80
1 إِ ؤُمقّْرَانْ ن إِمغْنَاجنْ.
س ثغْنِينْثْ ن ’ثْلِيلِّيشِينْ‘.
شّْهَاذثْ ن أَسَافْ. أَزهّذْ.◼80:1 ’ثِيلِيلِّيشِينْ‘ - إِشْثْ ن مَارْكَا ن إِنُّووَّارنْ ذَايْسنْ أَژْرِي أَطَّاسْ.
2 سڒْ، أَ أَمكْسَاوْ ن إِسْرَائِيل،
شكْ ذ ونِّي يَاركّْوسنْ يُوسُوفْ
أَمْ وُودْجِي،
شكْ ذ ونِّي إِتّْغِيمَانْ خْ إِكِيرُوبنْ،
بَانْ-د ذِي ثِيسِّيقْثْ! ◼80:2 ’إِكِيرُوبنْ‘ - إِشْثْ ن مَارْكَا ن لْمَالَاكَاثْ.
3 سكَّارْ جّهْذْ أَمقّْرَانْ نّشْ
زَّاثْ إِ وُوذمْ ن إِفْرَايِيمْ
ذ بِينْيَامِينْ ذ مَانَاسَّا،
أَسْ-د حِيمَا أَذْ أَنغْ ثْفكّذْ.
4 أَ أَربِّي، أَرّْ أَنغْ-د،
أجّْ ؤُذمْ نّشْ أَذْ خَانغْ يَارْغْ،
خنِّي أَذْ نتّْوَافكّْ. ◘80:4 إِزهد. 4:7؛ 31:17؛ 67:2؛ 80:8؛ دَان. 9:17
5 أَ سِيذِي، أَربِّي ن ڒْعسْكَارَاثْ،
مشْحَاڒْ إِ غَا ثكّذْ ثتّْخيَّاقذْ
غَارْ ثْژَادْجِيثْ ن ڒْڭنْسْ نّشْ؟
6 شكْ ثسّشّذْ ثنْ
س وغْرُومْ ن إِمطَّاونْ،
ثَارِّيذْ ثنْ أَذْ سْونْ إِمطَّاونْ
س إِجّْ ن ڒْمِيجَاڒْ إِتّْوَاڭّنْ.
7 شكْ ثڭِّيذْ أَنغْ
ذ إِشْثْ ن ثْشَامَّا ن إِمْشُوبّشنْ
إِ جِّيرَانْ نّغْ،
ڒْْعذْيَانْ نّغْ
سْثهزَّانْ زَّايْنغْ جَارْ أَسنْ. ◘80:7 إِزهد. 44:14؛ 79:4
8 أَرّْ أَنغْ-د، أَ أَربِّي ن ڒْعسْكَارَاثْ،
أجّْ ؤُذمْ نّشْ أَذْ خَانغْ يَارْغْ،
خنِّي أَذْ نتّْوَافكّْ. ◘80:8 إِزهد. 80:4
9 شكْ ثْقڒْعذْ إِشْثْ ن ثْزَايَارْثْ زِي مِيصْرَا،
ثُوژّْڒذْ خْ ڒڭْنُوسْ، ؤُشَا ثژُّوذْ-إِ-ت ذِينْ.
10 شكْ ثسّْوجْذذْ أَسْ أَمْشَانْ
ؤُ ثَارِّيذْ ت-إِ-د أَذْ ثوّثْ إِژوْرَانْ،
ثْعمَّارْ ثْزَايَارْثْ مَارَّا ثَامُّورْثْ.
11 تّْوَاسّْذُورْينْ إِذُورَارْ س ثِيڒِي نّسْ،
ثِيشجُّورَا ن ثنْڭلْثْ ن أَربِّي
س ڒفْرُوعْ نّسْ.
12 ثڭَّا ثِيسضْوِينْ نّسْ
أَذْ أَوْضنْثْ أَڒْ ڒبْحَارْ،
إِفثْوَانْ نّسْ إِزِييْزَاونْ
أَڒْ إِغْزَارْ ن لْفُورَاطْ.
13 مَايمِّي ثْغضْڒضْ إِغبْرَاونْ نّسْ،
أَڒَامِي مَارَّا إِنِّي د-إِتّكّنْ
خْ وبْرِيذْ ڒقّْضنْ ت؟
14 إِڒفْ زڭْ وزْغَارْ إِقْڒبْ ثَازَايَارْثْ،
مَارَّا مِينْ إِنْثنْهزَّانْ ذڭْ إِيَّارْ،
أَقَا إِهْذَا إِ-ت. ◼80:14 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.
15 أَ أَربِّي ن ڒْعسْكَارَاثْ،
ذْوڒْ-د غَارْنغْ،
سِيجّْ-د زڭْ ؤُجنَّا،
ؤُ خْزَارْ، أَرْزفْ ثَازَايَارْثْ-أَ،
16 تّْهِيلَّا ذِي ثْزَايَارْثْ
ثنِّي إِژُّو ؤُفُوسْ نّشْ أَفُوسِي،
ذِي مِّيشْ نِّي ثسّْجهْذذْ إِ يِيخفْ نّشْ.
17 أَقَا ثتّْوَاسّشْمضْ س ثْمسِّي، ثتّْوَاقْضعْ.
زڭْ ؤُسڭّْوذْ ن وُوذمْ نّشْ
أَذْ ودَّارنْ.
18 أجّْ أَفُوسْ نّشْ أَذْ يِيڒِي
أَكْ-ذ ورْيَازْ ن ؤُفُوسْ نّشْ أَفُوسِي،
أَكْ-ذ مِّيسْ ن بْنَاذمْ
ونِّي ثسّْجهْذذْ إِ يِيخفْ نّشْ.
19 خنِّي وَارْ خَاكْ نْحيّذْ شَا.
أجّْ أَنغْ أَذْ ندَّارْ،
خنِّي أَذْ نْڒَاغَا خْ يِيسمْ نّشْ.
20 أَ سِيذِي، أَربِّي ن ڒْعسْكَارَاثْ،
أَرّْ أَنغْ-د،
أجّْ ؤُذمْ نّشْ أَذْ خَانغْ يَارْغْ،
خنِّي أَذْ نتّْوَافكّْ.
◼80:1 80:1 ’ثِيلِيلِّيشِينْ‘ - إِشْثْ ن مَارْكَا ن إِنُّووَّارنْ ذَايْسنْ أَژْرِي أَطَّاسْ.
◼80:2 80:2 ’إِكِيرُوبنْ‘ - إِشْثْ ن مَارْكَا ن لْمَالَاكَاثْ.
◘80:4 80:4 إِزهد. 4:7؛ 31:17؛ 67:2؛ 80:8؛ دَان. 9:17
◘80:7 80:7 إِزهد. 44:14؛ 79:4
◘80:8 80:8 إِزهد. 80:4
◼80:14 80:14 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.