٣٤
١ ن ذَاوُوذْ، ؤُمِي إِسّْنِيعْمِيڒْ، إِڭَّا إِخفْ نّسْ ذ أَبُوهَاڒِي زَّاثْ إِ وُوذمْ ن أَبِيمِيلِيكْ، ونِّي إِ خَاسْ يُوژّْڒنْ أَڒَامِي يُويُورْ نتَّا.◘34:1 1 صم. 21:13
٢ أَلِيفْ. نشّْ خْسغْ أَذْ بَارْكغْ إِ سِيذِي ڒبْذَا،
أَصبِّيحْ نّسْ أَذْ يِيڒِي
ذڭْ ؤُقمُّومْ إِنُو بْڒَا قطُّو.
٣ بِيثْ. ڒعْمَارْ إِنُو أَذْ إِصبّحْ إِ سِيذِي.
إِمْهِيننْ أَذْ أَسْ سْڒنْ ؤُ أَذْ فَارْحنْ.
٤ ڭِيملْ. سمْغَارمْ أَكِيذِي سِيذِي،
أجّْ أَنغْ أَذْ نسُّوعْڒَا إِسمْ نّسْ جْمِيعْ.
٥ ذَالِيثْ. نشّْ أَرْزُوغْ خْ سِيذِي
ؤُ نتَّا يَارَّا-د خَافِي،
إِفكّْ أَيِي زِي مَارَّا إِنّخْڒِيعنْ إِنُو.
٦ هِي. نِيثْنِي خزَّارنْ غَارسْ ؤُشَا شعْشعنْ،
إِغمْبَابْ نْسنْ
وَارْ دِّيكّْوِيڒنْ زوْغنْ
س ؤُسضْحِيعمَّارْصْ.
٧ زَايِينْ. ڒْْمسْكِينْ-أَ ذَانِيثَا إِڒَاغَا
ؤُ سِيذِي إِسْڒَا غَارسْ،
إِفكّْ إِ-ث زِي مَارَّا ڒحْصَارَاثْ نّسْ.
٨ خِيثْ. لْمَالَاكْ ن سِيذِي إِقُووَّارْ س ڒْْمَارْڭحْ نّسْ
خْ يِينِّي ث إِتّڭّْوذنْ،
نتَّا إِفكّْ إِ-ثنْ.
٩ ثِيث. قَاسمْ ؤُشَا خْزَارمْ، أَقَا سِيذِي إِشْنَا.
سّعْذْ ن ورْيَازْ ونِّي غَارسْ يَاركّْوَاڒنْ.
١٠ يُوذْ. ڭّْوذمْ سِيذِي،
أَ كنِّيوْ، إِمْقدَّاسنْ نّسْ،
مَاغَارْ إِنِّي ث إِتّڭّْوذنْ
وَارْ ثنْ إِتّْخصِّي وَالُو.
١١ كَافْ. إِيْرَاذنْ إِمژْيَاننْ تّحْوَاجنْ،
ذَايْسنْ ڒَْاژْ،
مَاشَا إِنِّي يَارزُّونْ خْ سِيذِي،
وَارْ ثنْ إِتّْخصِّي وَالُو
زِي مَارَّا مِينْ إِدْجَانْ ذ ڒْْخَارْ. ◘34:11 أَيُوبْ 4:11
١٢ لَامِيذْ. أَسمْ-د،
أَ، كنِّيوْ إِحنْجِيرنْ، سْڒمْ-د غَارِي!
نشّْ أَذْ أَومْ سّْڒمْذغْ
ثِيڭّْوُوذِي ن سِيذِي.
١٣ مِيمْ. مَانْ ونْ إِ إِدْجَانْ ذ أَرْيَازْ
ونِّي ذِي إِدْجَا مژْرِي ذِي ثُوذَارْثْ،
ونِّي إِتّخْسنْ ؤُسَّانْ ن ثُوذَارْثْ نّسْ
حِيمَا أَذْ إِژَارْ ڒْْخَارْ؟ ◘34:13 1 بُط. 3:10
١٤ نُونْ. مْنعْ إِڒسْ نّشْ زِي ڒْْغَارْ،
ؤُڒَا ذ إِينْشِيشنْ نّشْ زڭْ وَاوَاڒْ نْ ڒْْغشّْ.
١٥ سَامِيخْ. حيّذْ خْ ثُوعفّْنَا ؤُ أڭّْ ڒْْخَارْ،
أَرْزُو خْ ڒهْنَا ؤُ ضْفَارْ إِ-ث.
١٦ عَايِينْ. ثِيطَّاوِينْ ن سِيذِي خْ إِمْسڭَّاذنْ،
إِمزُّوغنْ نّسْ ميّْڒنْ
غَارْ إِغُويَّانْ نْسنْ. ◘34:16 أَيُوبْ 36:7؛ إِزهد. 33:18؛ 1 بُط. 3:12
١٧ بِي. ؤُذمْ ن سِيذِي
ضِيدّْ إِ يِينِّي إِتّڭّنْ ڒْْغَارْ،
حِيمَا أَذْ إِكّسْ ڒِْيذَارثْ ذَايْسنْ زِي ثمُّورْثْ.
١٨ ثْسَاذِي. نِيثْنِي ڒَاغَانْ ؤُ سِيذِي إِسْڒَا غَارْسنْ،
نتَّا إِفكّْ إِ-ثنْ زِي مَارَّا ڒحْصَارَاثْ نْسنْ.
١٩ قُوفْ. سِيذِي يُوذسْ إِ مَارَّا
إِنِّي ؤُمِي إِتّْوَارْژْ وُوڒْ نْسنْ،
إِسّنْجَامْ إِنِّي ؤُمِي إِتّْوَاڒْبزْ بُوحْبڒْ نْسنْ. ◘34:19 2 تِيم. 3:11
٢٠ رِيخْ. أَطَّاسْ إِدْجَانْ إِفقُّوسنْ ن إِمْسڭَّاذنْ،
مَاشَا سِيذِي إِفكّْ إِ-ثنْ زَّايْسنْ مَارَّا. ◘34:20 2 تِيم. 3:12
٢١ شِينْ. نتَّا إِحطَّا إِغْسَانْ نّسْ مَارَّا،
ؤُڒَا ذ إِجّْ زَّايْسنْ وَارْ إِتَّارژِّي. ◘34:21 يُوح. 19:36
٢٢ ثَافْ. أَقَا ڒْْغَارْ أَذْ إِنغْ أَعفَّانْ،
إِنِّي إِشَارّْهنْ أَمْسڭّذْ أَذْ تّْوَاعَاقْبنْ.
٢٣ سِيذِي أَذْ إِفْذِي ڒعْمَارْ ن إِمْسخَّارنْ نّسْ،
مَارَّا إِنِّي غَارسْ يَاركّْوَاڒنْ،
وَارْ تّْوَاعَاقْبنْ. ◼34:23 ’أَذْ إِفْذِي‘ - خْزَارْ ’أَمفْذِي‘ - إِزهد. 78:35.