2
أَرْشَامْ ن ثسْڒِيثْ
1 ”نشّْ ذ ثَانوَّاشْثْ ن شَارُونْ
وَارْ زَّايسْ وْضَانْثْ ثِيفْرَايْعمَّارْصْ،
ذ ثَالِيلّشْثْ ن ثيْسَارِينْ.“ ◼2:1 ’ثَالِيلّشْثْ‘ - إِجّْ ن مَارْكَا ن إِنُّووَّارنْ ذَايْسنْ أَژْرِي أَطَّاسْ.
2 ”أَمْ ثْلِيلّشْثْ جَارْ ثْزڭّْوَارْثْ،
أَمُّو إِ ثدْجَا ثَامدُّوكّتْشْ إِنُو
جَارْ ثْيدْجِيثِينْ.“
أَرْشَامْ ن يسْڒِي
3 ”أَمْ ثْشجَّارْثْ ن تّفَّاحْثْ
جَارْ ثْشجُّورَا ن وزْغَارْ،
أَمُّو إِ يدْجَا لِّيفْ إِنُو جَارْ وَارَّاونْ.
نشّْ أَقَا أَيِي مّژْرغْ
أَذْ قِّيمغْ ذِي ثِيڒِي نّسْ.
ڒْْغِيدْجثْ نّسْ ذ مِيژِيذْ إِ وَانغْ إِنُو. ◼2:3 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.
4 نتَّا إِنْذهْ أَيِي ذِي ثَادَّارْثْ ن بِينُو،
ؤُ ثَايْرِي ذ ثَاعدْجَانْثْ نّسْ خَافِي.
5 سْجهْذمْ أَيِي س ثْغَارْيِيطَاثِينْ ن زّْبِيبْ،
سْبَارّْذمْ أَيِي س تّفَّاحِينْ،
مَاغَارْ نشّْ هڒْشغْ س ثَايْرِي.
6 أَزڒْمَاضْ نّسْ سَاذُو ؤُزدْجِيفْ إِنُو،
أَفُوسِي نّسْ إِذَارّعْ أَيِي-د.
7 نشّْ أَذْ كنِّينْثْ سّْجَادْجَاغْ،
أَ يسِّيسْ ن ؤُرْشَالِيمْ،
غَارْ ثْغَايْضِينْ ن وزْغَارْ
ؤُ غَارْ ثُوذَاذِينْ ذڭْ إِيَّارْأنْ،
أَقَا كنِّينْثْ وَارْ هكّْوْڒنْثْ ثَايْرِي،
وَارْ ت-إِ-د-سّكَّارَانْثْ
أَڒْ ثتّخْسْ سِيمَانْثْ نّسْ.“
ثَاوَاسِيثْ ن يسْڒِي
8 ”ثْمِيجَّا ن لِّيفْ إِنُو!
أَقَا ذَا، إِتَّاسْ-د،
إِنطُّو خْ إِذُورَارْ،
إِنڭّزْ خْ ثوْرِيرِينْ!
9 لِّيفْ إِنُو يَارْوسْ ذڭْ إِغَايْضْ ن وزْغَارْ،
نِيغْ ذڭْ إِجّْ ن ؤُمژْيَانْ ن وُوذَاذنْ.
أَقَا-ث ذَا، إِبدّْ أَوَارْنِي إِ ڒْحِيضْ نّغْ،
إِخزَّارْ زِي ڒكْوَازِي،
إِتّْشيّعْ زِي شّبَّاشْ.“
ڒعْرُوضْ ن يسْڒِي
10 ”لِّيفْ إِنُو إِتَّارَّا-د، إِنَّا أَيِي:
’كَّارْ، بدّْ، أَ ثَامدُّوكّتْشْ إِنُو، أَژْرِي إِنُو،
أَسْ-د!
11 مَاغَارْ أَقَا ذَا، ثَاڭرْسْثْ ثعْذُو،
إِكْسِي ونْژَارْ، أَقَا إِرُوحْ.
12 بَاننْ-د إِنُووَّارنْ ذِي ثمُّورْثْ،
ڒْْحَاڒْ ن ونْزِيزْ أَقَا-ث ذَا،
ؤُ ثْمِيجَّا ن ثْجْلِيلّحْثْ نسْڒَا إِ-ت عَاوذْ
ذِي ثمُّورْثْ نّغْ.
13 أَرْثُو ن ثَازَارْثْ إِتّْخمَّاڒْ ڒْبَاشُورْ نّسْ،
ثِيزَايَارِينْ إِتّْنوَّارنْ أَرْخُونْ إِ ڒفْوَاحْ.
كَّارْ، بدّْ، ثَامدُّوكّتْشْ إِنُو،
أَژْرِي إِنُو،
أَسْ-د!‘ “
إِسْڒِي يَارنِّي ذِي ڒعْرُوضْ
14 ”ثَاذْبِيرْثْ إِنُو
ذڭْ إِمُوشَانْ ن ؤُذُورِّي ذِي ڒجْرُوفْ،
ثْنُوفَّارْ ذِي ثْسَاونْثْ ن وذْرَارْ.
أجّْ أَيِي أَذْ ژَترغْ أَغمْبُوبْ نّمْ،
أَذْ سْڒغْ إِ ثْمِيجَّا نّمْ،
مَاغَارْ ذ ثْمِيژِيذْثْ إِ ثدْجَا ثْمِيجَّا نّمْ،
إِصْبحْ ؤُغمْبُوبْ نّمْ.“
ثَاسْڒِيثْ ثخْسْ أَذْ ثِيڒِي إِ يسْڒِي وَاهَا
15 ”طّْفمْ أَنغْ-د إِشعْبَاونْ،
إِشعْبَاونْ إِمژْيَاننْ،
إِنِّي إِتَّارْيْثَارنْ أَنغْ إِمَارْجَاعنْ ن ؤُضِيڒْ،
مَاغَارْ ثِيزَايَارِينْ ذڭْ إِمَارْجَاعنْ نّغْ
تّْنوَّارنْثْ عَاذْ.
16 لِّيفْ إِنُو أَقَا-ث إِنُو ؤُ نشّْ نّسْ،
نشّْ ن ونِّي يَاركّْوْسنْ جَارْ ثْلِيلِّيشِينْ
17 أَڒْ إِ غَا إِسْمضْ وَاسّْ
ؤُ أَذْ أَروْڒنْثْ ثِيڒِيوِينْ.
نّضْ-د، أَ لِّيفْ إِنُو،
إِڒِي أَمْ يِيجّْ ن إِغَايْضْ ن وزْغَارْ
نِيغْ أَمْ يِيجّْ ن ؤُمژْيَانْ ن وُوذَاذنْ
خْ إِذُورَارْ إِ إِتّْوَاقضْعنْ س ثيْسَارِينْ.“