١٤٣
١ أَزهّذْ ن ذَاوُوذْ.
أَ سِيذِي، سڒْ إِ ثْژَادْجِيثْ إِنُو،
سْحسّْ إِ ثُوثْرَا إِنُو.
أَرّْ-د خَافِي عْلَاحْسَابْ ثِيذتّْ نّشْ،
عْلَاحْسَابْ ثَاسڭْذَا نّشْ.
٢ وَارْ تّڭّْ شّْرعْ أَكْ-ذ ؤُمْسخَّارْ نّشْ،
مَاغَارْ ؤُڒَا ذ إِجّْ زڭْ إِنِّي إِدَّارنْ
أَذْ يِيڒِي ذ أَمْسڭّذْ زَّاثْ إِ وُوذمْ نّشْ. ◘143:2 رُوم. 3، 4؛ ڭال. 3، 4
٣ مِينْزِي ڒعْذُو إِتّْذَارَّاشْ ڒعْمَارْ إِنُو،
إِعفّسْ خْ ثُوذَارْثْ إِنُو غَارْ ثمُّورْثْ،
إِسّْزدّغْ أَيِي ذڭْ إِمُوشَانْ ن طّْڒَامْ،
أَمْ يِينِّي إِمُّوثنْ زِي مشْحَاڒْ ؤُيَا.
٤ بُوحْبڒْ إِنُو إِتّفْشِيڒْ خَافِي،
ؤُڒْ إِنُو يَاروّعْ ذِي ذَاخڒْ إِنُو.
٥ نشّْ تّْعقْڒغْ خْ وُوسَّانْ إِعْذُونْ،
تّْخمَّامغْ ذِي مَارَّا ثِيمڭَّا نّشْ،
تّْخَارّْصغْ ذِي ڒفْعَايڒْ ن إِفَاسّنْ نّشْ. ◘143:5 إِزهد. 77:6، 11
٦ نشّْ تّْبزّْعغْ إِفَاسّنْ إِنُو غَاركْ،
ڒعْمَارْ إِنُو أَقَا-ث زَّاثكْ
أَمْ إِشْثْ ن ثمُّورْثْ إِفُّوذنْ. سِيلَاهْ.
٧ أَرّْ-د خَافِي ذغْيَا، أَ سِيذِي،
بُوحْبڒْ إِنُو إِتّفْشِيڒْ،
وَارْ سّْنُوفَّارَا ؤُذمْ نّشْ زَّايِي،
مَاحنْذْ وَارْ دِّيكّْوِيڒغْ
أَمْ يِينِّي د-إِهكّْوَانْ
ذڭْ وحْفُورْ ن ونْضڒْ.
٨ أجّْ أَيِي أَذْ سْڒغْ
إِ ثْمخْسِيوْثْ نّشْ إِشوَّارنْ
غَارْ ثفُّوثْ،
مَاغَارْ تّشْڒغْ خَاكْ.
سْشنْ أَيِي أَبْرِيذْ إِ غَا ؤُيُورغْ،
مَاغَارْ سّْڭعّْذغْ ڒعْمَارْ إِنُو غَاركْ. ◘143:8 إِزهد. 25:1
٩ أَ سِيذِي، كّسْ أَيِي إِ ڒْْعذْيَانْ إِنُو،
غَاركْ إِ غَا أَروْڒغْ.
١٠ سڒْمذْ أَيِي أَذْ ڭّغْ
مِينْ إِدْجَانْ إِ أَرْضَا نّشْ،
مَاغَارْ شكْ ذ أَربِّي إِنُو.
أجّْ أَرُّوحْ نّشْ إِصبْحنْ أَذْ أَيِي إِنْذهْ
ذڭْ إِشْثْ ن ثمُّورْثْ إِوَاطَانْ.
١١ أَ سِيذِي، أَرّْ-د ذَايِي ثُوذَارْثْ
ذِي طّْوعْ ن يِيسمْ نّشْ.
س ثْسڭْذَا نّشْ،
سُوفّغْ ڒعْمَارْ إِنُو زِي ڒحْصَارثْ،
١٢ أَردّدْجْ ڒْْعذْيَانْ إِنُو
ذِي ثْمخْسِيوْثْ نّشْ إِشوَّارنْ،
قْضَا خْ مَارَّا إِنِّي ذ أَيِي إِحصَّارنْ،
مَاغَارْ نشّْ ذ ؤُمْسخَّارْ نّشْ. ◘143:12 إِزهد. 86:16؛ 116:16