1 Xenni indeh ayi ɣar tewwart, ɣar tewwart nni ixezzaren ɣar ccarq. 2 Xzar, yusa-dd uɛuǧi n AREBBI n Israil zi jjihet n ccarq uca tmijja nnes tuɣa-tt am řhess n waman aṭṭas uca tammurt tceɛceɛ s uɛuǧi nnes. 3 Udem n řewḥiy i ẓriɣ tuɣa am řewḥiy i ẓriɣ umi dd-usiɣ ḥima ad areddǧeɣ tandint. Aqa d iweḥḥan am řewḥiy i ẓriɣ ɣar yeɣzar n Xabur, uca wḍiɣ s wudem inu ɣar temmurt. ◘43:3 Ḥiz. 1:4; 8:4 4 Aɛuǧi n SIDI yudef ɣar Taddart s tewwart nni ixezzaren ɣar ccarq. 5 Xenni issgeɛɛed ayi-dd Arruḥ uca issidef ayi ɣar řemraḥ n daxeř, uca xzar, aɛuǧi n SIDI iccur Taddart. ◘43:5 Ḥiz. 3:14, Ḥiz. 11:24 6 Uca sřiɣ ict n tmijja tessawař akidi zi daxeř n Taddart uca aryaz ibedd ɣar uɣezdis inu. 7 Netta inna ayi: “A mmis n bnadem, wa d amcan n řɛarc inu u amcan n třeqqa n iḍaren inu, mani ɣa zedɣeɣ di řwesṭ n ayt n Israil i řebda. Uca nitni, taddart n Israil, nitni uřa d ijeǧiden nsen, war ssxemmajen ɛad Isem inu iqeddsen s farq-ccɣeř nsen u s řxecbat n l’aṣnam n ijeǧiden nsen x řegɛudi nsen mani ttqeddamen tiwhibin nsen ◘43:7 Irm. 16:18 8 am ggin tanebdat nsen zzat i tnebdat inu, d ṭṭarf n tewwart nsen ɣar ṭṭarf n tewwart inu, iqqim mɣir ijj n weɣbar jar ayi-dd d nitni. Ammu i ssexmejen Isem inu iqeddsen s jjɛayef nsen nni ggin, ařami cciɣ ten deg weɣḍab inu. 9 Nitni ad xafi ssiggʷejen farq-ccɣeř nsen d řxecbat n l’aṣnam n ijeǧiden nsen, maḥend ad zemmareɣ ad zedɣeɣ di řwest nsen i řebda. 10 Cek, a mmis n bnadem, barreḥ s Taddart-a i taddart n Israil ḥima ad seḍḥan zi ssibbet n řmuɛṣiyyat nsen uca ejj i-ten ad ɛbaren ccekl nnes. 11 Mařa seḍḥan zi marra min ggin, scen asen xenni ccekl n Taddart d tisars nnes, uffuɣen nnes d adafen nnes d marra ccekl nnes d marra lfarayiḍ nnes, wah, marra ickalen nnes d marra tiweṣṣa nnes uca ari marra man aya zzat i tiṭṭawin nsen, ḥima xenni ad ḥḍan marra ccekl nnes d marra lfarayiḍ nnes, uca ad zzaysen ggen.”

12 “Ta d ccariɛa n Taddart: x tqiccat n wedrar ad yiři wemcan nnes deg wenneḍ nnes iqeddsen qaɛ. Ta d ccariɛa n Taddart.” ◘43:12 Ḥiz. 20:40; Ḥiz. 40:2

13 “Ina d řeɛburat n uɛalṭar s iɣaǧen: ijj n uɣiř aqa-t d ijj n uɣiř d ijj cbar n ufus. Tarya nnes d ijj n uɣiř u tiru nnes d ijj n uɣiř. Tma nnes ɣar ṭṭarf nnes i d as dd-innḍen aqa d ijj n wezyen n uɣiř. Wa d dsas n uɛalṭar. ◼43:13 aḥsin - niɣ ‘abeḥrur’. 14 Zi tarya di temmurt ař tareffidet n wadday n uɛalṭar: tnayen n iɣaǧen, u tiru nnes: ijj n uɣiř, u zi treffidet n wadday n uɛalṭar ař tareffidet n sennej n uɛalṭar: arebɛa n iɣaǧen u tiru nnes ijj n uɣiř. 15 Řebni ɣar sennej, adrar n Arebbi’, igga arebɛa n iɣaǧen di řuɛřa u zeg ufurnu n uɛalṭar geɛɛden-dd zzayes arebɛa n waccawen sennej nnes. 16 Afurnu n uɛalṭar ɣares ict n tuzzeggart n tenɛac n iɣaǧen d ict n tiru n tenɛac n iɣaǧen, ijj n ukwadrun s arebɛa n iɣezdisen nnes. 17 Tareffidet nnes sennej ɣares ict n tuzzeggart n arbeɛṭac n iɣaǧen d ict n tiru n arbeɛṭac n iɣaǧen ɣar arebɛa n iɣezdisen nnes, u tma nnes i d as dd-innḍen aqa d azyen n uɣiř, uca tarya nnes d ijj n uɣiř deg wenneḍ nnes uca tareffidin n ddruj nnes xezzaren ɣar ccarq.” *

18 Netta inna ayi: “A mmis n bnadem, ammu i iqqar Sidi inu, SIDI: ‘Tina d lfarayiḍ inu i uɛalṭar deg wass i di t ɣa ggen, maḥend ad xas ssgeɛɛden taɣarṣt n tmessi u maḥend ad xas zeǧɛen idammen.’ 19 Ammu i iqqar Sidi inu, SIDI: ‘Ad tewced ijj n ufunas, ameẓyan n ict n tfunast, d tawhibt n tɣarṣt n ddenb i ikehhanen zeg Ilawiyyen, i yinni dd-iqqarṣen zi Ṣaduq, inni ɣari dd-iqarrben maḥend ad ayi sexxaren. 20 Ad teksid zeg idammen nnes uca ad ten tegged ɣar arebɛa n waccawen n uɛalṭar u ɣar arebɛa n tɣemmura n treffidet u x tma nnes i d as dd-innḍen ɣar ṭṭarf nnes. Ittxeṣṣa ad zzayes tekksed ddenb nnes u ad t tṣeřḥed. 21 Awarni as ad teksid afunas nni ameẓyan n tɣarṣt n ddenb. Ittxeṣṣa asen ad t sscemḍen deg wemcan ittwaggen n Taddart barra i Zzawect Iqeddsen. 22 Deg wass wiss tnayen ad dd-tessqarrbed ijj n umyan zeg iɣayḍen icnan aṭṭas d taɣarṣt n ddenb. Ad zzayes kksen ddenb zeg uɛalṭar am mammec zzayes kksen ddenb s ufunas ameẓyan. 23 Xmi ɣa tkemmřed takessit n ddenb, ad dd-tessqarrbed ijj n ufunas, ameẓyan n tfunast icnan qaɛ, uřa d ijj n icarri icnan aṭṭas zeg wuǧi. 24 Ad ten dd-tessqarrbed zzat i wudem n SIDI uca ikehhanen ad xas ssuyusen tameǧaḥt u ad ten ssgeɛɛden am tɣarṣt n wecmaḍ i SIDI. 25 Sebɛa n wussan ad tesswejded di kuř ass ijj n umyan d taɣarṣt n ddenb. Ad sswejden ɛawed ijj n ufunas, ameẓyan n tfunast, uřa d ijj n icarri n wuǧi, ittxeṣṣa ad iřin cnan aṭṭas. 26 Sebɛa n wussan ad tegged aṣřaḥ i uɛalṭar uca ad t ssizedgen u ad t ssqeddsen. 27 Mařa kemmřen nitni ussan-a, xenni ad yiři deg wass wiss tmenya, belli ikehhanen ad sswejden tɣarṣa nwem n wecmaḍ d tewhibin nwem n uqadi x uɛalṭar u Necc ad xawem arḍiɣ!’, ammu i iqqar Sidi inu, SIDI.”