١ أَ أَيْثْمَا، أَمژْرِي ن وُوڒْ إِنُو ؤُ ثَاژَادْجِيثْ ثنِّي ژُودْجغْ غَارْ أَربِّي ذِي طّْوعْ ن إِسْرَائِيل، أَقَا-ت حِيمَا أَذْ غَارْسنْ ثِيڒِي ثُوذَارْثْ. ٢ أَقَا شهّْذغْ خَاسنْ أَقَا نِيثْنِي غَارْسنْ شْضَارثْ إِ أَربِّي، مَاشَا بْڒَا ثُوسّْنَا. ◘10:‏2 ڒخ. 22‏:‏3؛ رُوم. 9‏:‏31؛ ڭال. 4‏:‏17. ٣ مَاغَارْ وَارْ سِّيننْ ثَاسڭْذَا ن أَربِّي، مَاشَا أَرزُّونْ أَذْ طّْفنْ ذِي ثْسڭْذَا ن إِخفْ نْسنْ. س ؤُيَا وَارْ سّْوَاضْعنْ إِخفْ نْسنْ إِ ثْسڭْذَا ن أَربِّي. ٤ مِينْزِي أَكمّڒْ ن شَّارِيعَا نتَّا ذ لْمَاسِيحْ إِ ثْسڭْذَا إِ كُوڒْ إِجّنْ إِ إِتَّامْننْ. ◘10:‏4 مت. 5‏:‏17؛ ڒخ. 13‏:‏38؛ 2 كُور. 3‏:‏13؛ ڭال. 3‏:‏24. ٥ مِينْزِي مُوسَا يُورَا زِي جِّيهثْ ن ثْسڭْذَا ذِي شَّارِيعَا:

”ونِّي إِتّڭّنْ مَانْ أَيَا،

أَذْ زَّايسْ إِدَّارْ.“ ◘10:‏5 لَاوِي 18‏:‏5؛ حِز. 20‏:‏11؛ ڭال. 3‏:‏12.

٦ مَاشَا ثَاسڭْذَا ثنِّي زِي لْ-إِيمَانْ ثقَّارْ أَمُّو:

”وَارْ ثقَّارْ ذڭْ وُوڒْ نّشْ:

’وِي غَا إِڭَاعّْذنْ غَارْ ؤُجنَّا

ؤُشَا أَذْ إِسّهْوَا لْمَاسِيحْ؟“

٧ نِيغْ:

”وِي د-إِهْوَانْ ذڭْ وحْفُورْ ن ڒَْاخَارْثْ،

ؤُشَا إِسّْڭعّذْ لْمَاسِيحْ

زِي ثَادَّارْثْ ن إِمتِّيننْ؟“

٨ مَاشَا مِينْ إِخْسْ أَذْ يِينِي مَانْ أَيَا خنِّي؟

”ثَامْوَارِّيثْ ثُوذسْ إِ شكْ،

أَقَا-ث ذڭْ ؤُقمُّومْ نّشْ ؤُڒَا ذڭْ وُوڒْ نّشْ.

وَا ذ أَوَاڒْ ن لْ-إِيمَانْ إِ زِي نتّْبَارّحْ.“ ◘10:‏8 أَعَوذ. 30‏:‏12‏-‏14.

٩ مَاڒَا ثْشهْذذْ إِ سِيذِيثْنغْ يَاسُوع س ؤُقمُّومْ نّشْ ؤُشَا أَذْ ثَامْنذْ س وُوڒْ نّشْ بلِّي أَربِّي إِسّْنكَّارْ إِ-ث زِي ثَادَّارْثْ ن إِمتِّيننْ، أَذْ ثدَّارذْ. ١٠ مِينْزِي ؤُڒْ إِ ذَايسْ إِتَّامنْ أَذْ إِتّْوَاسڭّذْ، ؤُشَا أَقمُّومْ إِ زَّايسْ إِشهّْذنْ، أَذْ إِدَّارْ. ١١ مِينْزِي ثِيرَا إِقدّْسنْ قَّارنْثْ:

”مَارَّا وِي زَّايسْ إِ غَا يَامْننْ،

وَارْ إِتّْسضْحِي شَا.“ ◘10:‏11 إِشا. 28‏:‏16؛ رُوم. 9‏:‏33.

١٢ مِينْزِي نتَّا وَارْ إِتّڭّْ بُو ڒْْفَارْزْ جَارْ وُوذَاينْ ذ إِرَامِييّنْ، مِينْزِي نتَّا ذ إِجّنْ، سِيذِي نْسنْ مَارَّا نِّي إِتّنْفيَّاضْ ڒْْخَارْ خْ مَارَّا إِنِّي خَاسْ د-إِتّْڒَاغَانْ. ◘10:‏12 ڒخ. 15‏:‏9؛ رُوم. 3‏:‏22.

١٣ ”مِينْزِي كُوڒْ إِجّن

ونِّي إِ غَا إِڒَاغَانْ س يِيسمْ ن سِيذِي،

أَذْ إِدَّارْ.“ ◘10:‏13 يُووِ. 3‏:‏5؛ ڒخ. 2‏:‏21.

١٤ مَامّشْ إِ غَا ڒَْاغَانْ خْ ونِّي ذِي وَارْ ؤُمِيننْ شَا؟ نِيغْ مَامّشْ غَا يَامْننْ ذڭْ ونِّي مِيخفْ وَارْ سْڒِينْ، نِيغْ مَامّشْ غَا سْڒنْ، مَاڒَا ؤُڒَا ذ إِجّْ وَارْ زَّايسْ إِبَارّحْ شَا؟ ١٥ مَامّشْ إِ غَا بَارّْحنْ مَاڒَا وَارْ د-تّْوَاسّكّنْ؟ أَمْ مَامّشْ ثُورَا:

”مشْحَاڒْ ضَارْفنْ إِضَارنْ

ن يِينِّي إِتّْبَارّْحنْ س ڒهْنَا،

ن يِينِّي إِتّْبَارّْحنْ س ثبْرَاثِينْ ثِيصبْحَانِينْ.“ ◘10:‏15 إِشا. 52‏:‏7؛ نَحُم. 2‏:‏1.

١٦ مَاشَا وَارْ إِدْجِي مَارَّا طَّاعنْ إِ ؤُبَارّحْ ن ڒخْبَارْ أَصبْحَانْ ن لْ-إِنْجِيلْ، مِينْزِي إِشَاعْيَا إِقَّارْ:

”أَ سِيذِي إِنُو، وِي غَا يَامْننْ ذِي ثبْرَاثْ نّغْ؟“ ◘10:‏16 إِشا. 53‏:‏1؛ يُوح. 12‏:‏38.

١٧ أَقَا لْ-إِيمَانْ زڭْ ؤُسْحسِّي ؤُشَا أَسْحسِّي زڭْ وَاوَاڒْ ن أَربِّي. ١٨ مَاشَا أَذْ إِنِيغْ:

”مَا زعْمَا نِيثْنِي وَارْ سْڒِينْ؟“،

”خْزَارْ، ڒْْحسّْ نْسنْ إِفّغْ-د

غَارْ مَارَّا ثَامُّورْثْ،

ؤُشَا أَوَاڒنْ نْسنْ غَارْ ثْنڭُّورَا ن دُّونشْثْ.“ ◘10:‏18 إِزهد. 19‏:‏5.

١٩ مَاشَا أَذْ إِنِيغْ:

”مَا إِسْرَائِيل وَارْ ثفْهِيمْ شَا مَانْ أَيَا؟“

غَارْ ؤُمزْوَارْ مُوسَا إِنَّا:

”أَذْ ذَايْومْ ڭّغْ ثُوسْمِي

زڭْ إِجّْ ن ڒْْڭنْسْ إِ وَارْ إِدْجِينْ شَا ذ ڒْْڭنْسْ،

ؤُشَا س يِيجّْ ن ڒْْڭنْسْ إِ وَارْ إِتّطِّيعنْ

أَذْ ذَايْومْ ڭّغْ أَخيّقْ.“ ◘10:‏19 أَعَوذ. 32‏:‏21.

٢٠ ؤُشَا إِشَاعْيَا إِزْعمْ أَذْ يِينِي:

”أَقَا بَانغْ-د إِ يِينِّي وَارْ خَافِي يَارزُّونْ،

أَقَا ؤُفِينْ أَيِي إِنِّي وَارْ خَافِي إِسّقْسَانْ.“ ◘10:‏20 إِشا. 65‏:‏1.

٢١ مَاشَا زِي جِّيهثْ ن إِسْرَائِيل إِقَّارْ:

”أَسّْ إِكْمڒْ سّْوِيژّْضغْ إِفَاسّنْ إِنُو

إِ إِجّْ ن ڒْْڭنْسْ إِتّْعكّْسنْ، إِعصَّانْ.“◘10:‏21 إِشا. 65‏:‏2.