٥٨
١ إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ. ثِيرَا إِنقْشنْ.
٢ مَا ثسَّاوَاڒمْ س ثِيذتّْ
ثَاسڭْذَا ذڭْ ؤُسغْذِي؟
مَا ثْحكّْممْ ثَارْوَا ن بْنَاذمْ
س ڒْْحقّْ؟
٣ لَّ، مَاشَا ذڭْ وُوڒْ نْومْ
ثتّڭّمْ ڒْْغشّْ،
خْ ثمُّورْثْ ثْوزّْنمْ
لْعُونْفْ ن إِفَاسّنْ نْومْ.
٤ زڭْ وَامِي دْجَانْ ذِي ڒمْڒَاوثْ
فّْغنْ إِعفَّاننْ زڭْ وبْرِيذْ،
زڭْ ؤُعذِّيسْ ن يمَّاثْسنْ
ودَّارنْ أَيْثْ ن بُو-إِخَارِّيقنْ.
٥ أَقَا ذَايْسنْ سّمْ أَمْ سمّْ ن ؤُفِيغَارْ.
نِيثْنِي أَمْ يِيشْثْ ن ثْڒفْسَا ثَاذهْشُورْثْ،
ثنِّي إِقّْننْ أَمزُّوغْ نّسْ، ◘58:5 إِزهد. 140:4
٦ ثنِّي وَارْ إِتّسْڒِينْ
غَارْ ثْمِيجَّا ن إِعزَّامنْ،
ؤُڒَا غَارْ ثْمِيجَّا ن ؤُسحَّارْ
نِّي إِتّْحَاكَانْ أَطَّاسْ ذِي ثْسحَّارْثْ.
٧ أَ أَربِّي، أَرْژْ أَسنْ ثِيغْمَاسْ
ذڭْ ؤُقمُّومْ نْسنْ،
أَرْژْ ثِيغْمَاسْ ن ثغْمَارْثْ
ن إِيْرَاذنْ إِمژْيَاننْ، أَ سِيذِي!
٨ أجّْ إِ-ثنْ أَذْ فسْينْ أَمْ وَامَانْ،
أَڒَامِي أَذْ فّْغنْ.
مَاڒَا إِمحّضْ ڒْْقوْسْ س فْڒِيثْشَاثْ نّسْ،
أجّْ إِ-ثنْ وَارْ قْضِيعنْ.
٩ أجّْ إِ-ث أَذْ إِفْنَا أَمْ ؤُبُوشّڒْ إِرِيزّنْ.
أجّْ إِ-ثنْ وَارْ ژَترّنْ ثْفُوشْثْ،
أَمْ وطُّو ن ؤُعذِّيسْ ن ثْمطُّوثْ. ◼58:9 ’عَارْيَانْ‘ - إِخْسْ أَذْ يِينِي ’نْبْڒَا ثَادَّارْثْ خْ وعْرُورْ نّسْ‘.
١٠ قْبڒْ إِ غَا أَشَانْثْ مَارْمِيثَاثْ نْومْ
أَكْ-ذ ڒحْمُو ن شْبَارْقْ أَكْ-ذ إِسنَّاننْ،
أَذْ ذَايسْ إِسُوضْ أَڒَامِي أَذْ يَاژّڒْ
خْ ويْسُومْ ذ أَزِيزَا
نِيغْ خْ ويْسُومْ إِتّحْذُوذُوقنْ.
١١ أَمْسڭّذْ أَذْ إِفَارْحْ
خْمِي غَا إِژَارْ أَنْثَاقمْ.
نتَّا أَذْ إِسِّيرْذْ إِضَارنْ نّسْ
ذڭْ إِذَامّنْ ن إِعفَّاننْ.
١٢ أَذْ يِينِي بْنَاذمْ:
”وَاهْ، أَقَا ذِينْ ڒْْغِيدْجثْ إِ ؤُمْسڭّذْ،
أَقَا ذِينْ إِجّْ ن أَربِّي
نِّي إِحكّْمنْ ذِي ثمُّورْثْ.“