٧٩
١ أَزهّذْ ن أَسَافْ.
أَ أَربِّي، ڒڭْنُوسْ ؤُذْفنْ
غَارْ ڒْْوَارْثْ نّشْ.
نِيثْنِي سّْخمْجنْ
زَّاوشْثْ نّشْ ثَامقّْرَانْثْ إِقدّْسنْ،
أَرِّينْ ؤُرْشَالِيمْ ذ ڒْْخِيرْبَاثْ.
٢ ڒْْخشْبَاثْ ن إِمْسخَّارنْ نّشْ
وْشِينْ ثنْثْ ذ مَاشَّا إِ إِجْضَاضْ ن ؤُجنَّا،
أَيْسُومْ ن إِمْثِيقَّانْ نّشْ
إِ ڒوْحُوشْ ن ثمُّورْثْ.
٣ إِذَامّنْ نْسنْ زدْجْعنْ ثنْ
أَمْ وَامَانْ
غَارْ مَارَّا إِغزْذِيسنْ ن ؤُرْشَالِيمْ،
ؤُڒَا ذ إِجّْ وَارْ ثنْ إِنْضِيڒْ.
٤ نذْوڒْ ذ ڒفْذِيحثْ إِ جِّيرَانْ نّغْ،
ذ ؤُسْثهْزِي ذ ؤُسحْقَارْ
إِ مَارَّا إِنِّي ذ أَنغْ د-إِنّْضنْ. ◘79:4 إِزهد. 44:14؛ 80:7
٥ أَرْ مڒْمِي، أَ سِيذِي؟
مَا خنِّي أَذْ ثقِّيمذْ
ثْسعَّارذْ إِ ڒبْذَا؟
مَا أَذْ ثَارغْ ثُوسْمِي نّشْ إِقدّْسنْ
أَمْ ثْمسِّي إِ ڒبْذَا؟ ◘79:5 إِزهد. 89:47
٦ فَارّغْ أَسْعَارْ نّشْ
خْ ڒڭْنُوسْ إِ وَارْ شكْ إِسِّيننْ،
خْ ثِيڭلْذِيوِينْ نِّي وَارْ إِتّْڒِيغِينْ
خْ يِيسمْ نّشْ. ◘79:6 إِرْم. 10:25
٧ مَاغَارْ نِيثْنِي شِّينْ يَاعْقُوبْ،
أَردّْدْجنْ ثَازذِّيغْثْ نّسْ.
٨ وَارْ خَانغْعقّڒْ
عْلَاحْسَابْ ڒْْمُوعْصِييّثْ نّغْ ن زِيشْ.
قدْجقْ، أجّْ أَرّحْمثْ نّشْ
أَذْ كِيذْنغْ ثمْسَاڭَارْ،
مَاغَارْ نضْعفْ أَطَّاسْ. ◘79:8 إِشا. 64:8
٩ أوْشْ أَنغْ أَفُوسْ نّشْ، أَ أَربِّي،
ذِي طّْوعْ ن ؤُعُودْجِي ن يِيسمْ نّشْ،
فكّْ أَنغْ ؤُ سصْڒحْ خْ دّْنُوبْ نّغْ
ذِي طّْوعْ ن يِيسمْ نّشْ.
١٠ مَايمِّي غَا إِنِينْ ڒڭْنُوسْ:
”مَانِي إِدْجَا أَربِّي نْسنْ؟“
أجّْ أَنْثَاقمْ ن إِذَامّنْ
إِتّْوَاسِّيزْڒنْ ن ڒْْڭنْسْ نّشْ
أَذْ إِذْوڒْ إِتّْوَاسّنْ
جَارْ ڒڭْنُوسْ جَارْ ثِيطَّاوِينْ نّغْ.
١١ أجّْ أَزهَّارْ ن ؤُمحْبُوسْ أَذْ د-يَاسْ
زَّاثْ إِ وُوذمْ نّشْ،
حْضَا إِحنْجِيرنْ ن ڒْْموْثْ
عْلَاحْسَابْ ڒمْغَارثْ ن ؤُغِيڒْ نّشْ.
١٢ أَرّْ أَسنْ إِ جِّيرَانْ نّغْ أَبهْذڒْ نْسنْ
سبْعَا ن ثْسقَّارْ غَارْ وحْسِينْ نْسنْ،
أَبهْذڒْ نْسنْ إِ زِي شكْ فضْحنْ،
أَ سِيذِي إِنُو.
١٣ نشِّينْ ذ ڒْْڭنْسْ نّشْ
ذ وُودْجِي ن دّْمَانِي ن ثَاروْسَا نّشْ.
نتّْقَاذَا شكْ إِ ڒبْذَا،
زِي جِّيڒْ أَڒْ جِّيڒْ.
نشِّينْ أَذْ نْبَارّحْ شَّانْ نّشْ.