أَذْلِيسْ إِقدّْسنْ أَسَارْڭبْ ١٥

١٥

إِژْڒِي ن إِنِّي إِغلّْبنْ

١ ؤُشَا ژْرِيغْ ذڭْ ؤُجنَّا إِشْثْ ن ڒعْڒَامثْ نّغْنِي، ذ ثَامقّْرَانْثْ ذ ثَانبْهثْ: سبْعَا ن لْمَالَاكَاثْ نِّي د-إِوْينْ سبْعَا ن جّْرَايحْ ثِينڭُّورَا، مِينْزِي إِكْمڒْ زَّايْسنْثْ وغْضَابْ ن أَربِّي. ◘

٢ ؤُشَا ژْرِيغْ شَا إِتّمْشَابهْ ذِي ڒبْحَارْ ن زَّاجْ، ونِّي إِخدْجْضنْ أَكْ-ذ ثْمسِّي، ؤُشَا إِنِّي إِغلّْبنْ خْ ڒْْوحْشْ ذ ڒخْيَاڒْ نّسْ ذ نُّومْرُو ن يِيسمْ نّسْ، بدّنْ خْ ڒبْحَارْ ن زَّاجْ، غَارْسنْ لهَارْپَاثْ ن أَربِّي.◘ ٣ نِيثْنِيغنّْجنْ إِزْڒِي ن ؤُصبّحْ ن مُوسَا، أَمْسخَّارْ ن أَربِّي، ذ يزْڒِي ن ؤُصبّحْ ن يزْمَارْ، قَّارنْ:

”ذ ثِيمقّْرَانِينْ ذ ثْصبْحَانِينْ ڒخْذَايمْ نّشْ،

أَ، سِيذِي أَربِّي، أَمْزمَّارْ خْ كُوڒْشِي،

ڒخْذَايمْ نّشْ ذ ثَاسڭْذَا ذ ثِيذتّْ،

أَ أَجدْجِيذْ ن نْ زّْمَانَاثْ! ◘

٤ مَانْ ونْ وَارْ شكْ إِتّڭّْوذنْ، أَ سِيذِي،

مَانْ ونْ وَارْ إِسّمْغَارَانْ إِسمْ نّشْ؟

شكْ وحّْذكْ إِ إِدْجَانْ ذ أَمزْذَاڭْ قَاعْ،

مَاغَارْ مَارَّا ڒڭْنُوسْ أَذْ د-أَسنْ،

أَذْ سجْذنْ زَّاثكْ،

مِينْزِي شكْ ثْبَانذْ ذ أَمْسڭّذْ

ذِي ڒحْكَامَاثْ نّشْ.“ ◘

٥ أَوَارْنِي أَسْ ژْرِيغْ، أَقَا ثنُّورْزمْ زَّاوشْثْ ثَامقّْرَانْثْ ن ثْزذِّيغْثْ ن شّْهَاذثْ ذڭْ ؤُجنَّا ◘ ٦ ؤُشَا سبْعَا ن لْمَالَاكَاثْ نِّي غَارْ دْجَانْثْ سبْعَا ن جّْرَايحْ فّْغنْثْ-إِ-د زِي زَّاوشْثْ ثَامقّْرَانْثْ، يَارْضنْثْ ڒقْطنْ أَزْذَاذْ إِزْذِيڭنْ إِتِّيسِّيقنْ، ؤُشَا غَارْسنْ خْ إِذْمَارنْ إِجّْ ن وبْيَاسْ ن وُورغْ. ◘ ٧ ؤُشَا إِجّنْ زِي أَربْعَا ن إِمُودَّارنْ إِوْشَا أَسنْ إِ سبْعَا ن لْمَالَاكَاثْ سبْعَا ن طَّاوْيَاثْ، شُّورنْثْ س وغْضَابْ ن أَربِّي، ونِّي ذ ثُوذَارْثْ إِ ڒبْذَا قَاعْ. ”أَمِينْ!“ ٨ ؤُشَا ثتّْوَاعمَّارْ زَّاوشْثْ ثَامقّْرَانْثْ س دّخَّانْ إِ د-إِتّفّْغنْ زڭْ ؤُعُودْجِي ن أَربِّي ؤُ زِي جّهْذْ نّسْ. ؤُڒَا ذ إِجّنْ وَارْ إِزمَّارْ أَذْ د-يَاذفْ غَارْ زَّاوشْثْ ثَامقّْرَانْثْ أَڒْ غَا كّنْثْ قَاعْ سبْعَا ن جّْرَايحْ ثِينِّي د-إِوْينْ سبْعَا ن لْمَالَاكَاثْ. ◘

◘١٥:١ 15:‏1 إِزهد. 7‏:‏12؛ أَسَا. 11‏:‏14.

◘١٥:٢ 15:‏2 أَسَا. 4‏:‏6؛ مِيخَا 7‏:‏18.

◘١٥:٣ 15:‏3 ؤُف. 15‏:‏1‏-‏21؛ أَعَوذ. 32‏:‏1‏-‏44؛ إِزهد. 111‏:‏2؛ 139‏:‏14؛ 145‏:‏17.

◘١٥:٤ 15:‏4 إِرْم. 10‏:‏6، 7؛ زَاك. 14‏:‏16‏-‏20

◘١٥:٥ 15:‏5 أَسَا. 11‏:‏19.

◘١٥:٦ 15:‏6 أَسَا. 1‏:‏13.

◘١٥:٨ 15:‏8 ؤُف. 40‏:‏34؛ 1 إِج. 8‏:‏10؛ 2 إِم. 5‏:‏14؛ إِشا. 6‏:‏4.