57
1 إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ. ثِيرَا إِنقْشنْ. ؤُمِي يَارْوڒْ زِي شَاوُولْ ذڭْ إِفْرِي.◘57:1 1 صم. 22:1؛ 24:4
2 حِينّْ خَافِي، أَ أَربِّي، حِينّْ خَافِي،
مَاغَارْ ڒعْمَارْ إِنُو يَاركّْوَاڒْ-د غَاركْ.
نشّْ ؤُفِيغْ أَذُورِّي
ذِي ثِيڒِي ن وَافْرِيونْ نّشْ،
أَڒْ غَا عْذُونْثْ ڒْمُوصِيبَاثْ.
3 نشّْ أَذْ ڒَاغِيغْ غَارْ أَربِّي،
أَمْعُودْجِي خْ كُوڒْشِي،
غَارْ أَربِّي ونِّي ذ أَيِي غَا إِنذْهنْ
غَارْ ؤُنڭَّارْ إِصبْحنْ.
4 نتَّا أَذْ د-إِسّكّْ أَسنْجمْ إِنُو
زڭْ ؤُجنَّا،
أَذْ إِسّْبهْذڒْ ونِّي إِخْسنْ
أَذْ أَيِي إِسَارْضْ. سِيلَاهْ.
أَربِّي أَذْ إِسّكّْ
ثَامخْسِيوْثْ نّسْ إِشوَّارنْ
ذ ڒَامَانْ نّسْ.
5 ڒعْمَارْ إِنُو أَقَا-ث جَارْ إِيْرَاذنْ،
زّْڒغْ جَارْ إِصفْضَاونْ يَارقّنْ،
ثَارْوَا ن بْنَاذمْ، إِنِّي ثِيغْمَاسْ نْسنْ
أَمْ لَانْسَاثْ ذ فْڒِيثْشَاثْ ن ڒْقوْسْ،
إِڒسْ نْسنْ أَمْ يِيجّْ ن سِّيفْ إِقْضعْ.
6 أَ أَربِّي، سْڭعّذْ إِخفْ نّشْ
ثِيوَا إِ إِجنْوَانْ،
أَرّْ أَعُودْجِي نّشْ
سنّجْ إِ مَارَّا ثَامُّورْثْ. ◘57:6 إِزهد. 108:6
7 نِيثْنِي ڭِّينْ ثْرَاشَّا إِ إِصُورَافْ إِنُو،
ڒعْمَارْ إِنُو ثُوغَا إِغْنسْ.
نِيثْنِي غْزِينْ أَيِي أَحْفُورْ،
مَاشَا وْضَانْ ذَايسْ سِيمَانْثْ نْسنْ.
سِيلَاهْ. ◘57:7 إِزهد. 7:16؛ 9:16
8 أَ أَربِّي، ؤُڒْ إِنُو يَاركّنْ،
ؤُڒْ إِنُو يَاركّنْ.
أَقَا نشّْ أَذْغنّْجغْ أَذْ زهّْذغْ. ◘57:8 إِزهد. 108:2-6
9 فَاقْ، أَعُودْجِي إِنُو! فَاقْ،
لْهَارْبَا ذ ڒْڭَامْبْرِي!
نشّْ تّخْسغْ أَذْ سّْفَاقغْ
ثَافَاوْثْ ن ڒفْجَارْ.
10 نشّْ أَذْ شكْ قَاذِيغْ جَارْ ڒڭْنُوسْ،
أَ سِيذِي إِنُو،
أَذْ زهّْذغْ جَارْ شُّوعُوبْ إِ شكْ. ◘57:10 إِزهد. 108:4
11 مَاغَارْ ثَامخْسِيوْثْ نّشْ إِشوَّارنْ
ثتَّاكّْوَاضْ أَڒْ إِجنْوَانْ،
ڒَْامَانْ نّشْ أَڒْ إِسيْنُوثنْ. ◘57:11 إِزهد. 36:6؛ 108:5
12 أَ أَربِّي، سْڭعّذْ إِخفْ نّشْ
ثِيوَا إِ إِجنْوَانْ،
أَرّْ أَعُودْجِي نّشْ
سنّجْ إِ مَارَّا ثَامُّورْثْ.