106
1 هَالِّيلُو-يَاهْ، قَاذَامْ سِيذِي،
مَاغَارْ نتَّا إِصْبحْ،
مَاغَارْ ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا. ◘106:1 1 إِم. 16:34-36؛ إِزهد. 107:1؛ 118:1؛ 136:1
2 وِي إِزمَّارنْ أَذْ إِحَاجَا
ثِيمڭَّا ثِيمقّْرَانِينْ ن سِيذِي،
أَذْ إِبَارّحْ مَارَّا شَّانْ نّسْ؟
3 سّعْذْ نْسنْ إِ يِينِّي إِحْضَانْ ڒْحقّْ،
سّعْذْ نّسْ إِ ونِّي إِتّڭّنْ
ڒبْذَا ثَاسڭْذَا.
4 عْقڒْ خَافِي، أَ سِيذِي،
س أَرْضَا غَارْ ڒْڭنْسْ نّشْ،
عَاهذْ أَيِي س ؤُسنْجمْ نّشْ،
5 مَاحنْذْ أَذْ ژَترغْ ڒْخَارْ
إِ يِينِّي زَّايكْ إِتّْوَافَارْزنْ،
مَاحنْذْ أَذْ فَارْحغْ
س ڒفْرَاحثْ ن ڒْڭنْسْ نّشْ،
مَاحنْذْ أَذْ فَارْحغْ س يِيخفْ إِنُو
جْمِيعْ أَكْ-ذ ثسْغَارْثْ نّشْ.
6 نشِّينْ نخْضَا، جْمِيعْ
أَكْ-ذ ڒجْذُوذْ نّغْ،
نڭَّا ڒْغشّْ،
نڭَّا ثُوعفّْنَا. ◘106:6 لَاوِي 26:40؛ إِرْم. 3:25؛ دَان. 9:5
7 ڒجْذُوذْ نّغْ ذِي مِيصْرَا وَارْ فْهِيمنْ
إِ لْمُوعْجِيزَاثْ نّشْ،
وَارْ خَارّْصنْ ذڭْ ؤُفيّضْ ن ثْمڭَّا
ن ثْمخْسِيوْثْ نّشْ إِشوَّارنْ،
مَاشَاغوّْغنْ غَارْ ڒبْحَارْ،
غَارْ ڒبْحَارْ ن ثلْڭَا. ◘106:7 ؤُف. 14:11، 12
8 مَاشَا نتَّا إِسّنْجمْ إِ-ثنْ
ذِي طّْوعْ ن يِيسمْ نّسْ،
حِيمَا أَذْ ثتّْوَاسّنْ ڒمْغَارثْ نّسْ. ◘106:8 ؤُف. 9:16
9 نتَّا إِوبّخْ ڒبْحَارْ ن ثلْڭَا
أَڒَامِي إِذْوڒْ يُوژغْ،
ؤُشَا إِجَّا إِ-ثنْ أَذْ كّنْ
خْ وُوذمْ ن ثمُّورْثْ
10 نتَّا إِفكّْ إِ-ثنْ زڭْ ؤُفُوسْ
ن يِينِّي إِ-ثنْ إِشَارّْهنْ،
إِفكّْ إِ-ثنْ زڭْ ؤُفُوسْ ن ڒعْذُو.
11 أَمَانْ ذْڒِينْ إِنِّي ثنْ إِحصَّارنْ،
وَارْ إِقِّيمْ ؤُڒَا ذ إِجّنْ زَّايْسنْ. ◘106:11 ؤُف. 14:27؛ 15:5
12 نِيثْنِي تّشْڒنْ خْ وَاوَاڒنْ نّسْ،
صبّْحنْ أَسْ س يِيجّْ ن يزْڒِي ن ؤُصبّحْ. ◘106:12 ؤُف. 14:31؛ 15:1
13 مَاشَا تُّونْ ذغْيَا ثِيمڭَّا نّسْ،
وَارْ خْسنْ أَذْ رَاجَانْ عَاذْ شّْوَارْ نّسْ.
14 نِيثْنِي ذوْڒنْ تّْمغّْڒنْ أَطَّاسْ ذِي ڒخْڒَا،
قدْجْبنْ أَربِّي ذِي ثْنزْرُوفْثْ. ◘106:14 ؤُف. 16:3؛ ڒخْڒ. 11:4، 6، 33؛ إِزهد. 78:18؛ 1 كُور. 10:6
15 خنِّي إِوْشَا أَسنْ مِينْ تَّارنْ،
مَاشَا إِسّمْژِي ڒْْقدّْ ن ڒعْمُورْ نْسنْ. ◘106:15 ڒخْڒ. 11:20، 33؛ إِزهد. 78:30، 31؛ إِشا. 10:16
16 نِيثْنِي ذوْڒنْ ؤُسْمنْ زِي مُوسَا
ذِي ڒْمَارْڭحْ ن ڒْعسْكَارْ،
ؤُڒَا زِي هَارُونْ، أَمْقدّسْ ن سِيذِي. ◘106:16 ڒخْڒ. 16
17 ثَامُّورْثْ ثنُّورْزمْ، ثْصَارْضْ ذَاثَانْ،
ؤُشَا ثنْثِييْ أَبَارُّو ن أَبِيرَامْ. ◘106:17 ڒخْڒ. 16:31، 32، 33؛ أَعَوذ. 11:6
18 ثِيمسِّي ثبْذَا ثشْمضْ جَارْ ؤُبَارُّو نْسنْ،
إِجّْ ن ؤُشعَّاڒْ ن ثْمسِّي
إِقّذْ إِعفَّاننْ نِّي. ◘106:18 ڒخْڒ. 16:35،46
19 نِيثْنِي ڭِّينْ إِجّْ ن ؤُعجْمِي غَارْ حُورِيبْ،
بنْذْقنْ إِ يِيجّْ ن ڒخْيَاڒْ إِفسْينْ. ◘106:19 ؤُف. 32:4
20 نِيثْنِي بدّْڒنْ أَعُودْجِي ن سِيذِي
أَكْ-ذ ڒخْيَاڒْ ن إِجّْ ن ؤُفُونَاسْ
إِ إِتّتّنْ أَرْبِيعْ. ◘106:20 إِرْم. 2:11؛ رُوم. 1:22-23
21 تُّونْ أَربِّي، أَمْسنْجمْ نْسنْ،
ونِّي ثُوغَا إِڭِّينْ
ثِيمڭَّا ثِيمقّْرَانِينْ ذِي مِيصْرَا،
22 لْمُوعْجِيزَاثْ ذِي ثمُّورْثْ ن حَامْ،
ثِيمڭَّا سَّاڭّْوَاذنْثْ
غَارْ ڒبْحَارْ ن ثلْڭَا.
23 إِنَّا أَقَا أَذْ ثنْ إِكحّضْ،
مْڒِي وَارْ إِدْجِي ذ مُوسَا،
ونِّي زَّايسْ إِتّْوَافَارْزنْ،
إِكَّارْ-د ذِي ثْخنْذُوقْثْ زَّاثْ إِ وُوذمْ نّسْ
ذِي طّْوعْ نْسنْ،
مَاحنْذْ أَذْ إِسّْبعّذْ أَسْعَارْ نّسْ
إِ زِي إِخْسْ أَذْ ثنْ يَاردّدْجْ. ◘106:23 ؤُف. 32:11، 32؛ أَعَوذ. 9:13، 14؛ 10:10
24 نِيثْنِي كّْسنْ ثَاقْشُورْثْ
خْ ثمُّورْثْ إِعِيزّنْ،
وَارْ ثشْڒنْ شَا خْ وَاوَاڒْ نّسْ. ◘106:24 ڒخْڒ. 14:1، 2
25 نِيثْنِي نْذقْمنْ ذڭْ إِقِيضَانْ نْسنْ،
وَارْ سْڒِينْ غَارْ ثْمِيجَّا ن سِيذِي.
26 نتَّا إِسّْڭعّذْ أَفُوسْ نّسْ خَاسنْ،
إِجِّيدْجْ أَذْ ثنْ إِسّغْضڒْ ذِي ڒخْڒَا، ◘106:26 ڒخْڒ. 14:28
27 مَاحنْذْ أَذْ إِسّغْضڒْ ثَارْوَا نْسنْ
جَارْ ڒڭْنُوسْ،
مَاحنْذْ أَذْ ثنْ إِزدْجعْ ذِي ثمُّورَا. ◘106:27 إِزهد. 44:12؛ حِز. 20:23
28 نِيثْنِي سّْڒحْمنْ إِخفْ نْسنْ
غَارْ بَاعَالْ-فَاغُورْ،
شِّينْ ثِيغَارْصَا إِ إِمتَّانْ. ◘106:28 ڒخْڒ. 25:3؛ 31:16؛ أَسَا. 2:14
29 سْعَارنْ ث س ثْمڭَّا نْسنْ،
أَڒَامِي د خَاسنْ ثوْضَا جّْرِيحشْثْ.
30 خنِّي إِكَّارْ-د فِينَاحَاسْ،
يُوسَا-د جَارْ أَسنْ،
ؤُ أَمُّو إِ ثتّْوَاسّْبدّْ جّْرِيحشْثْ.
31 أَيَا إِتّْوَاحْسبْ أَسْ-د ذ ثَاسڭْذَا،
زِي جِّيڒْ أَڒْ جِّيڒْ إِ ڒبْذَا.
32 نِيثْنِي سْعَارنْ أَفُوڭمْ نّسْ
غَارْ وَامَانْ ن مَارِيبَا،
أَڒَامِي إِڭَّا مُوسَا ڒْغَارْ ذِي سِّيبّثْ نْسنْ، ◘106:32 ڒخْڒ. 20:12؛ إِزهد. 95:8
33 مَاغَارْ سَّارزْڭنْ ڒعْمَارْ نّسْ،
غَارسْ أَڒَامِي إِفّغْ وَاوَاڒْ وَارْ إِضْبِيعنْ
زڭْ إِينْشِيشنْ نّسْ.
34 نِيثْنِي وَارْ ثحَّانْ ڒڭْنُوسْ
عْلَاحْسَابْ مِينْ ذ أَسنْ يُومُورْ سِيذِي.
35 مَاشَا صُّورنْ إِخفْ نْسنْ أَكْ-ذ ڒڭْنُوسْ
ڒمْذنْ أَذْ ڭّنْ مِينْ ڭِّينْ نِيثْنِي. ◘106:35 ڒقض. 2:2؛ 3:5، 6
36 نِيثْنِي ثُوغَا تّْسخَّارنْ
إِ ڒخْيَاڒَاثْ ن لْ-أَصْنَامْ نْسنْ،
إِنِّي ذ أَسنْ إِذوْڒنْ ذ ڒْفخْ.
37 نِيثْنِي إِوْينْ إِحنْجِيرنْ نْسنْ
ذ ثْحنْجِيرِينْ نْسنْ ذ ثَاغَارْصْثْ إِ شّْوَاطنْ. ◘106:37 لَاوِي 18:21؛ أَعَوذ. 12:31؛ 2 إِج. 16:3؛ 17:17؛ 21:6؛ 2 إِم. 28:3؛ 33:6
38 نِيثْنِي سِّيزّْڒنْ إِذَامّنْ إِمزْذَاڭنْ،
إِذَامّنْ ن إِحنْجِيرنْ نْسنْ
ذ ثْحنْجِيرِينْ نْسنْ،
نِّي إِوْينْ ذ ثَاغَارْصْثْ
إِ ڒخْيَاڒَاثْ ن لْ-أَصْنَامْ ن كنْعَانْ،
أَڒَامِي ثذْوڒْ ثمُّورْثْ ثفْسذْ
س إِذَامّنْ. ◘106:38 ڒخْڒ. 35:33
39 نِيثْنِي ذوْڒنْ خمْجنْ زِي ثْمڭَّا نْسنْ،
سّْفسْذنْ إِخفْ نْسنْ س ڒخْذَايمْ نْسنْ.
40 يَارْغَا وغْضَابْ ن سِيذِي خْ ڒْڭنْسْ نّسْ
ؤُ نتَّا إِعِيفّْ ثَاسْغَارْثْ نّسْ.
41 نتَّا إِسلّمْ إِ-ثنْ
غَارْ إِفَاسّنْ ن ڒڭْنُوسْ
ؤُ إِنِّي ثنْ إِشَارّْهنْ ذوْڒنْ تّْسدْجَاضنْ خَاسنْ.
42 حْصَارنْ ثنْ ڒْعذْيَانْ نْسنْ،
نِيثْنِي تّْوَاسّْوَاضْعنْ سَاذُو أَفُوسْ نْسنْ.
43 أَطَّاسْ ن ثْوَاڒَاوِينْ ثُوغَا إِتّْفكَّا إِ-ثنْ،
مَاشَا نِيثْنِي سَّارزْڭنْ خَاسْ
س ثْغنَّانْثْ نْسنْ،
تّْوَاسّْمژْينْ س ڒْمُوعْصِييّثْ نْسنْ.
44 وَاخَّا أَمنِّي نتَّا إِخْزَارْ عَاذْ غَارْسنْ
ؤُمِي ثنْ ثُوغَا ذِي ڒحْصَارثْ،
ؤُمِي إِسْڒَا ثْغُويِّيثْ نْسنْ.
45 يِيذَارْ ڒْعَاهْذْ نّسْ ذِي طّْوعْ نْسنْ
ؤُ إِنْذمْ زِي سِّيبّثْ
ن ثْمخْسِيوْثْ نّسْ إِشوَّارنْ.
46 إِسّْشنْ أَسنْ أَرّحْمثْ نّسْ
زَّاثْ إِ وُوذمْ ن مَارَّا
إِنِّي ثنْ إِحبّْسنْ.
47 سنْجمْ أَنغْ، أَ سِيذِي، أَربِّي،
نْذهْ أَنغْ نْمُونْ زِي ڒڭْنُوسْ،
حِيمَا أَذْ نْقَاذَا إِسمْ أَمْقدَّاسْ نّشْ،
أَذْ شكْ نْصبّحْ س يزْڒَانْ ن ؤُسمْغَارْ. ◘106:47 1 إِم. 16:35
48 أَذْ إِتّْوَابَاركْ سِيذِي، أَربِّي ن إِسْرَائِيل،
زِي ڒبْذَا أَڒْ ڒبْذَا!“
أجّْ مَارَّا ڒْڭنْسْ أَذْ يِينِي:
’أَمِينْ! هَالِّيلُو-يَاهْ!‘ ◘106:48 1 إِم. 16:36
◘106:1 106:1 1 إِم. 16:34-36؛ إِزهد. 107:1؛ 118:1؛ 136:1
◘106:6 106:6 لَاوِي 26:40؛ إِرْم. 3:25؛ دَان. 9:5
◘106:7 106:7 ؤُف. 14:11، 12
◘106:8 106:8 ؤُف. 9:16
◘106:9 106:9 ؤُف. 14:21، 22، 29
◘106:11 106:11 ؤُف. 14:27؛ 15:5
◘106:12 106:12 ؤُف. 14:31؛ 15:1
◘106:14 106:14 ؤُف. 16:3؛ ڒخْڒ. 11:4، 6، 33؛ إِزهد. 78:18؛ 1 كُور. 10:6
◘106:15 106:15 ڒخْڒ. 11:20، 33؛ إِزهد. 78:30، 31؛ إِشا. 10:16
◘106:16 106:16 ڒخْڒ. 16
◘106:17 106:17 ڒخْڒ. 16:31، 32، 33؛ أَعَوذ. 11:6
◘106:18 106:18 ڒخْڒ. 16:35،46
◘106:19 106:19 ؤُف. 32:4
◘106:20 106:20 إِرْم. 2:11؛ رُوم. 1:22-23
◘106:23 106:23 ؤُف. 32:11، 32؛ أَعَوذ. 9:13، 14؛ 10:10
◘106:24 106:24 ڒخْڒ. 14:1، 2
◘106:26 106:26 ڒخْڒ. 14:28
◘106:27 106:27 إِزهد. 44:12؛ حِز. 20:23
◘106:28 106:28 ڒخْڒ. 25:3؛ 31:16؛ أَسَا. 2:14
◘106:32 106:32 ڒخْڒ. 20:12؛ إِزهد. 95:8
◘106:35 106:35 ڒقض. 2:2؛ 3:5، 6
◘106:37 106:37 لَاوِي 18:21؛ أَعَوذ. 12:31؛ 2 إِج. 16:3؛ 17:17؛ 21:6؛ 2 إِم. 28:3؛ 33:6
◘106:38 106:38 ڒخْڒ. 35:33
◘106:47 106:47 1 إِم. 16:35
◘106:48 106:48 1 إِم. 16:36