33
سْڒِيوڒْومْ إِ سِيذِي، أَ إِمْسڭَّاذنْ،
أَصبَّاحْ ذ إِشْثْ ن ثلْوِيزْثْ إِ يِينِّي إِسڭّْمنْ. 33:‏1 إِزهد. 147‏:‏1
قَاذَامْ سِيذِي س ڒْڭَامْبْرِي،
زهّْذمْ أَسْ س لْعُوذْ
ؤُ س لهَارْپَا أَكْ-ذعشْرَا ن إِفِيڒَانْ.
غنّْجمْ أَسْ س يِيجّْ ن يزْڒِي أَمَايْنُو،
إِرَارمْ مْلِيحْ س وسْرُودّحْ ن ڒْبُوقْ. 33:‏3 إِزهد. 40‏:‏4؛ 96‏:‏1؛ 98‏:‏1؛ 144‏:‏9؛ إِشا. 42‏:‏10؛ أَسَا. 5‏:‏9؛ 14‏:‏3
 
مِينْزِي أَوَاڒْ ن سِيذِي إِسڭّمْ،
مَارَّا مِينْ إِتّڭّْ، إِتّڭّْ إِ-ث س ڒَامَانْ.
نتَّا إِتّخْسْ ثَاسڭْذَا ذ ڒْحقّْ.
ثَامُّورْثْ ثشُّورْ
س ثْمخْسِيوْثْ إِشوَّارنْ ن سِيذِي. 33:‏5 إِزهد. 45‏:‏8؛ 119‏:‏64؛ عبر. 1‏:‏9
 
زڭْ وَاوَاڒْ ن سِيذِي تّْوَاڭّنْ إِجنْوَانْ،
زِي أَرُّوحْ ن ؤُقمُّومْ نّسْ
تّْوَاڭّنْثْ مَارَّا ڒْعسْكَارَاثْ نْسنْ. 33:‏6 أَمز. 1‏:‏6، 7
نتَّا إِسّْمُونْ أَمَانْ ن ڒبْحَارْ
أَمْ يِيجّْ ن وغْبَارْ.
نتَّا إِخمّڒْ أَمَانْ إِهوْڒنْ
ذڭْ إِخَّامنْ ن ڒخْزنْ.
 
أَذْ ثڭّْوذْ مَارَّا ثَامُّورْثْ زِي سِيذِي،
أَذْ زَّايسْ ڭّْوذنْ
مَارَّا إِمزْذَاغْ ن دُّونشْثْ.
مَاغَارْ نتَّا إِسَّاوَاڒْ ؤُشَا أَقَا-ث ذِينْ،
نتَّا إِتَّامَارْ ؤُشَا أَذْ يِيڒِي إِبدّْ ذِينْ.
 
10 سِيذِي إِتَّارژَّا شّْوَارْ ن ڒڭْنُوسْ،
إِسّبْضڒْ إِخَارِّيصنْ نْ ڒڭْنُوسْ. 33:‏10 إِشا. 19‏:‏3
11 شّْوَارْ ن سِيذِي أَذْ إِقِّيمْ إِبدّْ إِ ڒبْذَا،
إِخَارِّيصنْ ن وُوڒْ نّسْ زِي جِّيڒْ أَڒْ جِّيڒْ. 33:‏11 أَوڒن. 19‏:‏21؛ 21‏:‏30؛ إِشا. 46‏:‏10
 
12 سّعْذْ ن ڒْڭنْسْ
إِ غَارْ إِدْجَا أَربِّي نّسْ ذ سِيذِي،
ڒْڭنْسْ نِّي إِخْضَارْ إِ-ث نتَّا
ذ ثَاسْغَارْثْ إِ يِيخفْ نّسْ.33:‏12 إِزهد. 65‏:‏5؛ 144‏:‏15
13 سِيذِي إِخزَّارْ-د زڭْ ؤُجنَّا،
إِتّْوَاڒَا مَارَّا ثَارْوَا ن بْنَاذمْ.
 
14 زِي ثْزذِّيغْثْ نّسْ إِمثْننْ إِخزَّارْ
غَارْ مَارَّا إِمزْذَاغْ ن ثمُّورْثْ.
15 نتَّا وحّْذسْ
ذ ونِّي إِكوّْننْ ؤُڒْ نْسنْ،
نتَّا إِحكَّارْ إِ مَارَّا ثِيمڭَّا نْسنْ.
 
16 أَجدْجِيذْ وَارْ إِتّْوَاسّنْجَامْ
س يِيجّْ ن ڒْعسْكَارْ ذ أَمقّْرَانْ،
بُو-ثغْرُوضْثْ وَارْ إِتّْوَافكِّي
س جّهْذْ أَطَّاسْ.
17 أَقَا ذ أَخَارِّيقْ
بلِّي أَيِيسْ أَذْ د-يَاوِي أَسنْجمْ،
عَاذْ س جّهْذْ نّسْ أَمقّْرَانْ
وَارْ د-إِتّنْفكِّي.
 
18 خْزَارْ، ثِيطّْ ن سِيذِي
خْ يِينِّي زَّايسْ إِتّڭّْوذنْ،
خْ يِينِّي إِتّْرَاجَانْ
ثَامخْسِيوْثْ نّسْ إِشوَّارنْ، 33:‏18 أَيُوبْ 36‏:‏7؛ إِزهد. 34‏:‏16؛ 1 بُط. 3‏:‏12
19 حِيمَا أَذْ إِفكّْ ڒعْمَارْ نْسنْ زِي ڒْموْثْ،
حِيمَا أَذْ ثنْ يجّْ قِّيمنْ دَّارنْ ذِي ڒَاژْ.
 
20 ڒعْمَارْ نّغْ إِتّْرَاجَا سِيذِي،
أَقَا نتَّا ذ أَعَاونْ نّغْ
ذ ثَاسدَّارْثْ نّغْ إِ ؤُسڒْقِي.
21 مَاغَارْ زَّايسْ إِفَارّحْ وُوڒْ نّغْ،
مِينْزِي نتّْشَاڒْ خْ يِيسمْ نّسْ إِقدّْسنْ.
22 أَذْ خَانغْ ثَارْسَا
ثْمخْسِيوْثْ نّشْ إِشوَّارنْ، أَ سِيذِي،
أَمْ مَامّشْ إِ شكْ نتّْرَاجَا.
 
 

33:1 33:‏1 إِزهد. 147‏:‏1

33:3 33:‏3 إِزهد. 40‏:‏4؛ 96‏:‏1؛ 98‏:‏1؛ 144‏:‏9؛ إِشا. 42‏:‏10؛ أَسَا. 5‏:‏9؛ 14‏:‏3

33:5 33:‏5 إِزهد. 45‏:‏8؛ 119‏:‏64؛ عبر. 1‏:‏9

33:6 33:‏6 أَمز. 1‏:‏6، 7

33:10 33:‏10 إِشا. 19‏:‏3

33:11 33:‏11 أَوڒن. 19‏:‏21؛ 21‏:‏30؛ إِشا. 46‏:‏10

33:12 33:‏12 إِزهد. 65‏:‏5؛ 144‏:‏15

33:18 33:‏18 أَيُوبْ 36‏:‏7؛ إِزهد. 34‏:‏16؛ 1 بُط. 3‏:‏12