١ مِينْ غَا نِينِي خنِّي؟ مَا أَذْ نقِّيمْ ذِي دّنْبْ حِيمَا أَذْ إِمَّارْنِي أَرْضَا؟ ٢ عمَّارْصْ! نشِّينْ إِنِّي إِمُّوثنْ إِ دّنْبْ، مَامّشْ عَاذْ ذَايسْ إِ غَا ندَّارْ؟ ٣ مَا وَارْ ثسِّينمْ شَا بلِّي إِنِّي زَّايْنغْ إِتّْوَاسّْغضْصنْ ذِي يَاسُوع لْمَاسِيحْ، تّْوَاسّْغضْصنْ ذِي ڒْْموْثْ نّسْ؟ ◘6:‏3 ڭال. 3‏:‏27. ٤ أَقَا نتّْوَانْضڒْ أَكِيذسْ س ؤُسغْضصْ ذِي ڒْْموْثْ، حِيمَا، أَمْ مَامّشْ د-إِتّْوَاسّْنكَّارْ لْمَاسِيحْ زِي ثَادَّارْثْ ن إِمتِّيننْ غَارْ ؤُعُودْجِي ن بَابَاسْ، أَمُّو إِ غَا نُويُورْ ؤُڒَا ذ نشِّينْ ذِي ثُوذَارْثْ ن جْذِيذْ. ◘6:‏4 رُوم. 8‏:‏11؛ أَفا. 4‏:‏23؛ فِيل. 3‏:‏10، 11؛ كُول. 2‏:‏12؛ 3‏:‏10؛ عبر. 12‏:‏1؛ 1 بُط. 2‏:‏2. ٥ مِينْزِي مَاڒَا نتّْوَاژُّو ذِي ثمُّورْثْ ذ إِجّنْ أَكِيذسْ س ثفْرَاسْ ن ڒْْموْثْ نّسْ، خنِّي أَمُّو إِ غَا نِيڒِي عَاوذْ ذ إِجّنْ أَكِيذسْ س ثفْرَاسْ ن ثْنُوكْرَا نّسْ. ◘6:‏5 رُوم. 8‏:‏11؛ كُول. 3‏:‏1. ٦ أَقَا نسّنْ بلِّي بْنَاذمْ نّغْ أَقْذِيمْ إِتّْوَاصلّبْ أَكِيذسْ، حِيمَا أَذْ ثبْضڒْ أَرِّيمثْ ن دّنْبْ، وَارْ نْذِيكّْوِيڒْ عَاوذْ ذ إِمْسخَّارنْ إِ دّنْبْ. ◘6:‏6 ڭال. 2‏:‏20؛ 5‏:‏24؛ فِيل. 3‏:‏10؛ 1 بُط. 4‏:‏1، 2. ٧ مِينْزِي ونِّي إِمُّوثنْ، أَقَا إِتّْوَافكّْ زِي دّْنُوبْ. ◘6:‏7 1 بُط. 4‏:‏1.

٨ مَاڒَا خنِّي نمُّوثْ أَكْ-ذ لْمَاسِيحْ، أَقَا نُومنْ بلِّي ندَّارْ عَاوذْ أَكِيذسْ، أَكْ-ذ لْمَاسِيحْ. ◘6:‏8 2 تِيم. 2‏:‏11. ٩ مِينْزِي نسّنْ بلِّي لْمَاسِيحْ إِتّْوَاسّْنكَّارْ-د زِي ثَادَّارْثْ ن إِمتِّيننْ، وَارْ إِتّْمتِّي عَاوذْ. أَقَا ڒْْموْثْ وَارْ خَاسْ ثْحكّمْ شَا. ◘6:‏9 أَسَا. 1‏:‏18. ١٠ مِينْزِي زڭْ ؤُغزْذِيسْ ن ڒْْموْثْ إِ إِمُّوثْ، أَقَا إِمُّوثْ إِ دّْنُوبْ إِجّْ ن ؤُمُورْ، مَاشَا زڭْ ؤُغزْذِيسْ ن ثُوذَارْثْ نّسْ، نتَّا إِدَّارْ إِ أَربِّي. ◘6:‏10 1 بُط. 2‏:‏24. ١١ أَمُّو كنِّيوْ عَاوذْ: حسْبمْ إِخفْ نْومْ ذ إِمتِّيننْ إِ دّنْبْ، مَاشَا ذ إِمُودَّارنْ إِ أَربِّي ذِي سِيذِيثْنغْ يَاسُوع لْمَاسِيحْ.

١٢ خنِّي وَارْ تّجِّيمْ دّنْبْ أَذْ إِحْكمْ ذِي أَرِّيمثْ نْومْ إِفنَّانْ، أَڒَامِي أَذْ أَسْ ثطَّاعمْ ذِي نّشْوَاثْ نّسْ، ١٣ ؤُشَا وَارْ تّوْشِيمْ إِغزْذِيسنْ ن أَرِّيمثْ نْومْ أَمْ دُّوزَانْ إِ ڒْْمُوعْصِييّثْ، مَاشَا وْشمْ إِخفْ نْومْ إِ أَربِّي، أَمْ إِوْذَانْ إِنِّي إِذوْڒنْ غَارْ ثُوذَارْثْ زڭْ إِمتِّيننْ، ؤُشَا وْشمْ إِغزْذِيسنْ ن أَرِّيمثْ نْومْ أَمْ دُّوزَانْ إِ ثْسڭْذَا ن أَربِّي. ◘6:‏13 لك. 1‏:‏74؛ رُوم. 12‏:‏1؛ ڭال. 2‏:‏20؛ عبر. 9‏:‏14؛ 1 بُط. 4‏:‏2. ١٤ دّنْبْ وَارْ خَاومْ إِحكّمْ شَا، مِينْزِي وَارْ ثدْجِيمْ سَاذُو شَّارِيعَا مَاشَا سَاذُو أَرْضَا.

١٥ مَامّشْ خنِّي؟ مَا أَذْ نخْضَا مِينْزِي وَارْ ندْجِي شَا سَاذُو شَّارِيعَا، مَاشَا سَاذُو أَرْضَا؟عمَّارْصْ! ١٦ مَا وَارْ ثسِّينمْ شَا أَقَا كنِّيوْ ذ إِمْسخَّارنْ ن ونِّي ؤُمِي ثوْشِيمْ إِخفْ نْومْ مَاحنْذْ أَذْ أَسْ ثْسخَّارمْ س طَّاعثْ، ن ونِّي ؤُمِي ثتّطَّاعمْ، مَا إِ دّنْبْ إِ ثتّطَّاعمْ نِيغْ إِ ثْسڭْذَا؟ ◘6:‏16 يُوح. 8‏:‏34؛ 2 بُط. 2‏:‏19.

١٧ ثْقَاذْ أَسْ إِ أَربِّي، أَقَا كنِّيوْ إِنِّي ثُوغَا ذ إِمْسخَّارنْ إِ دّنْبْ، أَقَا ثْذوْڒمْ ثتّطَّاعمْ س وُوڒْ إِ دَّابْ إِصْفَانْ ن ؤُسڒْمذْ إِ ذ أَومْ إِتّْوَاسلّْمنْ. ١٨ ڒَْامِي ثتّْوَافكّمْ زِي دّنْبْ، ثْذوْڒمْ ذ إِمْسخَّارنْ ن ثْسڭْذَا. ◘6:‏18 يُوح. 8‏:‏32؛ ڭال. 5‏:‏1؛ 1 بُط. 2‏:‏16. ١٩ سَّاوَاڒغْ خْ ڒحْسَابْ ڒعْقڒْ ن بْنَاذمْ خْ سِّيبّثْ ن ثُوضْعفْثْ ن ويْسُومْ نْومْ، مِينْزِي أَمْ مَامّشْ ثوْشِيمْ إِغزْذِيسنْ نْومْ ذ إِمْسخَّارنْ إِ ڒخْمجْ ذ مِينْ وَارْ إِسڭّْذنْ، أَمنِّي ڒخُّو وْشمْ إِغزْذِيسنْ نْومْ ذ إِمْسخَّارنْ إِ ثْسڭْذَا ذ ثْقدَّاسْثْ. ٢٠ مِينْزِي ڒَْامِي ثُوغَا كنِّيوْ ذ إِمْسخَّارنْ ن دّنْبْ، ثُوغَا كنِّيوْ ذ إِحُورِّييّنْ زِي جِّيهثْ ن ثْسڭْذَا. ◘6:‏20 يُوح. 8‏:‏34. ٢١ مَانْ ڒْْغِيدْجثْ إِ ثُوغَا غَارْومْ ڒخْذنِّي؟ ثِيمسْڒَايِينْ إِ زِي ثتّْسضْحَامْ ڒخُّو؟ س مِينْزِي أَنڭَّارْ نْسنْثْ ذ ڒْْموْثْ. ٢٢ مَاشَا ڒخُّو، ؤُمِي ثتّْوَافكّمْ زِي دّنْبْ ؤُشَا ثْذوْڒمْ ذ إِمْسخَّارنْ ن أَربِّي، أَقَا ڒْْغِيدْجثْ نْومْ ثتّْوَاقدّسْ ؤُشَا ؤُنڭَّارْ نّسْ ذ ثُوذَارْثْ إِتّْذُومَانْ. ٢٣ مِينْزِي ڒخْڒَاصْ ن دّنْبْ ذ ڒْْموْثْ، مَاشَا ثَاوْهِيبْثْ ن أَربِّي ذ ثُوذَارْثْ إِتّْذُومَانْ س سِيذِيثْنغْ يَاسُوع لْمَاسِيحْ. ◘6:‏23 أَمز. 2‏:‏17؛ رُوم. 5‏:‏12؛ 1 كُور. 15‏:‏21؛ يَاع. 1‏:‏15.