أَذْلِيسْ إِقدّْسنْ أَسَارْڭبْ ١١

١١

ثْنَاينْ ن ڒشْهُوذْ

١ ؤُشَا إِمّوْشْ أَيِي إِجّْ ن ؤُغَانِيمْ، إِڭَّا أَمْ يِيجّْ ن ؤُقطَّابْ ن ڒعْبَارْ، ؤُشَا إِبدّْ ذِينْ لْمَالَاكْ، إِنَّا: ”كَّارْ ؤُشَا عْبَارْ زَّاوشْثْ ثَامقّْرَانْثْ ن أَربِّي ذ ؤُعَالْطَارْ ذ يِينِّي ذَايسْ إِعبّْذنْ، ◼ ◘ ٢ مَاشَا ڒمْرَاحْ نِّي غَارْ ذَاخڒْ ن زَّاوشْثْ ثَامقّْرَانْثْ، أجّْ إِ-ث، وَارْ ث تّْعبَّارْ، مِينْزِي أَقَا إِمّوْشْ إِ ڒڭْنُوسْ ؤُشَا نِيثْنِي أَذْعفْسنْ خْ ثنْذِينْثْ إِقدّْسنْ ثْنَاينْ ؤُ أَربْعِينْ ن إِيُورنْ. ◼ ◘ ٣ نشّْ أَذْ وْشغْ صُّولْطَا إِ ثْنَاينْ ن ڒشْهُوذْ إِنُو، مَاحنْذْ أَذْ نبَّانْ س وَاوَاڒْ ن أَربِّي أَڒفْ ؤُ مِيثَاينْ ؤُ-ستِّينْ ن وُوسَّانْ، أَمْ يَارْضنْ ثْخَانْشثْ ن وشْضَانْ.“

٤ نِيثْنِي ذ ثْنَاينْ ن ثْزِيثُونِينْ ذ ثْنَاينْ ن ڒقْنَاذڒْ إِ إِبدّنْ زَّاثْ إِ وُوذمْ ن سِيذِي ن مَارَّا ثَامُّورْثْ. ◘ ٥ مَاڒَا ذِينْ شَا ن يِيجّنْ إِخْسْ أَذْ ثنْ إِهْوڒْ، أَذْ ثفّغْ ثْمسِّي زڭْ ؤُقمُّومْ نْسنْ ؤُشَا أَذْ ثشّْ ڒْْعذْيَانْ نْسنْ. أَمُّو إِ غَا تّْوَانْغنْ إِنِّي إِخْسنْ أَذْ ثنْ ضَارّنْ. ٦ نِيثْنِي غَارْسنْ صُّولْطَا مَاحنْذْ أَذْ قّْننْ أَجنَّا، حِيمَا وَارْ د-إِوطِّي ونْژَارْ ذڭْ وُوسَّانْ نِّي ذِي غَا نبَّانْ نِيثْنِي، ؤُ غَارْسنْ صُّولْطَا حِيمَا أَذْ أَرّنْ أَمَانْ ذ إِذَامّنْ ؤُ حِيمَا أَذْ سيّْحنْ ثَامُّورْثْ س مَارَّا جّْرِيحشْثْ مڒْمِي مَا خْسنْ. ◘

٧ خْمِي غَا كمّْڒنْ شّْهَاذَاثْ نْسنْ، أَذْ د-إِڭعّذْ ڒْْوحْشْ زِي ڒَْادْجَاغْ، أَذْ كِيسنْ إِمّْنغْ، أَذْ خَاسنْ إِغلّبْ ؤُشَا أَذْ ثنْ إِنغْ. ◘ ٨ ڒْْخشْبَاثْ نْسنْ أَذْ إِڒِينْثْ ذڭْ وَازَّايْ ن ثنْذِينْثْ ثَامقّْرَانْثْ ؤُمِي قَّارنْ س ڒْْمعْنَا أَرُّوحِي نّسْ ’سَاذُومْ‘ ذ ’مِيصْرَا‘، مَانِي نْغِينْ سِيذِيثْسنْ خْ صَّالِيبْ. ◘ ٩ ؤُشَا زِي شُّوعُوبْ ذ ثْقبَّاڒْ ذ إِڒْسَاونْ ذ ڒڭْنُوسْ أَذْ ژَترنْ إِوْذَانْ ڒْْخشْبَاثْ نْسنْ، ڒْْقدّْ ن ثْڒَاثَا ن وُوسَّانْ ذ وزْينْ، وَارْ تّجِّينْ ڒْْخشْبَاثْ نْسنْ أَذْ تّْوَامَّارْسنْثْ ذڭْ إِمضْڒَانْ. ١٠ إِمزْذَاغْ ن ثمُّورْثْ أَذْ زَّايْسنْ فَارْحنْ، أَذْعيّْذنْ، أَذْ أَرزْفنْ إِجّنْ غَارْ ونّغْنِي، أَذْ سّكّنْ إِكَاذُوثنْ إِ وَايَاوْيَا، مِينْزِي ثْنَاينْ ن إِنَابِييّنْ-أَ ثُوغَاغزَّانْ ذڭْ إِمزْذَاغْ ن ثمُّورْثْ.

١١ مَاشَا أَوَارْنِي ثْڒَاثَا ن وُوسَّانْ ذ وزْينْ يُوذفْ ذَايْسنْ أَرُّوحْ إِدَّارنْ زِي أَربِّي ؤُشَا كَّارنْ، بدّنْ خْ إِضَارنْ نْسنْ ؤُ ثوْضَا-د خَاسنْ أَرُّوحْ ن ثُوذَارْثْ ؤُشَا ثِيڭّْوُوذِي ثمْغَارْ ثوْضَا-د خْ مَارَّا إِنِّي ثنْ إِژْرِينْ. ◘ ١٢ نِيثْنِي سْڒِينْ إِشْثْ ن ثْمِيجَّا ثجْهذْ ثتّْڒَاغَا زڭْ ؤُجنَّا، ثقَّارْ أَسنْ: ”ڭعّْذمْ-د ذَا!“ ؤُشَا نِيثْنِي ڭعّْذنْ غَارْ ؤُجنَّا ذڭْ ؤُسيْنُو ؤُشَا ڒْْعذْيَانْ نْسنْ ژْرِينْ ثنْ.

١٣ ذِي ثْسَاعّثْ نِّي إِمْسَارْ إِجّْ ن ونْهزِّي ن ثمُّورْثْ ذ أَمقّْرَانْ. إِشْثْ ن ثْعشَّارْثْ ن ثنْذِينْثْ ثهْذمْ ؤُشَا سبْعَا-أَڒَافْ ن يرْيَازنْ غَارْسنْ إِسمْ إِشنّْعنْ مُّوثنْ س ونْهزِّي-يَا ن ثمُّورْثْ. وِي إِقِّيمنْ، ذوْڒنْ ڭّْوذنْ أَطَّاسْ ؤُشَا سُّوعْڒَانْ زِي أَربِّي ن ؤُجنَّا.

١٤ ’خْزَارْ، ثْنَاينْ ن وُوشْثَاثْ عْذُونْثْ، ؤُشَا خْزَارْ ’ؤُشْثْ!‘ وِيسّْ ثْڒَاثَا أَذْ د-ثَاسْ ذغْيَا. ◘

١٥ لْمَالَاكْ وِيسّْ سبْعَا إِسُوضْ ذِي ڒْبُوقْ نّسْ ؤُشَا كَّارنْثْ-إِ-د ثْمِيجَّاوِينْ ثِيمقّْرَانِينْ ذڭْ ؤُجنَّا، تّْڒَاغَانْثْ:

”ثَاڭلْذَا ن دُّونشْثْ أَقَا-ت ن أَربِّي نّغْ ؤُ ن لْمَاسِيحْ نّسْ، ؤُشَا نتَّا أَذْ إِحْكمْ أَمْ ؤُجدْجِيذْ إِ ڒبْذَا قَاعْ.“

١٦ أَربْعَا ؤُ عِيشْرِينْ ن إِمْغَارنْ، إِنِّي إِقِّيمنْ زَّاثْ إِ أَربِّي خْ ڒكْرَاسِي نْسنْ إِڭلّْذنْ، وْضَانْ س ؤُغمْبُوبْ نْسنْ غَارْ ثمُّورْثْ ؤُشَا سجْذنْ إِ أَربِّي، ١٧ نَّانْ:

”نشِّينْ نتّْقَاذَا شكْ، أَ سِيذِي أَربِّي،

أَمْزمَّارْ خْ كُوڒْشِي،

شكْ ذ ونِّي إِدْجَانْ ذ ونِّي ثُوغَا،

أَقَا ثكْسِيذْ جّهْذْ نّشْ أَمقّْرَانْ

ذڭْ ؤُفُوسْ نّشْ،

ؤُشَا ثبْذِيذْ أَذْ ثْحكْمذْ أَمْ ؤُجدْجِيذْ. ◘

١٨ ڒڭْنُوسْ ثُوغَا خيّْقنْ خَاكْ،

مَاشَا يُوسَا-د وغْضَابْ نّشْ،

ؤُشَا ثِيوضْ-د ڒْْوقْثْ ن إِمتِّيننْ

حِيمَا أَذْ تّْوَاحَاسْبنْ

ؤُ حِيمَا أَذْ ثمّوْشْ ڒْْمُونثْ

إِ إِمْسخَّارنْ نّشْ،

إِنَابِييّنْ، ؤُ إِ إِمْقدَّاسنْ

ؤُ إِ يِينِّي إِتّڭّْوذنْ إِسمْ نّشْ،

أَمْ إِمژْيَاننْ أَمْ يِيمقّْرَاننْ،

ؤُ شكْ أَذْ ثَاريّْبذْ

إِنِّي إِتَّارذْدْجنْ ثَامُّورْثْ.“

١٩ ثنُّورْزمْ زَّاوشْثْ ثَامقّْرَانْثْ ذڭْ ؤُجنَّا أَڒَامِي ثتّْوَاژَارْ تَّابُوثْ ن ڒْْعَاهْذْ نّسْ ذِي زَّاوشْثْ ثَامقّْرَانْثْ، ؤُشَا كَّارنْ وَاسَّامنْ ذ وَاجَّاجنْ ذ ثْمِيجَّاوِينْ ؤُشَا إِمْسَارْ إِجّْ ن ونْهزِّي ن ثمُّورْثْ ؤُ وْضَانْ إِبْقُوقنْ إِمقّْرَاننْ ن ثبْرُورِي. ◼ ◘

◼١١:١ 11:‏1 ’ذَايسْ‘ - إِخْسْ أَذْ يِينِي ’ذِي زَّاوشْثْ ثَامقّْرَانْثْ‘.

◘١١:١ 11:‏1 حِز. 40‏:‏3‏-‏49؛ 41؛ 42؛ 43.

◼١١:٢ 11:‏2 ’أَذْعفْسنْ‘ - نِيغْ: ’أَذْعجْننْ‘.

◘١١:٢ 11:‏2 أَسَا. 13‏:‏5.

◘١١:٤ 11:‏4 زَاك. 4‏:‏3، 14.

◘١١:٦ 11:‏6 ؤُف. 7؛ 8؛ 9؛ 10؛ 12؛ 1 إِج. 17‏:‏1.

◘١١:٧ 11:‏7 دَان. 7‏:‏21؛ أَسَا. 13‏:‏7، 11.

◘١١:٨ 11:‏8 إِرْم. 23‏:‏14؛ أَسَا. 7‏:‏2، 5؛ 18‏:‏10.

◘١١:١١ 11:‏11 حِز. 37‏:‏5، 10

◘١١:١٤ 11:‏14 أَسَا. 8‏:‏13؛ 9‏:‏12؛ 15‏:‏1.

◘١١:١٧ 11:‏17 أَسَا. 1‏:‏4، 8؛ 4‏:‏18؛ 16‏:‏5.

◼١١:١٩ 11:‏19 ’تَّاپُوثْ‘ - نتَّا ذ إِجّْ ن سّنْذُوقْ ن ؤُكشُّوضْ ن ؤُكَاسِييَا إِغدْجْفنْ س وُورغْ. ثُوغَا ذَايسْ ثْنَاينْ ن ثڒْوِيحِينْ ن وژْرُو ن شَّارِيعَا ذ ثَاغَّارْشْثْ ن هَارُونْ نِّي إِتّْوَانُّووْشنْ ذ إِجْ ن ؤُزنْبِيڒْ ذَايسْ ’مَانَّا‘. خْزَارْ عِيبْ. 9:4.

◘١١:١٩ 11:‏19 أَسَا. 15‏:‏5.