١ خنِّي نشِّينْ، أَمْ نتّْوَاسڭّذْ س لْ-إِيمَانْ، أَقَا أَذْ غَارْنغْ يِيڒِي ڒهْنَا أَكْ-ذ أَربِّي س سِيذِيثْنغْ يَاسُوع لْمَاسِيحْ. ◘5:‏1 إِشا. 32‏:‏17؛ يُوح. 16‏:‏33؛ أَفا. 2‏:‏13. ٢ مَاغَارْ زَّايسْ إِذْوڒْ أَنغْ-د أَذَافْ س لْ-إِيمَانْ غَارْ أَرْضَا-يَا مِينْ ذِي نْبدّْ، ؤُ نسّمْغَارْ ذڭْ ؤُسِيثمْ ن ؤُعُودْجِي ن أَربِّي. ◘5:‏2 يُوح. 10‏:‏9؛ 14‏:‏6؛ 1 كُور. 15‏:‏1؛ أَفا. 2‏:‏18؛ 3‏:‏12؛ عبر. 3‏:‏6؛ 10‏:‏19. ٣ مَاشَا وَارْ إِدْجِي ذِي مَانْ أَيَا وَاهَا، مَاشَا نسّمْغَارْ عَاوذْ ذِي ڒمْحَايمْ، نسّنْ بلِّي ڒْْمحْنثْ ثتَّارُو-د ذَايْنغْ صّْبَارْ، ◘5:‏3 يَاع. 1‏:‏3. ٤ ذ صّْبَارْ أَذْ يَاوِي ثَاقدْجبْثْ، ؤُشَا ثَاقدْجبْثْ أَذْ ثَاوِي أَسِيثمْ، ٥ ؤُشَا أَسِيثمْ وَارْ إِتّْسحْشِيمْ شَا، مِينْزِي ثَايْرِي ن أَربِّي أَقَا ثتّْوَافَارّغْ ذڭْ وُوڒَاونْ نّغْ س أَرُّوحْ إِقدّْسنْ إِ ذ أَنغْ إِمّوْشنْ.

٦ ذِي سِّيبّثْ ن ثُوضْعفْثْ نّغْ، أَقَا إِمُّوثْ لْمَاسِيحْ ذِي ڒْْوقْثْ-أَ ذِي طّْوعْ ن إِعفَّاننْ. ◘5:‏6 أَفا. 2‏:‏1؛ كُول. 2‏:‏13؛ عبر. 9‏:‏15؛ 1 بُط. 3‏:‏18. ٧ س ڒْْوحْڒَانْ أَذْ إِمّثْ حذْ ذِي طّْوعْ ن إِجّْ ن ؤُعفَّانْ، مَاشَا ذِي طّْوعْ ن إِصبْحَاننْ أَذْ ثَاغْ إِزمَّارْ أَذْ إِزْعمْ حذْ أَذْ إِمّثْ. ٨ ذِي مَانْ أَيَا إِمْڒَا أَنغْ أَربِّي ثَايْرِي نّسْ، أَقَا لْمَاسِيحْ إِمُّوثْ ذِي طّْوعْ نّغْ ؤُمِي ثُوغَا أَنغْ عَاذْ ذ إِمذْنَابْ. ◘5:‏8 عبر. 9‏:‏15؛ 1 بُط. 3‏:‏18. ٩ مشْحَاڒْ كْثَارْ أَقَا نتّْوَاسڭّذْ ڒخُّو س إِذَامّنْ نّسْ ؤُشَا نتّْوَافكّْ زَّايسْ زڭْ وغْضَابْ! ١٠ مِينْزِي ڒَْامِي ذ أَنغْ ثُوغَا ذ ڒْْعذْيَانْ، إِجَّا أَربِّي أَذْ إِسّصْڒحْ إِخفْ نّسْ أَكِيذْنغْ س ڒْْموْثْ ن مِّيسْ، مشْحَاڒْ قَاعْ ڒخُّو أَذْ ندَّارْ س ثُوذَارْثْ نّسْ، أَوَارْنِي ڒَْامِي زَّايسْ نُوفَا أَصْڒَاحْ. ١١ ؤُ وَارْ إِدْجِي مَانْ أَيَا وَاهَا، مَاشَا أَذْ نسّمْغَارْ ذِي أَربِّي عَاوذْ س سِيذِيثْنغْ يَاسُوع لْمَاسِيحْ، ونِّي زِي نكْسِي ڒخُّو أَصْڒَاحْ.

١٢ مَاغَارْ أَمْ مَامّشْ س يِيجّْ ن بْنَاذمْ يُوذفْ-د دّنْبْ غَارْ دُّونشْثْ ؤُشَا س دّنْبْ ثُوذفْ-د ڒْْموْثْ، أَمُّو د-ثُوذفْ ڒْْموْثْ غَارْ إِوْذَانْ مَارَّا، مِينْزِي خْضَانْ مَارَّا. ◘5:‏12 أَمز. 2‏:‏17؛ 3‏:‏6؛ 1 كُور. 15‏:‏21. ١٣ مِينْزِي قْبڒْ مَا ثُوغَا ثدْجَا شَّارِيعَا، ثُوغَا دّنْبْ ذِي دُّونشْثْ، مَاشَا دّنْبْ وَارْ إِتّْوَاحْسِيبْ شَا مِينْزِي وَارْ ذِينْ ثدْجِي شَّارِيعَا. ١٤ مَاشَا ڒْْموْثْ ثُوغَا ثحْكمْ زِي أَذَامْ أَڒْ مُوسَا ؤُڒَا خْ يِينِّي وَارْ إِخْضِينْ ذِي صِّيفثْ ن ؤُخطُّو إِ زِي إِخْضَا أَذَامْ أَكْ-ذ شَّارِيعَا. أَذَامْ ونِّي ذ صِّيفثْ ن ونِّي د غَا يَاسنْ.

١٥ مَاشَا أَمْ مَامّشْ ثدْجِي ثْمسْڒَاشْثْ س ؤُوطُّو، أَمُّو وَارْ ثدْجِي س ثوْهِيبْثْ ن أَرْضَا. مِينْزِي مَاڒَا مُّوثنْ أَطَّاسْ خْ سِّيبّثْ ن إِجّْ ن ؤُخطُّو، مشْحَاڒْ قَاعْ إِ غَا إِفيّضْ أَرْضَا ن أَربِّي ذ ثوْهِيبْثْ نّسْ إِ وَاطَّاسْ س ؤُينِّي ن بْنَاذمْ نِّي، يَاسُوع لْمَاسِيحْ. ١٦ ثَاوْهِيبْثْ س أَرْضَا وَارْ ثتِّيڒِي أَمْ ؤُخطُّو ن يِيجّنْ. س مِينْزِي ڒْْحُوكْمْ يِيوِي-د لْحِيسَابْ زڭْ إِجّْ ن ؤُخطُّو، مَاشَا ثَاوْهِيبْثْ ن أَرْضَا ثِيوِي-د زڭْ وَاطَّاسْ ن دّْنُوبْ غَارْ ثْسڭْذَا. ١٧ مِينْزِي مَاڒَا س ؤُخطُّو ن إِجّنْ أَقَا ثحْكمْ ڒْْموْثْ، مشْحَاڒْ قَاعْ إِ غَا حكْمنْ ذِي ثُوذَارْثْ إِنِّي إِكْسِينْ أَفيّضْ ن أَرْضَا ذ ثوْهِيبْثْ ن ثْسڭْذَا س ؤُينِّي ن بْنَاذمْ نِّي، أَقَا-ث ذ يَاسُوع لْمَاسِيحْ.

١٨ أَمْ مَامّشْ خنِّي س ؤُخطُّو ن إِجّنْ، أَقَا إِذْوڒْ ڒْْحُوكْمْ إِ مَارَّا إِوْذَانْ، أَمُّو إِ غَا ثِيڒِي ڒصْفَايثْ إِكمّْڒنْ إِ ثُوذَارْثْ إِ مَارَّا إِوْذَانْ س ثْسڭْذَا ن يِيجّنْ. ١٩ مِينْزِي أَمْ س ڒْْمُوعْصِييّثْ ن إِجّْ ن بْنَاذمْ ذوْڒنْ أَطَّاسْ ذ إِمذْنَابْ، أَمُّو عَاوذْ س طَّاعثْ ن إِجّنْ أَذْ ذوْڒنْ أَطَّاسْ ذ إِمْسڭَّاذنْ. ٢٠ مَاشَا ؤُمِي د-ثُوسَا شَّارِيعَا، إِمَّارْنِي دّنْبْ، ؤُ مَانِي إِمَّارْنِي دّنْبْ، إِمَّارْنِي أَرْضَا أَطَّاسْ س وَاطَّاسْ، ◘5:‏20 Luik. 7‏:‏47؛ يُوح. 15‏:‏22؛ رُوم. 4‏:‏15؛ 7‏:‏8؛ ڭال. 3‏:‏19 ٢١ حِيمَا، أَمْ مَامّشْ إِحْكمْ دّنْبْ أَڒْ ڒْْموْثْ، أَذْ إِحْكمْ أَرْضَا عَاوذْ س ثْسڭْذَا أَڒْ ثُوذَارْثْ إِتّْذُومَانْ س سِيذِيثْنغْ يَاسُوع لْمَاسِيحْ.