١ ؤُشَا ژْرِيغْ، أَقَا إِزْمَارْ إِبدّْ-د خْ وذْرَارْ ن صِيهْيُونْ، ؤُشَا أَكِيذسْ مْيَا ؤُ-أَربْعَا ؤُ-ربْعِينْ-أَڒفْ، إِنِّي خْ ثنْيَارْثْ نْسنْ يُورَا إِسمْ نّسْ ذ يِيسمْ ن بَابَاسْ. ◘14:‏1 2 إِم. 23‏:‏7؛ إِشا. 31‏:‏4؛ إِزهد. 2‏:‏6؛ أَسَا. 7‏:‏4

٢ سْڒِيغْ إِشْثْ ن ثْمِيجَّا ثُوسَا-د زڭْ ؤُجنَّا، أَمْ ڒْْحسّْ ن وَاطَّاسْ ن وَامَانْ ؤُ أَمْ ڒْْحسّْ ن وَاجَّاجْ أَمقّْرَانْ، ؤُشَا ڒْْحسّْ إِ سْڒِيغْ ثُوغَا أَمْ يِيجّْ ن بُو-لهَارْپَا إِتِّيرَارنْ ذِي لهَارْپَا نّسْ. ◘14:‏2 يُووِ. 4‏:‏8؛ أَسَا. 1‏:‏15؛ 5‏:‏8؛ 10‏:‏3 ٣ أَقَا نِيثْنِيغنّْجنْ مِينْ إِدْجَانْ أَمْ يِيجّْ ن يزْڒِي ن ؤُصبّحْ ذ جْذِيذْ قَاعْ زَّاثْ إِ ڒْْعَارْشْ ؤُ زَّاثْ إِ أَربْعَا ن إِمُودَّارنْ ذ إِمْغَارنْ، ؤُشَا ؤُڒَا ذ إِجّْ وَارْ إِزمَّارْ أَذْ إِڒْمذْ إِزْڒِي أَيَا ن ؤُصبّحْ مْغِيرْ مْيَا ؤُ-أَربْعَا ؤُ-ربْعِينْ-أَڒفْ، إِنِّي إِتّْوَافْذِينْ زِي ثمُّورْثْ. ◘14:‏3 أَسَا. 5‏:‏9. ٤ إِنَا ذ إِنِّي وَارْ إِسّفْسذنْ إِخفْ نْسنْ أَكْ-ذ ثمْغَارِينْ، مِينْزِي نِيثْنِي ذ إِعزْرِييّنْ إِمزْذَاڭنْ. نِيثْنِي ضفَّارنْ إِزْمَارْ مَانِي مَا إِكَّا. أَقَا إِنَا إِتّْوَافْذِينْ زڭْ إِوْذَانْ أَمْ صَّابثْ ثَامزْوَارُوثْ إِ أَربِّي ؤُ إِ يزْمَارْ. ◘14:‏4 2 كُور. 11‏:‏2. ٥ أَقَا وَارْ إِتّْوِيفِّي شَا ڒْْغشّْ ذڭْ ؤُقمُّومْ نْسنْ، أَقَا وَارْ ذَايْسنْ بُو ڒْْعِيبْ. ◘14:‏5 صَاف. 3‏:‏13؛ أَفا. 5‏:‏27.

٦ ؤُشَا ژْرِيغْ إِجّْ ن لْمَالَاكْ نّغْنِي ثُوغَا إِطَّاوْ ذِي ڒْْوسْطْ ن ؤُجنَّا، غَارسْ ڒخْبَارْ أَصبْحَانْ إِ ڒبْذَا حِيمَا أَذْ زَّايسْ إِبَارّحْ إِ يِينِّي إِزدّْغنْ ذِي ثمُّورْثْ، إِ كُوڒْ ڒْْڭنْسْ ذ شّعْبْ ذ ثقْبِيتْشْ ذ يِيڒسْ، ٧ ؤُشَا إِنَّا س جّهْذْ:

”ڭّْوذمْ أَربِّي، وْشمْ أَسْ-د أَعُودْجِي،

أَقَا ثَاسَاعّثْ ن لْحِيسَابْ نّسْ ثِيوضْ-د.

سجْذمْ إِ ونِّي إِڭِّينْ أَجنَّا ذ ثمُّورْثْ

ذ ڒبْحَارْ ذ ثَاڒَاوِينْ ن وَامَانْ.“ ◘14:‏7 أَمز. 1‏:‏1؛ إِزهد. 33‏:‏6؛ 124‏:‏8؛ 146‏:‏6؛ ڒخ. 14‏:‏15؛ 17‏:‏24.

٨ ؤُشَا ونّغْنِي، ونِّي ذ وِيسّْ ثْنَاينْ، إِضْفَارْ إِ-ث، إِنَّا:

”أَقَا ثوْضَا، أَقَا ثوْضَا ثنْذِينْثْ ثَامقّْرَانْثْ بَابِيلْ،

إِ يجِّينْ أَذْ سْونْ مَارَّا ڒڭْنُوسْ زِي بِينُو

ن ثفْقحْثْ ن فَارْقْ-شّْغڒْ نّسْ.“ ◘14:‏8 إِشا. 21‏:‏9؛ إِرْم. 51‏:‏8؛ أَسَا. 16‏:‏19؛ 17‏:‏5؛ 18‏:‏2، 10، 21.

٩ ؤُشَا ونّغْنِي، إِجّْ ن لْمَالَاكْ وِيسّْ ثْڒَاثَا، إِضْفَارْ إِ-ثنْ ؤُشَا إِڒَاغَا س جّهْذْ:

”ونِّي إِعبْذنْ ڒْْوحْشْ ذ ڒخْيَاڒْ نّسْ

ذ ونِّي إِكْسِينْ ڒْْمَارْكَا خْ ثنْيَارْثْ نّسْ

نِيغْ ذڭْ ؤُفُوسْ نّسْ،

١٠ ذ نتَّا أَذْ إِسُو عَاوذْ

زِي بِينُو ن ثفْقحْثْ ن سِيذِي،

ونِّي إِسّْوجْذنْ بْڒَا أَخدْجضْ

ذِي ڒْْكَاسْ ن وغْضَابْ نّسْ،

ؤُشَا أَذْ إِتّْوَاعدّبْ

س ثْمسِّي ذ ڒشْبَاريّثْ

قِيبَاتْشْ إِ ثِيطَّاوِينْ ن لْمَالَاكَاثْ إِقدّْسنْ

ؤُ قِيبَاتْشْ إِ ثِيطَّاوِينْ ن يزْمَارْ. ◘14:‏10 أَسَا. 16‏:‏19؛ 18؛6؛ 19‏:‏20.

١١ ؤُشَا دّخَّانْ ن ؤُعدّبْ نْسنْ

أَذْ إِقِّيمْ إِڭعّذْ إِ ڒبْذَا قَاعْ.

وَارْ ذِينْ بُو أَرَّاحثْ أَسّْ ذ دْجِيڒثْ

إِ ونِّي إِسجّْذنْ إِ ڒْْوحْشْ ذ ڒخْيَاڒْ نّسْ

ؤُ إِ ونِّي إِكْسِينْ ڒْْمَارْكَا ن يِيسمْ نّسْ. ◘14:‏11 أَسَا. 19‏:‏3.

١٢ أَقَا ذَا إِتّْبَانْ-د صّْبَارْ ن إِمْقدَّاسنْ،

إِنِّي إِتّطّْفنْ ذِي ثْوصَّا ن أَربِّي

ؤُ حطَّانْ لْ-إِيمَانْ ن يَاسُوع.“ ◘14:‏12 أَسَا. 13‏:‏10.

١٣ ؤُشَا سْڒِيغْ إِشْثْ ن ثْمِيجَّا ثتّْڒَاغَا-د زڭْ ؤُجنَّا، ثقَّارْ:

”أَرِي: سّعْذْ ن إِمتِّيننْ

إِنِّي إِ غَا مّْثنْ ذِي سِيذِيثْنغْ،

زِي ڒخُّو ثْسَاونْثْ!“

”وَاهْ، إِنَّا أَرُّوحْ، مَاغَارْ أَذْ أَريّْحنْ

زِي ڒخْذَايمْ نْسنْ!“،

أَقَا ڒخْذَايمْ نْسنْ أَذْ ثنْ ضْفَارنْثْ.

١٤ ؤُشَا ژْرِيغْ، أَقَا إِجّْ ن ؤُسيْنُو ذ أَشمْڒَاڒْ، ؤُشَا خْ ؤُسيْنُو إِقِّيمْ خَاسْ ونِّي يَارْوسنْ ذڭْ إِجّْ ن مِّيسْ ن بْنَاذمْ، غَارسْ تَّاجْ ن وُورغْ خْ ؤُزدْجِيفْ نّسْ ؤُ أَمْجَارْ إِقْضعْ ذڭْ ؤُفُوسْ نّسْ. ◘14:‏14 حِز. 1‏:‏26؛ دَان. 7‏:‏13؛ أَسَا. 1‏:‏13.

١٥ ؤُشَا إِجّْ ن لْمَالَاكْ نّغْنِي إِفّغْ-د زِي زَّاوشْثْ ثَامقّْرَانْثْ ؤُشَا إِڒَاغَا س جّهْذْ خْ ونِّي إِقِّيمنْ خْ ؤُسيْنُو:

”سكّْ-د أَمْجَارْ نّشْ، مْجَارْ!

أَقَا ثَاسَاعّثْ ن ثْميْرَا ثِيوضْ-د!“ ◘14:‏15 يُووِ. 4‏:‏13؛ مت. 13‏:‏39.

١٦ ؤُشَا ونِّي إِقِّيمنْ خْ ؤُسيْنُو، إِسّكّْ-د أَمْجَارْ نّسْ غَارْ ثمُّورْثْ ؤُشَا ثتّْوَامْجَارْ ثمُّورْثْ.

١٧ ؤُشَا إِجّْ ن لْمَالَاكْ نّغْنِي إِفّغْ-د زِي زَّاوشْثْ ثَامقّْرَانْثْ إِ إِدْجَانْ ذڭْ ؤُجنَّا، ؤُشَا ؤُڒَا ذ نتَّا غَارسْ إِجّْ ن ومْجَارْ إِقْضعْ. ١٨ ؤُشَا إِجّْ ن لْمَالَاكْ نّغْنِي ونِّي غَارْ ثدْجَا صُّولْطَا خْ ثْمسِّي، إِفّغْ-د زڭْ ؤُعَالْطَارْ، ؤُشَا إِڒَاغَا-د س جّهْذْ خْ ونِّي غَارْ إِدْجَا ومْجَارْ إِقْضعْ، إِنَّا:

”سكّْ-د أَمْجَارْ نّشْ إِقضْعنْ،

ڒْْقضْ إِزكُّوننْ ن ثْزَايَارِينْ ن ثمُّورْثْ،

مِينْزِي أَضِيڒْ نّسْ أَقَا يِيوضْ.“

١٩ ؤُشَا لْمَالَاكْ إِسّكّْ-د أَمْجَارْ نّسْ غَارْ ثمُّورْثْ، إِڒْقضْ أَضِيڒْ نْ ثْزَايَارْثْ ن ثمُّورْثْ، إِنْضَارْ إِ-ث ذِي ثْسِيرْثْ ثَامقّْرَانْثْ ن وغْضَابْ ن أَربِّي. ◘14:‏19 أَسَا. 19‏:‏15. ٢٠ حَارْينْ ذِي ثْسِيرْثْ ن ؤُضِيڒْ أَڒْ بَارَّا ن ثنْذِينْثْ ؤُشَا رُوشّنْ-د إِذَامّنْ زِي ثْسِيرْثْ أَڒَامِي إِوْضنْ غَارْ سْڒِيمَاثْ ن ييْسَانْ، ڒْْقدّْ ن أَڒفْ ؤُ-مِيثَاينْ ن ’إِسْثَاذِييّنْ‘، إِخْسْ أَذْ يِينِي عْڒَاحَاڒْ مِيثَاينْ ؤُ-عِيشْرِينْ كِيلُومِيثْرْ. ◼14:‏20 ’إِسْثَاذِييّنْ‘
إِجّْ ن ڒْْمڒْعبْ ذِي ڒْْوقْثْ ن إِيُونَانِييّنْ ثُوغَا غَارسْ إِشْثْ ثُوزُّوڭَارْثْ ن 185 مِيثْرْ، إِخْسْ أَذْ يِينِي ’إِنّْ ن ؤُسْثَاذِييْ‘.  ◘14:‏20 إِشا. 63‏:‏3.