1 Xenni yarra ayi ɛawed ɣar tewwart n barra n Zzawect Iqeddsen nni ixezzaren ɣar ccarq. Tuɣa tbelleɛ. 2 Inna ayi SIDI: “Tawwart-a ad teqqim tbelleɛ, war tarzem ca uca uřa d ijj ad zzayes yadef. Minzi SIDI, AREBBI n Israil, yudef zzayes, x uya ad teqqim tbelleɛ. 3 Řḥakem waha i yeǧan d řḥakem, ad din iqqim ḥima ad yecc aɣrum zzat i wudem n SIDI. Ad yadef s ukulwar n wesqif n řebni n tewwart uca ad iffeɣ s ukulwar nnes.”

4 Awarni as indeh ayi s tewwart n ccamal ɣar zzat n Taddart. Xezzareɣ, uca xzar, aɛuǧi n SIDI iccur Taddart n SIDI. Xenni wḍiɣ s uɣembub inu ɣar temmurt. 5 Inna ayi SIDI: “A mmis n bnadem, egg uř nnec, xzar s tiṭṭawin nnec uca seř s imezzuɣen nnec marra min d ac ɣa ssiwřeɣ x marra tiweṣṣa n Taddart n SIDI u x marra izerfan nnes. Egg uř nnec x kuř ijjen i ittadfen Taddart s marra uffuɣen n Zzawect Iqeddsen 6 uca ini i yinni ittɣewwɣen, i taddart n Israil: ‘Ammu i iqqar Sidi inu, SIDI: Cfa marra jjɛayef nwem, a taddart n Israil, 7 maɣar kenniw tessidfem ibarraniyyen, inni war ittwaxetnen n wuř u inni war ittwaxetnen n arrimet, maḥend ad iřin di Zzawect inu Iqeddsen u ad ssɛiǧten ammu Taddart inu, řami kenniw tiwyem aɣrum inu, ixs ad yini tadunt d idammen, u arẓin nitni Řɛahd inu sennej i marra jjɛayef i teggim s yixef nwem. 8 Kenniw war teḥḍim aḥeṭṭu x min iǧan iqeddsen i Necc uca teggim imeḥḍayen i yixef nwem maḥend ad ḥḍan x Zzawect inu Iqeddsen.”

9 “Ammu i iqqar Sidi inu, SIDI: ‘Uřa d ijj n řbarrani nni war ittwaxetnen uř nnes u war ittwaxetnen aysum nnes ad yadef ɣar Zzawect inu Iqeddsen. Ammu i ɣa yiři i kuř řbarrani nni iǧan di řwesṭ n ayt n Israil. 10 Ilawiyyen nni yaggʷejen xafi aṭṭas umi zzayi iweddar Israil, ffɣen zeg webrid, uyuren awarni imeyḍa nsen n l’aṣnam. Aqa nitni ad arbun řmuɛṣiyyet nsen. 11 Ad ḥḍan di Zzawect inu Iqeddsen ɣar řebniyyat n tewwart n Taddart uca ad sexxaren ɛawed di Taddart. Nitni ad ɣarṣen taɣarṣt n wecmaḍ d tɣarṣt i řgens uca ad bedden zzat i wudem n řgens maḥend ad asen sexxaren. 12 Umi tuɣa ttsexxaren zzat i wudem n imeyḍa nsen n l’aṣnam u umi ten tuɣa d ict n ssibbet i dd-yiwyen řmuɛṣiyyet i taddart n Israil, x uya aqa ssgeɛɛdeɣ Necc afus inu xasen u nitni ad arbun řmuɛṣiyyet nsen, ammu i iqqar Sidi inu, SIDI. 13 War iɛeddeř ad ɣari dd-qarrben maḥend ad ayi iřin d ikehhanen u maḥend ad dd-qarrben ɣar marra timesřayin iqeddsen inu, ɣar tmesřayin iqeddsen qaɛ. Nitni ad arbun řefdiḥet nsen d jjɛayef i ggin. 14 Ad ten ggeɣ maḥend ad ḥḍan x tsexxart di Taddart, x marra řxedmet nnes u x marra min ittxeṣṣa ad dayes ittwagg.’ ”

15 “Maca ikehhanen ilawiyyen, ayt n Ṣaduq, inni iḥḍan aḥeṭṭu n Zzawect inu Iqeddsen xmi xafi iggʷejen ayt n Israil, ad ɣari dd-qarrben maḥend ad ayi sexxaren. Nitni ad bedden zzat i wudem inu maḥend ad ɣari dd-awyen tadunt d idammen, ammu i iqqar Sidi inu, SIDI. 16 Nitni ad adfen ɣar Zzawect inu Iqeddsen uca ad dd-qarrben ɣar ṭṭabřa inu maḥend ad ayi sexxaren u ad ḥḍan tasexxart inu. 17 Ad yiři xmi ɣa yadfen ɣar řebniyyat n tewwart n řemraḥ n daxeř, ad arḍen arruḍ n řeqṭen. War iɛeddeř ad arḍen ca n taḍuft xmi ɣa sexxaren di řebniyyat n tewwart n řemraḥ n daxeř u ɣar daxeř nnes. 18 Areẓẓat n řeqṭen ad iřin x izeǧifen nsen u ssraweř n řeqṭen ad iřin x tejɛinnatin nsen, war beysen ca min zi ɣa ssuffɣen tidi. 19 Xmi ɣa ffɣen ɣar řemraḥ n barra, ɣar řemraḥ n barra ɣar řgens, xenni ad kksen arruḍ nsen i di sexxaren uca ad t ssarsen deg ixxamen iqeddsen. Awarni as ad arḍen arruḍ nneɣni, ḥima war ssqeddasen řgens s warrud nsen. 20 War ssquccaren azeǧif nsen u war ttejjin tijeṭṭayin nsen ad ayřent amenni waha. Nitni ad qessen acuwwaf n uzeǧif nsen mliḥ. 21 War iɛeddeř uřa i yijj n ukehhan ad isu binu, xmi ɣa yadef ɣar řemraḥ n daxeř. 22 War d asen iɛeddeř i ikehhanen maḥend ad awyen ict n tajjač niɣ ict n tnuřuft d tamɣart i yixef nsen. Iɛeddeř maḥend ad awyen mɣir tiɛzuray zi zzariɛet n taddart n Israil ict n tajjač tenni d tajjač n ijj n ukehhan. ◘44:22 Lawi 21:13, 14 23 Ad ssřemden řgens inu řfarq jar min iǧan iqeddsen d min war iǧin iqeddsen uca ad ten ssaregben řfarz jar min ixemjen d min izdigen. 24 Deg umcubbec ad kkaren ḥima ad carrɛen. Ad ten ḥakmen ɛlaḥsab lfarayiḍ inu. Nitni ad ḥḍan tiweṣṣa inu d lfarayiḍ inu di marra řeɛyudat inu ittwaggen uca ad ssqeddsen ussan inu n ssebt. 25 War iɛeddeř ad ireḥḥeg ukehhan ɣar ijj n bnadem immuten ařami ɣa issexmej ixef nnes. Iɛeddeř waha ad ssxemjen ixef nsen mɣir i babatsen niɣ i yemmatsen niɣ i mmitsen niɣ i yeǧitsen niɣ i umatsen niɣ i učmatsen nni war imřicen ɛemmarṣ. 26 Awarni usizdeg nnes ittxeṣṣa asen ad ḥessben sebɛa n wussan i netta. 27 Deg wass nni i ɣa yadef ɣar Uqeddas, ɣar řemraḥ n daxeř, maḥend ad isexxar deg Uqeddas, ittxeṣṣa as ad dd-issqarreb taɣarṣt n ddenb, ammu i iqqar Sidi inu, SIDI.”

28 “Wa ad yiři d řwart nsen: Necc d Řwart nsen. War d asen tᵉtticim uřa d ijj n wagřa n temmurt di Israil: Necc d Agřa nsen. ◘44:28 Řxř. 18:20; Aɛwd. 18:1 29 Iɛeddeř ad ccen tawhibt n řɣiǧet d tɣarṣt n ddenb d tɣarṣt n umarwas. Marra min ittwaḥarrmen di Israil ad asen yiři. 30 Mummu n tmenzut n marra u marra tawhibt n usgeɛɛed, zi marra tiwhibin nwem n usgeɛɛed, ad yiři i ikehhanen. Tamezwarut n warecti nwem ad tt tewced i ukehhan, ḥima ad tarsa lbaraka x taddart nnec. ◘44:30 Uf. 13:2; 22:29,30; Řxř. 18:11 31 Uřa d ict n řxecbet niɣ min ittwacarrgen n ijḍaḍ niɣ n řebḥayem, war iɛeddeř ad t ccen ikehhanen.” ◘44:31 Lawi 22:8