١٤٢
١ أَخمِّي ن ذَاوُوذْ.
ثَاژَادْجِيثْ ؤُمِي ث ثُوغَا ذڭْ يفْرِي.
٢ س ثْمِيجَّا إِنُو سْغُويغْ غَارْ سِيذِي،
س ثْمِيجَّا إِنُو حشّْمغْ سِيذِي.
٣ نشّْ تّْزدْجَاعغْ إِفقُّوصنْ إِنُو
زَّاثْ إِ وُوذمْ نّسْ،
سَّارْڭْبغْ أَسْ ڒحْصَارثْ إِنُو
زَّاثْ إِ وُوذمْ نّسْ.
٤ مَاڒَا بُوحْبڒْ إِنُو إِذْقڒْ خَافِي أَطَّاسْ،
شكْ ثسّْنذْ أَمسْرُوقْ إِنُو.
نِيثْنِي سّْنُوفَّارنْ أَيِي إِجّْ ن ڒْْفخْ
ذڭْ وبْرِيذْ نِّي ذِي غَا ؤُيُورغْ. ◘142:4 إِزهد. 77:4
٥ سْوضْ غَارْ ؤُفُوسِي، ؤُ خْزَارْ،
وَارْ ذِينْ ثُوغِي حذْ
إِ ذ أَيِي غَا إِوْشنْ ثَايْنِيثْ،
إِتّْوَاكّسْ أَيِي قَاعْ مَانِي غَا أَروْڒغْ،
وَارْ ذِينْ ثُوغِي ؤُڒَا ذ إِجّْ
إِ غَا إِسّقْسَانْ خْ ڒعْمَارْ إِنُو.
٦ نشّْ سْغُويُّوغْ-د غَاركْ، أَ سِيذِي. قَّارغْ:
”شكْ ذ أَمْشَانْ إِنُو ن ثَاروْڒَا،
ثَاسْغَارْثْ إِنُو ذِي ثمُّورْثْ ن يِينِّي إِدَّارنْ.◘142:6 إِزهد. 16:5
٧ حْضَا خْ ؤُغُويِّي إِنُو، مَاغَارْ فْنِيغْ قَاعْ.
فكّْ أَيِي زڭْ إِنِّي ذ أَيِي إِضفَّارنْ،
مَاغَارْ نِيثْنِي جهْذنْ خَافِي. ◘142:7 إِزهد. 41:2؛ 79:8؛ 116:6
٨ سُوفّغْ ڒعْمَارْ إِنُو زِي ڒحْبسْ
مَاحنْذْ أَذْ قَاذِيغْ إِسمْ نّشْ.
إِمْسڭَّاذنْ أَذْ أَيِي د-نّْضنْ،
مَاغَارْ شكْ ثتّڭّذْ ذَايِي س ثْشُونِي.“