١ ؤُشَا سْڒِيغْ إِشْثْ ن ثْمِيجَّا زِي زَّاوشْثْ ثَامقّْرَانْثْ ثتّْڒَاغَا خْ سبْعَا ن لْمَالَاكَاثْ نِّي، ثنَّا:

”ؤُيُورنْثْ، تّْفَارّْغنْثْ سبْعَا ن طَّاوْيَاثْ ن وغْضَابْ ن أَربِّي خْ ثمُّورْثْ!“ ◘16:‏1 إِشا. 66‏:‏6

٢ ونِّي ذ أَمزْوَارُو يُويُورْ، إِفَارّغْ طَّاوْيَا نّسْ خْ ثمُّورْثْ. ؤُشَا إِذْوڒْ إِجّْ ن ؤُبُوعْرُوسْ ذ أَعفَّانْ إِقْبحْ غَارْ إِوْذَانْ إِ غَارْ ثدْجَا ڒْْمَارْكَا ن ڒْْوحْشْ، إِنِّي إِسجْذنْ إِ ڒخْيَاڒْ نّسْ. ◼16:‏2 ’ڒخْيَاڒْ‘ - نِيغْ ’ثِيمْثَالْ‘.  ◘16:‏2 ؤُف. 9‏:‏9، 10، 11؛ 1 صم. 5‏:‏9؛ أَسَا. 13‏:‏14، 16، 17.

٣ خنِّي إِفَارّغْ لْمَالَاكْ وِيسّْ ثْنَاينْ طَّاوْيَا نّسْ ذِي ڒبْحَارْ ؤُشَا إِذْوڒْ ڒبْحَارْ أَمْ إِذَامّنْ ن إِجّْ ن ؤُمتِّينْ، ؤُشَا كُوڒْ ڒعْمَارْ إِدَّارنْ ذِي ڒبْحَارْ إِمُّوثْ. ◘16:‏3 ؤُف. 7‏:‏17، 18، 20

٤ خنِّي إِفَارّغْ لْمَالَاكْ وِيسّْ ثْڒَاثَا طَّاوْيَا نّسْ خْ إِغزْرَانْ ذ ثَاڒَاوِينْ، ؤُشَا أَمَانْ نْسنْ ذوْڒنْ ذ إِذَامّنْ.

٥ ؤُشَا سْڒِيغْ إِ لْمَالَاكْ ن وَامَانْ إِقَّارْ:

”شكْ ذ أَمْسڭَّاذْ،

شكْ ذ ونِّي إِدْجَانْ ذ ونِّي ثُوغَا،

ذ ونِّي ذ أَمزْذَاڭْ قَاعْ،

ؤُمِي ثْكمّْڒذْ ڒحْكَامَاثْ-أَ أَمُّو. ◘16:‏5 أَسَا. 1‏:‏4، 8؛ 4‏:‏8؛ 11‏:‏17.

٦ مِينْزِي نِيثْنِي سِّيزّْڒنْ إِذَامّنْ

ن إِنَابِييّنْ ذ إِمْقدَّاسنْ،

ثوْشِيذْ أَسنْ عَاوذْ أَذْ سْونْ إِذَامّنْ،

مَاغَارْ أَمُّو إِ ذ أَسنْ د-إِفّغْ.“ ◘16:‏6 مت. 23‏:‏34.

٧ ؤُشَا سْڒِيغْ أَقَا أَعَالْطَارْ إِقَّارْ:

”وَاهْ، أَ سِيذِي أَربِّي، أَمْزمَّارْ خْ كُوڒْشِي،

ڒحْكَامَاثْ نّشْ ذ ثِيذتّْ ذ ثَاسڭْذَا.“ ◘16:‏7 أَسَا. 15‏:‏3.

٨ خنِّي إِفَارّغْ لْمَالَاكْ وِيسّْ أَربْعَا طَّاوْيَا نّسْ خْ ثْفُوشْثْ ؤُشَا ثمّوْشْ أَسْ إِ ثْفُوشْثْ، حِيمَا أَذْ ثشْنفْ إِوْذَانْ س ثْمسِّي. ٩ ؤُشَا شمْضنْ إِوْذَانْ س ڒْْعابُوقْ إِمْغَارنْ ن ثْمسِّي ؤُشَا شقّْفنْ ذڭْ يِيسمْ ن أَربِّي ونِّي غَارْ ثدْجَا صُّولْطَا خْ جّْرَايحْ-أَ ؤُشَا وَارْ ثُوبنْ شَا مَاحنْذْ أَذْ أَسْ وْشِينْ أَعُودْجِي. ◘16:‏9 أَسَا. 16‏:‏11، 21.

١٠ خنِّي إِفَارّغْ لْمَالَاكْ وِيسّْ خمْسَا طَاوْيَا نّسْ خْ ڒْْعَارْشْ ن ڒْْوحْشْ ؤُشَا ثوْضَا-د ثَادْجسْثْ خْ ثْڭلْذِيثْ ن ڒْْوحْشْ. ؤُشَا زعْفنْ ذڭْ إِڒسْ نْسنْ س سِّيبّثْ ن ڒحْرِيقْ ١١ ؤُشَا شقّْفنْ ذڭْ يِيسمْ ن أَربِّي ن إِجنْوَانْ س سِّيبّثْ ن ڒحْرِيقْ ذ إِبُوعْرُوسنْ نْسنْ، مَاشَا وَارْ ثُوبنْ شَا زِي ڒخْذَايمْ نْسنْ.

١٢ خنِّي إِفَارّغْ لْمَالَاكْ وِيسّْ ستَّا طَّاوْيَا نّسْ ذڭْ إِغْزَارْ أَمقّْرَانْ، إِغْزَارْ ن لْفُورَاطْ ؤُشَا ؤُژْغنْ وَامَانْ نّسْ، أَڒَامِي إِسّوْجذْ أَبْرِيذْ إِ إِجدْجِيذنْ إِنِّي د غَا يَاسنْ زِي مَانِيسْ د-ثْنقَّارْ ثْفُوشْثْ. ◘16:‏12 إِشا. 11‏:‏15

١٣ خنِّي ژْرِيغْ، أَقَا ثْڒَاثَا ن ڒَْارْيَاحْ إِمنْڭَاسْ أَمْ إِقَارْقْرِيونْ فّْغنْ-د زڭْ ؤُخنْفُوشْ ن ڒْْهَايْشثْ ؤُ زڭْ ؤُقمُّومْ ن ڒْْوحْشْ ؤُ زڭْ ؤُقمُّومْ ن ؤُنَابِي إِسّْخَارِّيقنْ، ١٤ مَاغَارْ نِيثْنِي ذ ڒَْارْيَاحْ ن شّْوَاطنْ إِنِّي إِتّڭّنْ ڒعْڒَامَاثْ إِ ذ إِڭُّورنْ غَارْ إِجدْجِيذنْ ن دُّونشْثْ، مَاحنْذْ أَذْ ثنْ سّْمُوننْ إِ ؤُمنْغِي ذڭْ وَاسّْ أَمقّْرَانْ ن أَربِّي، أَمْزمَّارْ خْ كُوڒْشِي. ◘16:‏14 2 تس. 2‏:‏9؛ أَسَا. 13‏:‏13؛ 17‏:‏14؛ 19‏:‏19، 20؛ 20‏:‏8.

١٥ ”خْزَارْ، نشّْ أَذْ د-أَسغْ

أَمْ يِيجّْ ن ؤُشفَّارْ!

سّعْذْ ن ونِّي إِ غَا إِقِّيمنْ إِفَاقْ،

ونِّي إِ غَا إِحْضَانْ أَرُّوضْ نّسْ

حِيمَا وَارْ إِڭُّورْ ذ أَعَارْيَانْ،

وَارْ إِتّْوَاژَارْ ؤُسضْحِي نّسْ.“ ◘16:‏15 مت. 24‏:‏43؛ لك. 12‏:‏39؛ 1 تس. 5‏:‏2؛ 2 بُط. 3‏:‏10؛ أَسَا. 3‏:‏3، 18.

١٦ ؤُشَا إِسّْمُونْ إِ-ثنْ غَارْ ومْشَانْ ؤُمِي تّْڒَاغَانْ س ثْعِيبْرَانِيثْ ’مڭِيدُّو‘.

١٧ خنِّي إِفَارّغْ لْمَالَاكْ وِيسّْ سبْعَا طَّاوْيَا نّسْ خْ ڒعْوِينْ ؤُشَا ثُوسَا-د إِشْثْ ن ثْمِيجَّا ثجْهذْ زِي زَّاوشْثْ ثَامقّْرَانْثْ، زِي زَّاثْ ن ڒْْعَارْشْ، ثقَّارْ:

”أَقَا إِتّْوَاكمّڒْ!“ ◘16:‏17 إِشا. 66‏:‏6؛ أَسَا. 21‏:‏6.

١٨ ؤُشَا ؤُسِينْ-د وَاسَّامنْ ذ وَاجَّاجنْ، ؤُشَا إِمْسَارْ إِجّْ ن ونْهزِّي ن ثمُّورْثْ ذ أَمقّْرَانْ، وَارْ ثمْسَارْ أَمُّو زڭْ وَامِي إِدْج بْنَاذمْ ذِي ثمُّورْثْ، أَمُّو إِ إِمْغَارْ. ◘16:‏18 أَسَا. 4‏:‏5؛ 8‏:‏5. ١٩ ثَانْذِينْثْ ثَامقّْرَانْثْ ثوْضَا ثبْضَا خْ ثْڒَاثَا ن ثْسقَّارْ ؤُشَا مَارَّا ثِيندَّامْ ن ڒڭْنُوسْ هذْمنْثْ ؤُشَا أَربِّي إِعْقڒْ خْ ثنْذِينْثْ ثَامقّْرَانْثْ بَابِيلْ، حِيمَا أَذْ أَسْ إِوْشْ ڒْْكَاسْ ن بِينُو ن ثفْقحْثْ ن وغْضَابْ نّسْ. ◘16:‏19 إِزهد. 75‏:‏9؛ إِرْم. 25‏:‏15؛ أَسَا. 14‏:‏8، 10؛ 18‏:‏5. ٢٠ ؤُشَا كُوڒْ ثَاڭْزِيرْثْ ثَارْوڒْ، وَارْ تّْوِيفِينْ شَا إِذُورَارْ عَاذْ، ٢١ وْضَانْ-د إِبْقُوقنْ إِمقّْرَاننْ ن ثبْرُورِي زڭْ ؤُجنَّا خْ إِوْذَانْ، ثُوغَا دّْقڒْ نْسنْ أَنشْثْ ن إِشْثْ ن ’ثَالِينْثْ‘، ؤُشَا إِوْذَانْ شقّْفنْ ذِي أَربِّي زِي سِّيبّثْ ن جّْرِيحشْثْ ن ثبْرُورِي، مِينْزِي جّْرِيحشْثْ نّسْ ثُوغَا ثمْغَارْ أَطَّاسْ. ◘16:‏21 أَسَا. 11‏:‏19؛ 16‏:‏9، 11.