذَا،
فكّْ أَيِي س ثْسڭْذَا نّشْ. ◘31:2 إِزهد. 22:6؛ 25:2، 3؛ 71:1، 2؛ إِشا. 49:23
٣ أوْشْ أَيِي أَمزُّوغْ نّشْ، فكّْ أَيِي ذغْيَا.
إِڒِي ذ ثَاصْضَارْثْ إِجهْذنْ إِ نشّْ،
إِجّْ ن لْبُورْجْ حِيمَا أَذْ أَيِي ثسّْنجْمذْ.
٤ مَاغَارْ شكْ ذ ثَاصْضَارْثْ إِنُو ذ لْبُورْجْ إِنُو.
نْذهْ أَيِي، ثْهِيلَّا ذَايِي
ذِي طّْوعْ ن يِيسمْ نّشْ.
٥ فكّْ أَيِي زِي ثْرَاشَّا
نِّي خَافِي ڭِّينْ س ثْنُوفّْرَا،
مَاغَارْ شكْ ذ جّهْذْ إِنُو.
٦ ذڭْ ؤُفُوسْ نّشْ إِ ڭِّيغْ بُوحْبڒْ إِنُو.
شكْ ثفْذِيذْ أَيِي، أَ سِيذِي، أَربِّي،
ذ أَمْثِيقِّي إِ ثدْجِيذْ. ◘31:6 لك. 23:46
٧ نشّْ شَارّْهغْ إِنِّي إِتّْشغْڒنْ إِخفْ نْسنْ
س ڒخْيَاڒَاثْ إِبطّْڒنْ.
نشّْ تّشْڒغْ خْ سِيذِي.
٨ نشّْ أَذْ أَرشْقغْ ؤُ أَذْ فَارْحغْ
زِي ثْمخْسِيوْثْ نّشْ إِشوَّارنْ،
مِينْزِي شكْ ثتّْوَاڒِيذْ ڒغْبنْ إِنُو
ؤُ ثَارڭّْبذْ خْ ڒحْصَارَاثْ إِنُو،
٩ مِينْزِي وَارْ ذ أَيِي ثَارِّيذْ
غَارْ ؤُفُوسْ ن ڒعْذُو إِنُو،
مَاشَا ثڭِّيذْ أَيِي تَّاسِيعْ غَارْ إِضَارنْ إِنُو.
١٠ حِينّْ خَافِي، أَ سِيذِي، مَاغَارْ تّْوَاحصَّارغْ،
ثِيطّْ إِنُو ذ ڒعْمَارْ إِنُو ذ ثكْرِيشْثْ إِنُو
أَقَا فشْڒنْ.
١١ مَاغَارْ ثُوذَارْثْ إِنُو ثْكمّڒْ س وشْضَانْ،
إِسڭّْوُوسَا إِنُو س ؤُزهَّارْ.
جّْهذْ إِنُو إِهيّفْ زِي ڒْْمُوعْصِييّثْ إِنُو،
إِخْسَانْ إِنُو أَقَا أَرْشَانْ.
١٢ إِ مَارَّا إِنِّي ذ أَيِي إِحصَّارنْ
ذوْڒغْ ذ أَسْثهْزِي،
إِ جِّيرَانْ إِنُو قَاعْ أَطَّاسْ،
إِ يِينِّي ذ أَيِي إِسّْننْ
ذوْڒغْ ذ إِجّنْ إِ إِسّْنخْڒِيعنْ.
إِنِّي ذ أَيِي إِتّْوَاڒِينْ ذڭْ وبْرِيذْ،
تّْرَاكّْوَاڒنْ زَّايِي. ◘31:12 أَيُوبْ 19:13؛ إِزهد. 38:12
١٣ تُّونْ أَيِي س وُوڒْ أَمْ يِيجّْ ن ؤُمتِّينْ،
ذوْڒغْ أَمْ يِيشقْفَانْ ن وقْذِيحْ،
١٤ مَاغَارْ سْڒِيغْ أَقَا أَطَّاسْ شقّْفنْ ذَايكْ،
أَسِّيڭّْوذْ ثُوغَا إِتّنّضْ أَيِي-د
ؤُمِي خَافِي ڭِّينْ ثَامعْمُوتْشْ.
ثُوغَا أَرزُّونْ أَذْ كّْسنْ ثُوذَارْثْ إِنُو.
١٥ مَاشَا نشّْ تّشْڒغْ خَاكْ، أَ سِيذِي،
قَّارغْ: ’شكْ ذ أَربِّي إِنُو!‘
١٦ ڒْْوقْثْ إِنُو أَقَا-ت ذڭْ ؤُفُوسْ نّشْ.
فكّْ أَيِي زڭْ ؤُفُوسْ ن ڒْْعذْيَانْ إِنُو
ؤُ زڭْ إِنِّي ذ أَيِي إِضفَّارنْ،
١٧ أجّْ ؤُذمْ نّشْ أَذْ يَارْغْ
خْ ؤُمْسخَّارْ نّشْ،
سنْجمْ أَيِي س ثْمخْسِيوْثْ نّشْ إِشوَّارنْ.
١٨ أَ سِيذِي، وَارْ تّجِّي أَذْ ذوْڒغْ تّْسضْحِيغْ،
مَاغَارْ خَاكْ إِ تّْڒَاغِيغْ.
أَرّْ إِعفَّاننْ أَذْ ذوْڒنْ تّْسضْحَانْ،
أَرّْ إِ-ثنْ أَذْ سُّوسْمنْ ذِي ڒَاخَارْثْ.
١٩ أجّْ أَذْ سْقَارنْ إِينْشِيشنْ إِسّْخَارِّيقنْ،
إِنِّي إِسَّاوَاڒنْ س نّْفَاخثْ
ضِيدّْ إِ ؤُمْسڭّذْ،
س ؤُعفَّارْ ذ ؤُسحْقَارْ.
٢٠ مشْحَاڒْ إِمقَّارْ ڒْْخَارْ نّشْ إِ ثْخمّْڒذْ
إِ يِينِّي شكْ إِتّڭّْوذنْ،
نِّي ثسّْوجْذذْ إِ يِينِّي غَاركْ يَاركّْوَاڒنْ
زِي ثَارْوَا ن بْنَاذمْ! ◘31:20 إِشا. 64:3؛ 1 كُور. 2:9
٢١ شكْ ثسّْذُورُّويذْ إِ-ثنْ س ؤُڒحَّافْ
ن وُوذمْ نّشْ،
زِي نّْفَاخثْ ن بْنَاذمْ.
شكْ ثسّْنُوفَّارذْ إِ-ثنْ ذِي ثخْزَانْثْ،
زڭْ ؤُمْشُوبّشْ ن إِينْشِيشنْ.
٢٢ أَذْ إِتّْوَابَاركْ سِيذِي،
مَاغَارْ نتَّا يَارَّا أَيِي-د
ثَامخْسِيوْثْ نّسْ إِشوَّارنْ ذ ڒعْجبْ،
ذڭْ إِشْثْ ن ثنْذِينْثْ إِفَارْينْ.
٢٣ نشّْ ذغْيَا نِّيغْ:
”نشّْ تّْوَاقسّغْ
زِي زَّاثْ إِ ثِيطَّاوِينْ نّشْ!‘
مَاشَا عَاذْ شكْ ثسْڒِيذْ إِ ثْمِيجَّا إِنُو،
ؤُمِي د خَاكْ ڒَْاغِيغْ. ◘31:23 يُون. 2:5
٢٤ سْعِيزّمْ سِيذِي، مَارَّا إِمْثِيقَّانْ نّسْ،
مَاغَارْ سِيذِي إِحطَّا خْ يِينِّي إِتَّامْننْ،
ؤُ ونِّي إِتّڭّنْ س نّْفَاخثْ،
إِتّْخدْجصْ إِ-ث س أَطَّاسْ.
٢٥ إِڒِيمْ ذ إِرْيَازنْ
ؤُ نتَّا أَذْ ذَايْومْ يڭّْ ؤُڒْ،
وَاهْ، مَارَّا إِنِّي إِتّْرَاجَانْ سِيذِي. ◘31:25 إِزهد. 27:14