1 Deg useggʷwas wiss tenɛac n Aḥaz, ajeǧid n Yahuda, idweř Huciɛa, mmis n Ila, d ajeǧid x Israil di Samarya. Netta iḥkem tesɛa n iseggʷusa. 2 Netta igga min iǧan d aɛeffan di tiṭṭawin n SIDI, maca war iǧi anect n ijeǧiden n Israil, inni tuɣa qbeř nnes. 3 Calmanassar, ajeǧid n Accur, ihjem xas uca Huciɛa idweř d amsexxar nnes uca ittwagg xas maḥend ad as iwc ljizya. 4 Ajeǧid n Accur yufa aqa Huciɛa igga ict n tmeɛmuč. Wanita tuɣa issekk ireqqasen nnes ɣar Su, ajeǧid n Miṣra, uca war dd-yiwi ɛad ljizya am qbeř i ujeǧid n Accur, zeg useggʷas ař aseggʷas. Ajeǧid n Accur iṭṭef i-t uca icedd i-t s iceddiyyen di řeḥbes. 5 Ajeǧid n Accur iwḍa x marra tammurt, igeɛɛed ɣar Samarya u inneḍ as-dd třata n iseggʷusa. ◘17:5 2 Ij. 18:9 6 Deg useggʷas wiss tesɛa n Huciɛa, iḥewwes ajeǧid n Accur Samarya uca indeh ayt n Israil di lmenfa ɣar Accur u issezdeɣ i-ten di Ḥalaḥ u ɣar Xabur wenni d iɣzar n Juzan, u di tneddam n Imadayen. ◘17:6 2 Ij. 18:10; Ica. 8:4

7 Aya imsar minzi ayt n Israil xḍan x SIDI, AREBBI nsen, wenni ten dd-issgeɛɛden zi Miṣra, zi sadu i ufus n firɛun, ajeǧid n Miṣra, u umi ggʷeden nitni irebbiten nneɣni, 8 ggin ad ddaren ɛlaḥsab tiweṣṣa n řegnus nni iɛarren i-ten SIDI zi zzat i wudem nsen, u ɛlaḥsab tiweṣṣa n ijeǧiden n Israil inni ten iggin. ◘17:8 Lawi 18:3 9 Ayt n Israil tuɣa dřin timesřayin i war ittřiqin zzat i SIDI. Nitni ssbedden i ixef nsen řegɛudi di marra tineddam nsen, wah, zi lburj n tɛessast ař tandint ifaryen s iɣebřawen. 10 Nitni ssbedden imayḍuten iqeddsen d trebbin n cwarti x kuř tawrirt yuɛřan u sadu kuř azɣar d aziza. 11 Nitni qeddmen tiwhibin n řebxur x marra řegɛudi, am mammec ggin řegnus nni tuɣa issuffeɣ SIDI zi zzat n wudem nsen. Nitni ggin timesřayin d tiɛeffanin ařami sɛaren SIDI. 12 Nitni sexxaren i imeyḍa n l’aṣnam i x tuɣa d asen inna SIDI: “War iɛeddeř ad teggem aya!” ◘17:12 Uf. 20:3, 4, 5; Aɛwd. 5:7, 8, 9 13 SIDI iɛřem i Israil d Yahuda s uqemmum n marra inabiyyen, u s kuř ijj n umwařaw, inna: “Tubem zi tbridin nwem tiɛeffanin u ḥḍam x lfarayiḍ inu d tweṣṣa inu ɛlaḥsab marra Ccariɛa i zi umureɣ řejdud nwem u wenni d awem dd-ssekkeɣ s ufus n imsexxaren inu, inabiyyen. ◘17:13 Irm. 18:11; 25:5; 35:15 14 Nitni war sřin ca u tuɣa qesḥen aṭṭas am mammec tuɣa qesḥen aṭṭas řejdud nsen, inni war iggin ttiqet di SIDI, AREBBI nsen. ◘17:14 Aɛwd. 31:27; Mal. 3:7 15 Nitni nḍaren tiweṣṣa nnes d Řɛahd nnes, wenni igga Netta ak-d řejdud nsen, uřa d cchadat nnes nni tuɣa xasen iched. Nitni ḍfaren min iǧan di řbaṭeř uca uřa d nitni s yixef nsen dewřen beṭṭřen. Nitni ḍfaren ɛawed řegnus nni d asen dd-innḍen i x tuɣa d asen inna SIDI aqa ad tteggen am mammec ggin nitni. 16 Nitni aggʷejen x marra tiweṣṣa n SIDI, AREBBI nsen, u ggin i yixef nsen řexyařat ifesyen: tnayen n iɛejmiyyen. Nitni ggin ɛawed ict n trebbit n cwarti uca bendqen i marra řɛeskar n ujenna u ɛebden i Baɛal. ◼17:16 iɛejmiyyen - niɣ ‘ayenduz’ niɣ ‘yuggu’.  ◘17:16 Uf. 32:8; 1 Ij. 12:28 17 Nitni arrin iḥenjiren nsen d tḥenjirin nsen ad cuqen di tmessi uca ssxedmen aɛezzem d tgezzant. Nitni zzenzen ixef nsen, maḥend ad ggen min iǧan d aɛeffan di tiṭṭawin n SIDI, ḥima ad t sɛaren. ◘17:17 Lawi 20:3, 4; Aɛwd. 18:10; 2 Ij. 16:3 18 X uyenni isɛar SIDI aṭṭas x Israil, ařami inḍar i-ten x wudem nnes. War zzaysen iqqim walu mɣir taqbič n Yahuda. ◘17:18 Ḥuc. 1:6

19 Maca uřa d Yahuda war iḥḍa lfarayiḍ n SIDI, AREBBI nsen. Nitni uyuren di tweṣṣa n Israil nni ggin s yixef nsen.

20 SIDI inḍar marra zzariɛet n Israil. Netta issbehdeř i-ten uca iwca i-ten deg ufus n imkeccaḍen ařami inḍar i-ten x wudem nnes. 21 Maɣar Netta tuɣa iqřeɛ Israil zi taddart n Dawud uca ggin Yarubɛam, mmis n Nabaṭ d ajeǧid. Yarubɛam maca ibḍa Israil x SIDI uca yarra i-ten ad ggen ijj n ddenb d ameqqran. ◘17:21 1 Ij. 12:16, 17, 26 22 Ayt n Israil kkin di marra ddnub i igga Yarubɛam. Nitni war xasen ḥeyyden ca, 23 ařami inḍar SIDI Israil zi zzat i wudem nnes am mammec tuɣa issiweř s uqemmum n marra imsexxaren nnes, inabiyyen. Ssuffɣen Israil zeg wudem n temmurt nnes di lmenfa ɣar Accur, ař ass-a.

24 Ajeǧid n Accur yiwi-dd iwdan zi Babil d Kuta d Ɛawa d Ḥamat d Sfarwayim, uca issezdeɣ i-ten di tneddam n Samarya, deg wemcan n ayt n Israil. Nitni ṭṭfen Samarya d řwart i yixef nsen u ggin ad zedɣen di tneddam nnes. 25 Umi dinni zedɣen ɛad cwayt, imsar aqa nitni war ggʷiden ca SIDI. Xenni issekk SIDI iyraden jar asen inni inɣin ca zzaysen. 26 Nitni ssiwřen x man aya ak-d u ujeǧid n Accur, nnan: “Řegnus nni tessuffɣed u tesszedɣed di tneddam n Samarya, war ssinen mammec teǧa tubbart n AREBBI n temmurt. X uya Netta issekk iyraden jar asen, u xzar, nitni nɣin ten, maɣar war ssinen ca tubbart n AREBBI n temmurt.

27 Ajeǧid n Accur yumur, inna: “Jjem ad din iraḥ ijjen zeg ikehhanen nni tnedhem ssenni. Nitni ad din raḥen u ad din zedɣen u netta ad asen isseřmed tubbart n AREBBI n temmurt.” 28 Yusa-dd ijjen zeg ikehhanen nni tuɣa nedhen zi Samarya uca netta izdeɣ di Bayt-Il. Isseřmed i-ten mammec ɣa weqqaren SIDI. 29 Maca kuř řgens yarni ad igg irebbiten n yixef nnes uca ssbedden ten di tudrin x řegɛudi nni tuɣa bnan Isamariyyen, kuř řgens di tneddam nsen mani tuɣa zeddɣen. 30 Iryazen n Babil ggin i yixef nsen Sukkut-Bnut, u iryazen zi Kuta ggin Narjal, u iryazen zi Ḥamat ggin Acima, 31 u Iɛawiyyen ggin iwrafen n Nibḥaz d Tartaq, uca Isafarwayyin sscemḍen iḥenjiren nsen i Adrammilik d Ɛanammilix, irebbiten n Sfarwayim. 32 S marra man aya ggʷeden nitni ɛawed SIDI, maca di řweqt d ijj ggin nitni i yixef nsen zi marra řeṣfuf nsen ɛawed ikehhanen i řegɛudi, inni d asen isexxaren di tudrin x řegɛudi. ◘17:32 1 Ij. 12:31 33 Nitni ggʷeden SIDI uca sexxaren uřa i irebbiten n ixef nsen am mammec tuɣa teǧa tubbart n řegnus i zi tuɣa ttwanedhen nitni. ◘17:33 Ṣaf. 1:5

34 Ař ass-a tteggen nitni ɛlaḥsab ṭṭbayeɛ nsen n zic. Nitni war tteggʷden ca SIDI u war tteggen ca ɛlaḥsab tiweṣṣa d lfariḍa, ixs ad yini Ccariɛa d řumur i igga SIDI x ayt n Yaɛqub wenni umi tuɣa iwca isem ‘Israil’. ◘17:34 Amz. 32:27; 35:10; 1 Ij. 18:31 35 SIDI igga ijj n Řɛahd akidsen, uca yumur i-ten, inna: “Kenniw war tzemmarem ad tweqqarem irebbiten nneɣni, war d asen ttaḍarem, war d asen ɛebbdem u war d asen ttawyem taɣarṣt. ◘17:35 Řqḍ. 6:10 36 Maca ittxeṣṣa ad teggʷdem SIDI, wenni kenniw dd-issuffɣen zi Miṣra s jjhed ameqqran u s uɣiř isswiẓẓḍen, u ad as tsejdem u ad as tawyem taɣarṣt. 37 Ad teḥḍam tiweṣṣa d lfarayiḍ d Ccariɛa d řumur nni d awem yura, maḥend ad ten teggem kuř ass. War iḥeǧeř ad teggʷdem irebbiten nneɣni. 38 War tᵉttᵉttum Řɛahd i ggiɣ akidwem u war tᵉttweqqarem i irebbiten nneɣni, 39 maɣar ad teggʷedem SIDI, AREBBI nwem. Netta ad kenniw issenjem zeg ufus n marra řɛedyan nwem.”

40 Maca nitni war xsen ad sřen, maca ggin ɛlaḥsab tubbart nsen n zic. 41 Řegnus ggʷeden SIDI u sexxaren uřa i řexyařat nsen ineqcen deg umur d ijjen. Uřa d iḥenjiren nsen d iḥenjiren n iḥenjiren nsen tteggen ɛad am mammec ggin řejdud nsen, ař ass-a.