1 Ɣar iɣezran n Babil,

dinni i tuɣa nettɣima,

nru ɛawed xmi tuɣa nettidar Ṣihyun.

2 Nuyeř řgambriyat nneɣ

ɣar iṣefṣafen i iǧan di řwest nnes.

3 Maɣar inni d aneɣ iḥebbsen

ttaren zzayneɣ dinni

ad nɣennej awařen n ijj n yezři,

inni d aneɣ iḥeṣṣaren

ttaren ca n řḥajjet issefraḥen.

Nitni nnan: “Ɣennjem zeɛma

ijj zeg izřan n Ṣihyun i neccin!” ◘137:3 Izhd. 79:1

4 Mammec nzemmar ad nɣennej

ijj n yezři n SIDI di temmurt n midden?

5 Mařa necc ttuɣ cem, a Urcalim,

ejj xenni ad ittu ufus afusi ixef nnes.

6 Ejj ad ayi iřṣeq iřes inu x waneɣ inu,

mařa war cem ttidareɣ,

mařa war ssɛuǧiɣ Urcalim

x řefraḥet inu tameqqrant qaɛ.

7 A SIDI, ɛqeř x ayt n Idum,

deg wass n Urcalim,

inni iqqaren: “Ɛarram tt, ɛarram tt,

ař dsas nnes!” ◘137:7 Irm. 49:7; Ḥiz. 25:12

8 A yeǧis n Babil,

cem tenni ittwassḥuzen i wareddeǧ,

sseɛd n yinni d am

i ɣa ixeǧṣen tameggit iɛeffnen

i dayneɣ teggid. ◘137:8 Irm. 50:15, 29; Asa. 18:6

9 Sseɛd n wenni i ɣa iṭṭfen

iḥenjiren nwem imeẓyanen,

ad ten iřbez x teṣḍart. ◘137:9 Ica. 13:16