١ مَاشَا نشّْ أَذْ إِنِيغْ: مَا يُوڭِي أَربِّي خنِّي ڒْْڭنْسْ نّسْ؟عمَّارْصْ! أَقَا نشّْ سِيمَانْثْ إِنُو عَاوذْ ذ إِجّْ ن ورْيَازْ زِي إِسْرَائِيل، زِي زَّارِيعثْ ن إِبْرَاهِيمْ، زِي ثقْبِيتْشْ ن بِينْيَامِينْ. ◘11:‏1 إِرْم. 31‏:‏37؛ 2 كُور. 11‏:‏22؛ فِيل. 3‏:‏5. ٢ أَربِّي وَارْ إِنطَّارْ شَا ڒْْڭنْسْ نّسْ إِ ثُوغَا إِسّنْ زڭْ ؤُمزْوَارُو. نِيغْ وَارْ ثسِّينمْ شَا مِينْ إِقَّارْ وذْلِيسْ إِقدّْسنْ خْ إِلِييَا، أَمْ مَامّشْ ثُوغَا إِكْسِي ثَانْفُوتْشْ خْ إِسْرَائِيل غَارْ أَربِّي، إِنَّا:

٣ ”أَ سِيذِي، نْغِينْ إِنَابِييّنْ نّشْ،

أَردّْدْجنْ إِعَالْطَارنْ نّشْ.

قِّيمغْ نشّْ وَاهَا،

ؤُشَا نِيثْنِي أَرزُّونْ ڒعْمَارْ إِنُو.“ ◘11:‏3 1 إِج. 19‏:‏10، 14.

٤ إِتّْوَانَّا أَسْ س إِجّْ ن ڒوْحِييْ:

”أَقَا جِّيغْ إِ يِيخفْ إِنُو سبْعَا-أَڒَافْ ن يرْيَازنْ،

إِنِّي وَارْ ضْرِينْ شَا غَارْ إِضَارنْ زَّاثْ إِ بَاعَالْ،

وَارْعبْذنْ إِ بَاعَالْ.“ ◘11:‏4 1 إِج. 19‏:‏18.

٥ أَمُّو ذِي ڒْْوقْثْ ن يِيضَا عَاوذْ، أَقَا إِقِّيمْ يِيجّْ ن ڒْْبَاقِي أَمْ ث إِخْضَارْ نتَّا خْ ڒحْسَابْ ن أَرْضَا. ◘11:‏5 رُوم. 9‏:‏27. ٦ مَاڒَا ثدْجَا س أَرْضَا، أَقَا وَارْ ثتِّيڒِي عَاذْ س ڒخْذَايمْ، نِيغْ خنِّي أَرْضَا وَارْ إِدْجِي عَاذْ ذ أَرْضَا. مَاشَا مَاڒَا س ڒخْذَايمْ، وَارْ ثدْجِي عَاذْ ذ أَرْضَا. مَاڒَا لَّا، أَقَا ڒْْخذْمثْ وَارْ ثدْجِي عَاذْ ذ ڒْْخذْمثْ. ◘11:‏6 أَعَوذ. 9‏:‏4.

٧ مِينْ غَا نِينِي خنِّي؟ مِينْ ثُوغَا ثَارزُّو إِسْرَائِيل وَارْ ث ثطِّيفْ، مَاشَا إِنِّي إِتّْوَافَارْزنْ طّْفنْ ث ؤُشَا إِنّغْنِي ذوْڒنْ ذ إِذَارْغَاڒنْ ذڭْ وُوڒَاونْ نْسنْ، ◘11:‏7 رُوم. 9‏:‏31. ٨ أَمْ مَامّشْ ثُورَا:

”أَقَا أَربِّي إِوْشَا أَسنْ أَرُّوحْ إِضْبَارنْ

ذ ثِيطَّاوِينْ إِ وَارْ إِتّْوِيڒِينْ،

ذ إِمزُّوغنْ إِ وَارْ إِتّسْڒِينْ،

أَڒْ أَسّْ ن يِيضَا.“ ◘11:‏8 أَعَوذ. 29‏:‏2؛ إِشا. 6‏:‏9‏-‏10؛ 29‏:‏10؛ حِز. 12‏:‏2؛ مت. 13‏:‏14؛ مك. 4‏:‏12؛ لك. 8‏:‏10؛ يُوح. 12‏:‏40؛ ڒخ. 28‏:‏26.

٩ ذَاوُوذْ إِنَّا عَاوذْ:

”أَذْ ثذْوڒْ ثَازوْضَا ن ثِيغَارْصِينْ نْسنْ

ذ ڒْْفخْ إِ نِيثْنِي،

ؤُشَا أَذْ ثذْوڒْ ڒْْمُونثْ نْسنْ ذ ثْعنْكْرِيفْثْ. ◘11:‏9 إِزهد. 69‏:‏23.

١٠ أجّْ أَذْ ذَارْغْڒنْثْ ثِيطَّاوِينْ نْسنْ

حِيمَا وَارْ تّْوِيڒِينْ نِيثْنِي،

ؤُشَا أجّْ أَذْ قوْسنْ إِعُورَارْ نْسنْ إِ ڒبْذَا.“ ◘11:‏10 إِزهد. 69‏:‏23‏-‏24.

١١ مَاشَا نشّْ أَذْ إِنِيغْ خنِّي: مَا نْذرْفنْ، مَاغَارْ إِتّْخصَّا أَذْ وْضَانْ؟عمَّارْصْ! مَاشَا س ؤُوطُّو نْسنْ ثِيوضْ-د ثُوذَارْثْ إِ ڒڭْنُوسْ، حِيمَا أَذْ ذوْڒنْ تَّاسْمنْ. ١٢ مَاڒَا إِذْوڒْ ؤُنذْرفْ نْسنْ ذ أَڭْڒَا ذ أَمقّْرَانْ إِ دُّونشْثْ ؤُشَا ڒْْحُوكْمْ خَاسنْ ذ أَڭْڒَا إِ ڒڭْنُوسْ، مشْحَاڒْ قَاعْ إِ غَا يِيوضْ ؤُعمَّارْ نْسنْ ذ أَفيّضْ. ١٣ أَقَا سَّاوَاڒغْ أَكِيذْومْ، أَ ڒڭْنُوسْ، نشّْ ذ ونِّي ذ رَّاسُولْ إِ ڒڭْنُوسْ، أَقَا تّْسّمْغَارغْ ذِي ڒْْخذْمثْ ن ثْسخَّارْثْ إِنُو: ◼11:‏13 ’رَّاسُولْ‘ - نِيغْ ’أَمَازَانْ‘.  ◘11:‏13 ڒخ. 9‏:‏15؛ 13‏:‏2؛ 22‏:‏21؛ ڭال. 1‏:‏16؛ 2‏:‏8؛ أَفا. 3‏:‏8؛ 1 تِيم. 2‏:‏7؛ 2 تِيم. 1‏:‏11. ١٤ أَذْ ثَاغْ أَذْ زمَّارغْ أَذْ سّكَّارغْ ثُوسْمِي ذڭْ أَيْثْ ن ڒْْڭنْسْ إِنُو ؤُشَا أَذْ سّْنجْمغْ شَا زَّايْسنْ. ١٥ إِوَا، مَاڒَا أَمنْضَارْ نْسنْ أَقَا-ث ذ أَصْڒَاحْ إِ دُّونشْثْ، مَامّشْ غَا يِيڒِي وذْوَاڒْ نْسنْ مْغِيرْ ذ ثُوذَارْثْ زِي ثَادَّارْثْ ن إِمتِّيننْ! ١٦ مَاڒَا ثُوغَا ثَامزْوَارُوثْ ن صَّابثْ ثْقدّسْ، أَمنِّي ؤُڒَا ذ ڒْْعجْنثْ ن أَرشْثِي ثْقدّسْ! مَاڒَا ثُوغَا أَژْوَارْ إِقدّسْ، أَمنِّي ؤُڒَا ذ ڒفْرُوعْ. ◘11:‏16 ڒخْڒ. 15‏:‏20 ١٧ ؤُشَا مَاڒَا تّْوَاقسّنْ شَا ن ڒفْرُوعْ ؤُ خنِّي شكْ، أَمْ يِيجّْ ن ؤُزمُّورْ ن ڒخْڒَا، ثتّْوَاڒقّْمذْ ذڭْ ومْشَانْ نْسنْ، ثْذوْڒذْ ثْنفْعذْ زڭْ إِژوْرَانْ ذ زّشْثْ ن ثْزِيثُونْثْ، ١٨ وَارْ ثُوفّْ شَا خْ ڒفْرُوعْ. مَاڒَا ثُوفّذْ، سّنْ، أَقَا شكْ وَارْ ثكْسِيذْ شَا أَژْوَارْ، مَاشَا أَژْوَارْ إِكْسِي شكْ.

١٩ أَذْ ثَاغْ أَذْ ثِينِيذْ: ”أَقَا تّْوَاقسّنْ ڒفْرُوعْ، حِيمَا نشّْ أَذْ تّْوَاڒقّْمغْ.“ ٢٠ إِوَا، نِيثْنِي تّْوَاقسّنْ زِي سِّيبّثْ ن بْڒَا لْ-إِيمَانْ نْسنْ، ؤُشَا شكْ س لْ-إِيمَانْ ثتّْوَاڒقّْمذْ ؤُشَا ثكْسِيذْ أَمْشَانْ نْسنْ. وَارْ ثُوفّْ شَا، مَاشَا ڭّْوذْ. ٢١ مِينْزِي مَاڒَا ثُوغَا أَربِّي وَارْ إِتّْشطَّارْ شَا خْ ڒفْرُوعْ ن طّْبِيعثْ، وَارْ خَاكْ إِتّْشطَّارْ شَا عَاوذْ. ٢٢ أَقَا ذَا ذ ڒضْرَافثْ ن أَربِّي ذ ڒوْعَارثْ نّسْ: ڒوْعَارثْ خْ يِينِّي إِوْضَانْ، مَاشَا ڒضْرَافثْ خَاكْ مَاڒَا ثطّْفذْ ذِي ڒضْرَافثْ نّسْ، نِيغْ ؤُڒَا ذ شكْ أَذْ ثتّْوَاقسّذْ. ٢٣ ؤُڒَا ذ نِيثْنِي أَذْ تّْوَاڒقّْمنْ، مَاڒَا وَارْ قِّيمنْ ذِي ثِيكّسْثْ ن لْ-إِيمَانْ نْسنْ، مِينْزِي غَارْ أَربِّي ثِيزمَّارْ، حِيمَا أَذْ ثنْ إِڒقّمْ عَاوذْ. ◘11:‏23 2 كُور. 3‏:‏16. ٢٤ مِينْزِي مَاڒَا شكْ، ونِّي إِدْجَانْ س طّْبِيعثْ ذ إِجّْ ن ؤُزمُّورْ ن ڒخْڒَا، ثتّْوَاقسّذْ ؤُشَا ثتّْوَاڒقّْمذْ ذِي ثْزِيثُونْثْ ثَاصبْحَانْثْ، مشْحَاڒْ إِهوْننْ كْثَارْ أَذْ تّْوَاڒقّْمنْ نِيثْنِي ذِي ثْزِيثُونْثْ نِّي د-إِتَّاسنْ أَكْ-ذ طّْبِيعثْ نْسنْ!

٢٥ مِينْزِي تّخْسغْ أَذْ ثسّْنمْ سِّيرّْ-أَ، أَ أَيْثْمَا، حِيمَا وَارْ تِّيڒِيمْ ذ إِمِيغِيسنْ أَكْ-ذ يِيخفْ نْومْ، أَقَا ثمْسَارْ إِشْثْ ن ؤُسْذَاغڒْ ن وُوڒْ خْ إِسْرَائِيل إِ ذْرُوسْ ن ڒْْوقْثْ أَڒْ د غَا يَاذفْ ؤُعمَّارْ ن ڒڭْنُوسْ، ◘11:‏25 لك. 21‏:‏24. ٢٦ ؤُشَا خنِّي مَارَّا إِسْرَائِيل أَذْ ثذْوڒْ غَارْ ثُوذَارْثْ أَمْ مَامّشْ ثُورَا:

”أَمْسنْجمْ أَذْ د-إِفّغْ زِي صِيهْيُونْ

ؤُشَا أَذْ إِسّْبعّذْ ڒْْمُوعْصِييّثْ خْ يَاعْقُوبْ.“ ◘11:‏26 إِزهد. 14‏:‏7؛ إِشا. 27‏:‏9؛ 59‏:‏20؛ إِرْم. 31‏:‏31، 32، 33، 34؛ 2 كُور. 3‏:‏16؛ عبر. 8‏:‏8؛ 10‏:‏16.

٢٧ “خنِّي أَذْ طّْفنْ ذِي ڒْْعَاهْذْ

إِ د-يُوسِينْ زَّايِي،

خْ مِينِّي إِ غَا غْفَارغْ إِ دّْنُوبْ نْسنْ.“ ◘11:‏27 إِشا. 59‏:‏20، 21؛ دَان. 9‏:‏24

٢٨ زِي جِّيهثْ ن لْ-إِنْجِيلْ نِيثْنِي أَقَا ذ ڒْْعذْيَانْ ذِي طّْوعْ نْومْ، مَاشَا زِي جِّيهثْ ن ڒِْيخْضَارثْ إِ زِي تّْوَاخْضَارنْ نِيثْنِي، أَقَا نِيثْنِي ذ إِمْعِيزّنْ خْ سِّيبّثْ ن ڒجْذُوذْ. ٢٩ مِينْزِي أَربِّي وَارْ إِتّْبدَّاڒْ ثَاوْهِيبْثْ نّسْ ن أَرْضَا ؤُڒَا ذ ثْڒَاغِيثْ نّسْ. ٣٠ مِينْزِي أَمْ مَامّشْ ثُوغَا كنِّيوْ زِيشْ وَارْ ثطِّيعمْ شَا أَربِّي، مَاشَا ڒخُّو أَقَا ثكْسِيمْ أَرّحْمثْ س ڒْْمُوعْصِييّثْ نْسنْ، ٣١ أَمُّو نِيثْنِي عَاوذْ وَارْ طِّيعنْ شَا ڒخُّو إِ أَرّحْمثْ ثنِّي خَاومْ د-يُوسِينْ، حِيمَا أَذْ خَاسنْ د-ثَاسْ أَرّحْمثْ. ٣٢ مِينْزِي أَربِّي إِحبّسْ إِ-ثنْ مَارَّا سَاذُو ڒْْمُوعْصِييّثْ، حِيمَا أَذْ ثنْ يَارْحمْ مَارَّا. ◘11:‏32 ڭال. 3‏:‏22.

٣٣ أَ، رَادْجَاغْ ن وَاڭْڒَا ذ ثِيغِيثْ ذ ثُوسّْنَا ن أَربِّي، مَامّشْ غَا يڭّْ بْنَاذمْ أَذْ إِقدْجبْ ڒحْكَامَاثْ نّسْ، مَامّشْ غَا يڭّْ أَذْ يَافْ إِبْرِيذنْ نّسْ.

٣٤ ”مِينْزِي وِي غَا إِسّْننْ نّيّثْ ن سِيذِي؟“

نِيغْ:

”وِي ذ أَسْ إِدْجَانْ ذ أَمْشَاوَارْ؟“ ◘11:‏34 إِشا. 40‏:‏13؛ 1 كُور. 2‏:‏16.

٣٥ نِيغْ:

”وِي ذ أَسْ إِزَّارنْ إِوْشَا أَسْ شَا،

ؤُمِي ذ أَسْ إِتّْخصَّا أَذْ إِتّْوَاخدْجصْ زَّايسْ؟“ ◘11:‏35 أَيُوبْ 41‏:‏3.

٣٦ مِينْزِي مَارَّا زَّايسْ إِ إِدْجَا، ؤُ مَارَّا ذَايسْ، ؤُ مَارَّا أَقَا-ث س ؤُفُوسْ نّسْ. إِ نتَّا إِ غَا يِيڒِي مَارَّا أَسمْغَارْ ذ مَارَّا لْبَارَاكَا إِ ڒبْذَا قَاعْ. أَمِينْ! ◘11:‏36 أَوڒن. 16‏:‏4؛ 1 كُور. 8‏:‏6.