أَذْلِيسْ إِقدّْسنْ إِرُومَانِييّنْ ٩

أَربِّي ذ ڒْْڭنْسْ نّسْ إِسْرَائِيل

١ قَّارغْ ثِيذتّْ ذِي لْمَاسِيحْ، وَارْ سّْخَارِّيقغْ شَا، ؤُشَا ثَانفْسشْثْ إِنُو ثْشهّذْ ذَايِي س أَرُّوحْ إِقدّْسنْ، ◘ ٢ بلِّي غَارِي أَشْضَانْ إِمْغَارْ ذ ڒحْرِيقْ وَارْ إِتّْبذِّي ذڭْ وُوڒْ إِنُو. ٣ ثُوغَا تّْژَادْجِيغْ معْلِيكْ ؤُفِيغْ تّْوَاحَارّْمغْ ذِي مُومُّو إِنُو خْ لْمَاسِيحْ س إِشْثْ نّعْڒثْ ذِي طّْوعْ ن وَاوْمَاثنْ إِنُو، ڒَْادْجْ إِنُو زِي جِّيهثْ ن ويْسُومْ ن أَرِّيمثْ. ◘ ٤ أَرَّاونْ ن إِسْرَائِيل، إِنِّي إِتّْوَاقبْڒنْ ذ مِّيسْ. غَارْسنْ إِ يدْجَا ؤُعُودْجِي، ڒْْعُوهُوذْ، شَّارِيعَا، ثَاسخَّارْثْ إِ إِدْجَانْ ذِي زَّاوشْثْ إِقدّْسنْ إِ غَارسْ د-إِقّْننْ، لْوُوعُوذْ ذ ڒجْذُوذْ. ◘ ٥ زَّايْسنْ إِ د-إِبَانْ لْمَاسِيحْ خْ وبْرِيذْ ن ويْسُومْ ن أَرِّيمثْ ونِّي ذ أَربِّي خْ مَارَّا. إِ نتَّا إِ غَا يِيڒِي مَارَّا أَسمْغَارْ ذ مَارَّا لْبَارَاكَا إِ ڒبْذَا قَاعْ. أَمِينْ! ◘

٦ مَاشَا وَارْ إِدْجِي أَڒَامِي أَوَاڒْ ن أَربِّي وَارْ يِيوِيضْ، مِينْزِي مَارَّا إِنِّي زِي إِسْرَائِيل وَارْ دْجِينْ شَا ذ إِسْرَائِيل. ◘ ٧ ؤُشَا ؤُڒَا ذ مَارَّا نِيثْنِي وَارْ دْجِينْ شَا ذ ثَارْوَا ن إِبْرَاهِيمْ، مِينْزِي نِيثْنِي زِي زَّارِيعثْ ن إِبْرَاهِيمْ، مِينْزِي إِتّْوَانَّا: ”ذِي إِسْحَاقْ أَذْ أَشْ ڒَْاغَانْ زَّارِيعثْ.“ ◘ ٨ مَانْ أَيَا وَارْ إِخْسْ أَذْ يِينِي أَقَا ثَارْوَا عْلَاحْصَابْ جَّاذِيرَا ن أَرِّيمثْ أَقَا-ثنْ ذ ثَارْوَا ن أَربِّي، مَاشَا ثَارْوَا ن لْوَاعْذْ أَذْ تّْوَاحسْبنْ ذ زَّارِيعثْ. ◘ ٩ مِينْزِي أَوَاڒْ ن لْوَاعْذْ ذ وَا:

”غَارْ ڒْْوقْثْ-أَ أَذْ د-أَسغْ

ؤُشَا أَذْ غَارسْ يِيڒِي غَارْ سَارَا مِّيسْ!“ ◘

١٠ مَانْ أَيَا وَارْ إِدْجِي وَاهَا ذِي ثْمسْڒَاشْثْ ن سَارَا، مَاشَا ؤُڒَا ذِي ثْمسْڒَاشْثْ ن رِيفْقَا، ؤُمِي ثْمُونْ أَكْ-ذ ؤُينِّي ن بْنَاذمْ نِّي، جذِّيثغْ إِسْحَاقْ، ◘ ١١ ثُوغَا ثِيزَّارْ ثتّْوَاسّنْ ڒِْيخْضَارثْ ن أَربِّي ؤُمِي ثُوغَا عَاذْ وَارْ د-خْڒِيقنْ إِحنْجِيرنْ نّسْ، وَارْ زمَّارنْ أَذْ ڭّنْ عَاذْ ڒْْخَارْ نِيغْ ڒْْغَارْ، حِيمَا وَارْ ثتِّيڒِي ثْمسْڒَاشْثْ ذڭْ وبْرِيذْ ن ڒخْذَايمْ، مَاشَا ذڭْ وبْرِيذْ ن ونِّي إِتّْڒَاغَانْ. ١٢ مَاغَارْ إِتّْوَانَّا إِ رِيفْقَا:

”أَقَا أَمقّْرَانْ أَذْ إِسخَّارْ إِ ؤُمژْيَانْ!“، ◘

١٣ أَمْ مَامّشْ ثُورَا:

”يَاعْقُوبْ إِ خْسغْ، مَاشَا شَارْهغْ إِسُو.“ ◘

١٤ مِينْ غَا نِينِي خنِّي؟ مَا إِقدّْ أَذْ يِيڒِي غَارْ أَربِّي مِينْ وَارْ إِسڭّْذنْ؟عمَّارْصْ! ◘ ١٥ خْزَارْ، نتَّا إِنَّا عَاوذْ إِ مُوسَا:

”أَذْ أَرحْمغْ وِي خْسغْ أَذْ أَرحْمغْ،

ؤُشَا أَذْ حِينّغْ خْ وِي خْسغْ أَذْ حِينّغْ.“ ◘

١٦ خنِّي ثَامسْڒَاشْثْ وَارْ ثقِّيمْ شَا غَارْ وِي إِتّخْسنْ ؤُڒَا غَارْ وِي إِتَّازّْڒنْ، مَاشَا غَارْ أَربِّي ونِّي يَارحّْمنْ. ١٧ مِينْزِي عْلَاحْسَابْ ثِيرَا إِقدّْسنْ إِنَّا نتَّا إِ فِيرْعُونْ:

”أَقَا إِ مَانْ أَيَا سّْنكَّارغْ-د شكْ،

حِيمَا أَذْ زَّايكْ سّشْنغْ جّهْذْ إِنُو،

ؤُشَا أَذْ إِتّْوَابَارّحْ إِسمْ إِنُو

ذِي مَارَّا دُّونشْثْ.“ ◘

١٨ خنِّي نتَّا أَذْ يَارْحمْ وِي إِخْسْ، ؤُشَا أَذْ إِسّقْسحْ وِي إِخْسْ.

١٩ إِوَا، أَذْ ثَاغْ أَذْ ثِينِيذْ: مَايمِّي إِتّْشثْشَا عَاذْ، مِينْزِي وِي غَا إِمّْعَاڒَانْ أَكْ-ذ مِينْ إِخْسْ نتَّا؟ ٢٠ مَاشَا مِينْ ثعْنِيذْ شكْ، أَ بْنَاذمْ، ونِّي إِتّْقَاشَاحنْ أَربِّي؟ مَا مِينْ إِتّْوَاڭّنْ إِزمَّارْ أَذْ إِنِي إِ ونِّي ث إِڭِّينْ: ”مَايمِّي ذ أَيِي ثڭِّيذْ أَمُّو؟“ ◘ ٢١ مَا وَارْ إِدْجِي غَارْ بُو-ثْڒَاخْثْ صُّولْطَا خْ ثْڒَاخْثْ حِيمَا أَذْ إِڭّْ زڭْ إِشْثْ ن ڒْْعجْنثْ إِشْثْ ن ڒْْقشْعثْ إِ لْكَارَامَا ؤُ ونّغْنِي إِ ؤُبهْذڒْ؟ ◘ ٢٢ مَاغَارْ أَربِّي، ونِّي ثُوغَا إِخْسْ أَذْ إِسّْشنْ أَغْضَابْ نّسْ ذ جّهْذْ نّسْ، إِسِّيوضْ لْغَاضَابْ نّسْ س وَاطَّاسْ ن تَّاسِيعْ ن ڒْْخَاضَارْ خْ ڒقْشُوعْ ن وغْضَابْ إِنِّي إِتّْوَاسّْوجْذنْ مَارَّا إِ ؤُهلّكْ، ٢٣ ؤُشَا إِفَارْغْ ثَايْرِي نّسْ خْ ڒقْشُوعْ ن أَرّحْمثْ إِنِّي إِزْوَارْ إِسّوْجذْ إِ-ثنْ إِ ؤُعُودْجِي إِ أَربِّي! ٢٤ مَاغَارْ نشِّينْ ذ إِنِّي إِتّْوَاڒَاغَانْ، وَارْ إِدْجِي زڭْ وُوذَاينْ وَاهَا، مَاشَا عَاوذْ زِي ڒڭْنُوسْ. ٢٥ أَمْ مَامّشْ إِتّْوَانَّا عَاوذْ ذِي حُوشِيعَا:

”أَذْ سمِّيغْ إِ يِينِّي وَارْ إِدْجِينْ ذ ڒْْڭنْسْ إِنُو

’ڒْْڭنْسْ إِنُو!‘،

ؤُشَا إِ يِينِّي وَارْ إِدْجِينْ ذ أَمْعِيزّْ ذ ’أَمْعِيزّْ!‘ “ ◘

٢٦ أَذْ يِيڒِي ذڭْ ومْشَانْ مَانِي ذ أَسنْ إِتّْوَاڒَاغَا:

’وَارْ إِدْجِي ذ ڒْْڭنْسْ إِنُو!‘،

بلِّي ذِينِّي أَذْ أَسنْ ڒَْاغَانْ:

’أَرَّاونْ ن أَربِّي إِدَّارنْ!‘ ◘

٢٧ مَاشَا إِشَاعْيَا إِبَارّحْ زِي جِّيهثْ ن أَيْثْ ن إِسْرَائِيل:

”مَاڒَا ثُوغَا ڒْْقدّْ ن أَيْثْ ن إِسْرَائِيل

أَنشْثْ ن إِجْذِي ن ڒبْحَارْ،

مْغِيرْ مِينْ إِ غَا إِقِّيمنْ أَذْ إِنْجمْ.“ ◘

٢٨ ”ثَامسْڒَاشْثْ ثْبدّْ نِيشَانْ ؤُ أَذْ ثتّْوَاقْفڒْ،

سِيذِي أَذْ ت إِڭّْ خْ ثمُّورْثْ.“ ◘

٢٩ أَمْ مَامّشْ إِزْوَارْ إِشَاعْيَا إِنَّا:

”مَاعْلِيكْ سِيذِي ن ڒْْعسْكَارَاثْ وَارْ ذ أَنغْ إِجِّي

إِنِّي إِقِّيمنْ دَّارنْ،

إِڒِي نذْوڒْ أَمْ سَاذُومْ ؤُ نَارْوسْ ذِي عَامُورَّا.“ ◘

٣٠ مِينْ غَا نِينِي خنِّي؟ مَا خنِّي ڒڭْنُوسْ إِنِّي وَارْ يَارزُّونْ ثَاسڭْذَا، أَقَا كْسِينْ ثَاسڭْذَا؟ إِوَا، مَاشَا ثَاسڭْذَا ثنِّي س لْ-إِيمَانْ. ٣١ مَاشَا إِسْرَائِيل نِّي إِضفَّارنْ شَّارِيعَا ن ثْسڭْذَا، وَارْ يِيوِيضْ شَا غَارْ شَّارِيعَا ن ثْسڭْذَا. ◘ ٣٢ مَايمِّي؟ مِينْزِي ثَاسڭْذَا نِّي وَارْ ثدْجِي شَا زِي لْ-إِيمَانْ مَاشَا زِي ڒخْذَايمْ ن شَّارِيعَا، مِينْزِي نِيثْنِي نْذرْفنْ ذڭْ وژْرُو ن ؤُنذْرفْ، ◘ ٣٣ أَمْ مَامّشْ ثُورَا:

”أَقَا أَذْ ڭّغْ ذِي صِيهْيُونْ أَژْرُو إِ ؤُنذْرفْ

ذ وژْرُو إِ ؤُنقْرَاذْ.

مَارَّا وِي زَّايسْ إِ غَا يَامْننْ،

وَارْ إِتّْسضْحَا.“ ◘

◘٩:١ 9:‏1 رُوم. 1‏:‏9؛ 2 كُور. 1‏:‏23؛ 11‏:‏31؛ ڭال. 1‏:‏20؛ فِيل. 1‏:‏8؛ 1 تس. 2‏:‏5؛ 5‏:‏27.

◘٩:٣ 9:‏3 ؤُف. 32‏:‏32؛ رُوم. 10‏:‏1.

◘٩:٤ 9:‏4 ؤُف. 4‏:‏22؛ أَعَوذ. 7‏:‏6؛ رُوم. 2‏:‏17؛ 3‏:‏2؛ أَفا. 2‏:‏12.

◘٩:٥ 9:‏5 إِرْم. 23‏:‏6؛ يُوح. 1‏:‏1؛ ڒخ. 20‏:‏28؛ رُوم. 1‏:‏4؛ عبر. 1‏:‏8، 9، 10.

◘٩:٦ 9:‏6 ڒخْڒ. 23‏:‏19؛ يُوح. 8‏:‏39؛ رُوم. 2‏:‏28؛ 3‏:‏3؛ 2 تِيم. 2‏:‏13.

◘٩:٧ 9:‏7 أَمز. 21‏:‏12؛ ڭال. 3‏:‏29؛ 4‏:‏23؛ عبر. 11‏:‏18.

◘٩:٨ 9:‏8 ڭال. 4‏:‏28.

◘٩:٩ 9:‏9 أَمز. 18‏:‏10.

◘٩:١٠ 9:‏10 أَمز. 25‏:‏21.

◘٩:١٢ 9:‏12 أَمز. 25‏:‏23.

◘٩:١٣ 9:‏13 مـَال. 1‏:‏2‏-‏3.

◘٩:١٤ 9:‏14 أَعَوذ. 32‏:‏4؛ 2 إِم. 19‏:‏7؛ أَيُوبْ 34‏:‏10.

◘٩:١٥ 9:‏15 ؤُف. 33‏:‏19.

◘٩:١٧ 9:‏17 ؤُف. 9‏:‏16.

◘٩:٢٠ 9:‏20 إِشا. 29‏:‏16، 45‏:‏9؛ إِرْم. 18‏:‏6.

◘٩:٢١ 9:‏21 إِرْم. 18‏:‏4‏-‏6؛ 2 تِيم. 2‏:‏20.

◘٩:٢٥ 9:‏25 حُوش. 2‏:‏25

◘٩:٢٦ 9:‏26 حُوش. 2‏:‏1؛ 1 بُط. 2‏:‏10.

◘٩:٢٧ 9:‏27 إِشا. 10‏:‏22.

◘٩:٢٨ 9:‏28 إِشا. 10‏:‏22، 23.

◘٩:٢٩ 9:‏29 أَمز. 19‏:‏24؛ إِشا. 1‏:‏9؛ 13‏:‏19؛ إِرْم. 50‏:‏40؛ حِز. 16‏:‏46.

◘٩:٣١ 9:‏31 رُوم. 10‏:‏2؛ 11‏:‏7.

◘٩:٣٢ 9:‏32 إِشا. 8‏:‏14؛ 1 بُط. 2‏:‏7

◘٩:٣٣ 9:‏33 إِزهد. 2‏:‏12؛ 118‏:‏22؛ أَوڒن. 16‏:‏20؛ إِشا. 8‏:‏14؛ 28‏:‏16؛ إِرْم. 17‏:‏7؛ مت. 21‏:‏42؛ 1 بُط. 2‏:‏6.