1 Ajeǧid Suliman tuɣa ittexs aṭṭas n temɣarin tibarraniyyin, am mammec tuɣa ittexs uřa d yeǧis n firɛun: timɣarin zi Mu’ab, zi Ɛammun, zi Idum, zi Ṣidun u zeg Iḥittiyyin, ◘11:1 Aɛwd. 17:17 2 timɣarin zi řegnus i x tuɣa inna SIDI i ayt n Israil: “Kenniw war ɣarsen ttadfem uca uřa d nitni war ɣarwem ttadfen. S tidett ad ɣwan nitni uř nwem, ḥima ad tuyurem awarni i irebbiten nsen!” Maca Suliman iqqen ɣarsen s tayri. ◘11:2 Uf. 34:16; Aɛwd. 7:3 3 Netta tuɣa ɣares sebɛa-mya n temɣarin, tijeǧidin, u teřt-mya n tiyya. Timɣarin nnes ɣwant uř nnes. 4 Řami dd-tiweḍ tewsar ɣar Suliman ɣwant temɣarin nnes uř nnes, ařami yuyur awarni i irebbiten nneɣni. Uř nnes war iqqim imun i SIDI, AREBBI nnes, am wuř n babas Dawud. 5 Suliman yuyur awarni i Acturit, tarebbit n Iṣiduniyyen, u awarni i Milkum, nnɛi n l’aṣnam n ayt n Ɛammun. ◘11:5 Řqḍ. 2:13; 2 Ij. 23:13 6 Suliman igga min iǧan d aɛeffan di tiṭṭawin n SIDI. Netta war tuɣi icḍar aṭṭas i SIDI am babas Dawud. 7 Xenni ibna Suliman ict n řgeɛɛdet i Kamuc, nnɛi n ṣṣanam n ayt n Mu’ab, deg wedrar wenni iǧan zzat i Urcalim, uca uřa d ict n řgeɛɛdet i Mulik, nnɛi n ṣṣanam n ayt n Ɛammun. ◘11:7 2 Ij. 23:13 8 Ammu i igga i marra timɣarin nnes tibarraniyyin, tinni iwyen řebxur d tɣarṣa n wecmaḍ i irebbiten nsent.

9 S uyenni isɛar SIDI x Suliman, minzi uř nnes tuɣa iḥeyyed x SIDI, AREBBI n Israil, i tuɣa ɣares-dd iban tnayen n twařawin, ◘11:9 1 Ij. 3:5; 9:2 10 waxxa tuɣa ɣares dd-yusa řumur nican, maḥend war iggur awarni i irebbiten nneɣni u netta xenni war iḥḍa min d as yumur SIDI. ◘11:10 1 Ij. 6:12 11 S uyenni inna SIDI i Suliman: “Minzi imsar ac ammu ařami war teḥḍid ca Řɛahd inu d tweṣṣa inu nni cek umureɣ, s tidett ad zzayek qeřɛeɣ tageldit-a uca ad tt wceɣ i umsexxar nnec. ◘11:11 1 Ij. 12:15 12 Deg wussan nnec war t ggeɣ ɛad di ṭṭweɛ n babac Dawud, maca ad tt qeřɛeɣ zeg ufus n mmic. 13 Maca Necc war xak qeřɛeɣ tageldit marra. Ad wceɣ ict n teqbič i mmic di ṭṭweɛ n umsexxar inu Dawud u di ṭṭweɛ n Urcalim nni farzeɣ Necc.”

14 SIDI issekkar-dd i Suliman ijj n řeɛdu Hadad, zi Idum. Tuɣa Hadad zi tarwa n ujeǧid n Idum. ◼11:14 tarwa - s Tɛibranit ‘zzariɛet’. 15 Umi tuɣa Dawud di Idum u Yuwab, akumandar nnes n řɛeskar, igeɛɛed maḥend ad inḍeř inni ittwassnuqqben, imsar, aqa Yuwab inɣa marra min iǧan d awtem di Idum. ◘11:15 2 Ṣm. 8:14; 1 Im. 18:12, 13 16 Maɣar Yuwab iqqim dinni setta n iyuren ak-d marra Israil, ařami iteḥḥa marra min iǧan d awtem di Idum. ◼11:16 iteḥḥa- s Tɛibranit ‘iqḍeɛ’. 17 Maca Hadad izemmar ad yarweř, netta d ca n yeryazen Idumiyyen zeg imsexxaren n babas akides, ařami dd-usin ɣar Miṣra. Tuɣa Hadad ɛad d ijj n uḥenjir d ameẓyan. 18 Nitni tuɣa kkaren zi Midyan uca iwḍen ɣar Faran. Dinni ksin nitni iryazen n Faran akidsen uca usin-dd ɣar Miṣra ɣar firɛun, ajeǧid n Miṣra. Wanita iwca as ict n taddart, iwca as awař ad as iwc macca u iwca as ict n temmurt. 19 Hadad yufa arḍa ameqqran di tiṭṭawin n firɛun, ařami wanita iwca as učmas n temɣart nnes d tamɣart, učmas n tjeǧidt Taḥfanis. 20 Učmas n Taḥfanis turuw as-dd mmis Janubat, wenni tessuṭṭuḍ Taḥfanis di taddart n firɛun, ařami xenni Janubat iyma di řwesṭ n ayt n firɛun.

21 Isřa Hadad di Miṣra belli Dawud tuɣa igga ad yareyyeḥ jar řejdud nnes uca Yuwab, akumandar n řɛeskar, immut. Xenni inna Hadad i firɛun: “Sekk ayi-dd, ad raḥeɣ ɣar temmurt inu!” 22 Maca firɛun inna: “Min cek ixeṣṣen ɣari, řami dayek ẓriɣ, cek texsed ad tɛeqbed ɣar temmurt nnec?” Netta inna: “Walu, maca waxxa amenni sekk ayi-dd din!”

23 AREBBI issekkar xas ɛawed ijj n řeɛdu nneɣni, Razun, mmis n Ilidaɛ, wenni tuɣa yarewřen zi sidi nnes Hadad-Ɛazar, ajeǧid n Ṣuba. ◘11:23 2 Ṣm. 8:3; 10:18 24 Tuɣa issmun iryazen, idweř d řqebṭan n bandiyya nsen řami tuɣa ixs Dawud ad ten ineɣ. Maca nitni ruḥen ɣar Dimacq, zeddɣen din u areyysen di Dimacq. ◘11:24 2 Ṣm. 8:3 25 Netta tuɣa-t d ijj n řeɛdu n Israil marra ussan n Suliman d man aya sennej i řɣar i igga Hadad. Netta iɛiff Israil u yareyyes am ujeǧid x Aram.

26 Yarubɛam, mmis n Nabaṭ, ijj n Ifrati zi Ṣaradata, ijj n umsexxar n Suliman issgeɛɛed afus nnes x ujeǧid. Yemmas qqaren as Ṣaruɛa, tuɣa-tt d tajjač. ◼11:26 Yarubɛam - isem wanita ixs ad yini ‘řgens d aṭṭas’ niɣ ‘řgens imcubbec’.  ◘11:26 2 Im. 13:6 27 D man aya d ssibbet i zi tuɣa dd-issgeɛɛed afus nnes x ujeǧid, řami tuɣa Suliman ibenna lqelɛa, iqqen tazzit di tendint n babas Dawud. ◼11:27 tazzit - niɣ ‘řxawi’. 28 Tuɣa Yarubɛam d ijj n bu-teɣruḍt imeḥḍen. Iẓra Suliman aqa aḥudri imḥeḍ di řxedmet uca netta igga i-t x marra řxedmet n tarebbut n taddart n Yusuf. 29 Di řweqt nni imsar aqa Yarubɛam iffeɣ zi Urcalim uca yufa i-t unabi Axiya deg webrid. Wanita tuɣa yarḍ ijj n warruḍ n jdid u nitni s tnayen idsen tuɣa aten weḥḥedsen deg iyyar. 30 Axiya iṭṭef arruḍ n jdid nnes wenni yarḍen u icarreg i-t di tenɛac n iziynat. 31 Inna i Yarubɛam: “Ksi ɛecra n iziynat i cek, maɣar ammu i iqqar SIDI, AREBBI n Israil: ‘Xẓar, Necc ad carrgeɣ tageldit zeg ufus n Suliman uca ad ac wceɣ ɛecra n tqebbař, ◘11:31 1 Ṣm. 15:28 32 maca ict n teqbič ad tiři i netta di ṭṭweɛ n umsexxar inu Dawud u di ṭṭweɛ n Urcalim, tandint nni farzeɣ Necc zi marra tiqebbař n Israil. 33 Maɣar nitni semḥen dayi u sejden i Acturit, tarebbit n Iṣiduniyyen, i Kamuc, arebbi n ayt n Mu’ab, u i Malkam, arebbi n ayt n Ɛammun. War uyuren nitni di tebridin inu maḥend ad ggen min iǧan nican di tiṭṭawin inu u war ḥḍin tiweṣṣa inu d lfarayiḍ inu am t igga babas Dawud. 34 Maca war d as ttekkseɣ ca marra tageldit zeg ufus nnes, maca ad t ssmetneɣ d řḥakem marra ussan n tudart nnes di ṭṭweɛ n umsexxar inu Dawud, wenni farzeɣ d wenni iḥḍan řumurat inu d tweṣṣa inu, 35 maca ad kkseɣ tagelda zeg ufus n mmis u ad cek wceɣ ɛecra n tqebbař zzayes, 36 u i mmis ad as wceɣ ict n teqbič, maḥend ad teqqim i umsexxar inu Dawud řebda ict n tfawt zzat i wudem inu di Urcalim, tandint nni farzeɣ Necc i Yixef inu, ḥima ad din ssmetneɣ Isem inu. ◘11:36 1 Ij. 15:4; Izhd. 132:17 37 Necc ad cek ksiɣ u cek ad tḥekmed x marra min immeẓri řeɛmar nnec u ad tiřid d ajeǧid x Israil. 38 Mařa cek tesřid ɣar marra min zi cek umureɣ, ad tuyured x tebridin inu u ad tegged min iǧan nican di tiṭṭawin inu umi i ɣa teḥḍid tiweṣṣa inu d řumurat inu am t igga umsexxar inu Dawud, xenni ad imsar aqa Necc ad iřiɣ akidek u ad ac bniɣ ict n taddart i ɣa teqqim am mammec tt bniɣ i Dawud u Necc ad ac wceɣ Israil, 39 Necc ad ssehwiɣ tarwa n Dawud i man aya, maca war iǧi i řebda.” ◼11:39 tarwa - s Tɛibranit ‘zzariɛet’.

40 Suliman tuɣa yarezzu ad ineɣ Yarubɛam, maca Yarubɛam ikkar, yarweř ɣar Miṣra, ɣar Cicak, ajeǧid n Miṣra. Netta iqqim di Misra ař řmewt n Suliman.

41 Min iqqimen n imezruyen n Suliman d marra min igga d tiɣit i ɣares, ma man aya marra war ittwazemmem ca deg wedlis n imezruyen n Suliman? ◘11:41 2 Im. 9:29-31 42 Řweqt nni iḥkem Suliman x marra Israil di Urcalim, tuɣa arebɛin n iseggʷusa. ◘11:42 2 Im. 9:30 43 Suliman igga ad yareyyeḥ jar řejdud nnes. Netta ittwanḍeř di tendint n babas Dawud u mmis Raḥabɛam idweř d ajeǧid deg wemcan nnes.