١ أَوَارْنِي أَسْ سْڒِيغْ إِجّْ ن ڒْْحسّْ أَمقّْرَانْ ن وَاطَّاسْ ن ڒْْغَاشِي ذڭْ ؤُجنَّا، نَّانْ:

”هَالِّيلُو-يَاهْ!

أَسنْجمْ ذ ؤُعُودْجِي ذ جّهْذْ

أَقَا أَثنْ غَارْ أَربِّي نّغْ،

٢ مِينْزِي ڒحْكَامَاثْ نّسْ مْغِيرْ ذ ثِيذتّْ ذ ڒْْحقّْ،

ؤُمِي إِحَاسبْ خْ ثمْغَارْثْ ن فَارْقْ-شّْغڒْ،

ثنِّي يَاردّْدْجنْ دُّونشْثْ س فَارْقْ-شّْغڒْ نّسْ،

ؤُشَا نتَّا يُوغَا ثَاسْغَارْثْ

خْ إِذَامّنْ ن إِمْسخَّارنْ نّسْ

إِ يُومْسنْ غَارْ إِفَاسّنْ نّسْ.“ ◘19:‏2 أَعَوذ. 32‏:‏43؛ أَسَا. 15‏:‏3؛ 16‏:‏7؛ 18‏:‏20.

٣ نَّانْ إِ ؤُمُورْ وِيسّْ ثْنَاينْ:

”هَالِّيلُو-يَاهْ!“

ؤُشَا أَذْ يَاڒِي دّخَّانْ نّسْ غَارْ ؤُجنَّا إِ ڒبْذَا قَاعْ.◘19:‏3 إِشا. 34‏:‏10؛ أَسَا. 14‏:‏11؛ 18‏:‏18.

٤ ؤُشَا أَربْعَا ؤُ-عِيشْرِينْ ن إِمْغَارنْ ذ أَربْعَا ن إِمُودَّارنْ وْضَانْ غَارْ ثمُّورْثْ، سجْذنْ إِ أَربِّي نّغْ ونِّي إِقِّيمنْ خْ ڒْْعَارْشْ، نَّانْ:

”أَمِينْ، هَالِّيلُو-يَاهْ!“

٥ ؤُشَا ثُوسَا-د إِشْثْ ن ثْمِيجَّا زِي ڒْْعَارْشْ، ثنَّا:

”سمْغَارمْ أَربِّي نّغْ، أَ كنِّيوْ مَارَّا إِمْسخَّارنْ نّسْ،

ؤُ مَارَّا إِنِّي إِتّڭّْوذنْ إِسمْ نّسْ،

أَمْ ؤُمژْيَانْ أَمْ ؤُمقّْرَانْ!“

٦ ؤُشَا سْڒِيغْ أَقَا نَّانْ أَمْ س ثْمِيجَّا ن ؤُبَارُّو ن ڒْْغَاشِي، أَمْ س ڒْْحسّْ ن وَاطَّاسْ ن وَامَانْ، أَمْ س زّْهِيرْ ن وَاجَّاجنْ إِمقّْرَاننْ:

”هَالِّيلُو-يَاهْ، مِينْزِي سِيذِي أَربِّي،

أَمْزمَّارْ خْ كُوڒْشِي، أَقَا إِحكّمْ. ◘19:‏6 أَسَا. 11‏:‏17؛ أَسَا. 14‏:‏2

٧ أجّْ أَذْ نْفَارْحْ، أَذْ نسْڒِيوْڒِيوْ،

أَذْ أَسْ نڭّْ أَعُودْجِي،

مَاغَارْ ؤُرَارْ ن يزْمَارْ يِيوضْ-د،

ؤُشَا ثَامْغَارْثْ نّسْ أَقَا ثْحزّمْ، ◘19:‏7 مت. 22‏:‏2؛ لك. 14‏:‏16.

٨ ؤُشَا ثمّوْشْ أَسْ أَذْ ثْيَارْضْ أَرُّوضْ

زِي ڒْْقطَّانْ إِفْسُوسنْ إِزْذِيڭنْ إِتِّيسِّيقنْ،

مِينْزِي ڒْْقطَّانْ نِّي

ذ ڒخْذَايمْ إِسڭّْذنْ ن إِمْقدَّاسنْ.“

٩ نِيثْنِي نَّانْ أَيِي:

”أَرِي: سّعْذْ ن يِينِّي إِتّْوَاعَارْضنْ

غَارْ ؤُمنْسِي ن وُورَارْ ن إِزْمَارْ.‘

خَاسْ ؤُشَا إِنَّا أَيِي شَا ن يِيجّنْ:

”إِنَا ذ أَوَاڒنْ ن ثِيذتّْ ن أَربِّي.“ ◘19:‏9 أَسَا. 21‏:‏5.

١٠ ؤُشَا وْضِيغْ أَسْ غَارْ إِضَارنْ نّسْ حِيمَا أَذْ ثعبْذغْ، مَاشَا نتَّا إِنَّا أَيِي:

”لَّ، وَارْ تّڭّْ شَا مَانْ أَيَا! أَقَا نشّْ ذ أَمْسخَّارْ أَمْعَاشَارْ أَمْ شكْ ذ أَيْثْمَاشْ إِنِّي غَارْ ثدْجَا شّْهَاذثْ ن يَاسُوع.عبْذثْ أَربِّي، مِينْزِي شّْهَاذثْ ن يَاسُوع نتَّاثْ ذ أَرُّوحْ ن مِينْ إِتّْوَانَابّنْ.“ ◘19:‏10 ڒخ. 10‏:‏26؛ 14‏:‏14؛ أَسَا. 22‏:‏9.

١١ أَوَارْنِي أَيَا ژْرِيغْ أَجنَّا إِنُّورْزمْ، ؤُ خْزَارْ، أَقَا ذِينْ إِجّْ ن ؤُيِيسْ ذ أَشمْڒَاڒْ ذ ونِّي خَاسْ إِنْيِينْ، قَّارنْ أَسْ ’ذَايسْ ڒَْامَانْ!‘، ’ذَايسْ ثِيذتّْ!‘، ؤُشَا نتَّا أَذْ إِحَاسبْ ؤُ أَذْ إِمّْنغْ س ثْسڭْذَا. ◘19:‏11 أَسَا. 6‏:‏2. ١٢ ثُوغَا ثِيطَّاوِينْ نّسْ أَمشْنَاوْ إِحُوذَاقْ ن ثْمسِّي، ؤُشَا غَارسْ خْ ؤُزدْجِيفْ نّسْ أَطَّاسْ ن تِّيجَانْ، ؤُشَا يُورَا خَاسْ إِسمْ إِ وَارْ ث إِسِّينْ حذْ مْغِيرْ نتَّا وَاهَا. ◘19:‏12 أَسَا. 1‏:‏14. ١٣ ثُوغَا يَارْضْ إِجّْ ن ؤُسڒْهَامْ إِتّْوَارُوشّنْ س إِذَامّنْ، ؤُشَا وَا ذ إِسمْ نّسْ: ’أَوَاڒْ ن أَربِّي‘. ◘19:‏13 إِشا. 63‏:‏1؛ يُوح. 1‏:‏1. ١٤ ڒْْعسْكَارَاثْ ن ؤُجنَّا ضْفَارنْ ث-إِ-د خْ ييْسَانْ إِشمْڒَاڒنْ، أَرْضنْ ڒْْقطَّانْ ذ أَشمْڒَاڒْ إِزْذِيڭْ. ◘19:‏14 مت. 28‏:‏3؛ أَسَا. 4‏:‏4؛ 7‏:‏9. ١٥ فّْغنْ-د ڒسْيُوفْ إِقضْعنْ زڭْ إِقمُّومنْ نْسنْ مَاحنْذْ أَذْ زَّايْسنْ نْغنْ ڒڭْنُوسْ، ؤُ نتَّا أَذْ ثنْ إِحْضَا س ؤُزدْجَاضْ ن وُوزَّاڒْ، ؤُ نتَّا سِيمَانْثْ نّسْ أَذْ إِعْفسْ ذِي ثْسِيرْثْ ن وغْضَابْ ن أَربِّي، أَمْزمَّارْ خْ كُوڒْشِي. ◘19:‏15 إِزهد. 2‏:‏9؛ إِشا. 63‏:‏3؛ أَسَا. 2‏:‏16، 27؛ 14‏:‏19، 20؛ 19‏:‏21. ١٦ خْ وَارُّوضْ نّسْ ؤُ خْ ثْمصَّاضِينْ نّسْ يُورَا خَاسنْ إِسمْ-أَ: ’أَجدْجِيذْ خْ مَارَّا إِجدْجِيذنْ‘، ’سِيذِي خْ مَارَّا ڒْْحُوكَّامْ‘. ◘19:‏16 1 تِيم. 6‏:‏15؛ أَسَا. 17‏:‏14.

١٧ ؤُشَا ژْرِيغْ إِجّْ ن لْمَالَاكْ نّغْنِي إِبدّْ ذِي ثْفُوشْثْ. نتَّا إِڒَاغَا س جّهْذْ، إِنَّا إِ مَارَّا إِجْضَاضْ إِطَّاونْ ذِي ڒْْوسْطْ ن ؤُجنَّا:

”أَستِّيوْ-ذ، مُونتِّيوْ-د

غَارْ ؤُمنْسِي أَمقّْرَانْ ن أَربِّي، ◘19:‏17 إِرْم. 12‏:‏9؛ حِز. 39‏:‏17.

١٨ حِيمَا أَذْ ثشّمْ أَيْسُومْ ن إِجدْجِيذنْ

ذ ويْسُومْ ن إِمقّْرَاننْ خْ وَاڒفْ

ذ ويْسُومْ ن يِينِّي إِجهْذنْ

ذ ويْسُومْ ن إِيْسَانْ ذ يِينِّي خَاسنْ إِنْيِينْ،

ذ ويْسُومْ ن إِحُورِّييّنْ ذ إِسمْغَانْ،

أَمْ ن إِمژْيَاننْ أَمْ ن إِمقّْرَاننْ.“

١٩ ؤُشَا ژْرِيغْ ڒْْوحْشْ أَكْ-ذ ڒْْعسْكَارَاثْ نّسْ ذ إِجدْجِيذنْ ن ثمُّورْثْ ذ إِعسْكَارِّييّنْ نْسنْ، إِنِّي إِمُوننْ حِيمَا أَذْ مّنْغنْ أَكْ-ذ ونِّي إِنْيِينْ خْ ؤُيِيسْ، ؤُ أَكْ-ذ إِعسْكَارِييّنْ نّسْ. ٢٠ أَقَا إِتّْوَاطّفْ ڒْْوحْشْ أَكْ-ذ ؤُنَابِي إِسّْخَارِّيقنْ، ونِّي إِڭِّينْ زَّاثسْ ڒعْڒَامَاثْ نِّي زِي ثُوغَا إِغشّْ إِنِّي إِكْسِينْ ڒْْمَارْكَا ن ڒْْوحْشْ ؤُشَا سجْذنْ إِ ڒخْيَاڒْ نّسْ. نِيثْنِي س ثْنَاينْ إِذْسنْ تّْوَامّنْضَارنْ ذِي ڒبْحَارْ ن ثْمسِّي إِتّْشفْشُوفنْ عَاوذْ س ڒشْبَاريّثْ. ◘19:‏20 أَعَوذ. 13‏:‏2؛ دَان. 7‏:‏11؛ مت. 24‏:‏24؛ أَسَا. 13‏:‏12، 13، 15، 16؛ 16‏:‏14؛ 20‏:‏10. ٢١ مَاشَا وِي إِقِّيمنْ تّْوَانْغنْ س وُوزَّاڒْ إِ د-إِكِّينْ زڭْ ؤُقمُّومْ ن ونِّي إِنْيِينْ خْ ؤُيِيسْ. ؤُشَا مَارَّا إِجْضَاضْ إِتّْكشَّاضنْ جِّيوْننْ س ويْسُومْ نْسنْ.