1 Tajeǧidt n Caba tesřa x ccennɛet n Suliman tenni i dd-yusin ak-d Yisem n SIDI u nettat tusa-dd, ḥima ad t tqeǧeb s tḥuja n twafit. ◘10:1 [2 Im. 9:1-12] 2 Nettat tusa-dd ɣar Urcalim s ijj n ukaravan i d as dd-iḍfaren s ddqeř n wagřa aṭṭas, s iřeɣman nni yarebbun řeɛṭur d waṭṭas n wureɣ d iẓra iɣřan, u nettat tusa-dd ɣar Suliman u tessiweř akides x marra min ɣares deg wuř. ◘10:2 2 Im. 9:1; Mt. 12:42; Lk. 11:31 3 Suliman icarḥ marra awařen i tḥaja nettat. War din uřa d ijj n wawař s řemɛani innuffaren i war izemmar ujeǧid ad as t icarreḥ.

4 Tajeǧidt n Caba teẓra marra tiɣit n Suliman d taddart i ibna, 5 d macca x ṭṭabřa nnes, d mammec qqimen imsexxaren nnes, d mammec bedden ixeddamen nnes d warruḍ nsen, d iwarraden nnes, d ddruj nnes izewwqen i xef dd-igeɛɛed ɣar Taddart n SIDI, uca war iqqim dayes ɛřaḥař buḥbeř ɛad. ◘10:5 2 Ij. 16:18; 1 Im. 9:18 6 Nettat tenna i ujeǧid: “Awař nni sřiɣ di temmurt inu x wawařen nnec u x tiɣit nnec, nican d tidett. 7 Necc war umineɣ ca s wawařen nni, ařami dd-usiɣ danita u xenni tiṭṭawin inu ẓrint aya. Xzar azyen zi kuř man aya war d ayi ittwanna. Tiɣit d tcuni ɛlaḥsab ccennɛet i x sřiɣ, aqa cek sennej nsent. 8 Sseɛd n yeryazen nnec, sseɛd n imsexxaren nnec, inni ibedden zzat i wudem nnec řebda, inni zemmaren ad sřen tiɣit nnec. 9 Ad ittwabarek SIDI, AREBBI nnec, wenni umi dd-tusid x řxaḍar, ḥima ad cek yegg x řɛarc n Israil. Minzi SIDI ittexs Israil i řebda, s uya igga cek d ajeǧid, maḥend ad tegged řḥeqq d tsegda.” 10 Nettat tewca i ujeǧid mya u-ɛicrin talint n wureɣ d waṭṭas n řeɛṭur d yeẓra iɣřan. Ijj n ufeyyeḍ n řeɛṭur am wanita i iwcin tajeǧidt n Caba i ujeǧid Suliman, ɛemmarṣ ɛad war dd-yusi ca.

11 Agraw n iɣarruba n Ḥiram i-dd yiwyen ureɣ zeg Ufir, yiwyi-dd ɛawed aṭṭas n ukeccuḍ n tcejjart n ṣandal d yeẓra iɣřan zi Ufir. 12 Ajeǧid igga zeg ukeccuḍ n ṣandal wanita afrayen izewwqen i Taddart n SIDI u i taddart n ujeǧid uřa d řgambriyat d lharpat i imedyazen. Akeccuḍ n sandal am wanita ɛemmarṣ war dd-yusi niɣ ittwaẓar ɛad ař ass-a. ◘10:12 2 Im. 9:11

13 Ajeǧid Suliman iwca i tjeǧidt n Caba marra di min tuɣa temmeẓri, min ma tuɣa tᵉttar sennej i min d as iwca ɛad, ɛlaḥṣab tacrimt n ufus n ujeǧid Suliman. Xenni tenneqřeb, tedweř ɣar temmurt nnes, nettat d imsexxaren nnes.

14 Řqedd n wureɣ i ittadfen ɣar Suliman deg ijj n useggʷas tuɣa setta-mya u-setta u-settin talint n wureɣ, ◘10:14 [2 Im.9:13-28] — 2 Im. 9:13; Ɛiz. 2:13; Asa. 17:9. 15 břa min iksi zeg ittijariyyen u zi tsebbabt n isebbaben u zi marra ijeǧiden n Ɛarabiyya u zi lwulat n temmurt.

16 Ajeǧid Suliman igga ɛawed mitayen n tseddariyin n uɛeskari timeqqranin s wureɣ ittwaddzen. X ict n tseddart ttwaggen setta-mya ciqlu n wureɣ. ◘10:16 1 Ij. 14:26 17 Yarni igga netta teřt-mya n tseddariyin n uɛeskari s wureɣ ittwaddzen. Ttwaggent teřt minayat n wureɣ x ict n tseddart. Ajeǧid issars i-tent di taddart n Wezɣar n Lubnan. ◼10:17 azɣar - niɣ ‘řɣabet’ niɣ ‘tazgant’.  ◘10:17 1 Ij. 7:2

18 Ajeǧid Suliman igga ɛawed ijj n řɛarc ameqqran zi řɛaj uca iɣeǧef i-t s wureɣ ittwaṣeffan. ◼10:18 řɛaj - ixs ad yini ‘accawen n lfil’.  ◘10:18 2 Im. 9:17 19 Řɛarc wanita ɣares setta n tareffidin u azeǧif n řɛarc tuɣa-t iquwwar ɣar ḍeffar nnes u ɣar tnayen n iɣezdisen n řkursi tuɣa ǧan iɣaǧen, u tnayen n wayraden tuɣa bedden zzat i iɣaǧen. 20 Tenɛac n wayraden bedden ɣar tnayen n iɣezdisen x setta n tareffidin. Am netta war ittwagg ɛad uřa deg ict n tgeldit.

21 Marra iɣarrafen n tissit n Suliman tuɣa aten n wureɣ u marra řeqcuɛ n Taddart n Wezɣar n Lubnan tuɣa aten s wureɣ izedgen, war din nnuqart dayes, maɣar deg wussan n Suliman tuɣa ḥessben tt d walu. ◼10:21 azɣar - niɣ ‘řɣabet’ niɣ ‘tazgant’. 22 Maɣar ajeǧid tuɣa ɣares ijj n wagraw n iɣarruba n Tarcic x řebḥar jmiɛ ak-d wegraw n iɣarruba n Ḥiram. Ict n twařa di třata n iseggʷusa yudef wegraw n iɣarruba n Tarcic, yiwi ureɣ d nnuqart, řɛaj d ibaɣusen d iṭawsen. 23 Ajeǧid Suliman iɛdu marra ijeǧiden n ddunect deg wagřa d tiɣit. ◘10:23 1 Ij. 3:12, 13 24 Marra ddunect yarzu ad ẓaren udem n Suliman, maḥend ad sřen tiɣit nnes i tuɣa issars AREBBI deg wuř nnes. 25 S uyenni usin-dd nitni aseggʷas awarni i umas, kuř ijj s tarzeft nnes, s řeqcuɛ n nnuqart, řeqcuɛ n wureɣ, arruḍ, řesnaḥ, řeɛṭur, iysan d isardan. Aqa d man aya imsar aseggʷas awarni i umas. 26 Suliman issmun ikarruten d imnayen. Netta tuɣa ɣares ařef u-arebɛa-mya n ikarruten d tenɛac-ařef n imnayen, uca yiwyi ten ɣar tneddam n ikarruten u ɣar ujeǧid di Urcalim. ◘10:26 1 Ij. 5:20; 2 Im. 1:14; 9:25

27 Ajeǧid igga nnuqart aṭṭas di Urcalim, amecnaw iẓra, u ticejjura n tengelt igga i-tent aṭṭas amecnaw izemmuren nni iǧan di Temmurt Iwaṭan. ◘10:27 2 Im. 1:15; 9:27

28 Iysan i Suliman ttwassuffɣen zi Miṣra, zi Qiwi. Isebbaben n ujeǧid iwyen ten s yijj n ttaman imetnen zi Qiwi. ◘10:28 2 Im. 1:16; 9:28 29 Ijj n ukarru igeɛɛed-dd u ittwassuffeɣ-dd zi Miṣra s ijj n ttaman n setta-mya ciqlu n nnuqart u ijj n uyis s mya u-xemsin ciqlu. Nitni ssuffɣen ten s ufus nsen ɛawed i marra ijeǧiden n Iḥittiyyen u i ijeǧiden n Aram. ◘10:29 2 Im. 1:17