1 Deg useggʷas wiss tmenṭac n ujeǧid Yarubɛam, mmis n Nabaṭ, idweř Abiyam d ajeǧid x Yahuda. ◘15:1 [2 Im. 13:1-23] — 2 Im. 13:1 2 Netta iḥkem třata n iseggʷusa di Urcalim. Yemmas qqaren as Maɛka, yeǧis n Abicalum. ◘15:2 2 Im. 13:2 3 Netta yuyur di marra ddnub n babas nni tuɣa igga qbeř nnes uca uř nnes war tuɣi ca icḍar ɣar SIDI, AREBBI nnes, am wuř n babas Dawud. 4 Maca di ṭṭweɛ n Dawud iwca as SIDI, AREBBI nnes, ijj n řefnar di Urcalim umi igga ad issekkar mmis awarni as, u umi igga ad teqqim tbedd Urcalim, ◘15:4 1 Ij. 11:36 5 maɣar Dawud tuɣa igga min iǧan nican di tiṭṭawin n SIDI u netta tuɣa war iḥeyyed di marra tudart nnes x marra min i d as yumur Netta, mɣir di tmesřact n Uriya, Aḥitti. ◘15:5 2 Ṣm. 11:4, 15; 12:9 6 Tuɣa din amenɣi jar Raḥabɛam d Yarubɛam, marra ussan n tudart nnes.

7 Imezruyen iqqimen n Abiyam d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? Tuɣa din ɛawed amenɣi jar Abiyam d Yarubɛam. 8 Abiyam igga ad yareyyeḥ jar řejdud nnes. Neḍřen t di tendint n Dawud. Mmis Asa idweř d ajeǧid deg wemcan nnes.◘15:8 2 Im. 13:23

9 Deg useggʷas wiss ɛicrin n Yarubɛam, ajeǧid n Israil, idweř Asa d ajeǧid x Yahuda. ◘15:9 [2 Im. 14:1-2; 15:16; 16:6; 11-14] 10 Netta iḥkem waḥit u-rebɛin n iseggʷusa di Urcalim. Ḥennas qqaren as Maɛka, yeǧis n Abicalum. 11 Asa igga min iǧan nican di tiṭṭawin n SIDI, am igga babas Dawud. 12 Netta issuffeɣ imetleyyen zi temmurt uca iḥeyyed marra imeyḍa n l’aṣnam nsen i tuɣa ggin řejdud nnes. ◘15:12 1 Ij. 22:47 13 Netta issḥeyyed uřa d ḥennas Maɛka zi jjehd nnes, maɣar nettat tuɣa tegga ijj n řexyař d jjɛifect i trebbit n cwarti. Asa iqess jjɛifect nnes uca isscemḍ i-tt ɣar teɣzart n Qidrun. ◘15:13 2 Im. 15:16 14 War ttwaḥeyydent řegɛudi, maca uř n Asa tuɣa icḍar nican i SIDI, marra ussan n tudart nnes. 15 Netta yiwi tiwhibin iqeddsen n babas uřa d tiwhibin nni issqeddes netta s yixef nnes di Taddart n SIDI: nnuqart d wureɣ d řeqcuɛ nneɣni. ◘15:15 Lawi 5:15

16 Tuɣa din amenɣi jar Asa d Baɛca, ajeǧid n Israil, marra ussan nsen. 17 Baɛca, ajeǧid n Israil, igeɛɛed ɣar umenɣi ḍidd i Yahuda uca ibna Rama, ḥima war ittejji uřa d ijj ad yuyur ɣar Asa, ḥima ad ɣares dd-yas. ◘15:17 2 Im. 16:1 18 Xenni iksi Asa marra nnuqart d wureɣ i tuɣa iqqimen deg ixxamen n txubay n Taddart n SIDI uřa d txubay n taddart n ujeǧid, uca isellem marra aya i imsexxaren nnes. Uca ajeǧid Asa issekk i-ten ɣar Binhadad, mmis n Tabrimun, mmis n Ḥazyun, ajeǧid n Aram, wenni tuɣa izeddɣen di Dimacq, ḥima ad yini: ◘15:18 1 Ij. 20:1; 2 Im. 16:2-14 19 “Aqa din ijj n řɛahd jar ayi d cek, jar baba d babac. Xzar necc ad ac dd-ssekkeɣ ict n terzeft n nnuqart d wureɣ. Ruḥ, fsi řɛahd nnec ak-d Baɛca, ajeǧid n Israil, maḥend ad ikkar ad xafi iggʷej.” 20 Binhadad isřa ɣar ujeǧid Asa uca issekk ikumandaren n řɛeskar nnes ɣar tneddam n Israil. Netta iɣřeb x Ɛiyun d Dan d Abal-Bayt-Maɛka d marra Kinnarut. Aqa issekk i-ten ɣar marra tammurt n Naftali. 21 Umi Baɛca isřa x uya, imsar, aqa netta issbedd di řebni n Rama uca iqqim izeddeɣ di Tirṣa. 22 Ajeǧid Asa ijja ad barrḥen di marra Yahuda, war ittɣimi ḥed, ḥima nitni ad kksen iẓra zi Rama d ukeccuḍ i zi tuɣa ibenna Baɛca. U s man aya ibna ujeǧid Asa tandint n Jibɛa di Binyamin d Miṣfa.

23 Imezruyen iqqimen n Asa, marra timegga nnes imeḥḍen d marra min igga uřa d tineddam nni ibna, ma man aya marra war ittwazemmem ca deg wedlis n imezruyen n ijeǧiden n Yahuda? Maca umi iwsar, ihřec netta zeg iḍaren nnes s tnayen. 24 Asa igga ad yareyyeḥ jar řejdud nnes. Netta ittwanḍeř jar řejdud nnes di tendint n babas Dawud. Mmis Yahucafaṭ idweř d ajeǧid deg wemcan nnes. ◘15:24 2 Im. 16:13; 17:1

25 Nadab, mmis n Yarubɛam, idweř d ajeǧid x Israil deg useggʷas wiss tnayen n Asa, ajeǧid n Yahuda. Netta iḥkem tnayen n iseggʷusa x Israil. 26 Netta igga min iǧan d aɛeffan di tiṭṭawin n SIDI uca yuyur deg webrid n babas u di ddnub nnes i zi yarra Israil ad ixḍa.

27 Baɛca, mmis n Abiya, zi taddart n Issakar, igga xas ict n tmeɛmuč u Baɛca iɣřeb xas di Jibbatun nni iǧan n Ifilisṭiniyyen, umi Nadab d marra Israil tuɣa innḍen i Jibbatun. 28 Inɣa i-t Baɛca deg useggʷas wiss třata n Asa, ajeǧid n Yahuda, u netta idweř d ajeǧid deg wemcan nnes. 29 Umi idweř netta d ajeǧid, imsar, aqa iqḍa x marra taddart n Yarubɛam. Uřa d ca n Yarubɛam nni yarrin nnefs, war t ijji ad iqqim iddar, ařami t iteḥḥa ɛlaḥsab awař n SIDI nni tuɣa issiweř s uqemmum n umsexxar nnes Axiya, Aciluni, ◘15:29 1 Ij. 14:10, 14 30 di ssibbet n ddnub n Yarubɛam i zi ixḍa netta u i zi yarra Israil ad ixḍa s tmegga nnes ixewwjen i zi isɛar SIDI, AREBBI n Israil.

31 Imezruyen iqqimen n Nadab, d marra min igga, ma man aya marra war ittwazemmem ca deg wedlis n imezruyen n ijeǧiden n Israil? 32 Tuɣa din amenɣi jar Asa d Baɛca, ajeǧid n Israil, marra ussan nsen.

33 Deg useggʷas wiss třata n ujeǧid Asa, ajeǧid n Yahuda, idweř Baɛca, mmis n Axiya, d ajeǧid x marra Israil di Tirṣa, u netta iḥkem arebɛa u-ɛicrin n iseggʷusa. 34 Netta igga min iǧan d aɛeffan di tiṭṭawin n SIDI u yuyur deg webrid n Yarubɛam u di ddnub nnes i zi yarra Israil ad ixḍa.