١ خنِّي ثتّْوَاژَارْ إِشْثْ ن ڒعْڒَامثْ ثَامقّْرَانْثْ ذڭْ ؤُجنَّا: إِشْثْ ن ثْمطُّوثْ ثْيَارْضْ ثَافُوشْثْ، ؤُ ثَازِيرِي سَاذُو إِضَارنْ نّسْ ؤُشَا غَارسْ خْ ؤُزدْجِيفْ نّسْ إِجّْ ن تَّاجْ س ثنْعَاشْ ن إِثْرَانْ. ٢ ثُوغَا ثكْسِي دّيْسثْ، ثسْغُويُّو س ڒوْجعْ، ثتّْوَاحْصَارْ س ؤُنزْبَارْ ن ثَارُوثْ.

٣ خنِّي ثتّْوَاژَارْ إِشْثْ ن ڒعْڒَامثْ نّغْنِي ذڭْ ؤُجنَّا، أَقَا ذِينْ إِشْثْ ن ڒْْهَايْشثْ ثَامقّْرَانْثْ ثَازڭّْوَاغْثْ أَمْ ثْمسِّي، غَارسْ سبْعَا ن إِزدْجِيفنْ ذعشْرَا ن وَاشَّاونْ، ؤُشَا خْ إِزدْجِيفنْ نّسْ سبْعَا ن تِّيجَانْ. ◼12:‏3 ’أَشَّاونْ‘ - نِيثْنِي ذ إِقَاشَّاونْ ن لْحَايَاوَانْ. ٤ ؤُشَا أَكنَّاسْ نّسْ إِفَارْضْ إِشْثْ ن تُّوڒُوثْ ن إِثْرَانْ زڭْ ؤُجنَّا، ثسّْژَاريّضْ إِ-ثنْ غَارْ ثمُّورْثْ. ؤُشَا ڒْْهَايْشثْ ثُوغَا ثْبدّْ زَّاثْ إِ ثْمطُّوثْ إِ غَا يَارْونْ، حِيمَا أَذْ ثْصَارْضْ مِّيسْ خْمِي ث-إِ-د إِ غَا ثَارُووْ. ٥ ؤُشَا ثُورُووْ-د مِّيسْ، أَرْيَازْ نِّي إِ غَا إِحكْمنْ خْ مَارَّا ڒڭْنُوسْ س ؤُزدْجَاضْ ن وُوزَّاڒْ، ؤُشَا مِّيسْ إِمّكْسِي ذغْيَا غَارْ أَربِّي ؤُ غَارْ ڒْْعَارْشْ نّسْ. ◘12:‏5 إِزهد. 2‏:‏9؛ أَسَا. 2‏:‏27. ٦ مَاشَا ثَامطُّوثْ ثَارْوڒْ غَارْ ڒخْڒَا، غَارْ مَانِي ثُوغَا ذ أَسْ إِڭَّا أَربِّي أَمْشَانْ حِيمَا أَذْ أَسْ سّشّنْ، ڒْْقدّْ ن وَاڒفْ ؤُ-مِيثَايْنْ ؤُ-ستِّينْ ن وُوسَّانْ. ◘12:‏6 إِزهد. 55‏:‏7‏-‏19؛ أَسَا. 11‏:‏3.

٧ ؤُشَا إِكَّارْ ؤُمنْغِي ذڭْ ؤُجنَّا. مِيخَايِيلْ ذ لْمَالَاكَاثْ نّسْ مّنْغنْثْ أَكْ-ذ ڒْْهَايْشثْ، ؤُشَا ؤُڒَا ذ ڒْْهَايْشثْ ذ لْمَالَاكَاثْ نّسْ مّنْغنْثْ، ٨ مَاشَا نِيثْنِي وَارْ جْهِيذنْ شَا ؤُشَا وَارْ إِتّْوِيفْ عَاذْ ومْشَانْ ذڭْ ؤُجنَّا إِ نِيثْنِي. ◘12:‏8 دَان. 2‏:‏35. ٩ ثمّنْضَارْ-د ڒْْهَايْشثْ ثَامقّْرَانْثْ، نتَّاثْ ذ ؤُفِيغَارْ نِّي ثُوغَا زِيشْ، قَّارنْ أَسْ ’إِبْڒِيسْ‘ نِيغْ ’شِّيطَانْ‘، ونِّي إِغكّْوَانْ مَارَّا ثَامُّورْثْ، وَاهْ، أَقَا إِمّنْضَارْ-د خْ ثمُّورْثْ ؤُشَا لْمَالَاكَاثْ نّسْ مّنْضَارنْثْ-إِ-د عَاوذْ أَكِيذسْ. ◘12:‏9 لك. 10‏:‏18؛ أَسَا. 20‏:‏2. ١٠ ؤُشَا سْڒِيغْ إِشْثْ ن ثْمِيجَّا ثَامقّْرَانْثْ زڭْ ؤُجنَّا ثقَّارْ س جّهْذْ:

”أَقَا يُوسَا-د ؤُفكِّي ذ صُّولْطَا

ذ ثْڭلْذِيثْ ن أَربِّي نّغْ،

مِينْزِي ونِّي إِضڒْمنْ أَيْثْمَاثْنغْ، أَقَا إِمّنْضَارْ،

ونِّي إِ ثنْ إِضڒْمنْ أَسّْ ذ دْجِيڒثْ.

١١ غلّْبنْ خَاسْ س إِذَامّنْ ن إِزْمَارْ،

ذ وَاوَاڒْ ن شّْهَاذثْ نّسْ،

ؤُشَا نِيثْنِي وَارْ سّْعِيزّنْ شَا ثُوذَارْثْ نْسنْ

أَڒْ ڒْْموْثْ.

١٢ خْ ؤُينِّي، فَارْحمْ، أَ إِجنْوَانْ

ذ يِينِّي ذَايْسنْ إِزدّْغنْ!

ؤُشْثْ خْ ثمُّورْثْ ذ ڒبْحَارْ،

إِبْڒِيسْ أَقَا إِهْوَا-د غَارْومْ

س ثفْقحْثْ نّسْ إِمْغَارنْ أَطَّاسْ،

إِسّنْ أَذْ غَارسْ إِقِّيمْ

ذْرُوسْثْ ن ڒْْوقْثْ وَاهَا.“ ◘12:‏12 إِزهد. 96‏:‏11؛ إِشا. 49‏:‏13؛ أَسَا. 8‏:‏13.

١٣ أَڒَامِي ڒْْهَايْشثْ ثُوفَا إِخفْ نّسْ ثمّنْضَارْ غَارْ ثمُّورْثْ، ثضْفَارْ ثَامطُّوثْ إِ د-يُورْونْ مِّيسْ ذ أَوْثمْ. ١٤ مّوْشنْ أَسْ إِ ثْمطُّوثْ ثْنَاينْ ن وفْرِيونْ ن ؤُڭِيذرْ أَمقّْرَانْ، حِيمَا أَذْ ثضْوُو غَارْ ومْشَانْ نّسْ ذِي ڒخْڒَا، مَاحنْذْ أَذْ ثتّْوَاسّشّْ ذِينِّي، إِجّْ ن ڒْْمِيجَاڒْ ن ڒْْوقْثْ ذ ڒوْقَاثْ ذ إِجّْ ن وزْينْ ن يِيجّْ ن ڒْْمِيجَاڒْ ن ڒْْوقْثْ، مَانِي وَارْ ت إِژَارّْ ؤُفِيغَارْ. ◼12:‏14 ’إِجّْ ن ڒْْمِيجَاڒْ ن ڒْْوقْثْ ذ ڒوْقَاثْ ذ إِجّْ ن وزْينْ ن يِيجّْ ن ڒْْمِيجَاڒْ ن ڒْْوقْثْ‘ - مَانْ أَيَا إِخْسْ أَذْ يِينِي ’إِجّْ ن ؤُسڭّْوَاسْ ذ ثْنَاينْ ن إِسڭّْوُوسَا ذ وزْينْ ن ؤُسڭّْوَاسْ‘. خْزَارْ أَسَا. 12:6.  ◘12:‏14 أَسَا. 2‏:‏6. ١٥ أَفِيغَارْ إِسُّوسفْ زڭْ ؤُقمُّومْ نّسْ أَوَارْنِي إِ ثْمطُّوثْ، إِڭَّا إِشْثْ ن ڒْْحمْڒثْ ن وَامَانْ أَمْ يغْزَارْ، حِيمَا أَذْ ت أَوْينْ وَامَانْ. ١٦ ثَامُّورْثْ ثْعَاونْ ثَامطُّوثْ ؤُشَا ثَارْزمْ ثمُّورْثْ أَقمُّومْ نّسْ، ثحْرُووْ إِغْزَارْ ونِّي د-إِسُّوسْفنْ ڒْْهَايْشثْ زڭْ ؤُقمُّومْ نّسْ. ١٧ ؤُشَا ڒْْهَايْشثْ ثْخيّقْ أَطَّاسْ خْ ثْمطُّوثْ ؤُشَا ثُويُورْ حِيمَا أَذْ ثمّْنغْ أَكْ-ذ يِينِّي إِقِّيمنْ زِي زَّارِيعثْ نّسْ ؤُشَا أَكْ-ذ إِنِّي إِتّطّْفنْ ذِي ثْوصَّا ن أَربِّي ؤُ ذِي شّْهَاذثْ ن يَاسُوع. ◼12:‏17 ’زَّارِيعثْ نّسْ‘ - إِخْسْ أَذْ يِينِي لْمَاسِيحْ (خْزَارْ أَمز. 3:15) ؤُ ينِّي إِقِّيمنْ أَقَا-ثنْ ذ ڒْْمُومِينِينْ إِنِّي يُومْننْ ذِي لْمَاسِيحْ.