أَذْلِيسْ إِقدّْسنْ أَسَارْڭبْ ٩

١ خنِّي إِسُوضْ ونِّي ذ وِيسّْ خمْسَا ذِي ڒْبُوقْ نّسْ ؤُشَا ژْرِيغْ إِجّْ ن يثْرِي إِوْضَا-د زڭْ ؤُجنَّا خْ ثمُّورْثْ، ثمّوْشْ أَسْ ثَاسَارُوثْ ن ؤُقمُّومْ ن ثسْرَافْثْ يُودْجْغنْ. ◘ ٢ ؤُشَا إِڭعّذْ-د دّخَّانْ زڭْ ؤُقمُّومْ ن ثسْرَافْثْ، أَمْ دّخَّانْ ن ثفْقُونْثْ ثَامقّْرَانْثْ إِحْمَانْ، ؤُشَا ثْفُوشْثْ ذ ڒعْوِينْ بَّارْشْننْ س دّخَّانْ ن ثسْرَافْثْ. ٣ زِي دّخَّانْ فّْغنْ-د زَّايسْ إِبُورخْسنْ غَارْ ثمُّورْثْ، ثمّوْشْ أَسنْ صُّولْطَا أَمْ ثنِّي إِدْجَانْ غَارْ ثْغَارْضْمِيوِينْ ن ثمُّورْثْ. ٤ إِتّْوَانَّا أَسنْ، مَاحنْذْ وَارْ جيّْحنْ أَرْبِيعْ ن ثمُّورْثْ ؤُڒَا ذ قَاعْ أَغمُّويْ أَزِيزَا ؤُڒَا ذ ثِيشجِّيرَا، مْغِيرْ إِوْذَانْ وَاهَا إِنِّي وَارْ غَارْ إِدْجِي ؤُشمِّيعْ ن أَربِّي خْ ثنْيَارْثْ نْسنْ. ◼ ◘ ٥ ثمّوْشْ أَسنْ ثْزمَّارْ مَاحنْذْ وَارْ ثنْ نقّنْ، مَاشَا أَذْ ثنْعدّْبنْ ڒْْقدّْ ن خمْسَا ن إِيُورنْ، ؤُشَا أَعدّبْ نْسنْ أَمْ ؤُعدّبْ ن ثْغَارْضنْثْ خْمِي ثتّقّسْ إِ بْنَاذمْ.

٦ ذڭْ وُوسَّانْ نِّي أَذْ أَرْزُونْ إِوْذَانْ خْ ڒْْموْثْ، مَاشَا وَارْ ت تّطِّيفنْ، ؤُشَا أَذْ تَّارنْ أَذْ مّْثنْ، مَاشَا ڒْْموْثْ أَذْ زَّايْسنْ ثَارْوڒْ. ◘ ٧ إِبُورخْسنْ ڭِّينْ أَمْ يِييْسَانْ إِوجْذنْ إِ ؤُمنْغِي، ؤُ غَارْسنْ خْ إِزدْجِيفنْ نْسنْ شَا أَمْ تِّيجَانْ أَخْمِي ثنْثْ ڭِّينْ س وُورغْ، ؤُ إِغمْبَابْ نْسنْ أَمْ إِغمْبَابْ ن إِوْذَانْ، ◘ ٨ ؤُ أَشُووَّافْ نْسنْ أَمْ ؤُشُووَّافْ ن ثمْغَارِينْ ؤُ ثِيغْمَاسْ نْسنْ أَمْ ثِينِّي ن وَايْرَاذنْ، ◘ ٩ ؤُ ثُوغَا غَارْسنْ ثْشَابَّاثْ خْ إِذْمَارنْ نْسنْ أَمْ ثْشَابَّاثْ ن وُوزَّاڒْ إِ ؤُسڒْقِي، ؤُ دّْرِيزْ ن وَافْرِيونْ نْسنْ أَمْ دّْرِيزْ ن إِكَارُّوثنْ أَكْ-ذ وَاطَّاسْ ن إِيْسَانْ إِتّقْنُونُّوينْ غَارْ ؤُمنْغِي، ١٠ ؤُ غَارْسنْ إِكنَّاسنْ أَمْ يِينِّي ن ثْغَارْضْمِيوِينْ ؤُ ثُوغَا ذِينْ إِسنَّاننْ ذڭْ إِكنَّاسنْ نْسنْ. نِيثْنِي غَارْسنْ صُّولْطَا حِيمَا أَذْ سّهْوَانْ ذْرُوشْثْ خْ إِوْذَانْ، ڒْْمِيجَاڒْ ن خمْسَا ن إِيُورنْ. ١١ نِيثْنِي غَارْسنْ لْمَالَاكْ ن ثسْرَافْثْ ذ أَجدْجِيذْ خَاسنْ، قَّارنْ أَسْ س ثْعِيبْرَانِيثْ ’أَبَادُّو‘ ؤُ س ثْرَامِيثْ قَّارنْ أَسْ ’شَارَا‘. ◼

١٢ ؤُشْثْ ثَامزْوَارُوثْ ثعْذُو، أَوَارْنِي مَانْ أَيَا أَذْ د-أَسنْثْ عَاذْ ثْنَاينْ ن وُوشْثَاثْ. ◘

١٣ أَوَارْنِي مَانْ أَيَا إِسُوضْ لْمَالَاكْ وِيسّْ ستَّا ذِي ڒْبُوقْ نّسْ ؤُشَا سْڒِيغْ ثْمِيجَّا إِ د-يُوسِينْ زِي أَربْعَا ن وَاشَّاونْ ن ؤُعَالْطَارْ ن وُورغْ إِ إِبدّنْ قِيبَاتْشْ إِ أَربِّي، ١٤ ثنَّا إِ لْمَالَاكْ وِيسّْ ستَّا إِ غَارْ إِدْجَا ؤُيِيشّْ ن إِشَارِّي: ”فْسِييْ إِ أَربْعَا ن لْمَالَاكَاثْ نِّي إِشَارْفنْ طَّارْفْ ن إِغْزَارْ أَمقّْرَانْ، لْفُورَاطْ.“ ١٥ ؤُشَا أَرْخُونْ أَسنْ إِ أَربْعَا ن لْمَالَاكَاثْ نِّي ثُوغَا إِوجْذنْ ذِينِّي غَارْ وَاسّْ ذ ؤُيُورْ ذ ؤُسڭّْوَاسْ، حِيمَا أَذْ نْغنْثْ إِشْثْ ن تُّوڒُوثْ ن إِوْذَانْ. ١٦ ثُوغَا ڒْْقدّْ ن ڒْْعسْكَارَاثْ ن يِينِّي إِندّْهنْ إِيْسَانْ ثْيُويَا نعشْرَا-أَڒَافْ سعشْرَا ن ڒُْوڒُوفْ، ؤُشَا سْڒِيغْ مشْحَاڒْ ذِي دْجَانْ. ◼ ١٧ أَمُّو إِ ژْرِيغْ إِيْسَانْ ذِي ڒوْحِييْ، أَقَا إِنِّي خَاسنْ إِنْيِينْ ثُوغَا سّْذُورُّوينْ إِذْمَارنْ نْسنْ س ثْشَابَّاثْ ن وُوزَّاڒْ إِ ؤُسڒْقِي ذ ثِيزڭّْوَاغِينْ أَمْ ثْمسِّي، شَابنْثْ، ذ ثِيوْرَاغِينْ أَمْ ڒشْبَاريّثْ. إِزدْجِيفنْ ن إِيْسَانْ نِّي أَمْ يِيزدْجِيفنْ ن وَايْرَاذنْ ؤُشَا زڭْ إِقمُّومنْ نْسنْ ثفّغْ-د زَّايْسنْ ثْمسِّي ذ دّخَّانْ ذ ڒشْبَاريّثْ. ١٨ أَقَا إِشْثْ ن تُّوڒُوثْ ن إِوْذَانْ ثتّْوَانغْ س ثْڒَاثَا-يَا ن جّْرَايحْ: س ثْمسِّي ذ ڒشْبَاريّثْ ذ دّخَّانْ إِ د-إِتّفّْغنْ زڭْ إِقمُّومنْ نْسنْ. ١٩ مِينْزِي صُّولْطَا نْسنْ أَقَا-ت ذڭْ إِقمُّومنْ ذ إِكنَّاسنْ نْسنْ، مِينْزِي إِكنَّاسنْ نْسنْ ڭِّينْ أَمْ إِفِيغْرَانْ نِّي غَارْ إِدْجَا إِزدْجِيفنْ، ؤُشَا تّْجيّْحنْ زَّايْسنْ إِوْذَانْ.

٢٠ إِوْذَانْ إِقِّيمنْ، إِنِّي وَارْ إِتّْوَانْغنْ شَا س جّْرَايحْ-أَ، وَارْ ثُوبنْ شَا زِي ڒْْخذْمثْ ن إِفَاسّنْ نْسنْ أَڒَامِي وَارْعبّْذنْ عَاذْ شّْوَاطنْ ذ لْ-أَصْنَامْ ن وُورغْ ذ نُّوقَارْثْ ذ نّْحَاسْ ذ وژْرُو ذ ؤُكشُّوضْ، إِنِّي وَارْ إِتّْوِيڒِينْ، وَارْ إِتّسْڒِينْ، وَارْ إِڭُّورنْ، ◘ ٢١ ؤُشَا نِيثْنِي وَارْ ثُوبنْ شَا زڭْ ونْغَايْ نْسنْ، ڒَْا زِي ثْسحَّارْثْ نْسنْ ؤُڒَا زِي فَارْقْ-شّْغڒْ نْسنْ.

◘٩:١ 9:‏1 لك. 8‏:‏31؛ أَسَا. 17‏:‏8.

◼٩:٤ 9:‏4 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

◘٩:٤ 9:‏4 حِز. 9‏:‏4؛ يُوح. 6‏:‏26؛ أَسَا. 6‏:‏6؛ 7‏:‏2، 3.

◘٩:٦ 9:‏6 إِشا. 2‏:‏19؛ إِرْم. 8‏:‏3؛ حُوش. 10‏:‏8؛ لك. 23‏:‏30؛ أَسَا. 6‏:‏16.

◘٩:٧ 9:‏7 ؤُف. 10‏:‏4؛ يُووِ. 2‏:‏4

◘٩:٨ 9:‏8 يُووِ. 1‏:‏6

◼٩:١١ 9:‏11 ’أَبَادُّو‘ - إِسمْ-أَ يُوسَا-ذ زِي ثُوثْلَايْثْ ن ثْعِيبْرَانِيثْ ؤُشَا إِخْسْ أَذْ يِينِي 'أَريّبْ' نِيغْ 'أَردّدْجْ' (أَسَا. 9:11).

◘٩:١٢ 9:‏12 أَسَا. 8‏:‏13.

◼٩:١٦ 9:‏16 ’ثْيُويَا نعشْرَا-أَڒَافْ سعشْرَا ن ڒُْوڒُوفْ‘ - ڒْْقدّْ نْسنْ أَمُّو 2 خْ 10.000 خْ 10.000 إِخْسْ أَذْ يِينِي 200 مِيلْيُونْ، إِخْسْ أَذْ يِينِي إِجّْ ن ڒْْعسْكَارْ ذ أَمقّْرَانْ أَطَّاسْ س وَاطَّاسْ.

◘٩:٢٠ 9:‏20 إِزهد. 115‏:‏4، 5، 6، 7؛ 135‏:‏15.