1 Deg useggʷas wiss třatin, deg uyur wiss arebɛa, deg wass wiss xemsa n uyur, umi d ayi tuɣa di řwesṭ n ayt n lmenfa ɣar yeɣzar n Xabur, imsar belli arezmen ijenwan uca ẓriɣ iweḥḥan n AREBBI. ◘1:1 Izhd. 137:1 2 Deg wass wiss xemsa n uyur - tuɣa d aseggʷas wiss xemsa n lmenfa n ujeǧid Yuyakin - 3 yusa-dd wawař n SIDI nican ɣar Ḥizqiyal, mmis n Buzi, akehhan, di temmurt n Ikaldaniyyen, ɣar yeɣzar n Xabur. Tuɣa din xas afus n SIDI.

4 Ẓriɣ, uca xzar, yusa-dd usemmiḍ n tḥaryaḍt zi ccamal, ijj n useynu d ameqqran, d ict n tmessi tᵉttceɛɛeř, inneḍ as-dd i useynu ijj n uwesseg. Zi řwesṭ nnes iban-dd ca am wuzzař ittwessgen, zi řwesṭ n tmessi. ◘1:4 Uf. 9:24 5 Zi řwesṭ nnes tban-dd ṣṣifet n arebɛa n imuddaren. Ammu dd-ḍharen yina: tuɣa marra ɣarsen ṣṣifet n bnadem. 6 Kuř ijj ɣares arebɛa n wudmawen u kuř ijj ɣares arebɛa n wafriwen. ◘1:6 Ḥiz. 10:14 7 Iḍaren nsen tuɣa aten nican u tiřeqqa n iḍaren nsen am třeqqa n iḍaren n uɛejmi uca ttissiqent třeqqat n iḍaren nsen am wudem n nnḥas ittwassuydan.◼1:7 aɛejmi - niɣ ‘amwa’, ‘ayenduz’ niɣ ‘yuggu’. 8 Sadu afriwen nsen ɣar arebɛa n iɣezdisen nsen ɣarsen ifassen n bnadem. Arebɛa n imuddaren ɣarsen udmawen d wafriwen. ◘1:8 Ḥiz. 10:8 9 Tuɣa afriwen nsen munen ijj ak-d wenneɣni. Nitni war nnqeřben ca xmi gguren. Gguren nitni, kuř ijj zzaysen iggur nican ɣar zzat. 10 Arwas n wudmawen nsen tuɣa am wudem n bnadem u ɣar uɣezdis afusi n arebɛa n imuddaren nni am wudem n weyrad u ɣar uɣezdis azeřmaḍ n arebɛa n imuddaren nni am wudem n ufunas uca arebɛa n imuddaren nni ɣarsen ɛawed udem n ugider. ◘1:10 Ḥiz. 10:14; Asa. 4:7 11 Udmawen nsen d wafriwen nsen ttwamsebḍan ɣar tiwa. Tnayen n wafriwen n kuř ijjen ttmunan ak-d wenneɣni, u tnayen dřin arrimat nsen. 12 Nitni uyuren, kuř ijj nican ɣar zzat. Mani ma tuɣa ixs Arruḥ ad yuyur, gguren nitni. Nitni war ttneqřiben ca xmi gguren. 13 X warwas n imuddaren nni: aqa banen-dd am řefḥem itteḥduduqen icemmḍen, am yiṣefḍawen. Tuɣa timessi tᵉttraḥ tᵉttas-dd jar imuddaren uca timessi tᵉttissiq u zi tmessi tteffɣen-dd wassamen. ◘1:13 Ḥiz. 10:2 14 Imuddaren tuɣa ttazzřen, dekkwařen-dd, ittban am wassamen.

15 Řami ẓriɣ imuddaren nni, xzar ict n tjarrart tbedd x temmurt zzat i imuddaren, ɣar kuř ijj zi arebɛa n wudmawen. 16 Tajarrarin d twaggit nsen banent-i-dd am texrisulit u ɣarsen ṣṣifet d ict ɣar arebɛa n imuddaren. Mammec dd-ḍharent u mammec ttwaggent tuɣa axmi ict n tjarrart tuɣa nican di tjarrart nneɣni. ◘1:16 Ḥiz. 10:9, 10 17 Xmi gguren, gguren ɣar arebɛa n iɣezdisen nsen. Nitni war ttneqřiben ca xmi gguren. 18 Yantat nsen tuɣa aten uɛřant u ssagʷadent u yantat nsen ccurent s tiṭṭawin i d asent-i-dd innḍen, ɣar arebɛa n imuddaren nni. ◘1:18 Ḥiz. 10:12 19 Xmi gguren imuddaren, ggurent uřa d tjarrarin nni ɣar zzat nsen akidsen, u xmi ttwassgeɛɛden imuddaren zi temmurt, ttwassgeɛɛdent uřa d tijarrarin. ◘1:19 Ḥiz. 10:16 20 Ař mani ixs Arruḥ ad yuyur, din gguren nitni, mani ixs Arruḥ ad iraḥ, uca tijarrarin ɣar zzat nsen ttwassgeɛɛdent, maɣar Arruḥ n imuddaren tuɣa di tjarrarin. 21 Xmi gguren nitni, ggurent uřa d nitenti, u xmi ttbeddan nitni, beddent uřa d nitenti u xmi ttwassgeɛɛden nitni, ttwassgeɛɛdent uřa d tijarrarin akidsen, maɣar Arruḥ n imuddaren tuɣa di tjarrarin. 22 Sennej i izeǧifen n umuddar tuɣa din min yarewsen deg ict n řqubbet, tban-dd am yict n řqubbet issaggʷaden n wejris nni ittwabezzɛen sennej i izeǧifen nsen. 23 Sadu řqubbet tuɣa afriwen nsen seggmen, sswiẓẓaḍen ijj ɣar wenneɣni. Kuř ijj ɣares tnayen maḥend ad zzaysen issduriy ixef nnes ɣar uɣezdis-s, uca kuř ijj ɣares ɛawed tnayen nneɣni maḥend ad zzaysen issduriy ixef nnes ɣar uɣezdis nni, tuɣa d man aya i arrimat nsen. ◘1:23 Ḥiz. 1:11 24 Xmi gguren, sřiɣ i řḥess n wafriwen nsen am zzhir n řebḥar, am tmijja n Umzemmar x kuřci, aqa řḥess d ameqqran am řḥess n řɛeskar. Řami bedden, ssehwan afriwen nsen. 25 Tuɣa din ict n tmijja sennej i řqubbet nni tuɣa sennej i izeǧifen nsen. Řami xenni bedden nitni, ssehwan afriwen nsen. 26 Sennej i řqubbet nni tuɣa x izeǧifen nsen iban-dd ca am yijj n řɛarc s wudem n weẓru n ṣaffir aziza u sennej qaɛ x min ittbanen am řɛarc, iqqim xas sennej min ittbanen am ṣṣifet n bnadem. ◘1:26 Dan. 7:9 27 Uca ẓriɣ aqa ṣsifet tᵉttban am wuzzař ittwessgen, tban-dd am tmessi ɣar daxeř nnes u deg wenneḍ nnes. Zi tejɛinnatin nnes ař sennej u zi min yarwesen di tejɛinnatin nnes ař wadday, ẓriɣ wenni dd-ittbanen am tmessi uca inneḍ as-dd ijj n uwesseg. 28 Am mammec dd-tᵉttban tesřit n wenẓar deg iseynuten deg ijj n wass n wenẓar ijehden, ammu tuɣa ccuf n uwesseg nni i d as dd-innḍen. Wanita d udem n waddud n uɛuǧi n SIDI. Řami t ẓriɣ, wḍiɣ s uɣembub inu ɣar temmurt uca sřiɣ tmijja nni kidi issawařen. ◘1:28 Dan. 10:9