1 Issiweř SIDI ak-d Musa, inna:

2 “Siweř ak-d ayt n Israil uca ini asen: ‘Necc d SIDI, AREBBI nwem! 3 War tteggem am mammec tteggen di temmurt n Miṣra mani tuɣa tzeddɣem kenniw, u war tᵉtteggem am mammec tteggen di temmurt n Kenɛan mani kenniw ɣa nedheɣ, u war tᵉtteggem ɛlaḥsab tiweṣṣa nsen. ◼18:3 war tᵉtteggem - s Tɛibranit ‘war tᵉggurem’. 4 Ad teggem lfarayiḍ inu uca ad teḥḍam tiweṣṣa inu, maḥend ad daysen tuyurem: Necc d SIDI, AREBBI nwem! 5 Ad teḥḍam tiweṣṣa inu d lfarayiḍ inu: bnadem nni tent itteggen, ad zzaysent iddar, Necc d SIDI! ◘18:5 Ḥiz. 20:11, 13; Rum. 10:5; Gal. 3:12

6 Uřa d ijj ad dd-iqarreb ɣar ca n yijjen zi raǧ nnes, ḥima ad issɛarra řɛar nnes: Necc d SIDI.

7 War ttessɛarri ca řɛar n babac d řɛar n yemmac. Aqa-tt d yemmac, war ttessɛarri ca řɛar nnes. 8 Řɛar n temɣart n babac war t ttessɛarri ca. Aqa-t d řɛar n babac. ◘18:8 Lawi 20:11; 1 Kur. 5:1 9 X řɛar n učmac, yeǧis n babac niɣ yeǧis n yemmac, niɣ nettat tᵉttwaxřeq-dd di taddart niɣ barra i taddart, aqa řɛar nnes war t tessɛarri ca. 10 X řɛar n yeǧis n mmic niɣ n yeǧis n yeǧic, war ttessɛarri ca řɛar nsen minzi aqa d řɛar nnec. 11 War ttessɛarri ca řɛar n yeǧis n temɣart n babac, tenni dd-ittwaxeřqen i babac. Aqa-tt d učmac. ◘18:11 Lawi 20:17 12 War ttessɛarri ca řɛar n učmas n babac. Aqa-tt d raǧ n babac. ◘18:12 Lawi 20:19 13 War ttessɛarri ca řɛar n učmas n yemmac, minzi nettat d raǧ n yemmac. 14 War ttessɛarri ca řɛar n umas n babac u war dd-ttqarrabed ɣar temɣart nnes, aqa-tt d ɛentic. ◘18:14 Lawi 20:20; Ḥiz. 22:11 15 War ttessɛarri ca řɛar n temɣart n mmic, aqa-tt d tamɣart n mmic. War ttessɛarri ca řɛar nnes. ◘18:15 Lawi 20:12 16 War ttessɛarri ca řɛar n temɣart n umac, aqa-t d řɛar n umac. ◘18:16 Lawi 20:21 17 War tessɛarri ca řɛar n temɣart d yeǧis. War dd-ttawi ca yeǧis n mmis niɣ yeǧis n yeǧis, maḥend ad tessɛarrid řɛar nnes. Aqa atent d raǧ nnec, aqa-tt d ict n tmeɛmuč ifesden. ◘18:17 Lawi 20:14 18 War dd-ttawi tamɣart d tacna ak-d učmas maḥend ad tt tɣenned ammu, xmi ɣa tessɛarrid řɛar nnes am ɛad teddar. 19 War dd-ttqarrab ca ɣar ict n temɣart xmi ɣa teɛzeř ixef nnes zi ssibbet n řexmej nnes ḥima ad tessɛarrid řɛar nnes. ◘18:19 Lawi 20:18 20 War ttᵉṭṭeṣ ak-d temɣart n jjar nnec, maɣar ammu i ɣa tfesded ixef nnec zzayes. ◘18:20 Lawi 20:10; Aɛwd. 22:22; Yḥ. 9:5

21 War ttejji arraw nnec ad ẓwan ɣar Mulak, war ssexsara Isem n AREBBI nnec, Necc d SIDI! ◘18:21 Lawi 20:2; Aɛwd. 18:10; 2 Ij. 17:17; 23:10 22 War ttᵉṭṭeṣ ca ak-d ca n weryaz am tᵉṭṭeṣed ak-d temɣart. Aqa-tt d jjɛifect. ◘18:22 Lawi 20:13 23 War fessed ca ixef nnec ak-d ca n řebhimet am tfeḥḥřed ixef nnec akides, u tamɣart war tᵉttbeddi zzat i řebhimet maḥend ad tfesded ixef nnes zzayes. Aqa d ijj n uxeǧeḍ ifesden. ◘18:23 Lawi 20:15, 16 24 War fessdem ca ixef nwem s marra timesřayin-a, minzi řegnus nni i ɣa ssuffɣeɣ zzat i uɣembub nwem, tuɣa fessden ixef nsen s marra timesřayin-a. 25 S uyenni tedweř temmurt tefsed uca Necc ad as xeǧṣeɣ řmuɛṣiyyet nnes, uca ad tɛuqq temmurt imezdaɣ nnes. 26 Maca kenniw ad teḥḍam tiweṣṣa d lfarayiḍ inu, war tteggem uřa d ict n řḥajjet zi marra jjɛayef-a, niɣ wenni zi tarwa n temmurt uřa d abarrani nni izeddɣen di řwesṭ nwem. ◘18:26 Lawi 20:22 27 Minzi iryazen n temmurt, inni tuɣa qbeř nwem, aqa ggin marra jjɛayef-a uca ammu i tedweř temmurt tefsed. 28 War ttejji tammurt ad kenniw tɛuqq umi tt tfessdem, am mammec tɛuqq temmurt řgens nni tuɣa din qbeř nwem. 29 Minzi marra inni iggin ca zi marra jjɛayef-a, aqa řeɛmur i ɣa iggin ammu, ad ttwaqeḍɛen zi řgens nsen. 30 Ad teḥḍam min d awem umureɣ, maḥend war tḍeffarem tiweṣṣa yurṣuḍen am mammec tt ggin řegnus qbeř nwem. War zzaysent tfessdem ixef nwem, Necc d SIDI, AREBBI nwem!’ ”