1 Deg useggʷas wiss sbeɛṭac n Faqaḥ, mmis n Ramalyahu, idweř Aḥaz, mmis n Yutam, d ajeǧid n Yahuda. ◘16:1 [2 Im. 28:1-27] — 2 Im. 28:1 2 Aḥaz tuɣa ɣares ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec igga babas Dawud. 3 Netta yuyur deg ibriden n ijeǧiden n Israil. Netta ijja ɛad mmis ad yuyur di tmessi am mammec marra jjɛayef n řegnus inni tuɣa iɛarren SIDI zzat i wudem n ayt n Israil. ◘16:3 Lawi 18:21; 20:2, 3; 2 Ij. 17:31 4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza. 5 Xas uca iffeɣ Raṣin, ajeǧid n Aram, d Faqaḥ, mmis n Ramalyahu, ajeǧid n Israil, immneɣ ak-d Urcalim. Nitni nnḍen i Aḥaz, maca war zemmaren ad xas ɣeřben. ◘16:5 Ica. 7:1

6 Di řweqt nni yarra-dd Raṣin, ajeǧid n Aram, Ilat i Aram. Issuffeɣ ayt n Yahuda zi Ilat uca usin-dd ayt n Aram ɣar Ilat, qqimen zeddɣen din ař ass-a. ◼16:6 Iramiyyen - ixs ad yini ‘ayt n temmurt n Aram’. 7 Aḥaz issekk ireqqasen i Tiɣlat-Filasir, ajeǧid n Accur, inna: “Necc d amsexxar nnec d mmic. Geɛɛed d tfekked ayi zeg ufus n ujeǧid n Aram d ujeǧid n Israil, inni xafi innqeřben.” 8 Aḥaz yiwi nnuqart d wureɣ i ittwafen di Taddart n SIDI u deg ixxamen n txubay n taddart n ujeǧid uca issekk aya am ict n terzeft i ujeǧid n Accur. ◘16:8 2 Im. 28:21 9 Ajeǧid n Accur isřa ɣares uca igeɛɛed ujeǧid n Accur ɣar Dimacq, iṭṭef i-tt. Netta indeh i-tt ɣar lmenfa ɣar Qir u inɣa Raṣin.

10 Ajeǧid Aḥaz iffeɣ ɣar Dimacq i umsagar ak-d Tiɣlat-Filasir, ajeǧid n Accur, uca iẓra ijj n uɛalṭar di Dimacq. Ajeǧid Aḥaz issekk ijj n umedya n uɛalṭar d tweṣṣaf nnes n řebni, qaɛ am mammec tuɣa ittxeṣṣa ad t ggen, ɣar ukehhan Uriya. 11 Xas uca ibna ukehhan Uriya aɛalṭar. Ɣar řweqt i di dd-iɛqeb ujeǧid Aḥaz zi Dimacq, aqa ibna t ukehhan Uriya am mammec marra min ɣares dd-issekk ujeǧid Aḥaz zi Dimacq. 12 Umi dd-yusa ujeǧid zi Dimacq, iẓra ujeǧid aɛalṭar uca iqarreb-dd ujeǧid ɣar uɛalṭar uca issbexxar xas tiɣarṣa. 13 Netta issbexxar taɣarṣt nnes d tewhibt nnes n řɣiǧet u iseyyeb xas tawhibt n useyyeb nnes. Issfarrɣeɣ uřa d idammen n tɣarṣa nnes n řehna x uɛalṭar. 14 Aɛalṭar n nnḥas nni ibedden zzat i wudem n SIDI, issmuṭṭiy t zeg uɣezdis n zzat n Taddart, zi jar uɛalṭar n jdid d Taddart n SIDI, ɣar uɣezdis n ccamal n uɛalṭar n jdid uca issars i-t dinni. 15 Řexdenni ajeǧid Aḥaz iweṣṣa akehhan Uriya, inna: “Sbexxar taɣarṣt n wecmaḍ n ṣṣbeḥ d tewhibt n řɣiǧet n tmeddit řa taɣarṣt n wecmaḍ n ujeǧid d tewhibt nnes n řɣiǧet d tɣarṣt n wecmaḍ di ṭṭweɛ n marra řgens n temmurt d tewhibin nsen n řɣiǧet d tewhibin nsen n useyyeb, u zeǧeɛ xas marra idammen n marra tiɣarṣa n wecmaḍ u n tɣarṣa nneɣni. Aɛalṭar n nnḥas ad yiři i nnec, ḥima ad dayes arzuɣ ɛad. 16 Akehhan Uriya igga am mammec marra s minzi iweṣṣa ujeǧid Aḥaz. 17 Ajeǧid Aḥaz iqess teřwiḥin i yeǧan x tkarrutin uca ikkes zzaysent tabanyut i xas iǧan. Ikkes uřa d tarimant n waman zeg ifunasen n nnḥas inni sadu nnes uca issars i-tt x ict n zzellij n weẓru. ◼16:17 tarimant - s Tɛibranit ‘řebḥar’ niɣ ‘il’.  ◘16:17 1 Ij. 7:23-51 18 Pasu n ssebt i tuɣa ibnan di Taddart, uřa d adaf n ujeǧid ɣar uɣezdis n barra ikkes i-ten zi Taddart n SIDI di ssibbet n ujeǧid n Accur. ◘16:18 1 Ij. 10:5; 1 Im. 9:18 19 Imezruyen iqqimen n Aḥaz d min igga, ma man aya marra war ittwazemmem ca deg wedlis n imezruyen n ijeǧiden n Yahuda? 20 Aḥaz igga ad yareyyeḥ jar řejdud nnes di tendint n Dawud. Mmis Ḥizqiya idweř d ajeǧid deg wemcan nnes.