1 “War tᵉttiři tesɣart niɣ řwart ak-d Israil i ikehhanen, Ilawiyyen, i marra taqbič n Lawi. Ad ccen tiɣarṣa n wecmaḍ n SIDI u zi teṣɣart nnes. ◘18:1 Řxř. 18:20; Aɛwd. 10:9; 1 Kur. 9:13 2 War ɣares ittiři d řwart di řwesṭ n aytmas. SIDI d řwart nnes, am mammec d as inna. ◘18:2 Řxř. 18:20-32.; Aɛwd. 10:9; Ḥiz. 44:28 3 Man aya ad yiři d tasɣart n řḥeqq n ikehhanen qibač i řgens, qibač i yinni iṣeddqen ict n tɣarṣt, ma d afunas niɣ ijjen zeg wuǧi: ad wcen i ukehhan tameṣṣaḍt n zzat, tnayen n iɣesmiren d tekrict.

4 Asuffuɣ amezwaru n ṣṣabet n irden nnec u zi binu n jdid nnec u zi zzect nnec n ṭṭri u tamezwarut n waǧas zi taḍuft n wuǧi nnec, ad as tewced. 5 Minzi yixḍar i-t SIDI, AREBBI nnec zi jar marra tiqebbař nnec, ḥima ad ikkar, ad isexxar di ṭṭweɛ n Yisem n SIDI, netta d arraw nnes, marra ussan. 6 Xmi dd ɣa yas Ulawi zeg ijjen zi tewwura nnec zi marra Israil, mani izeddeɣ am ubarrani, uca yusa-dd s marra řxaḍar nnes ɣar wemcan i ɣa yixḍar SIDI 7 uca ad isexxar dinni deg Yisem n SIDI, AREBBI nnes, am marra aytmas, Ilawiyyen, inni din ibedden zzat i wudem n SIDI, 8 xenni ad ccen nitni tasɣart anect n wayawya, barra i ttaman n min immenzen zeg min iǧan nnes ɛlaḥṣab jjadira nnes n taddart n řejdud.”

9 “Xmi ɣa tadfed ɣar temmurt nni i d ac ɣa yewc SIDI, AREBBI nnec, war sseřmad ca i yixef nnec ad tegged am jjɛayef n řegnus-a. 10 War ittwiffi ḥed jar awem wenni i ɣa isseɛdun mmis niɣ yeǧis x tmessi niɣ wenni iǧan d aɛezzem, niɣ abezgaw, niɣ amegzu, niɣ aseḥḥar, ◘18:10 Lawi 18:21; 20:27; 1 Ṣm. 28:7; Ica. 8:19 11 niɣ wenni itteggen tira, niɣ wenni issawařan ak-d imettan niɣ wenni ittgezzan uřa d wenni yarezzun ccwar zeg imettan. 12 Minzi marra wenni itteggen timesřayin-a, aqa-t d jjɛifect ɣar SIDI u zi ssibbet n jjɛayef-a ad zzaysen ikkes SIDI, AREBBI nnec, řwart nsen zzat i wudem nnec. 13 Maca cek ad tiřid d addud zzat i SIDI, AREBBI nnec. 14 Minzi řegnus nni i ɣa twarted s uɣiř, ad sřen i ibezgawen d iɛezzamen, maca cek, war d ac isemmeḥ SIDI, AREBBI nnec, ad tegged aya.”

15 “Ad ac igg SIDI, AREBBI nnec, ijj n unabi zi řwesṭ nnec, zeg aytmac, am necc, i netta umi ɣa tesřem, ◘18:15 Yḥ. 1:46; Řex. 3:22; 7:37 16 minzi d man aya am mammec marra min tᵉttared zi SIDI, AREBBI nnec, di Ḥurib deg wass n wegraw n řgens, umi tennid: ‘War dd-ddikkwiřeɣ necc ad sřeɣ i tmijja n SIDI, AREBBI inu, uca war ẓarreɣ necc ɛad timessi-ya imɣaren, ḥima war ttmettiɣ.’ ◘18:16 Uf. 20:19; Aɛwd. 5:25; Ɛbr. 12:19 17 Xenni inna ayi SIDI: ‘Aqa ggin mliḥ umi kik ssiwřen marra aya.’ 18 Ad asen dd-ssekkeɣ ijj n unabi zi řwesṭ n aytmatsen, am cek, uca necc ad ggeɣ awařen inu deg uqemmum nnes uca netta ad awem issiweř x marra min xef d as weṣṣiɣ. ◘18:18 Yḥ. 4:25 19 Uca ad imsar, ad ttareɣ řeḥsab zeg weryaz nni war isřin i wawařen inu i ɣa issiweř s Yisem inu. 20 Maca anabi nni i ɣa yuffen ḥima ad issiweř ijj n wawař s Yisem inu, wenni necc war umureɣ ca ad zzayes issiweř, d wenni i ɣa issiwřen s yisem n irebbiten nneɣni, aqa anabi nni ad immet. ◘18:20 Aɛwd. 13:6, Irm. 14:14 21 Mařa teqqared deg wuř nnec: ‘Mammec ɣa negg ad nessen aqa SIDI war issiweř awař nni?’, 22 xenni ittxeṣṣa ad tessnem, xmi anabi nni tuɣa issawař s Yisem n SIDI uca xenni awař nnes war imsar u war dd-iffiɣ, aqa awař nni war d as ittwanna zi ɣar SIDI. Anabi nni issawař s uɛeffar. War zzayes tteggʷed ca.”