1 إِزْڒِي خْ إِزْڒَانْ نِّي إِدْجَانْ ن سُولِيمَانْ.

2 ”أجّْ إِ-ث أَذْ أَيِي إِسُّوذمْ

س إِسُوذِيمنْ ن ؤُقمُّومْ نّسْ،

مِينْزِي ؤُسْحِينّبْ نّشْ حْسنْ زِي بِينُو.

3 ڒفْوَاحثْ ن زّشْثْ نّشْ ثشْنَا،

إِسمْ نّشْ أَمْ زّشْثْ إِزدْجْعنْ،

خْ ؤُيَا تّخْسنْثْ شكْ ثعْزَارِييِّينْ.

4 جْبذْ أَيِي أَوَارْنِي أَشْ،

نشِّينْ أَذْ نَازّڒْ أَوَارْنِي أَشْ!

أَجدْجِيذْ إِنْذهْ أَيِي ذڭْ إِخَامّنْ نّسْ.

أجّْ أَنغْ أَذْ نَارْشقْ ؤُ أَذْ زَّايكْ نْفَارْحْ،

أَذْ نعْقڒْ خْ ؤُسْحِينّبْ نّشْ

كْثَارْ خْ مِينْ غَا نعْقڒْ خْ بِينُو.

نِيشَانْ تّخْسنْثْ شكْ.“

5 ”ذ ثَابَارْشَانْثْ نشّْ، ؤُ صبْحغْ،

أَ يسِّيسْ ن ؤُرْشَالِيمْ،

أَمْ ثْقِيضُونِينْ ن قِيذَارْ،

أَمْ ڒِيزَارَاثْ ن سُولِيمَانْ.

6 وَارْ ذ أَيِي خزَّارنْثْ أَمُّو،

مِينْزِي نشّْ بَّارْشْنغْ،

مِينْزِي ثسّشْمضْ أَيِي ثْفُوشْثْ،

إِحنْجِيرنْ ن يمَّا ثُوغَا خيّْقنْ خَافِي،

ڭِّينْ أَيِي أَذْ حْضِيغْ إِمَارْجَاعنْ ن ؤُضِيڒْ.

أَمَارْجعْ ن يِيخفْ إِنُو وَارْ ث حْضِيغْ شَا.“

7 ”شكْ، ونِّي إِتّخْسْ بُوحْبڒْ إِنُو،

إِنِي أَيِي، مَانِي ثَاركّْوسذْ،

مَانِي ثسَّاريَّاحذْ ثَاحِيمَارْثْ

غَارْ طْحَا ن ؤُزِيڒْ،

مِينْزِي إِ ؤُمِي غَا إِڒِيغْ أَمْ ثنِّي إِحجْبنْ

غَارْ ثْحِيمْرِيوِينْ ن إِمْعَاشَارنْ نّشْ؟“

8 ”مَاڒَا شمْ وَارْ ث ثسِّينذْ،

شمْ ثنِّي إِشْنَانْ قَاعْ جَارْ ثمْغَارِينْ،

خنِّي فّغْ، ضْفَارْ ڒَاثَارْ ن وُودْجِي،

أَرْوسْ ثِيغَاضْثِينْ نّمْ

مَانِي زدّْغنْ إِمكْسَاونْ.“ ◼1:‏8 ’إِمكْسَاونْ‘ - نِيغْ ’إِنِيتْشَانْ‘.

9 ”سّمْقُوذِّيغْ شمْ أَكْ-ذ ڒْعوْذَا إِنُو

زَّاثْ إِكَارُّوثنْ ن فِيرْعُونْ،

أَ ثَامدُّوكّتْشْ إِنُو.

10 مشْحَاڒْ صبْحنْ إِمڭِّيزنْ نّمْ

جَارْ ثْسدّْيِينْ،

إِرِي نّمْ جَارْ إِفِيڒَانْ س ثْيَاقُوثِينْ.

11 أَذْ أَمْ نڭّْ ثِيسدّْيِينْ ن وُورغْ،

أَكْ-ذ ثْنقِّيضِينْ ن نُّوقَارْثْ.“

12 ”مِينْ غَا يكّْ ؤُجدْجِيذْ

إِقِّيمْ غَارْ طَّابْڒَا نّسْ ثَاقُورَارِيثْ،

إِتِّيشّْ صّنْبلْ إِنُو ڒفْوَاحثْ نّسْ.

13 لِّيفْ إِنُو إِتّڭّْ أَيِي

أَمْ ثشْيَارْثْ ن مِيرُّو،

ثنِّي إِسّنْسنْ جَارْ إِذْمَارنْ إِنُو.

14 لِّيفْ إِنُو إِ نشّْ أَمْ

ثْقبِّيضْثْ ن نوَّاشْ ن ڒْحنِّي،

ذڭْ إِمَارْجَاعنْ ن ؤُضِيڒْ ن عَايْنْ-جَاذِي.“

15 ”خْزَارْ، ثشْنِيذْ شمْ،

ثَامدُّوكّتْشْ إِنُو!

خْزَارْ، شمْ ثشْنِيذْ،

ثِيطَّاوِينْ نّمْ ذ إِذْبِيرنْ.“

16 ”خْزَارْ، شكْ ثشْنِيذْ، أَ لِّيفْ إِنُو،

وَاهْ، ثْضَارْفذْ،

ثُوزِّيزوْثْ ذ ثَاسُّوثْ نّغْ،

17 ثِيحنْيَا ن ثُوذْرِينْ نّغْ ذ ثِينڭْلِينْ،

ثِيحنْيَا ن ثْزقَّا

أَقَا أَثنْثْ ذ ثِيشجُّورَا ن ؤُمرْزِي.“