١ خنِّي وَارْ ذِينِّي بُو ڒْْحُوكْمْ خْ يِينِّي إِڭُّورنْ وَارْ إِدْجِي عَاذْ ذڭْ ويْسُومْ س يَاسُوع لْمَاسِيحْ. ٢ مِينْزِي شَّارِيعَا ن أَرُّوحْ ن ثُوذَارْثْ ذِي يَاسُوع لْمَاسِيحْ، أَقَا ثْفكّْ أَشْ زِي شَّارِيعَا ن دّنْبْ ذ ڒْْموْثْ. ◘8:‏2 يُوح. 8‏:‏36؛ رُوم. 6‏:‏18، 22؛ ڭال. 5‏:‏1. ٣ مِينْزِي مَاغَارْ ثُوغَا شَّارِيعَا ثضْعفْ س ثُوضْعفْثْ ن ويْسُومْ، إِسّكّْ-د أَربِّي مِّيسْ ذِي صِّيفثْ ن ويْسُومْ ن دّنْبْ خْ سِّيبّثْ ن دّنْبْ، مَاحنْذْ أَذْ إِحَاسبْ دّنْبْ ذڭْ ويْسُومْ، ◘8:‏3 ڒخ. 13‏:‏39؛ رُوم. 3‏:‏28؛ ڭال. 2‏:‏16؛ عبر. 7‏:‏18. ٤ حِيمَا أَذْ ذَايْنغْ ثتّْوَاكمّڒْ ثَاسڭْذَا ن شَّارِيعَا، مَاحنْذْ وَارْ نڭُّورْ ذڭْ ويْسُومْ، مَاشَا ذِي أَرُّوحْ. ٥ مِينْزِي إِنِّي إِدْجَانْ ذڭْ ويْسُومْ تّڭّنْ نّيّثْ نْسنْ ذڭْ ويْسُومْ، مَاشَا إِنِّي ن أَرُّوحْ تّڭّنْ نّيّثْ نْسنْ ذِي أَرُّوحْ. ◘8:‏5 1 كُور. 2‏:‏14. ٦ مِينْزِي نّيّثْ ن ويْسُومْ ذ ڒْْموْثْ، مَاشَا نّيّثْ ن أَرُّوحْ ذ ثُوذَارْثْ ذ ڒهْنَا. ٧ مِينْزِي نّيّثْ ن ويْسُومْ، أَقَا-ت ذ ڒعْذَاوَاثْ إِ أَربِّي، مِينْزِي وَارْ ثتّڭّْ شَا أَرَّايْ إِ شَّارِيعَا ن أَربِّي، مَاغَارْ وَارْ ذ أَسْ ثْزمَّارْ. ٨ إِنِّي إِدْجَانْ ذڭْ ويْسُومْ وَارْ إِزمَّارنْ أَذْ أَرْضَانْ أَربِّي.

٩ مَاشَا كنِّيوْ وَارْ ثدْجِيمْ شَا ذڭْ ويْسُومْ، مَاشَا ذِي أَرُّوحْ مَاڒَا إِزْذغْ ذَايْومْ أَرُّوحْ ن أَربِّي. مَاشَا مَاڒَا حذْ وَارْ غَارسْ بُو أَرُّوحْ ن لْمَاسِيحْ، ذ ونِّي وَارْ إِتِّيڒِي نّسْ. ◘8:‏9 1 كُور. 3‏:‏16. ١٠ مَاڒَا ذَايْومْ لْمَاسِيحْ، أَقَا أَرِّيمثْ ثمُّوثْ زِي سِّيبّثْ ن دّْنُوبْ، مَاشَا أَرُّوحْ إِدَّارْ زِي سِّيبّثْ ن ثْسڭْذَا. ١١ مَاڒَا إِزْذغْ ذَايْومْ أَرُّوحْ ن ونِّي د-إِسّْنكَّارنْ سِيذِيثْنغْ يَاسُوع لْمَاسِيحْ زِي ثَادَّارْثْ ن إِمتِّيننْ، أَقَا ونِّي د-إِسّْنكَّارنْ يَاسُوع لْمَاسِيحْ زِي ثَادَّارْثْ ن إِمتِّيننْ أَذْ إِسّدَّارْ عَاوذْ أَرِّيمَاثْ نْومْ إِفنَّانْ س أَرُّوحْ نّسْ إِ إِزدّْغنْ ذَايْومْ. ◘8:‏11 رُوم. 6‏:‏4، 5؛ 1 كُور. 6‏:‏14؛ 2 كُور. 4‏:‏14؛ أَفا. 2‏:‏5؛ كُول. 2‏:‏13.

١٢ خنِّي، أَ أَيْثْمَا، أَقَا أَنغْ س ؤُمَارْوَاسْ، مَاشَا وَارْ إِدْجِي إِ ويْسُومْ، حِيمَا أَذْ ندَّارْ خْ ڒحْسَابْ ن ويْسُومْ، ١٣ مِينْزِي مَاڒَا ثدَّارمْ خْ ڒحْسَابْ ن ويْسُومْ، أَذْ ثمْثمْ. مَاشَا مَاڒَا ثتَّارِّيمْ أَذْ مّْثنْثْ ڒخْذَايمْ ن أَرِّيمثْ س أَرُّوحْ، أَذْ ثدَّارمْ. ١٤ مِينْزِي مَارَّا إِنِّي إِتّْوَانذْهنْ س أَرُّوحْ ن أَربِّي، نِيثْنِي ذ أَرَّاونْ ن أَربِّي. ◘8:‏14 ڭال. 5‏:‏18. ١٥ مِينْزِي كنِّيوْ وَارْ ثكْسِيمْ شَا أَرُّوحْ ن ثسْمُوغِي ونِّي كنِّيوْ إِ غَا يَارّنْ ذ إِسمْغَانْ، حِيمَا أَذْ ثڭّْوذمْ عَاوذْ، مَاشَا أَقَا ثكْسِيمْ أَرُّوحْ إِ زِي نتّْوَاقْبڒْ ذ أَرَّاونْ، إِ زِي نتّْڒَاغَا: ’ثَابَابَاثْ، بَابَاثْنغْ!‘ ◘8:‏15 إِشا. 56‏:‏5؛ 1 كُور. 2‏:‏12؛ ڭال. 3‏:‏26؛ 4‏:‏5، 6؛ 2 تِيم. 1‏:‏7. ١٦ أَرُّوحْ نِّي سِيمَانْثْ نّسْ إِشهّذْ أَكْ-ذ أَرُّوحْ نّغْ، بلِّي نشِّينْ ذ أَرَّاونْ ن أَربِّي. ◘8:‏16 2 كُور. 1‏:‏22؛ 5‏:‏5؛ أَفا. 1‏:‏13؛ 4‏:‏30. ١٧ مَاڒَا نشِّينْ ذ أَرَّاونْ، أَقَا أَنغْ عَاوذْ ذ إِوْرِيثنْ، إِوْرِيثنْ ن أَربِّي ذ إِوْرِيثنْ أَكْ-ذ يَاسُوع لْمَاسِيحْ، مَاغَارْ مَاڒَا نْودّبْ أَكِيذسْ، أَذْ نتّْوَاعُودْجِي أَكِيذسْ عَاوذْ. ◘8:‏17 2 تِيم. 2‏:‏11، 12.

١٨ نشّْ تّْوَاسّْقنْعغْ بلِّي أَودّبْ إِ خَانغْ إِتّكّنْ إِضَا، وَارْ إِسْذِيهدْجْ شَا أَذْ إِتّْوَاعْبَارْ س ؤُعُودْجِي إِ د غَا إِتّْوَاسّضْهَارنْ ذَايْنغْ. ◘8:‏18 مت. 5‏:‏12؛ 2 كُور. 4‏:‏10، 17؛ فِيل. 3‏:‏20؛ 1 بُط. 4‏:‏13؛ 1 يُوح. 3‏:‏1، 2. ١٩ مِينْزِي مَارَّا مِينْ د-إِتّْوَاخڒْقنْ إِخزَّارْ س ؤُسِيثمْ ذ ؤُرَاجِي غَارْ ؤُسَارْڭبْ ن وَارَّاونْ ن أَربِّي. ٢٠ مِينْزِي مَارَّا مِينْ د-إِتّْوَاخڒْقنْ أَقَا إِتّْوَاڭّْ ذِي ڒْْبَاطڒْ، وَارْ إِدْجِي س ڒْْخَاضَارْ، مَاشَا س ونِّي ث إِڭِّينْ ذِي ڒْْبَاطڒْ ٢١ س ؤُسِيثمْ بلِّي مَارَّا مِينْ د-إِتّْوَاخڒْقنْ أَذْ إِتّْوَافكّْ عَاوذْ زِي ثسْمُوغِي إِ ڒْْغشّْ غَارْ ثِيڒلِّي ن ؤُعُودْجِي ن وَارَّاونْ ن أَربِّي. ٢٢ أَقَا نسّنْ بلِّي مَارَّا مِينْ د-إِتّْوَاخڒْقنْ إِزهَّارْ جْمِيعْ س ؤُنزْبَارْ ن ثَارْوَا أَڒْ أَسّْ-أَ. ◘8:‏22 أَسَا. 5‏:‏13

٢٣ وَارْ إِدْجِي نِيثْنِي وَاهَا، مَاشَا ؤُڒَا ذ نشِّينْ، إِنِّي غَارْ ثدْجَا ذَايْنغْ ڒْْغِيدْجثْ ثَامزْوَارُوثْ ن أَرُّوحْ، نْزهَّارْ ذڭْ إِخفْ نّغْ، نتّْرَاجَا أَذْ نتّْوَاقْبڒْ ذ مِّيسْ، ؤُڒَا ذ أَفكِّي ن أَرِّيمَاثْ نّغْ. ◘8:‏23 لك. 21‏:‏28. ٢٤ س ؤُينِّي ندَّارْ ذڭْ ؤُسِيثمْ نِّي. مَاشَا أَسِيثمْ إِتّْبَاننْ وَارْ إِدْجِي ذ أَسِيثمْ، مِينْزِي مِينْ إِتّْبَاننْ إِ حذْ، مَامّشْ غَا يڭّْ أَذْ ذَايسْ إِسِّيثمْ عَاذْ؟ ٢٥ مَاشَا مَاڒَا نسِّيتِّيمْ ذِي مِينْ وَارْ نتّْوِيڒِي، أَقَا نتّْرَاجَا ث س صّْبَارْ. ٢٦ ذِي مَانْ أَيَا إِتّْعَاوَانْ أَنغْ أَرُّوحْ عَاوذْ ذِي ثضْعفْثْ نّغْ، مِينْزِي وَارْ نسِّينْ شَا مَامّشْ ذ أَنغْ إِ غَا إِشُووَّارْ أَذْ نژَّادْجْ، مَاشَا أَرُّوحْ سِيمَانْثْ نّسْ إِتّْژَادْجْ ذِي طّْوعْ نّغْ س زّْهِيرْ وَارْ إِنطْقنْ. ◘8:‏26 مت. 20‏:‏22؛ يَاع. 4‏:‏3.

٢٧ مَاشَا ونِّي إِتّْبقّْشنْ ذڭْ وُوڒَاونْ إِسّنْ مِينْ إِدْجَانْ ذ نّيّثْ ن أَرُّوحْ، أَقَا إِتّْژَادْجْ ذِي طّْوعْ ن إِمْقدَّاسنْ أَمْ مَامّشْ ث إِخْسْ أَربِّي. ٢٨ نشِّينْ نسّنْ أَقَا نتَّا إِعَاونْ ذِي كُوڒْشِي إِ ڒْْخَارْ إِ يِينِّي إِتّخْسنْ أَربِّي، إِنِّي إِعدْجمْ إِ-ثنْ قْبڒْ مَاحنْذْ أَذْ تّْوَاڒَاغَانْ. ٢٩ مِينْزِي إِنِّي إِزْوَارْ إِسّنْ إِ-ثنْ، أَقَا إِزْوَارْ إِعدْجمْ إِ-ثنْ حِيمَا أَذْ أَرْوسنْ ذِي صِّيفثْ ن مِّيسْ، حِيمَا أَذْ يِيڒِي نتَّا ذ أَمنْزُو جَارْ وَاطَّاسْ ن وَاوْمَاثنْ. ◘8:‏29 كُول. 1‏:‏18. ٣٠ ؤُشَا إِنِّي نتَّا إِزَّارْ إِعدْجمْ إِ-ثنْ، أَقَا ذ إِنِّي خْ ذ إِڒَاغَا عَاوذْ، ؤُ إِنِّي خْ ذ إِڒَاغَا، أَقَا ذ إِنِّي إِسڭّذْ عَاوذْ، ؤُ إِنِّي إِسڭّذْ أَقَا ذ إِنِّي إِسّْعُودْجْ عَاوذْ.

٣١ مِينْ غَا نِينِي خنِّي ذِي مَانْ أَيَا؟ مَاڒَا أَربِّي أَكِيذْنغْ وِي ذ أَنغْ إِ غَا إِضَادّنْ؟ ◘8:‏31 ڒخْڒ. 14‏:‏8. ٣٢ ونِّي وَارْ إِشطَّارنْ شَا خْ مِّيسْ، مَاشَا إِوْشَا إِ-ث ذِي طّْوعْ نّغْ مَارَّا، مَامّشْ وَارْ ذ أَنغْ إِتِّيشْ كُوڒْشِي أَكْ-ذ مِّيسْ عَاوذْ؟ ◘8:‏32 أَمز. 22‏:‏12؛ إِشا. 53‏:‏5؛ يُوح. 3‏:‏16. ٣٣ وِي غَا إِكْسِينْ ثَانْفُوتْشْ إِ يِينِّي إِتّْوَافَارْزنْ زِي أَربِّي؟ أَربِّي ذ ونِّي إِتّْسڭَّاذنْ. ◘8:‏33 إِشا. 50‏:‏8. ٣٤ وِي غَا إِقْضَانْ ڒْْحُوكْمْ؟ لْمَاسِيحْ إِمُّوثْ ؤُ إِكَّارْ-د ؤُ نتَّا إِقِّيمْ غَارْ ؤُفُوسِي ن أَربِّي، إِتّْژَادْجْ إِ نشِّينْ. ◘8:‏34 عبر. 7‏:‏25. ٣٥ مِينْ ذ أَيِي غَا إِبْضَانْ خْ ثَايْرِي ن لْمَاسِيحْ؟ مَا ڒْْمحْنثْ، نِيغْ ڒْْحبْسْ، نِيغْ أَذَارّشْ، نِيغْ ڒَْاژْ، نِيغْ ثُوعَارْينْثْ، نِيغْ لْخَاطَارْ، نِيغْ سِّيفْ؟ ٣٦ أَمْ مَامّشْ ثُورَا:

”أَقَا خْ سِّيبّثْ نّشْ نتّْمتَّا كُوڒْ أَسّْ،

نتّْوَاحْسبْ أَمْ إِحُوڒِييّنْ إِ ثْغَارْصْثْ.“ ◘8:‏36 إِزهد. 44‏:‏23؛ 1 كُور. 4‏:‏9؛ 2 كُور. 4‏:‏11.

٣٧ مَاشَا ذِي مَانْ أَيَا مَارَّا نذْوڒْ زڭْ إِنِّي إِغلَّابنْ س ونِّي ذ أَنغْ إِخْسنْ. ٣٨ أَقَا نشّْ تّْوَاسّْقنْعغْ بلِّي نِيغْ ڒْْموْثْ، نِيغْ ثُوذَارْثْ، نِيغْ لْمَالَاكَاثْ، نِيغْ ڒْْحُوكَّامْ، نِيغْ صُّولَاطَاثْ، نِيغْ مِينْ ن يِيضَا، نِيغْ مِينْ إِ د غَا يَاسنْ، ٣٩ نِيغْ ڒُْوعْڒَا، نِيغْ رَادْجَاغْ، نِيغْ ؤُڒَا ذ إِشْثْ ن ڒْْحَاجّثْ نّغْنِي زِي مِينْ د-إِتّْوَاخڒْقنْ، ثْزمَّارْ أَذْ أَنغْ ثبْضَا خْ ثَايْرِي ن أَربِّي، ثنِّي ذِي سِيذِيثْنغْ يَاسُوع لْمَاسِيحْ.