أَذْلِيسْ إِقدّْسنْ إِرُومَانِييّنْ ٧

أَمتِّيڒْ ن ڒمْڒَاشْ

١ مَا وَارْ ثسِّينمْ شَا، أَ أَيْثْمَا، سَّاوَاڒغْ أَكْ-ذ يِينِّي إِسّْننْ شَّارِيعَا، أَقَا شَّارِيعَا ثْصدْجضْ خْ بْنَاذمْ مِينْ غَا يكّْ إِدَّارْ؟ ٢ ثَامْغَارْثْ ثقّنْ غَارْ ورْيَازْ نّسْ س شَّارِيعَا مِينْ غَا يكّْ إِدَّارْ، مَاشَا مَاڒَا إِمُّوثْ ورْيَازْ نّسْ، أَقَا ثتّْوَافكّْ زِي شَّارِيعَا زِي جِّيهثْ ن ورْيَازْ نّسْ. ◘ ٣ مَاشَا مَاڒَا أَذْ ثقّنْ غَارْ ورْيَازْ نّغْنِي مِينْ غَا يكّْ ورْيَازْ إِدَّارْ، ثتّْوَاحْسبْ زَّايسْ أَقَا نتَّاثْ ثزْنَا. مَاشَا مَاڒَا إِمُّوثْ ورْيَازْ نّسْ، أَذْ ثَافْ أَذْ ثتّْوَافكّْ زِي شَّارِيعَا، أَقَا وَارْ ثزْنِي مَاڒَا ثمْڒشْ أَكْ-ذ ورْيَازْ نّغْنِي. ◘ ٤ خنِّي، أَ أَيْثْمَا، كنِّيوْ عَاوذْ أَقَا ثمُّوثمْ إِ شَّارِيعَا س أَرِّيمثْ ن لْمَاسِيحْ، حِيمَا أَذْ ثْذوْڒمْ إِ ونّغْنِي إِ ونِّي د-إِكَّارنْ زِي ثَادَّارْثْ ن إِمتِّيننْ، حِيمَا أَذْ ثوْشمْ ڒْْغِيدْجثْ إِ أَربِّي. ◘ ٥ مِينْزِي ؤُمِي ذ أَنغْ ثُوغَا ذڭْ ويْسُومْ، ثُوغَا شّهْوَاثْ ن دّْنُوبْ خدّْمنْثْ ذڭْ إِغزْذِيسنْ ن أَرِّيمثْ نّغْ أَمْ تّْوَاعَارْننْثْ زِي شَّارِيعَا أَڒَامِي غَا أَوْينْثْ ڒْْغِيدْجثْ إِ ڒْْموْثْ. ٦ مَاشَا ڒخُّو أَقَا نتّْوَافكّْ زِي شَّارِيعَا، أَقَا نمُّوثْ خْ مِينْ ذِي ثُوغَا نتّْوَاحْبسْ، حِيمَا أَذْ نعْبذْ أَربِّي س ثجْذِيذثْ ن أَرُّوحْ، وَارْ إِدْجِي ذِي صِّيفثْ ثَاقْذِيمْثْ ن ثِيرَا إِقدّْسنْ. ◼ ◘

أَمنْغِي أَكْ-ذ دّْنُوبْ

٧ مِينْ غَا نِينِي خنِّي؟ مَا شَّارِيعَا ذ دّنْبْ؟عمَّارْصْ! مَاشَا وَارْ سِّينغْ دّنْبْ مْغِيرْ س شَّارِيعَا وَاهَا، مَاغَارْ وَارْ سِّينغْ نّشْوثْ مَاڒَا وَارْ ثنِّي شَّارِيعَا: ”وَارْ تَّاسمْ!“ ◘ ٨ مَاشَا دّنْبْ يُوفَا لْفُورْصَا س ثوْصيّثْ ؤُشَا ثڭْمَا ذَايِي كُوڒْ نّشْوثْ، مِينْزِي بْڒَا شَّارِيعَا دّنْبْ إِمُّوثْ. ◘ ٩ زِيشْ ثُوغَا دَّارغْ بْڒَا شَّارِيعَا، مَاشَا ؤُمِي د-ثُوسَا ثوْصيّثْ، إِبْذَا دّنْبْ أَذْ إِدَّارْ، ؤُشَا مُّوثغْ. ١٠ ؤُفِيغْ بلِّي ثَاوْصيّثْ إِ إِدْجَانْ إِ ثُوذَارْثْ ثْندّهْ غَارْ ڒْْموْثْ. ١١ مِينْزِي دّنْبْ أَمْ يُوفَا لْفُورْصَا س ثوْصيّثْ، إِشْمثْ أَيِي ؤُشَا إِنْغَا أَيِي زَّايسْ. ١٢ خنِّي شَّارِيعَا إِقدّْسنْ إِ ثدْجَا ؤُ ثَاوْصيّثْ إِقدّْسنْ إِ ثدْجَا، ثْسڭّذْ ؤُ ثصْبحْ. ◘

١٣ مَا إِذْوڒْ أَيِي مِينْ إِدْجَانْ ذ أَصبْحَانْ ذ ڒْْموْثْ إِنُو؟عمَّارْصْ! مَاشَا دّنْبْ، حِيمَا أَذْ إِبَانْ ذ دّنْبْ، إِسّڭْمَا ذَايِي ڒْْموْثْ س مِينْ إِدْجَانْ ذ أَصبْحَانْ، حِيمَا أَذْ إِذْوڒْ دّنْبْ ذ دّنْبْ كْثَارْ س ثوْصِييّثْ. ١٤ أَقَا نسّنْ بلِّي شَّارِيعَا ن أَرُّوحْ إِ ثدْجَا، مَاشَا نشّْ ذ أَيْسُومْ، مّنْزغْ إِ دّنْبْ، ◘ ١٥ مِينْزِي وَارْ سِّينغْ مِينْ غَا ڭّغْ، ؤُشَا مِينْ خْسغْ، وَارْ ث تّڭّغْ، مَاشَا مِينْ شَارّْهغْ ذ مَانَاونِّي إِ تّڭّغْ. ◘ ١٦ مَاڒَا تّڭّغْ مِينْ وَارْ تّخْسغْ، أَذْ وَافْقغْ أَكْ-ذ شَّارِيعَا، بلِّي أَقَا نتَّاثْ ثصْبحْ. ١٧ مَاشَا ڒخُّو نشّْ وَارْ تّڭّغْ مَانْ أَيَا عَاذْ، مَاشَا دّنْبْ إِ ذ أَيِي إِزدّْغنْ إِتّڭّْ إِ-ث. ١٨ مِينْزِي سّْنغْ وَارْ ذَايِي إِزدّغْ مِينْ إِشْنَانْ، إِخْسْ أَذْ يِينِي ذڭْ ويْسُومْ إِنُو. مِينْزِي إِهْونْ خَافِي مَاحنْذْ أَذْ خْسغْ ثْشُونِي، مَاشَا وَارْ زمَّارغْ أَذْ ت ڭّغْ. ◘ ١٩ مِينْزِي وَارْ تّڭّغْ ثْشُونِي إِ خْسغْ، مَاشَا ڒْْغَارْ إِ وَارْ تّخْسغْ شَا، ذ مَانَاونِّي إِ تّڭّغْ. ٢٠ مَاڒَا تّڭّغْ مِينْ وَارْ تّخْسغْ، وَارْ إِدْجِي عَاذْ ذ نشّْ إِ إِتّڭّنْ مَانْ أَيَا، مَاشَا دّنْبْ ونِّي ذ أَيِي إِزدّْغنْ.

٢١ خنِّي تَّافغْ إِشْثْ ن شَّارِيعَا ثنِّي ثُوسَا-د أَكْ-ذ ثْنفْسشْثْ إِنُو، ثنِّي إِخْسنْ أَذْ إِڭّْ ثْشُونِي، أَمْ يُوذسْ أَيِي-د ڒْْغَارْ. ٢٢ مِينْزِي فَارْحغْ س شَّارِيعَا ن أَربِّي زِي جِّيهثْ ن بْنَاذمْ نِّي إِدْجَانْ ذِي ذَاخڒْ إِنُو، ◘ ٢٣ مَاشَا تّْوَاڒِيغْ ذِينْ شَّارِيعَا نّغْنِي ذڭْ إِغزْذِيسنْ ن أَرِّيمثْ إِنُو، ثتّْمنْغَا أَكْ-ذ شَّارِيعَا ن ڒعْقڒْ إِنُو ؤُشَا ثْحبّسْ أَيِي س شَّارِيعَا ن دّنْبْ ثنِّي إِدْجَانْ ذڭْ إِغزْذِيسنْ ن أَرِّيمثْ إِنُو. ◘

٢٤ أَيحَّاثْ مَانَا ومْشُومْ-أَ ن بْنَاذمْ إِ دْجِيغْ! وِي ذ أَيِي غَا إِسّْنجْمنْ زِي أَرِّيمثْ-أَ ن ڒْْموْثْ؟

٢٥ تّْقَاذِيغْ أَربِّي، ونِّي إِ ذ أَيِي إِسّنْجْمنْ س ؤُفُوسْ ن سِيذِيثْنغْ يَاسُوع لْمَاسِيحْ!

أَمُّو أَقَا نشّْ سِيمَانْثْ إِنُو س ڒعْقڒْ إِ خدّْمغْ إِ شَّارِيعَا ن أَربِّي، مَاشَا ذڭْ ويْسُومْ إِنُو إِ شَّارِيعَا ن دّنْبْ.

◘٧:٢ 7:‏2 1 كُور. 7‏:‏2، 10، 39.

◘٧:٣ 7:‏3 مت. 5‏:‏32.

◘٧:٤ 7:‏4 ڭال. 2‏:‏19؛ 1 بُط. 4‏:‏1.

◼٧:٦ 7:‏6 'وَارْ إِدْجِي ذِي صِّيفثْ ثَاقْذِيمْثْ ن ثِيرَا إِقدّْسنْ' - ثِيرَا إِقدّْسنْ سَّاوَاڒنْثْ خْ يَاسُوع لْمَاسِيحْ. نتَّا ذ أَثَارَّاسْ أَمزْوَارُو ن وذْلِيسْ إِقدّْسنْ زڭْ وذْلِيسْ ؤُمزْوَارُو أَڒْ أَذْلِيسْ ن ؤُسَارْڭبْ غَارْ ؤُنڭَّارْ نّسْ. ونِّي إِقَّارنْ أَذْلِيسْ إِقدّْسنْ (إِخْسْ أَذْ يِينَا ثِيرَا إِقدّْسنْ) نحْڒَا مَا إِسّنْ ؤُثَارَّاسْ أَمزْوَارُو ن وذْلِيسْ، إِدْجْ ذِي ثقْذِيمْثْ ن ثِيرَا إِقدّْسنْ، إِخْسْ أَذْ يِينِي، نتَّا إِقَّارْ بْڒَا مَا إِتّْوَاڒِي أَثَارَّاسْ نِّي أَمزْوَارُو، نتَّا أَمْ إِجّْ ن بْنَاذمْ ذ أَذَارْغَاڒْ. أَذْلِيسْ إِ إِقَّارْ، وَارْ إِدَّارْ إِ نتَّا، مَاشَا إِ نتَّا ذ أَذْلِيسْ نِّي أَمْ إِجّْ ن ؤُمتَّا. س ؤُينِّي ونِّي إِقَّارنْ أَمُّو، أَقَا نتَّا ذِي ثقْذِيمْثْ ن ثِيرَا إِقدّْسنْ، وَارْ إِدْجِي ذِي ثْمَايْنُوثْ ن أَرُّوحْ. مَاغَارْ مْغِيرْ مَاڒَا إِجّْ ن بْنَاذمْ إِسّنْ يَاسُوع لْمَاسِيحْ س وُوڒْ ؤُ س لِيمَانْ، أَذْ إِقْبڒْ أَرُّوحْ إِقدّْسنْ ؤُڒَا ذ ثَامَايْنُوثْ ن أَرُّوحْ ذِي ذَاخڒْ نّسْ ؤُشَا أَذْ إِغَارْ أَذْلِيسْ إِقدّْسنْ س يِيجّْ ن شّكْلْ ذ جْذِيذْ، مِينْزِي يَاسُوع لْمَاسِيحْ نتَّا ذ أَثَارَّاسْ أَمزْوَارُو ن وذْلِيسْ إِقدّْسنْ.

◘٧:٦ 7:‏6 رُوم. 2‏:‏29؛ 2 كُور. 3‏:‏6.

◘٧:٧ 7:‏7 ؤُف. 20‏:‏17؛ أَعَوذ. 5‏:‏21؛ رُوم. 3‏:‏20؛ عبر. 7‏:‏18.

◘٧:٨ 7:‏8 يُوح. 15‏:‏22؛ رُوم. 4‏:‏15؛ 5‏:‏20؛ ڭال. 3‏:‏19.

◘٧:١٢ 7:‏12 1 تِيم. 1‏:‏8.

◘٧:١٤ 7:‏14 إِشا. 52‏:‏3.

◘٧:١٥ 7:‏15 ڭال. 5‏:‏17.

◘٧:١٨ 7:‏18 أَمز. 6‏:‏5؛ 8‏:‏21.

◘٧:٢٢ 7:‏22 أَفا. 3‏:‏16.

◘٧:٢٣ 7:‏23 ڭال. 5‏:‏17.