32
1 ن ذَاوُوذْ. أَخمِّي.
سّعْذْ ن ونِّي
ؤُمِي ثتّْوَاغْفَارْ ثْعذِّيثْ نّسْ،
ونِّي ؤُمِي ذْڒِينْ خْ دّْنُوبْ نّسْ. ◘32:1 رُوم. 4:6، 7
2 سّعْذْ ن ورْيَازْ
ونِّي ؤُمِي وَارْ إِحصّبْ سِيذِي
ڒْمُوعْصِييّثْ نّسْ،
ونِّي غَارْ إِدْجَا بُوحْبڒْ وَارْ ذَايسْ بُو ڒْغشّْ.
3 ؤُمِي سْقَارغْ، أَرْشَانْ إِغْسَانْ إِنُو،
س ؤُزهَّارْ إِنُو، أَسّْ مَارَّا.
4 مَاغَارْ أَسّْ ذ دْجِيڒثْ
إِسّذْقڒْ أَيِي ؤُفُوسْ نّشْ،
إِذَامّنْ ن ثُوذَارْثْ إِنُو ذوْڒنْ
أَمْ ڒَاژَاغْ ن ؤُنبْذُو. سِيلَاهْ.
5 سَّارڭْبغْ أَشْ دّنْبْ إِنُو،
وَارْ سّْذُورْيغْ ڒْمُوعْصِييّثْ إِنُو.
نشّْ نِّيغْ:
”أَذْ نعْمغْ خْ إِخطَّانْ إِنُو غَارْ سِيذِي!“،
خنِّي شكْ ثغْفَارذْ أَيِي
ڒْمُوعْصِييّثْ ن دّنْبْ إِنُو. سِيلَاهْ. ◘32:5 أَوڒن. 28:13؛ 1 يُوح. 1:9
6 س ؤُينِّي مَارَّا أَمْثِيقِّي أَذْ أَشْ إِسْجذْ
ذِي ڒْوقْثْ ؤُمِي غَا ثجّذْ بْنَاذمْ
أَذْ شكْ يُوفَا.
خْمِي ذِينْ إِشْثْ ن سّحْڒثْ ن وَامَانْ أَطَّاسْ،
وَارْ ث ثْڒقّفْ قَاعْ.
7 شكْ ذ أَمْشَانْ ن ؤُذُورِّي إِ نشّْ،
ثسَّارذْ أَيِي زِي ڒحْصَارثْ،
ثْقُووَّارذْ أَيِي
س إِغُويَّانْ ن ڒفْرَاحثْ ن ؤُفكِّي. سِيلَاهْ. ◘32:7 إِزهد. 27:5؛ 31:21
8 نشّْ أَذْ شكْ وْشغْ ڒفْهَامثْ
ؤُشَا أَذْ أَشْ سّْڒمْذغْ
أَبْرِيذْ إِتّْخصَّا أَذْ ذَايسْ ثُويُورذْ.
نشّْ أَذْ شكْ وصِّيغْ، أَذْ خَاكْ ثِيڒِي ثِيطّْ إِنُو.
9 وَارْ تِّيڒِي أَمْ ؤُيِيسْ،
أَمْ ؤُسَارْذُونْ بْڒَا ڒعْقڒْ،
نِّي إِتّْخصَّا أَذْ ثنْ قمّْعنْ
س سّْرِيمثْ ذ ورْيَامْ،
نِيغْ وَارْ إِزمَّارْ أَذْ غَاركْ د-إِقَارّبْ. ◘32:9 أَوڒن. 26:3؛ يَاع. 3:3
10 أَطَّاسْ دْجَانْثْ ثَامَارَا ن ؤُعفَّانْ،
مَاشَا ونِّي إِتّْشَاڒنْ خْ سِيذِي،
أَذْ أَسْ إِقُووَّارْ نتَّا
س ثْمخْسِيوْثْ نّسْ إِشوَّارنْ.
11 فَارْحمْ ذِي سِيذِي، أَرشْقمْ، أَ إِمْسڭَّاذنْ،
سْڒِيوڒْومْ، أَ مَارَّا
إِنِّي غَارْ إِدْجَا وُوڒْ إِسڭّْمنْ!