1 Tajeǧidt n Caba tesřa x ccennɛet n Suliman uca, ḥima ad tqeǧeb Suliman s tḥuja n twafit, tusa-dd ɣar Urcalim s ijj n ukaravan s ddqeř n wagřa aṭṭas, s iřeɣman nni yarebbun řeɛṭur d waṭṭas n wureɣ d iẓra iɣřan u nettat tusa-dd ɣar Suliman uca tessiweř akides x marra min ɣares deg wuř. ◘9:1 [1 Ij. 10:1-3] 2 Suliman icarḥ marra awařen nnes. War din uřa d ijj n wawař s řemɛani innuffaren i Suliman ařami war izemmar ad as t icarreḥ.

3 Řami teẓra tjeǧidt n Caba tiɣit n Suliman d taddart i ibna, 4 d macca x ṭṭabřa nnes, d mammec qqimen imsexxaren nnes, d mammec bedden ixeddamen nnes, d warruḍ nsen d iwarraden nnes d warruḍ nsen d mammec igeɛɛed am dd-igeɛɛed ɣar Taddart n SIDI, war iqqim dayes ɛřaḥař buḥbeř ɛad. 5 Nettat tenna i ujeǧid:

“Awař nni sřiɣ di temmurt inu x wawařen nnec u x tiɣit nnec, nican d tidett. 6 Necc war umineɣ ca s wawařen nni, ařami dd-usiɣ danita u xenni tiṭṭawin inu ẓrint aya. Xzar, azyen n tiɣit nnec tameqqrant war d ayi ittwanna. Aqa cek sennej x řexbar i xak sřiɣ. 7 Sseɛd n yeryazen nnec, sseɛd n imsexxaren nnec, inni ibedden zzat i wudem nnec řebda u ittesřan ɣar tiɣit nnec! 8 Ad ittwabarek SIDI, AREBBI nnec, wenni umi dd-tusid x řxaḍar ḥima ad cek yegg d ajeǧid i SIDI, AREBBI nnec, x řɛarc nnes. Minzi AREBBI ittexs aṭṭas ad yejj Israil ad teqqim i řebda, s uya igga cek d ajeǧid xasen i řebda, maḥend ad tegged řḥeqq d tsegda.”

9 Nettat tewca i ujeǧid mya u-ɛicrin talint n wureɣ d waṭṭas n řebzer d iẓra iɣřan. Řebzer am wanita i tewca tjeǧidt n Caba i ujeǧid Suliman, ɛemmarṣ war iǧi ɛad.

10 Imsexxaren n Ḥiram i dd iwyen ureɣ zeg Ufir ak-d imsexxaren n Suliman, iwyen ɛawed akeccuḍ n tcejjart n ṣandal azeggʷaɣ d yeẓra iɣřan. 11 Ajeǧid igga zeg ukeccuḍ nni n tcejjart n ṣandel azeggʷaɣ ddrujat timeqqranin i Taddart n SIDI u i taddart n ujeǧid, uřa d řgambriyat d lharpat i imedyazen. Am man aya war t ẓrin ɛemmarṣ qbeř di temmurt n Yahuda.

12 Ajeǧid Suliman iwca i tjeǧidt n Caba marra min tuɣa dayes d meẓri, min ma tᵉttar, wah, ktar zi min dd ttiwi ɣar ujeǧid. Xenni tenneqřeb u teɛqeb ɣar temmurt nnes, nettat d imsexxaren nnes.

13 Řqedd n wureɣ i ittadfen ɣar Suliman deg ijj n useggʷas tuɣa setta-mya u-setta u-settin talint n wureɣ, ◘9:13 [1 Ij. 10:14-29] — 1 Ij. 10:14; Ɛiz. 2:13; Asa. 17:9. 14 nhřa arbeḥ zeg iryazen imsewwqen i dd-ittennḍen di temmurt u zi tsebbabt n isebbaben, u nhřa arbeḥ n wureɣ d nnuqart i Suliman zeg marra ijeǧiden n temmurt n Ɛarabiyya u zi lwulat n temmurt.

15 Ajeǧid Suliman igga ɛawed mitayen n tseddariyin n uɛeskari timeqqranin s wureɣ ittwaddzen. X ict n tseddart ttwaggen setta-mya ciqlu n wureɣ. 16 Yarni igga netta teřt-mya n tseddariyin n uɛeskari s wureɣ ittwaddzen. Ttwaggent teřt-mya cciqlu n wureɣ deg ict n tseddart. Ajeǧid issars i-tent di Taddart n Wezɣar n Lubnan. ◼9:16 azɣar - niɣ ‘řɣabet’ niɣ ‘tazgant’.

17 Ajeǧid igga ɛawed ijj n řɛarc ameqqran n řɛaj uca iɣeřf i-t s wureɣ iṣfan. ◼9:17 řɛaj - ixs ad yini ‘accawen n lfil’. 18 Řɛarc wanita ɣares setta n tareffidin u tᵉttwacedd ict n tneddabt n wureɣ i yiḍaren i řɛarc. Ɣar tnayen n iɣezdisen n řkursi tuɣa ǧan iɣaǧen u tnayen n wayraden tuɣa bedden zzat i iɣaǧen n řɛarc. 19 Tenɛac n wayraden bedden ɣar tnayen n iɣezdisen x setta n tareffidin. Am netta war ittwagg ɛad uřa deg ict n tgeldit.

20 Marra iɣarrafen n tissit n Suliman tuɣa aten n wureɣ u marra řeqcuɛ n Taddart n Wezɣar n Lubnan tuɣa aten s wureɣ izedgen, war din nnuqart dayes, maɣar deg wussan n Suliman tuɣa ḥessben tt d walu. 21 Maɣar ajeǧid tuɣa ɣares iɣarruba nni inedhen ɣar Tarcic ak-d imsexxaren n Ḥiram. Ict n twařa di třata n iseggʷusa usin-dd iɣarruba zi Tarcic, iwyen-dd ureɣ d nnuqart, řɛaj d ibaɣusen d iṭawsen. 22 Ajeǧid Suliman iɛdu marra ijeǧiden n ddunect deg wagřa d tiɣit. 23 Marra ijeǧiden n ddunect arzun ad ẓaren udem n Suliman, maḥend ad sřen ɣar tiɣit nnes i tuɣa issars AREBBI deg wuř nnes. 24 Nitni usin-dd aseggʷas awarni i umas, kuř ijj s tarzeft nnes, s řeqcuɛ n nnuqart, řeqcuɛ n wureɣ, arruḍ, řesnaḥ, řeɛṭur, iysan d isardan.

25 Suliman tuɣa ɣares arebɛa-ařaf n řkurit i iysan d ikarruten u i tenɛac-ařef n imnayen. Igga i-ten di tneddam n ikarruten u ɣar ujeǧid di Urcalim. 26 Netta iḥkem x marra ijeǧiden zeg iɣzar Lfuraṭ ař tammurt n Ifilisṭiniyyen u ař aymir n Miṣra. 27 Ajeǧid igga nnuqart di Urcalim am yeẓra u ticejjura n tengelt igga i-ten am yizemmuren nni iǧan aṭṭas di Temmurt Iwaṭan. 28 Iwyen-dd iysan i Suliman zi Miṣra u zi marra timmura.

29 Min iqqimen n imezruyen n Suliman, imezwura d ineggura, ma man aya marra war ittwazemmem ca deg wedlis n imezruyen n unabi Natan u di nnubuwa n Axiya Axiluni u deg iweḥḥan n umwařaw Yaɛdu x Yarubɛam, mmis n Nabaṭ? ◘9:29 [1 Ij. 11:41-43] 30 Suliman iḥkem di Urcalim arebɛin n iseggʷusa x marra Israil. 31 Suliman igga ad yareyyeḥ jar řejdud nnes uca neḍřen t di tendint n babas Dawud. Mmis Raḥabɛam idweř d ajeǧid deg wemcan nnes.